1, 2. Mwirin án Jesus a feitá láng, met ekkewe aposel neman ra ekieki?

 NÉÚN Jesus kewe aposel ra útá wóón ewe Chukun Olif me katol án Jesus, néúr we masta me chiechier, a feilunusetá láng, me eú kuchu a amwonaló i seniir. (Föf. 1:9, 10) Ina epwe úkúkún ruu ier, Jesus a fen asukuler, apéchékkúler me emmweniir. Nge iei Jesus ese chúen nóm. Iwe, met repwele féri?

² Me mwen án Jesus feitá láng, i a ereni néún kewe chón káé: “Oupwe pwäriei lon Jerusalem, lon unusen Jutea me Samaria tori lon unusen fanüfan.” (Föf. 1:8) Ifa usun repwe tongeni féri ena angang? Jesus a pwon pwe án Kot we manaman mi fel epwe álisiir. (Föf. 1:5) Nge ié epwe emmweniir me akkóta ena angangen afalafal epwe fis wóón unusen fénúfan? Ekkewe aposel ra silei pwe me lóóm Jiowa a fen néúnéú ekkóch mwán ar repwe wisen emmweni ekkewe chón Israel. Ina popun neman ra ekieki ika Jiowa epwe pwal filatá mineféén souemmwen lón ena atun.

3. (a) Mwirin án Jesus feitá láng, menni kefil mi lamot ekkewe aposel mi tuppwél ra féri? (b) Menni kapas eis sipwele pélúweni lón ei lesen?

³ Ekiseló mwirin án Jesus feitá láng, néún kewe chón káé ra kútta  álillis seni án Kot we Kapas, tingor án Kot álillis lón iótek, me filatá Matias pwe siwilin Jutas Iskariot pwe repwe engol me rúúemén aposel. (Föf. 1:15-26) Pwata ei kefil a fókkun lamot ngeniir me pwal ngeni Jiowa? Ekkewe chón káé ra mirititi pwe mi lamot epwe wor 12 aposel. * Jesus a fen filatá ekkewe aposel me asukuler fán iten eú wis mi fókkun lamot lein néún Kot aramas. Menni ena wis, me ifa usun Jiowa me Jesus ra ammólneeretá fán itan? Met sókkun kókkót mi fis lón ena atun a pwal fis lón ei fansoun? Me ifa usun sipwe ‘chechemeni ekkewe chon emmwenikich,’ ákkáeúin “ewe chon angang mi allükülük o tipachem”?​—Ipru 13:7, TF; Mat. 24:45.

4. Menni wis ekkewe aposel me pwal ekkóch mwán mi ásimaw lón Jerusalem ra eáni?

⁴ Ekkewe aposel ra poputá le wisen emmweni ewe mwichefelin Chón Kraist lón Pentikost ier 33. Ewe Paipel a apasa pwe “Petrus a ütä fiti ekewe engol me eman soukünö” me afalafala ewe pwóróusen manaw ngeni ewe mwichen aramas. (Föf. 2:14, 15) Chómmóng leir ra wiliti Chón Kraist. Mwirin ena, ekkena mineféén Chón Kraist ra “likitü le kaiö seni mine ekewe soukünö ra aiti ngeniir.” (Föf. 2:42) Ekkewe aposel ra wisen túmúnú monien ewe mwichefel. (Föf. 4:34, 35) Ra pwal asukula néún Kot kewe aramas me iótek fán iter. Ra apasa: “Äm aipwe tupwöl le iotek o afalafala ewe kapasen Kot.” (Föf. 6:4) Ra pwal tiinaaló ekkóch Chón Kraist mi ásimaw ar repwe afalafal lón ekkewe leenien afalafal minefé. (Föf. 8:14, 15) Mwirin och fansoun, pwal ekkóch mwán mi ásimaw mi kepit ra fiti ekkewe aposel le wisen emmweni ekkewe mwichefel. Iir ra emmweni ekkewe mwichefel meinisin, usun eú mwichen soupwúngúpwúng.​—Föf. 15:2.

