1-2. (a) Ifa ussun nónnómuch lón ei fansoun a léllé ngeni ekkewe chón Jus ra liwiniti Jerusalem? (b) Apwóróusa ekkewe weires ekkewe chón Jus ra kúna. (Ppii ewe pwóór “ Fansoun Akai, Sekaraia, me Esra.”)

 FÁN EKKÓCH ka kan aúreki met epwe fis lón mwach? Eli a péút sonuk óm angangen moni me ka lólilen iká ifa ussun kopwe atufichi óm famili. Eli ka kan aúreki ifa ussun óm famili epwe kúna túmún pokiten osukosuken mwú, riáfféúmwáál, are án aramas oputa ach angangen afalafal. Ka nónnóm lón eú me lein ekkeei osukosuk? Iká ina, kopwe péchékkúletá ren óm kúna ifa ussun Jiowa a fen álisi ekkewe chón Israel lóóm iir mi pwal kúna ekkena esin osukosuk.

² A mmen lamot an epwe péchékkúl án ekkewe chón Jus mi nóm Papilon lúkú, ar repwe tongeni likitaaló manawer mi kinamwe me sái ngeni eú fénú lape ngeniir rese sissilei ussun. Ese pwen imwo mwirin ar tori ena leeni, ra kúna weiresin ar repwe atufichi ar famili, osukosuken mwú, me án chón ekkewe fénú únúkkúr oputer. A weires ngeni ekkóch ar repwe nefótófót wóón kaúsefálliin imwen Jiowa we. Ina popun, lón ina epwe ewe ier 520 mwen Kraist, Jiowa a tiinaaló rúúemén néún soufós Akai me Sekaraia ar repwe álisiir le tinikkensefál. (Ak. 1:1; Sek. 1:1) Sipwele kúna pwe a mmen sópwéch án ekkena soufós álisiir. Iwe nge, arapakkan 50 ier mwirin, ekkena chón Jus ra pwal apwangapwang sefál. Esra ewe soumak mi fókkun silei ewe Allúk, a ló seni Papilon ngeni Jerusalem an epwe apéchékkúler le akkomwa ewe fel mi enlet.—Esr. 7:​1, 6.

3. Ikkefa ekkewe kapas eis sipwele pwóróus wóór? (Än Salomon Fos 22:19)

 ³ Án Akai me Sekaraia kewe oesini a álisi néún Kot kewe aramas me lóóm ar repwe sópweeló le lúkúlúk wóón Jiowa atun ra kúna koput, iwe ra pwal tongeni álisikich lón ei fansoun le lúkúlúk pwe Jiowa epwe álisikich lón fansoun weires. (Álleani Än Salomon Fos 22:19.) Atun sia káé ewe pwóróus seni Kot Akai me Sekaraia ra atoura me etittina pwóróusen Esra, sipwele pélúweni ekkeei kapas eis: Met a fis ngeni ekkewe chón Jus mi liwinsefál lupwen ra kúna weires? Pwata a lamot ach sipwe nefótófót wóón ach féri letipen Kot atun sia kúna weires? Me ifa ussun sia tongeni alapaaló ach lúkúlúk wóón án Jiowa álisikich lón fansoun weires?

4-5. Eli pwata a kisikisiló án ekkewe chón Jus mwasangasang le aúsefáli ewe imwenfel?

⁴ Atun ekkewe chón Jus ra wareiti Jerusalem, a chómmóng ar angang. Ra mwittir le ssenatá sefál án Jiowa we róngen asor me féri lóngólóngun ewe imwenfel. (Esr. 3:​1-3, 10) Nge ekiseló mwirin a kisikisiló ar mwasangasang. Pwata? Me lúkún angangen ewe imwenfel, a lamot repwe pwal kaútá pwisin imwer, ffér ar atake, me atufichi ar famili. (Esr. 2:​68, 70) Pwal och, chón koputer kewe ra ekieki ar repwe akaúlóói kaúsefálliin ewe imwenfel.—Esr. 4:​1-5.

⁵ Ekkewe chón Jus iir mi liwinsefál ra pwal kúna weiresin pekin áion me osukosuk lón mwú. Iei leenier we a nóm fán nemenien ewe mwúún Persia. Mwirin málóón Sirus ewe kingen Persia lón ewe ier 530 mwen Kraist, Cambyses a wii lón wisan me a poputá le maunei chón Isip. Atun ewe mwichen soufiu ra fetál ngeni Isip, ra ereni ekkewe chón Israel ar repwe amwéngééniir, éúnúúr konik me eleenier, ena mettóch a fen alapaaló weiresin ekkewe chón Israel. Atun lepoputáán án King Tarius I nemenem, ewe a wii Cambyses, a chúen chómmóng ekkewe osukosuk, áwewe chék án aramas ú ngeni ewe mwúún Persia. Ese mwáál meinisin ekkena mettóch a alólileni ekkewe chón Jus ren ifa ussun repwe tongeni atufichi ar kewe famili. Pokiten meinisin ekkena weires ra kúna, iwe ekkóch chón Jus ra meefi pwe resap mwo aúsefáli án Jiowa we imwenfel.—Ak. 1:2.

