1-2. Ikkefa ekkewe mettóch mi fókkun lamot me ren Chón Pwáraatá Jiowa?

A WOR met mi fókkun lamot ngenikich lón ei fansoun, ina án Kot pwúngún nemenem me letelóón itéchún itan we. Kich Chón Pwáraatá Jiowa sia sani le pwóróus usun ekkena mettóch mi aúchea. Nge itá ekkena mettóch ra sókkofesen? Aapw.

² Kich meinisin sia mirititi lamoten an epwe piniló iten Kot we. Sia pwal silei lamoten an epwe leteló pwe án Jiowa nemenem, a múrinné lap seni meinisin. Ina minne a lamot ekkena ruu mettóch.

3. Met a kapachelong lón ewe it Jiowa?

³ Ren enletin, ewe it Jiowa a kkúú mettóch meinisin usun ach we Kot, kapachelong napanapen an nennemenem. Iwe ika sia apasa pwe itéchúlóón iten Jiowa we ina ewe mettóch mi fókkun lamot seni meinisin, iwe weween pwe sia pwal apasa pwe mi lamot an epwe leteló pwe án Jiowa nemenem a múrinné lap seni meinisin. Ewe it Jiowa a fókkun riri ngeni napanapen an nemenem pwe i ewe Kot mi Unusen Manaman.​—Ppii ewe pwóór “ Met A Kapachelong lón Pinilóón Iten Jiowa?”

4. Met Kölfel 135:13 a apasa usun iten Kot we, me ikkefa ekkewe kapas eis sipwe pélúweniir lón ei lesen?

⁴ A kkóló aúchean ewe it Jiowa. (Álleani Kölfel 135:13.) Pwata a mmen lamot iten Kot we? Ineet ewe áeúin atun emén a pweni ena it? Ifa usun Kot a epinaaló itan we? Me ifa  usun sipwe penaatá itan we? Sipwe pélúweni ekkena kapas eis iei.

5. Eli met ekkóch repwe eis lupwen ra rong pwe a lamot iten Kot epwe piniló?

⁵ “Itom epwe pin.” (Mat. 6:9) Jesus a apasa pwe ina eú me lein ekkewe mettóch mi fókkun lamot sipwe ióteki. Nge met weween alon na? Ren an epwe piniló eú mettóch, a wewe ngeni pwe epwe liméch. Nge, neman ekkóch repwe ekieki, ‘Esap pwe iten Jiowa we a fen pin me liméch?’ Ren an epwe pélú, a lamot sipwe ekieki usun met a kapachelong lón iten emén.

6. Met a efisi aúchean eú it?

⁶ Iten emén esap chék eú féúféún kapas lón mak are fós. Nengeni met ewe Paipel a apasa: “Kopwe filätä iteüöch lap seni wöümong.” (SalF. 22:1; SalAf. 7:1) Pwata a fókkun lamot iten emén? Pún iten emén a kapachelong lón tikiéchchún, weween minne aramas ra ekieki usun ena emén mi iteni ena it. Ina popun, met aramas ra ekieki lupwen ra kúna are rong ena it, ina met a lamot seni meinisin, nge esap fen napanapen an mak lón taropwe are newenewan.

7. Ifa usun aramas ra atai itéchún Kot?

⁷ Lupwen aramas ra kapas chofona usun Jiowa, ra atai itéchún. Iwe lupwen ra féri ena, ra pweni itan we. Ewe áeúin atun emén a pweni itan we, ina lón ewe tánipiin Eten. Ekieki met sia káé seni ena.

8. Met Atam me Efa ra silei, me ikkefa ekkewe kapas eis ra ppiitá?

⁸ Atam me Efa ra silei pwe iten Kot, Jiowa, me ra pwal silei chómmóng mettóch mi lamot usun I. Ra silei pwe I ewe Chón Fératá, ewe mi ngeniir manawer, leenier we Paratis mi lingéch, me pwúlúwer mi unuséch. (Ken. 1:26-28; 2:18) Iwe nge, itá ra kan ekilonei mettóch meinisin Jiowa a fen féri fán iter? Itá ra kan alapaaló ar tongei me aúcheani ewe Emén mi iteni ena it? Pélúwen  ekkena kapas eis a ffatoló lupwen ewe chón oput Kot a sótuniir.

9. Me ren Keneses 2:16, 17 me 3:1-5, met Jiowa a ereni ewe popun aramas, me ifa usun Satan a sorei ewe enlet?

⁹ Álleani Keneses 2:16, 17 me 3:1-5. Satan a néúnéú emén serepenit pwe epwe fós ngeni Efa me a eisini: “Ifa usun, Kot a wesewesen apasa pwe ousap fokun mongö seni ekewe irän ei tanipi?” A tunosolá an na kapas eis usun Kot, pwe iwe Efa a poputá le eáni ekiek mi ngaw usun Kot. Nge Kot a wesewesen apasa pwe ra tongeni mwéngé seni meinisin ekkewe irá chilóón chék efóch irá. Atam me Efa ra tongeni mwéngé seni ekkewe chómmóng sókkopaten irá. (Ken. 2:9) Ewer, Jiowa a fókkun kisáseú. Nge a ereniir ar resap ocheei uwaan ewe efóch irá. Iwe án Satan na kapas eis a sorei ewe enlet. Usun itá Satan a ámmeef ngeniir pwe Kot ese kisáseú. Eli Efa a ekieki, ‘Itá Kot a amwéchú seniei och mettóch mi múrinné?’