5, 6. (a) Ifa usun án Kot we manaman mi fel a álisi ewe mwichen soupwúngúpwúng? (Ppii ewe sasing lepoputáán ei lesen.) (b) Ifa usun ekkewe chónláng ra álisi ewe mwichen soupwúngúpwúng? (c) Ifa usun án Kot we Kapas a emmweni ewe mwichen soupwúngúpwúng?

⁵ Ekkewe popun Chón Kraist ra silei pwe Jiowa a wisen emmweni ewe mwichen soupwúngúpwúng, nge a néúnéú Jesus. Ifa usun ra silei? Áeúin, án Kot we manaman mi fel a atufichi ewe mwichen soupwúngúpwúng. (Joh. 16:13) Meinisin ekkewe Chón Kraist mi kepit ra angei án Kot we manaman mi fel, nge angangan wóón ekkewe aposel me ekkewe mwán mi ásimaw lón Jerusalem mi sókkóló pwe repwe tongeni apwénúetáéchú wiser we chónemmwen. Áwewe chék, lón ewe ier 49, ewe manaman mi fel a emmweni ewe mwichen soupwúngúpwúng ren met repwe apwúngaló wóón ewe mettóch sirkumsais. Ekkewe mwichefel ra álleasochisi minne ra apwúngaló. Iwe, ra “pöchökülela lon ar lükülük o chochomongola iteiten rän.” (Föf. 16:4, 5) Lón néún ewe mwichen soupwúngúpwúng taropwe ngeni ekkewe mwichefel ren ewe mettóch  sirkumsais, sia tongeni kúna pwe a nóm ren ewe mwichen soupwúngúpwúng án Kot we manaman mi fel me ekkewe napanap choweán tong me lúkú.​—Föf. 15:11, 25-29; Kal. 5:22, 23.

⁶ Oruuan, ekkewe chónláng ra álisi ewe mwichen soupwúngúpwúng. Áwewe chék, emén chónláng a ereni Kornelius an epwe kútta ewe aposel Petrus. Mwirin án Petrus afalafal ngeni Kornelius me aramasan kewe, iir ra angei ewe manaman mi fel inaamwo ika ekkewe mwán rese sirkumsais. Ina minne, Kornelius i ewe áeménún chón lúkún Israel ese sirkumsais a wiliti Chón Kraist. Lupwen ekkewe aposel me pwal ekkóch pwiich kewe mwán ra rong usun minne a fis, ra etiwa pwe ina letipen Kot, iwe ra etiwaalong lón mwichefelin Chón Kraist ekkewe chón lúkún Israel rese sirkumsais. (Föf. 11:13-18) Iwe, a ffat pwe ekkewe chónláng ra fókkun álisatá ewe angangen afalafal ewe mwichen soupwúngúpwúng a wisen emmweni. (Föf. 5:19, 20) Aúlúngátin, án Kot we Kapas a emmweni ewe mwichen soupwúngúpwúng. Ekkena mwán ra néúnéú án Kot we Kapas le emmweni ekkewe mwichefel me apwúngaló ekkewe mettóch mi lamot mi weneiti minne Chón Kraist ra lúkú.​—Föf. 1:20-22; 15:15-20.

7. Pwata sia tongeni apasa pwe Jesus a wisen emmweni ekkewe popun Chón Kraist?

⁷ Inaamwo ika ewe mwichen soupwúngúpwúng a wisen emmweni ewe mwichefel, nge chón ewe mwichen soupwúngúpwúng ra weweiti pwe Jesus Kraist, i ar Souemmwen. Pwata sia silei ena? Ewe aposel Paulus a apasa pwe Kraist, I ewe a filatá “ekoch pwe repwe soukünö.” A pwal apasa pwe Kraist i “möküren mwichefel,” are Souemmwenin ewe mwichefel. (Ef. 4:11, 15) Me “ekkewe chon kaeo ra popueta le iteni ewe it, Chon Kraist,” rese fen iteit seni iten emén aposel. (Föf. 11:26, TF) Paulus a silei pwe mi lamot ar repwe fiti ewe káit mi lóngólóng wóón án Kot Kapas ekkewe aposel me pwal ekkóch mwán mi wisen emmwen ra kan afalafala ngeniir. Nge ikaamwo a ina usun, Paulus a apasa: “Üa mochen oupwe weweiti pwe Kraist möküren mwän meinisin.” Ei wokisin a pwal weneiti emén me emén chón ewe mwichen soupwúngúpwúng. Mwirin Paulus a pwal apasa: “Kot möküren Kraist.” (1 Kor. 11:2, 3) A ffat pwe Jiowa a seikaatá Néún we, Kraist Jesus, an epwe wisen emmweni ewe mwichefel.

