1, 2. (a) Pwata ekkewe Chón Kraist kúkkún me sáráfé ra wikkin lón ewe maun lefiler me Satan me ekkewe chónláng mi ngaw? (Ppii ewe sasing lepoputáán ei lesen.) (b) Met sipwele pwóróus usun?

EWE aposel Paulus a áweweei pwe ekkewe Chón Kraist ra usun soufiu. Sia fiti eú maun lón pekin lúkú nge sia mammaun ngeni wesewesen chón oputach kewe! Nge sise maun ngeni aramas pwe sia maun ngeni Satan me ekkewe chónláng mi ngaw. Ra fókkun sipeéch lón pekin maun pún iir soufiu ren fitengeréú ier. Ina minne, usun itá sise fókkun tongeni okkufuur ákkáeúin ika pwe kich kúkkún are sáráfé. Nge itá ekkewe kúkkún me sáráfé ra tongeni win lón ar maun ngeni ewe chón oputakich mi manaman? Ewer, ra tongeni, me ra fen wikkin iei! Pwata? Pokiten Jiowa a ngeniir an we manaman. Pwal och, ra áeá me úféúf ‘ekkewe pisekin maun Kot a ngeniir,’ pwe repwe mmólnetá ngeni ewe maun usun chék ekkewe soufiu mi sipeéch.​—Álleani Efisos 6:10-12.

² Lupwen Paulus a áeá ena kapas áwewe, neman a ekieki usun  án ekkewe soufiun Rom kewe pisekin maun. (Föf. 28:16) Lón ei lesen, sipwe etittina ena kapas áwewe mi fókkun múrinné. Sipwe pwal pwóróus usun meefien ekkóch kúkkún me sáráfé usun weiresin me feiéchún ar áeálong are úféúfolong eú me eú ach kana pisekin maun.

3, 4. Ifa usun ekkewe pwóróus mi enlet seni Paipel ra usun án emén soufiun Rom penit?

³ Álleani Efisos 6:14. A wor chéén mechá wóón án emén soufiun Rom we penit pwe epwe túmúnú wánúkún me énnúkú an we chechchen leupw mi chou. Wóón ekkóch penit a pwal wor fitefóch akéké mi péchékkúl pwe epwe uwei néún kewe ketilas me siles woor. Ewe soufiu epwe meefi núkúnúkéch lupwen a ló maun fán an we penit mi fókkun núk.

⁴ Ekkewe pwóróus mi enlet sia káé seni án Kot we kapas, a usun efóch penit, a túmúnúkich seni ekkewe pwóróus mi chofona. (Joh. 8:31, 32; 1 Joh. 4:1) Lapólóón ach aúcheani ekkewe pwóróus mi enlet lón án Kot we Kapas, pwal ina lapólóón mecheresin ach apwénúetá án Kot kewe allúk lón manawach, are ach úféúfolong ach we “chechen leupw.” (Kölf. 111:7, 8; 1 Joh. 5:3) Pwal och, atun sia weweéchúti ekkena pwóróus mi enlet, sipwe pwal lipwákéchúló le ánnetatá pwúngún ewe enlet ngeni chón oputach.​—1 Pet. 3:15.

5. Pwata a lamot ach sipwe kapas enlet fansoun meinisin?

⁵ Pokiten mi aúchea ngenikich ekkewe pwóróus mi enlet lón án Kot we Kapas, sia álleasochisi alon ewe Paipel me sia eáni kapas mi enlet fansoun meinisin. Kapas chofona, ina eú me lein án Satan kewe pisekin maun mi fókkun efeiengaw. Kapas chofona ese chék efeiengawa ewe chón kapas chofona nge pwal ewe emén mi chofona ngeni. (Joh. 8:44) Ina minne, inaamwo ika sise unuséch, nge sia fókkun achocho ach sisap kapas chofona. (Ef. 4:25) A tongeni áweires ena. Iei alon Abigail 18 ierin: “Fán ekkóch ach kapas enlet usun itá ese échitikich, nge ákkáeúin ika ach kapas chofona epwe álisikich ach sisap tolong lón osukosuk.” Nge pwata chék Abigail a achocho le kapas enlet? A erá: “Lupwen ua kapas enlet, mwelien letipei a liméch mwen mesen Jiowa. Semei kewe me inei, me chiechiei kewe ra tongeni lúkúlúk wóói.” Iei alon Victoria, 23 ierin: “Lupwen ka kapas wenechar me ánneta ngeni aramas minne ka lúkú, eli aramas repwe mesáánuk. Nge epwe atoto watteen feiéch ngonuk fansoun meinisin, áwewe chék epwe lapóló óm meefi lúkúlúk, kopwe meefi óm chiechiéch ngeni Jiowa, me chókkewe mi tongeok repwe súfélituk.” Iwe ka kúna lamoten óm kopwe ‘peliti ngeni lukalapom let’ fansoun meinisin?