6. Me ren Sekaraia 4:​6, 7, ikkefa pwal ekkóch weires ekkewe chón Jus ra kúna, me met Sekaraia a alúkúlúkú ngeniir?

⁶ Álleani Sekaraia 4:​6, 7. Me lúkún osukosuken pekin áion me mwú, ekkewe chón Jus ra pwal likiitú fán riáfféúmwáál. Lón ewe ier 522 mwen Kraist, chón koputer kewe ra sópwéch lón ar aúkatiw kaúsefálliin án Jiowa we imwenfel. Nge Sekaraia a alúkúlúkúúr pwe Jiowa epwe áeá an we ngún mi fel mi manaman le álisiir ar repwe sópweeló ese lifilifil weires ra kúna. Lón ewe ier 520 mwen Kraist, King Tarius a mut ngeniir ar repwe sópweeló angangen ewe imwenfel, a pwal mwo nge ngeniir moni. A pwal allúkú ngeni ekkewe kepina lón ena leeni ar repwe álisiir.—Esr. 6:​1, 6-10.

7. Ifa ussun Jiowa a efeiéchú ekkewe chón Jus iir mi liwiniti Jerusalem atun ra akkomwa an angang?

 ⁷ Jiowa a pwon ngeni néún kewe aramas me ren Akai me Sekaraia, pwe epwe álisiir iká ra akkomwa kaúsefálliin ewe imwenfel. (Ak. 1:​8, 13, 14; Sek. 1:​3, 16) Pokiten ra péchékkúletá me ren ekkena soufós, ekkewe chón Jus ra poputá le angang sefál wóón ewe imwenfel lón ewe ier 520 mwen Kraist, me kis seni 5 ier mwirin, ra áwesi kaúún. Pokiten ra akkomwa letipen Jiowa inaamwo iká ra kúna weires,  iwe Jiowa a álisiir esap chék lón pekin áion nge pwal lón pekin ngún. Iwe mwirin, ra fel ngeni Jiowa fán pwapwa.—Esr. 6:​14-16, 22.

8. Ifa ussun minne a mak lón Akai 2:4 epwe álisikich ach sipwe chék nefótófót lón ach féri letipen Kot? (Pwal ppii ewe footnote.)

⁸ Atun a kakkanoto ewe riáfféú mi lapalap, sia mirititi úkúúkún lamoten ach sipwe álleasochisi ewe allúk le álillis lón ewe angangen afalafal. (Mark. 13:10) Iwe nge, eli a weires ach sipwe nefótófót wóón ewe angangen afalafal iká a wor ach osukosuken moni are sia kúna koput lón ach angangen afalafal. Met epwe tongeni álisikich le akkomwa án Kot we mwú? Sipwe lúkúlúk pwe Jiowa ewe meilapen soufiu b a nónnóm rech. Epwe álisikich iká sia sópweeló le akkomwa mwúún we lap seni meinisin. Iwe, ese wor met sipwe niwokkusiti.—Álleani Akai 2:4.

9-10. Ifa ussun eú pean pwúpwúlú ra kúna pwúngún alon Jises we lón Mateus 6:33?

⁹ Iei pwóróusen Oleg me Irina, c eú pean pwúpwúlú pioneer. Mwirin ar mwékút ngeni pwal eú leeni pwe repwe álillis lón eú mwichefel, a péút seniir ar angangen moni pokiten osukosuken monien mwúúr we. Inaamwo iká ese núkúnúkéch nónnómur pwe fán ekkóch a wor ar angang me fán ekkóch ese ren úkúúkún eú ier, nge ra chék memmeefi án Jiowa álillis fán tong me fán ekkóch ra kúna álillis seni pwiir kewe. Met a álisiir atun ra kúna ekkena weires? Iei met Oleg ewe mi letipechou me mwan a apasa: “Ám fiti ewe angangen afalafal úkúúkún ám tufich ina met a álisikem le nefótófót wóón met mi kon aúchea lón manawem.” Lepwolen ar kúkkút ar angang, ra chék akkafalafal.

¹⁰ Eú rán atun ra liwin me afalafal, ra silei  pwe emén chiener a sái 100 mwail ren an epwe ngeniir ruu pwotoun mwéngé. Oleg a erá: “Lón na rán, áúa meefi sefál úkúúkún án Jiowa me ewe mwichefel tongekem. Áúa fókkun silei pwe Jiowa esap ménúkaaló néún kewe chón angang, inaamwo iká ra meefi ápilúkingaw.”—Mat. 6:33.