8, 9. Ifa ewe wis mi lamot Pwiich Russell a eáni?

⁸ Poputá seni ewe ier 1870, Charles Taze Russell me pwal ekkóch chienan ra achocho ngeni ar repwe eáni ewe sókkun fel ngeni Kot mi tipeeú ngeni ewe Paipel me álisi ekkewe ekkóch ar repwe pwal féri ena. Ren an epwe mecheres ar féri ena, kapachelong ar achéúfetálei ewe pwóróus mi enlet lón Paipel lón sókkopaten fósun fénúfan, mi lamot epwe wor eú sókkun mwicheich mi rechister me ren allúkún mwú epwe tupuniir lón ar féri ekkena sókkopaten angang. Iwe lón 1884, ra fératá ena sókkun mwicheich me eita ngeni Zion’s Watch Tower Tract Society, nge pwiich Russell a wisen preseten lón. * A káéfichi Paipel me ese pireir le ereni aramas pwe ekkewe afalafal, áwewe chék ren Trinitas me ngúnún aramas ese tongeni máló, iir rese feito seni Paipel. A káé pwe án Kraist liwinsefál epwe monomonoló seni mesen aramas me “fansoun än chon lükün Israel nemenem” epwe muchúló lón 1914. (Luk. 21:24) Pwiich Russell a áeá an fansoun, péchékkúl, me néún moni le  áiti ngeni aramas ekkena pwóróus mi enlet. A ffat pwe Jiowa me Jesus ra néúnéú Pwiich Russell an epwe wisen emmwen lón ena atun mi fókkun lamot.

⁹ Pwiich Russell ese mochen an epwe iteféúló mwen mesen aramas. Lón ewe ier 1896, a makkeei pwe i me ekkewe ekkóch mwán mi álisi lón ena angang, rese mochen aramas repwe elingereló. Rese mochen repwe eáni och itelap epwe átekiaretá, me rese mochen eú mwichen aramas epwe iteit seni iter. Mwirin a apasa: “Ei angang esap án aramas.”

10. (a) Ineet Jesus a seikaatá “ewe chon angang mi allükülük o tipachem”? (b) Áweweei ifa usun a ffatoló pwe ewe Mwichen Soupwúngúpwúng ese wewefengen me ewe Watch Tower Society.