6, 7. Pwata sia aléllééi ewe mettóch pwúng ngeni “chechen leupw”?

⁶ Fán chómmóng chechchen leupwen  emén soufiun Rom a ffér seni mechá mi sássár me ra apworopwor pwe epwe noppéch me leupwan. Ekkena mechá mi sássár ra akéké ngeni ékúkkún we mi ffér seni únúchen man mi wor ékkúk wóón mi ffér seni mechá. A pwal wor fitefóch mechá mi sássár wóón afaran mi pwal akéké ngeni ékúkkún we mi ffér seni únúchen man. Ewe chechchen leupw a ekis eppeti án ewe soufiu esap kon mwékútúkút, iwe mi lamot an epwe chechcheki ika sássárin úfan we a noppéch. Nge ena chechchen leupw a túmúnú féún ngasangasan me pwal ekkóch masouen lón inisin an esap feiengaw ren ketilas are féún esefich!

⁷ Sia tongeni áweweei pwe ewe chechchen leupw a usun án Jiowa kewe allúk mi pwúng mi túmúnú ‘lelukach,’ are enletin masouen letipach. (SalF. 4:23) Emén soufiu esap fókkun ekkesiwili an we chechchen leupw mi ffér seni mechá ngeni eú mi ffér seni pwal och sókkun mechá mi apwangapwang. Pwal ina chék usun, sisap ekkesiwili án Jiowa kewe allúk usun minne mi pwúng ngeni pwisin ach ekiek usun met mi pwúng. Ese nóm rech ewe tipachem ren ach sipwe pwisin túmúnú letipach. (SalF. 3:5, 6) Ina popun mi lamot sipwe chechcheki ach “chechen leupw” iteitan ika a chúen túmúnú letipach.

8. Pwata a lamot ach sipwe álleasochisi án Jiowa kewe allúk?

⁸ Fán ekkóch ka kan meefi pwe án Jiowa kewe allúk ra eppetuk le féri met ka mochen? Daniel, 21 ierin a erá: “Ekkewe sense me chienei kewe chón sukul ra eániei atakirikir pokiten ua fiti án Paipel kewe allúk. Ren ekis fansoun, use chúen meefi núkúnúkéch me ua letipechou.” Nge met meefian iei? A erá: “Ló, ló, ló, ua kúna feiéchún ai manaweni manawei me ren án Jiowa kewe allúk. Chókkewe itá ua kan ekieki pwe iir chienei me lóóm, ra poputá le angei drugs mi efeiengaw, me ekkóch ra towu me sukul. A mmen elichippúng ai kúna nónnómungawer iei. Jiowa a wesewesen túmúnúkich.” Madison, 15 ierin a erá: “A mmen weires ai upwe fitipachei án Jiowa kewe allúk me ai usap féri met chiechiei kewe ra meefi pwe a mmen apwapwa.” Iwe, met Madison a féri? A erá: “Ua kan áchema ngeniei pwe ua tupuni iten Jiowa we, me ena sóssót ina chék eú alen án Satan peppekiei. Lupwen ua pworacho ngeni, ua meefi núkúnúkéch usun pwisin ngang.”

9-11. (a) Menni ewe suus lón kapas áwewe Chón Kraist ra néúnéú? (b) Met epwe álisikich le meefi núkúnúkéch lupwen sia afalafal?

⁹ Álleani Efisos 6:15. Emén soufiun Rom ese tongeni ló maun nge ese néúnéú suus. Néúr kewe suus ra ffér seni únúchen man nge a úlúngát sássár manúnún, ina popun a fókkun péchékkúl. Nge ekkena suus ra pwal kinamwe, emén soufiu a tongeni fetál fán núkúnúkéch nge esap faas.

¹⁰ Néún ekkewe soufiun Rom kewe suus a álisiir ar repwe sópwéch lón ar maun, nge  lón kapas áwewe néúch we suus sia néúnéú a álisikich le “aronga ewe Pworausen Manau mi wor kinamwe lon.” (Ais. 52:7; Rom 10:15) Nge, fán ekkóch a chúen lamot watteen pwora lón ach angangen afalafal. Iei alon Bo, 20 ierin: “Ua niwokkus le afalafal ngeni chienei kewe chón sukul. Ua ekieki pwe ua ássáw. Nge iei, atun ua lesékúrú, use fen silei pwata a ina usui. Nge iei ua pwapwa le afalafal ngeni chienei kewe.”