11. Met sia tongeni kúna iká sia nefótófót wóón ach féri letipen Kot?

¹¹ Jiowa a mochen ach sipwe nefótófót lón ewe angangen álisi aramas le wiliiti chón káé. Lón ewe  parakraf 7, a fósun án Akai pesei néún Jiowa kewe aramas ar repwe poputá le angang sefál wóón ewe imwenfel. Iká ra féri ena, Jiowa a pwone ngeniir pwe epwe ‘afeiöchür.’ (Ak. 2:​18, 19) Sia pwal tongeni lúkúlúk pwe Jiowa epwe efeiéchú ach achocho iká sia akkomwa ewe angang a ewisa ngenikich.

12. Pwata a lamot ngeni Esra me chienan kewe watteen lúkú?

¹² Lón ewe ier 468 mwen Kraist, Esra a sái fengen me ewe oruuen kúmiin chón Jus seni Papilon ngeni Jerusalem. A lamot ngeni Esra me chienan kana watteen lúkú fán iten ena sái. Repwe fetál wóón al mi efeiengaw fán chómmóng kolt me silifer ewe king a ngeniir fán iten ewe imwenfel. Iwe, epwe mecheres ngeni chón solá ar repwe solá seniir. (Esr. 7:​12-16; 8:31) Pwal och, ra kúna pwe Jerusalem ese núkúnúkéch. Ese kon chómmóng aramas lón me a lamot epwe fférsefál tittin me asaman kewe. Met sia tongeni káé seni Esra ussun ach sipwe alapaaló ach lúkúlúk wóón Jiowa?

13. Ifa ussun Esra a apéchékkúla an lúkúlúk wóón Jiowa? (Pwal ppii ewe footnote.)

¹³ Esra a fen kúna ifa ussun Jiowa a álisi néún kewe aramas lón fansoun weires. Lón ewe ier 484 mwen Kraist, ese mwáál Esra a nónnóm Papilon atun King Asuworos a allúkú ninilóón chón Jus mi nóm fán nemenien ewe mwúún Persia. (Est. 3:​7, 13-15) Iwe, Esra a nóm lón feiengaw! Iwe pokiten ena, ekkewe chón Jus lón “ekewe sop meinisin” ra echikefel me kechiw, me ese mwáál ra seppiti Jiowa lón iótek fán iten álillis. (Est. 4:3) Anchangei meefien Esra me ekkewe chón Jus atun chókkewe mi ekiekin nireló ra fen wisen niniiló! (Est. 9:​1, 2) Minne a fis ngeni Esra lón ekkena fansoun mi áweires eli a ammólnatá ngeni met epwap kúna mwirin me ese mwáál a apéchékkúla an lúkúlúk lón án Jiowa tufichin túmúnú néún kewe aramas. d

14. Ifa ewe lesen emén Chón Kraist fefin a káé atun a kúna án Jiowa túmúnú lón fansoun weires?

¹⁴ Atun sia kúna án Jiowa túmúnúkich lón fansoun weires, epwe péchékkúleló ach lúkúlúk wóón. Áwewe chék ren pwóróusen Anastasia, mi nóm Eastern Europe. A towu seni an we angang pokiten ese mochen angolong lón pekin politics. A erá: “Epwe kerán ina ewe ákkáeúin atun ese wor nei moni.” A pwal erá: “Úa iótek ngeni Jiowa me mwirin úa kúna an túmúnúei. Iká a fissefál pwe esap chúen wor ái angang, iwe úsapw niwokkus. Pún iká Semei we lón láng a fen túmúnúei ikenái, iwe epwe pwal túmúnúei lesor.”

15. Met a álisi Esra an epwe akkamwéchú an lúkúlúk wóón Jiowa? (Esra 7:​27, 28)

¹⁵ Esra a pwisin kúna án Jiowa úméúméch ngeni. Án Esra ekkekieki ekkewe atun Jiowa a fen túmúnú ese mwáál a álisi le akkamwéchú an lúkúlúk wóón. Nengeni ewe kapas “ewe Samol mi Lapalap ai we Kot a ümöümöch ngeniei.” (Álleani  Esra 7:​27, 28.) Esra a néúnéú ena itiitin kapas fán rúáánú lón ewe puk a makkeei.—Esr. 7:​6, 9; 8:18.

16. Ineet atun sia tongeni kúna án Jiowa wesewesen álisikich? (Pwal ppii ewe sasing.)

¹⁶ Jiowa a pwal tongeni álisikich atun sia nóm lón weires. Áwewe chék, atun sia tingorei néúch boss ach sipwe asésé seni ach angang pwe sipwe fiti eú mwichelap, are tingorei an epwe siwili ach schedule pwe sipwe tongeni fiti meinisin ach kewe mwiich, sia tongeni wesewesen kúna án Jiowa álisikich. Eli sipwe máirú ren met epwe fis. Iwe, a péchékkúleló ach lúkúlúk wóón Jiowa.