¹⁰ Úlúngát ier mwirin málóón Pwiich Russell, lón 1919, Jesus a seikaatá “ewe chon angang mi allükülük o tipachem.” Pwata? Pwe epwe awora ngeni néún kewe chón káé ener “mongö lon fansoun fich.” (Mat. 24:45) Pwal mwo nge lón ekkewe ier a kerán kefilitá ewe chón angang mi alúkúlúk, eú kúkkún kúmiin aramas mi kepit lón ewe ofesilap lón Brooklyn, New York, a awora ewe mwéngé lón pekin lúkú ngeni néún Jesus kewe chón káé. Ewe mwuten kapas “mwichen soupwúngúpwúng” a poputá le nóm lón néúch kewe puk mwirin ewe ier 1940. Lón ena atun ra kan weweiti pwe ewe mwichen soupwúngúpwúng usun pwal iir ekkewe director lón ewe Watch Tower Bible and Tract Society. Iwe nge, lón 1971, ra affata pwe ewe Mwichen Soupwúngúpwúng ese wewefengen me ewe Watch Tower Society. Pún wisen ewe Watch Tower Society, a kan chék túmúnú ekkewe sókkopaten mettóch mi weneiti pekin allúkún mwú. Seni ena atun, pwiich kewe mi kepit ra tongeni wiliti chón ewe Mwichen Soupwúngúpwúng inaamwo ika resap pwal director lón ewe Watch Tower Society. Kukkuto chék, pwiich kewe mwán mi ásimaw chón ewe ‘ekoch sip’ ra wisen director lón ewe Watch Tower Society me pwal ekkewe ekkóch sókkun mwicheich mi rechister me ren allúkún mwú néún Kot aramas ra áeá pwe epwe tupuniir. Iwe ren ena, ewe Mwichen Soupwúngúpwúng a tongeni nefotofot wóón an awora emmwen me éúréúr seni Paipel. (Joh. 10:16; Föf. 6:4) Ewe Leenien Mas minen July 1, 2013 a áweweei pwe “ewe chon angang mi allükülük o tipachem” ina ewe kúkkún kúmiin pwiich kewe mi kepit, ewe Mwichen Soupwúngúpwúng.

11. Ifa usun ewe Mwichen Soupwúngúpwúng a apwúngaló mettóch?

¹¹ Chón ena Mwichen Soupwúngúpwúng ra kan mwichfengen iteiten wiik, pwúngúpwúngfengen wóón ekkewe kefil mi lamot, me apwúngaló. Ar mwichfengen lón ena napanap a álisiir an epwe chék sussuuk alen ar pwóppwóróusfengen me tipeeúfengen. (SalF. 20:18) Ese wor emén chón ena Mwichen Soupwúngúpwúng a tekia seni ekkewe pwal ekkóch, iir taitap chék meinisin. Ina minne iteiten ier a kan ekkesiwil ewe a wisen chón emmwen lón ar mwichfengen. (1 Pet. 5:1) A pwal ina usun lón ekkewe wonu kúmi lón ena Mwichen Soupwúngúpwúng. Emén me emén chón ewe Mwichen Soupwúngúpwúng ese meefi pwe  i ewe souemmwenin pwiin kewe. Emén me emén leir, iir pwal chón angang mi angei ewe mwéngé lón pekin lúkú seni ewe chón angang mi alúkúlúk me fiti an emmwen.

12. Ikkefa ekkewe kapas eis sipwele pélúweni?

¹² Kot ese kan mwéngúnúngún ngeni ewe mwichen soupwúngúpwúng minne repwe makkeei, pwár ngeniir me lón lángipwi me metakkan. Iir rese pwal unuséch, ra tongeni mwáálliló lón ar áweweei Paipel are emmweni ewe mwicheich. Áwewe chék, lón ewe Watch Tower Publications Index mi wor ewe kinikin itelapan “Beliefs Clarified” (Minne Sia Lúkú A Ffatoló) mi makketiw ekkewe ekkesiwil lón minne sia weweiti lón Paipel seni ewe ier 1870. Jesus ese apasa pwe ewe mwéngé lón pekin lúkú ewe chón angang mi alúkúlúk me tipachem epwe awora epwe chék unuséch. Iwe, ifa usun sipwe pélúweni án Jesus ei kapas eis: “Iö chök ewe chon angang mi allükülük o tipachem?” (Mat. 24:45) Met a ánnetatá pwe ewe  Mwichen Soupwúngúpwúng, ina ewe chón angang mi alúkúlúk? Sipwe pwóróus wóón úlúngát mettóch mi pwal álisi ewe mwichen soupwúngúpwúng lón fansoun ekkewe aposel.