¹¹ Chómmóng Chón Kraist kúkkún me sáráfé ra meefi núkúnúkéch le afalafal ika ra fen mmólnetá me mwan. Met ka tongeni féri pwe kopwe mmólnetá? Iei alon Julia, 16 ierin: “Ua kan uwou néúch kewe puk lón ai we pwotouun sukul, me ua aúseling ngeni meefien chienei kewe chón sukul me minne ra lúkú. Mwirin ua tongeni ekieki met epwe álisiir. Lupwen ua mmólnetá, ua tongeni fós ngeniir usun ekkewe pwóróus epwe wesewesen álisiir.” Makenzie, 23 ierin, a erá: “Ika ka kirekiréch, me aúselingéch ngeni chienom kewe, iwe kopwe silei met a fiffis lón manawer. Ua túmúnúéchú le álleani meinisin ekkewe pwóróus mi katowu usun kúkkún me sáráfé. Iwe, ua tongeni áiti ngeni  chienei kewe met epwe álisiir seni ewe Paipel are seni wóón ewe jw.org.” Óm mmólnéch le afalafal, usun nge ka néúnéú “suus” mi fókkun saiséch.

12, 13. Ikkefa ekkóch án Satan kewe ‘föün esefich mi pulopul’?

¹² Álleani Efisos 6:16. Emén soufiun Rom a uwei eú watteen eppetin maun mi napen pwóór. Epwe túmúnú seni afaran ngeni pwásukkun pwe ete feiengaw ren ketilas, siles me féún esefich.

¹³ Ikkefa ekkewe ‘föün esefich mi pulopul’ Satan a tongeni pekki ngonuk? Neman epwe maunek ren ekkewe kapas mi chofona usun Jiowa. A mochen kopwe meefi pwe Jiowa ese tongeok, me ese wor emén a áfánnuk. Ida, 19 ierin, a erá: “Fán chómmóng ua meefi pwe Jiowa ese arap ngeniei, me ese mochen epwe Chiechiei.” Iwe, met Ida a kan féri lupwen a meefi ina usun? A erá: “Ekkewe mwich ra mmen apéchékkúla ai lúkú. Me lóóm, ua kan chék mómmóót me esap fán eú ai upwe uwawu meefiei pún ua ekieki pwe esap wor emén a mochen rongorong. Nge iei, ua ammólnatá fán iten ekkewe mwich, me achocho le uwawu meefiei fán ruu are úlúngát. A weires nge ua pwapwa lupwen ua féri. Me pwiich kewe ra mmen apéchékkúlaei. Sárin mwich ua kan meefi pwe Jiowa a tonge ei.”

14. Met sia káé seni pwóróusen Ida?

¹⁴ Ese sissiwil saisin án emén soufiu eppetin maun. Nge sia káé seni pwóróusen Ida pwe ach lúkú ese ina usun. Ach lúkú mi tongeni watteeló are kúkkúnúló, a tongeni péchékkúleló are apwangapwangoló. Epwe lóngólóng wóón pwisinkich. (Mat. 14:31; 2 Tes. 1:3) Mi lamot ach sipwe ákkáwatteeló me akkapéchékkúla ach lúkú, ina ach we “epetin maun” pwe epwe túmúnúkich!

15, 16. Ifa usun ach ápilúkúlúk a usun chék eú akkaw?

¹⁵ Álleani Efisos 6:17. Emén soufiun Rom a imweimw imwan we akkaw pwe epwe túmúnú mékúran, úwan, me wóón mesan. Fán ekkóch a wor chúchúnen ewe akkaw pwe ewe soufiu epwe tongeni chúna.

¹⁶ Ach “apilüköchün manau” a túmúnú ach ekiek, usun chék imwen ewe soufiu we akkaw a túmúnú tupwuan. (1 Tes. 5:8; SalF. 3:21) Ápilúkúlúk a álisikich le nefotofot wóón án Kot kewe pwon, me a álisikich ach sisap lichippúng ren ach kewe osukosuk. (Kölf. 27:1, 14; Föf. 24:15) Nge ika sia mochen pwe ach ápilúkúlúk epwe túmúnúkich, mi lamot pwe ach ápilúkúlúk epwe wesewesan me enlet. Mi lamot sipwe imweimw imwach we “akau” nge sisap chék chúna!