17. Ifa ussun Esra a pwáári tipetekison lón fansoun weires? (Ppii ewe sasing wóón péén.)

¹⁷ Esra a tingor án Jiowa álillis fán tipetekison. Iteiten Esra a meefi aúrek ren wisan kewe, fán tipetekison a iótek ngeni Jiowa. (Esr. 8:​21-23; 9:​3-5) Pokiten Esra a lúkúlúk wóón Jiowa, iwe ekkewe ekkóch ra tipemecheres le álisi me áppirú an lúkú. (Esr. 10:​1-4) Atun sia pwal aúreki osupwangach lón pekin áion me túmúnún ach famili, a lamot sipwe seppiti Jiowa lón iótek fán lúkúlúk.

18. Met a tongeni álisikich an epwe lapóló ach lúkúlúk wóón Jiowa?

¹⁸ Iká sia tingor án Jiowa álillis fán tipetekison me etiwa án pwiich kewe álillis, a tongeni lapóló ach lúkúlúk wóón Kot. Erika emén inelap mi wor úlúmén néún, a lúkúlúk wóón Jiowa fansoun meinisin pwe epwe túmúnú i, pwal mwo nge atun a nóm fán watteen riáfféú. Akkomw a riáfféú ren málóón néún we esaamwo uputiw, nge mwirin chék pwúlúwan we mi áchengicheng a pwal máló. Iei met a erá ussun meinisin met mi fen fis ngeni: “Kese tongeni silei me mwan ifa ussun Jiowa epwe álisuk. Kopwe máirú ren ia epwe feito me ia ewe álillis. Úa kúna pwe chómmóng ái kewe iótek ra pélú ren met chienei kewe ra apasa me féri. Iká úa ereni chienei kewe met a fiffis lón manawei, a mecheres ngeniir ar repwe álisiei.”

19-20. Met sia káé seni ekkewe chón Jus rese tufichin liwiniti Jerusalem?

¹⁹ Sia pwal tongeni káé eú lesen mi aúchea seni ekkewe chón Jus rese tufichin liwiniti Jerusalem. Ese mwáál ekkóch rese tongeni liwin pokiten ra chinnap are semmwen are nónnómun ar famili ese mut ngeniir ar repwe ló. Ikáámwo ina, nge ra tipemecheres le álisi chókkewe mi liwinsefál ren ar awora ngeniir álillis fán iten ewe imwenfel. (Esr. 1:​5, 6)  Ussun itá 19 ier mwirin án ekkewe áeúin kúmiin chón Israel ra liwiniti Jerusalem, chókkewe mi chék nónnóm lón Papilon ra chúen fiti ena ééreni le tiinaaló ar asor ngeni Jerusalem.—Sek. 6:10.

²⁰ Inaamwo iká sipwe meefi pwe mi chék kaúk met sia tongeni féri lón ach angang ngeni Jiowa, nge sia tongeni lúkúlúk pwe a aúcheani ach achocho. Pwata sia silei ena? Lón fansoun Sekaraia we, Jiowa a ereni néún na soufós an epwe féri epa mwárámwár seni ewe silifer me kolt ttinien ekkewe chón ooló lón Papilon. (Sek. 6:11) Ena “epa mwärämwär” mi ling epwe “eu pisekin achem” ussun watteen ar kisáséú le liffang. (Sek. 6:14) Sia tongeni lúkúlúk pwe Jiowa esap ménúki ach achocho ren unusen letipach le angang ngeni lón fansoun weires.—Ipru 6:10.

21. Met epwe álisikich le lúkúlúk wóón Jiowa ese lifilifil met epwe fis lón mwachkkan?

²¹ Ese mwáál lón ekkeei ránin lesópwólóón sipwe kúkkúna weires, me ei ótót epwe fen ngangngawoló lón mwachkkan. (2 Tim. 3:​1, 13) Iwe nge, ese kon pwal lamot an epwe luluuló ach aúrek. Chemeni alon Jiowa keei ngeni néún kewe aramas lón fansoun Akai we: “Üpwe etikemi . . . Ousap niuokus.” (Ak. 2:​4, 5) Sia pwal tongeni lúkúlúk pwe Jiowa epwe nónnóm rech iká sia achocho úkúúkún ach tufich le féri letipan. Ren ach apwénúetá ekkewe lesen sia káé seni án Akai me Sekaraia kewe oesini me án Esra leenien áppirú, sipwe tongeni akkamwéchú ach lúkúlúk wóón Jiowa ese lifilifil met sókkun weires sipwe kúna lón mwachkkan.