13. Ifa usun án Kot we manaman mi fel a álisi ewe Mwichen Soupwúngúpwúng?

¹³ Án Kot we manaman mi fel a álisi ewe Mwichen Soupwúngúpwúng. Án Kot we manaman mi fel a fen álisi ewe Mwichen Soupwúngúpwúng le weweiti ekkewe pwóróus mi enlet lón Paipel rese weweiti me lóóm. Áwewe chék, nengenisefáli ewe kinikin “Beliefs Clarified” (Minne Sia Lúkú A Ffatoló) mi makketiw ekkewe ekkesiwil lón minne sia weweiti lón Paipel. Ese wor emén aramas epwe tongeni weweiti me áweweei ekkena “ekiekin Kot mi alolol” ren pwisin an tipachem! (Álleani 1 Korint 2:10.) Ewe Mwichen Soupwúngúpwúng a pwal meefieni met ewe aposel Paulus a meefi, ewe a makkeei: “Äm aisap afalafala ekewe kapas aitien aramas seni lon ar tipachem, nge aia afalafala ekewe kapas aitien ewe Ngünmifel.” (1 Kor. 2:13) Lón fitepúkú ier a fen chéúfetál afalafal mi chofona me aramas ra nóm lón rochopwak lón pekin lúkú. Iwe nge, pwata a chék sasaramoló me wakkatteló ach weweéchúti ewe Paipel seni ewe ier 1919? Mi chék wor eú popun, pokiten Kot a awora an álillis me ren an we manaman mi fel!

14. Me ren Pwärätä 14:6, 7, ifa usun ekkewe chónláng ra álisi ewe Mwichen Soupwúngúpwúng me néún Kot kewe aramas lón ei fansoun?

¹⁴ Ekkewe chónláng ra álisi ewe Mwichen Soupwúngúpwúng. A watte án ewe Mwichen Soupwúngúpwúng wis le emmweni lap seni walu million chón afalafal mi fiti ewe angangen afalafal wóón unusen fénúfan. Pwata ei angang a fókkun sópwéch? Eú popun pún ekkewe chónláng ra álillis. (Álleani Pwärätä 14:6, 7.) A wor chómmóng atun ekkewe chónláng ra emmweni ekkewe chón afalafal ngeni emén mi kerán iótek me tingor án Kot álillis! * Ewe angangen afalafal me asukul a wakkatteló pwal mwo nge lón ekkewe leeni mi wor chómmóng mi oputa ewe angang. Mi chék tufich ena, pokiten álillisin ekkewe chónláng.

15. Ifa sókkofesenin ewe Mwichen Soupwúngúpwúng me néúwisin ekkewe tipitipin lamalamen Chón Kraist? Áweweei.

¹⁵ Án Kot we Kapas a emmweni ewe Mwichen Soupwúngúpwúng. (Álleani Johannes 17:17.) Nengeni met a fis lón 1973. Ewe Watchtower minen June 1 a eis ika “mi fich ngeni ekkewe aramas mi umwesimwesin tobacco are suupwa ar repwe papatais.” Ena Watchtower a erá pwe aapw, ese fich ngeniir! Pélúwan na mi lóngólóng wóón Paipel. Ena Watchtower a alóni chómmóng wokisin seni Paipel me a áweweei popun a lamot epwe katowu ewe emén esap mochen úkútiw seni an ún suupwa. (1 Kor. 5:7; 2 Kor. 7:1) A áweweei pwe ena allúk mi tichik ese feito seni aramas nge a feito “seni Kot, ewe a pwáraawu letipan lón an we Kapas mi fen mak.” Ese wor pwal eú mwicheichen lamalam a tipemecheres le unusen lúkúlúk wóón án Kot we Kapas inaamwo ika an féri ena epwe fókkun tongeni áweires ngeni ekkóch chón an we lamalam. Iei met a mak lón eú puk mi kerán katowu, a fós usun lamalam lón Merika: “Ekkewe néúwisin lamalam mi erá pwe iir Chón Kraist ra kan ekkesiwili minne ra eáni káit pwe epwe tipeeú ngeni ekiekin me meefien aramas pwe chón ar lamalam me lap ngeni aramas repwe pwapwaitiir.” Iwe nge, minne ewe Mwichen Soupwúngúpwúng a eáni káit ese lóngólóng wóón met lap ngeni aramas repwe sani, nge a lóngólóng wóón án Kot we Kapas. Iwe, ei mettóch a  ánnetatá pwe Jiowa, i ewe a wesewesen emmweni néún kewe aramas lón ei fansoun.