10. Ifa usun Satan a tuwenewen le pweni iten Kot we, me met mwirilóón?

¹⁰ Lupwen Satan a eáni ena kapas eis, Efa a chúen álleasochisi Jiowa. A pélúweni Satan ren an affata ngeni met Kot a wesewesen apasa. A pwal erá pwe resap pwal mwo nge attapa ewe irá. A silei án Kot éúréúr pwe repwe máló ika ra álleasolap. Nge Satan a pélúweni: “Apwi, ousap fokun mäla.” (Ken. 3:2-4) Iwe ese chék ámmeef ngeni Efa pwe Jiowa a kapas chofona, nge a fen wesewesen tuwenewen lón an pweni iten Kot, me apasa pwe Jiowa a kapas chofona. Ina popun, Satan a wiliti ewe tefil, are emén chón pweni. Efa a unusen tupuló, a lúkú Satan. (1 Tim. 2:14) A fen kon lúkú Satan lap seni Jiowa. Iwe a ámecheresi án Efa wesewesen kefilingaw. A filatá an epwe álleasolapa Jiowa. A poputá le ocheei féún ewe irá mi pinepin ngeni. Mwirin, a pwal ngeni Atam.​—Ken. 3:6.

11. Met popuch kewe itá repwe fen féri, me met ra fen sópwongaw le féri?

¹¹ Ekieki mwo itá met Efa a tongeni ereni Satan. Ekieki pwe itá iei met a ereni: “Use sissileok, nge ua silei Semei we Jiowa, me ua tongei me lúkúlúkú. A fen fang ngenikem me Atam meinisin met mi wor rem. A fet me ngawen met ka erá usun i? Sú!” Itá epwele ian me pwapwaan Jiowa le rong alon néún na fefin mi tongei mi pwári an tuppwél! (SalF. 27:11) Nge Efa ese enletin tongei Jiowa me pwal ina usun Atam. Pokiten Atam me Efa rese tongei Jiowa, iwe rese tongeni penaatá pinilóón itan we atun Satan a pweni.

12. Ifa usun Satan a etipemwaramwara Efa, me met Atam me Efa rese féri?

¹² Usun met sia fen kúna pwe Satan a poputá le atai itéchún Jiowa ren an sótun etipemwaramwara Efa ika Jiowa emén Sam mi  múrinné. Iwe, Atam me Efa rese penaatá pinilóón iten Jiowa we atun Satan a eáni kapas chofona mi fókkun ngaw usun i. Iwe a ámecheresi ar repwe aúselinga Satan me ú ngeni Semer we. Lón ei fansoun, Satan a pwal áeá ekkena esin minen otuputup. A atai itéchún Jiowa ren an pweni i. A mecheres án chókkewe mi lúkú án Satan kewe kapas chofona repwe tipetipeló le ú ngeni án Jiowa nemenem mi pwúng.

13. Ifa usun Isikiel 36:23 a menlapei itelapen ewe Paipel?

¹³ Itá Jiowa a fanengeni ena féfférún pweni itan we? Aapw, ese! Unusen ewe Paipel a áiti ngenikich minne Jiowa a fen féri ren an epwe ánnetatá pwe ese pwúng ekkewe pwóróus mi mwáál a ppiitá lón ewe tánipiin Eten. (Ken. 3:15) Ren enletin, iei itelapen masouen Paipel: Jiowa a epinaaló itan we ren ewe Mwú fán nemenien Néún we, me a aworasefálli pwúng me kinamwe wóón fénúfan. Ewe Paipel a álisikich le weweiti ifa usun Jiowa a epinaaló itan.​—Álleani Isikiel 36:23.

14. Ifa usun Jiowa a epinaaló itan ren minne a féri atun ewe féfférún ú ngeni lón Eten?

¹⁴ Satan a fókkun achocho le eppeti án Jiowa apwénúetá minne a tipeni. Nge iteitan ese sópwéch. Ewe Paipel a affata met Jiowa a fen féri, me a ánnetatá pwe i emén Sam mi tong me emén Sounemenem mi múrinné lap seni meinisin. Ewer, án Satan féfférún ú ngeni me meinisin chón peni i ra efisi watteen án Jiowa letipechou. (Kölf. 78:40) Nge Jiowa a pwákini ena ren an tipachem, mosonottam, me pwúngiéch. A pwal pwári watteen an manaman lón chómmóng napanap. Nge lap seni meinisin, a pwári tong lón meinisin met a féri. (1 Joh. 4:8) Jiowa a chék sóssópweló le ekkepinaaló itan.