17, 18. (a) Ifa usun Satan a tongeni otupukich le pwilitatiw imwach we akkaw? (b) Ifa usun sipwe ánneta pwe sise tup ren Satan?

¹⁷ Ifa usun Satan a tongeni otupukich le pwilitatiw imwach we akkaw? Ekieki met a sótun féri ngeni Jesus. A silei pwe Jesus epwe wiliti sounemenemen fénúfan. Nge me mwen epwe pwénútá ena, Jesus epwe akkomw kúna riáfféú me máló. Mwirin, epwe mwo witi ewe atun mi kefilitá me ren Jiowa pwe epwe wisen King. Ina popun, Satan a ereni Jesus pwe a chék tongeni poputá le nemenem seni ena atun. Satan a pwon ngeni Jesus pwe ika epwe chék fel ngeni, iwe epwe wiliti ewe sounemenemen fénúfan lón chék ena atun. (Luk. 4:5-7) Satan a pwal  silei pwe Jiowa a pwonei an epwe ngenikich chómmóng mettóch mi amwarar lón ewe paratis. Nge mi lamot sipwe witiwiti pwénútáán ena pwon, nge ren mwo iei sia tongeni kúna chómmóng osukosuk. Ina minne Satan a erenikich pwe sia tongeni eáni manaw mi kinamwe iei chék. A mochen sipwe akkomwa kinamween manawach lap seni án Kot we Mwú.​—Mat. 6:31-33.

¹⁸ Chómmóng Chón Kraist kúkkún me sáráfé rese tup ren Satan. Áwewe chék, Kiana, 20 ierin, a erá: “Ua silei pwe án Kot we Mwú chék, ina ach ápilúkúlúk le pwákini meinisin ach kewe osukosuk.” Ifa usun án Kiana ápilúkúlúk a achchúngú an ekiek me napanapen an áeá manawan? A álisi le chechchemeni pwe mettóchun fénúfan resap nómottam. Ese achocho ngeni angangen moni lón ei ótót nge a áeá an fansoun me péchékkúl le angang ngeni Jiowa.

19, 20. Ifa usun sipwe lipwákéchúló lón ach néúnéú án Kot we Kapas?

¹⁹ Ekkewe soufiun Rom ra kan néúnéú ketilas ina epwe 20 inis ttaman. Ekkena soufiu ra fókkun sipeéch le néúnéú néúr kana ketilas pokiten ra kan akasóssót iteiten rán.

²⁰ Ewe aposel Paulus a erá pwe án Kot we Kapas a usun efóch ketilas. Jiowa a fen ngenikich an we Kapas. Nge mi lamot ach sipwe lipwákéch le néúnéú pwe sipwe tongeni ánneta ach lúkú are ekkesiwili ach ekiek. (2 Kor. 10:4, 5; 2 Tim. 2:15) Ifa usun sipwe lipwákéchúló? Iei alon Sebastian, 21 ierin: “Ua kan makkeei eú wokisin seni eú me eú sópwun lón ai álleaan Paipel. Ua kan ikkisoni ekkewe wokisin ua fókkun saniir.” Ena mettóch a álisi le wewefichiti án Jiowa ekiek. Daniel a pwal apasa: “Lupwen ua álleani ewe Paipel, ua filatá ekkewe wokisin ua meefi pwe epwe álisi aramas lón ai we leenien afalafal. Ua kúna pwe aramas ra etiwaéchúkich lupwen ra kúna pwe sia fókkun aúcheani ewe Paipel me sia fókkun achocho le álisiir.”

21. Pwata ese wor popun ach sipwe niweiti Satan me néún kewe chónláng mi ngaw?

²¹ Sia silei seni meefien ekkewe sáráfé lón ei lesen pwe ese wor popun ach sipwe niweiti Satan me néún kewe chónláng mi ngaw. Pwúngún pwe iir mi péchékkúl, nge Jiowa a fókkun manaman lap seniir. Resap manawffóch. Repwe kalapus me rese tongeni efeiengawa aramas atun án Kraist Nemenem Úkúkún Engeréú Ier, me mwirin ena repwe ninniiló. (Pwär. 20:1-3, 7-10) Sia silei chón oputach we, an kewe minen otuputup, me met a achocho ngeni. Ren án Jiowa álillis, sia tongeni úpéchékkúl ngeni!