16. Ifa eú alen ach sipwe chechchemeni ewe Mwichen Soupwúngúpwúng?

¹⁶ Ewe Paipel a apasa: “Oupwe chechemeni ekkewe chon emmwenikemi.” (Ipru 13:7, TF) Eú alen ach sipwe féri ena, ina ach apachaalong ewe Mwichen Soupwúngúpwúng lón ach kewe iótek. (Ef. 6:18) A chómmóng wisen ewe Mwichen Soupwúngúpwúng, áwewe chék a awora mwéngé lón pekin lúkú, emmweni ewe angangen afalafal wóón unusen fénúfan, me túmúnú ekkewe monien asor aramas ra eáni fán iten ewe mwicheich. Ina popun a fókkun lamot ach sipwe iótek fán iter iteitan.

17, 18. (a) Ifa usun sia fiti emmwenien ewe Mwichen Soupwúngúpwúng? (b) Ifa usun ach fiti ewe angangen afalafal a álisi ewe Mwichen Soupwúngúpwúng me Jesus?

¹⁷ Sia pwal tongeni chechchemeni ewe Mwichen Soupwúngúpwúng ren ach álleasochisi an kewe emmwen me éúréúr. Ewe Mwichen Soupwúngúpwúng a emmwenikich ren néúch kewe puk, ach kewe mwich me mwichelap. A pwal filatá ekkewe chónemmwen mi wisen sáifetál, me ekkena chónemmwen mi wisen sáifetál ra filatá ekkewe mwán mi ásimaw lón ekkewe mwichefel. Ren án ekkena chónemmwen me mwán mi ásimaw fitipachei ekkewe éúréúr ach mwicheich a ngeniir, ra pwáraatá pwe ra chechchemeni ewe Mwichen Soupwúngúpwúng. Me kich meinisin sia súféliti ach Souemmwen, Jesus, ren ach ákkálleasochisi ekkewe mwán Jesus a néúnéú lón ei fansoun.​—Ipru 13:17.

¹⁸ Pwal eú alen ach sipwe tongeni chechchemeni ewe Mwichen Soupwúngúpwúng, ina ach achocho úkúkún ach tufich lón ewe angangen afalafal. Ipru 13:7 a pesei ekkewe Chón Kraist le áppirú án ekkewe chónemmwen lúkúlúk. Ewe Mwichen Soupwúngúpwúng a fen pwáraatá watteen an lúkú ren an tinikken le afalafala ewe kapas allim me ákkálisatá ena angang. Sia kan álisiir lón ei angang mi lamot? Ika ina, sipwe pwapwa le rongorong án Jesus erenikich: “Mine oua föri ngeni eman lein ekewe pwii mi fokun kisikis, iei oua föri ngeniei.”​—Mat. 25:34-40.

19. Pwata sia tipeppós le tapweló mwirin ach we Souemmwen, Jesus?

¹⁹ Lupwen Jesus a liwinsefálitá láng, i ese likitaló néún kewe chón káé. (Mat. 28:20) A silei pwe lón ewe fansoun a nóm wóón fénúfan, ewe manaman mi fel, ekkewe chónláng, me án Kot we Kapas ra álisi le wisen emmweni néún Kot aramas. A awora ena pwal esin álillis ngeni ewe chón angang mi alúkúlúk lón ei fansoun. Ewe Mwichen Soupwúngúpwúng a sópweló le “tapwela mürin ewe Lam,” Jesus, “ekis meinisin ia a feila ie.” (Pwär. 14:4) Ina minne, lupwen sia álleasochisi emmwenien ewe Mwichen Soupwúngúpwúng, sia pwal álleasochisi ach we Souemmwen, Jesus. Ekiseló chék, i epwe emmwenikich ngeni manaw esemuch. (Pwär. 7:14-17) Ese pwal wor emén sounemenem wóón fénúfan a tongeni eáni ena esin pwon!