15. Ifa usun Satan a pweppweni iten Kot we lón ei fansoun, me met mwirilóón?

¹⁵ Lón ei fansoun, Satan a chúen pweppweni iten Kot we. A otupu aramas pwe  repwe tipemwaramwar ika Kot emén mi manaman, pwúng, tipachem me tong. Áwewe chék, Satan a etipetipa aramas pwe Jiowa esap ewe Chón Fératá. Nge ika aramas ra lúkú pwe mi wor Kot, iwe Satan epwe otupuur le lúkú pwe Kot me an kewe allúk ra kon tichik me rese pwúng. A pwal mwo nge asukula pwe Jiowa a kirikiringaw pwe a keni aramas lón ekkein ell. Atun ra lúkú ekkena kapas chofona mi fókkun ngaw, a ámecheresi ar repwe tunaló án Jiowa nemenem mi pwúng. Tori án Satan epwe unusen kkuf, epwe chék sóssópweló le pweni Jiowa me pwal sótun okkuluk seni I. Nge itá epwe sópwéch?

16. Met ka tongeni féri nge Atam me Efa rese féri?

¹⁶ Jiowa a mut ngeni aramas tipis le álillis lón pinilóón itan we. Ina minne ka tongeni féri minne Atam me Efa rese féri. Inaamwo ika ka nóm lón ei fénúfan mi uren aramas mi pweni me turunufaseei iten Jiowa, nge ka tongeni penaatá pinilóón iten Jiowa me ereni aramas pwe I emén mi pin, pwúng, múrinné, me tong. (Ais. 29:23) Ka tongeni álisatá an nemenem. Ka tongeni álisi aramas le weweiti pwe án Jiowa we nemenem chék a unusen pwúng, me ina chék met epwe atoto kinamwe me pwapwa ngeni férian kewe meinisin.​—Kölf. 37:9, 37; 146:5, 6, 10.

17. Ifa usun Jesus a pwáraaló iten Seman we?

¹⁷ Lupwen sia penaatá pinilóón iten Jiowa, sia áppirú Jesus Kraist. (Joh. 17:26) Jesus a pwáraaló iten Seman we ren an nénnéúnéú me pwal ren an asukula aramas usun enletin napanapen Jiowa. Áwewe chék, Jesus a ú ngeni án ekkewe Farisi soun eitengawa Jiowa mi ámmeef ngeni ekkewe aramas pwe a kirikiringaw, tichik, ese chiechiéch me ese sile tong. Nge a álisi aramas le kúna pwe Seman na a tipemecheres, mosonottam, tong, me a omusaaló tipisin aramas. A pwal álisi aramas le silei Jiowa ren an unusen áppirú napanapen Seman na lón manawan iteiten rán.​—Joh. 14:9.

18. Ifa usun sia tongeni áwena ekkewe kapas chofona me kapasen pweni usun Jiowa?

¹⁸ Sipwe usun Jesus le ereni aramas met sia  silei usun Jiowa, me áiti ngeniir pwe i emén Kot mi tong me kirekiréch. Lupwen sia féri ena, sia áwena ekkewe kapas chofona me kapasen pweni usun Jiowa. Atun sia epinaaló iten Jiowa, aramas repwe pwal meefi pwe a pin. Kich sia pwal tongeni áppirú Jiowa. A tufich ena inaamwo ika sise unuséch. (Ef. 5:1, 2) Lupwen ach kapas me féffér a pwári ngeni aramas enletin napanapen Jiowa, sia álisatá pinilóón itan we. Sia eitéchú itan we ren ach álisi aramas le silei ewe enlet usun Kot. Sia pwal ánneta pwe aramas tipis ra tongeni akkamwéchú ar tuppwél ngeni Kot.​—Hiop 27:5.

19. Ifa usun Aisea 63:7 a álisikich le silei met sipwe nefótófót wóón lón ach asukula aramas?

¹⁹ Mi pwal wor met sia tongeni féri le epinaaló iten Kot we. Lupwen sia asukula aramas ewe enlet seni Paipel, fán chómmóng sia menlapei án Kot nemenem, weween an pwúúng le nemeni unuselapen láng me fénúfan, nge a fókkun pwúng ena. Iwe nge, inaamwo ika a lamot ach sipwe menlapei án Kot kewe allúk, nge itá sipwe fen nefótófót wóón ach álisi aramas le tongei Jiowa Semach we, me tuppwél ngeni. Ina minne mi lamot sipwe menlapei napanapen Jiowa kewe mi múrinné, me menlapei ngeniir ewe sókkun Kot mi iteni ewe it Jiowa. (Álleani Aisea 63:7.) Lupwen a ina usun ach asukula aramas, sipwe álisiir le tongei Jiowa me álleasochisi pokiten ra mochen tuppwél ngeni.

20. Met sipwe káé lón en lesen mwirin ei?

²⁰ Iwe, ifa usun sipwe nochchei pwe féfférúch me napanapen ach asukula aramas epwe eitéchú iten Jiowa we, me amwékútú aramas le mochen arap ngeni? Ewe lesen mwirin ei epwe pélúweni ena kapas eis.