1. Ifa ewe sókkun tong mi aúchea seni meinisin, me ifa usun kopwe áweweei? (Ppii ewe sasing lepoputáán ei lesen.)

 TONG a pop seni Jiowa. (1 Joh. 4:7) Ewe sókkun tong mi aúchea seni meinisin, ina ewe mi lóngólóng wóón kapasen emmwen mi pwúng. Paipel a néúnéú ewe kapasen Krik a·gaʹpe fán iten ena sókkun tong. A tongeni wor lón ena esin tong ewe memmeefin chiechiéch are pwipwiéch, nge mi pwal wor met mi kapachelong lón. A pwá ren met sia féri fán iten feiéchún ekkewe ekkóch nge esap fán iten pwisin feiéchúch. Ena tong a amwékútúkich le féri met mi múrinné fán iten ekkewe ekkóch. A atoto ngenikich pwapwa me ach meefi aúchean manawach.

2, 3. Ifa usun Jiowa a pwáraatá ngeni aramas ewe sókkun tong ese akkomwa pwisin feiéchún?

² Jiowa a pwári an tong ngeni aramas pwal mwo nge me mwen an fératá Atam me Efa. Lupwen a féri fénúfan, a awora mettóch meinisin mi lamot pwe sipwe tongeni manaw. Nge lap seni ena, a féri pwe epwe ina leeniach ikewe sipwe tongeni  unusen pwapwaiti manawach ie. Jiowa ese féri ena fán pwisin itan nge a féri fán itach. Atun a fen mmólnetá leeniach ei, a fératá aramas me awora ngeniir ewe ápilúkúlúkún manaw esemuch lón Paratis wóón fénúfan.

³ Mwirin, Jiowa a pwáraatá ena esin tong lón eú napanap mi kkóló aúchean seni meinisin. Inaamwo ika Atam me Efa ra ú ngeni Jiowa, nge a fókkun lúkúlúk pwe ekkóch mwirimwiriir kewe repwe tongei i, iwe a akkóta kaworen ewe méén kepich me ren Néún we pwe repwe tongeni kúna manaw. (Ken. 3:15; 1 Joh. 4:10) Seni ewe atun Jiowa a pwonei usun ewe méén kepich, usun itá nge a fen pwénútá. Iwe, ina epwe 4,000 ier mwirin ena, Jiowa a fangóló Néún we áláemén fán iten aramas. (Joh. 3:16) Sia fókkun kilisou ren án Jiowa tong!

4. Pwata sia silei pwe aramas rese unuséch ra tongeni pwári ewe esin tong ese akkomwa pwisin feiéchún?

⁴ Sia tongeni pwáraatá ena esin tong ese akkomwa pwisin feiéchún inaamwo ika sise unuséch? Ewer, sia tongeni. Jiowa a férikich lón pwisin napanapan, weween pwe sia tongeni áppirú i. Fán ekkóch a weires ach sipwe pwári ena esin tong, nge mi tufich. Epel a pwári an tong ngeni Kot lupwen a pennúkú minne mi múrinné seni meinisin a eáni. (Ken. 4:3, 4) Noa a pwal pwáraatá ewe sókkun tong ese akkomwa pwisin feiéchún lupwen a likiitú le akkafalafala ewe pwóróus seni Kot ren fite ier inaamwo ika aramas rese mochen rongorong ngeni. (2 Pet. 2:5) Me Apraham a pwáraatá pwe an tong ngeni Kot a péchékkúl seni meinisin lupwen a tipemecheres le eáni asor néún we mi áchengicheng Isaak. (Jas. 2:21) Sipwe usun ekkena mwán mi tuppwél ren ach mochen pwári tong pwal mwo nge lupwen ese mecheres.

5. Ifa usun sia tongeni pwári tong mi enlet?

⁵ Ewe Paipel a erá pwe tong mi enlet “esap ren kapas chok. Ach tong epwe ennet o epwe pwȧpwȧno non ach föfför.” (1 Joh. 3:18, KG) Iwe itá weween pwe sise tongeni pwári tong lón ach kapas? Aapw, esap ina weween. (1 Tes. 4:18) A wewe ngeni pwe fán ekkóch ese chék naf ach erá “Ua tongek.” A lamot ach sipwe pwáraatá pwe mi enlet met sia erá. Áwewe chék, ika pwiich kewe ra osupwangen ener are úfer, iwe a lamot ngeniir álillis lap seni chék ach eáni kapas mi fiti kirekiréch. (Jas. 2:15, 16) Pwal ina chék usun, pokiten sia tongei Jiowa me chón óruch kewe, iwe sise chék ióteki chómmóngólóón chienach kewe chón afalafal, nge sia pwal pwisin angang weires le féri ewe angangen afalafal.​—Mat. 9:38.

6, 7. (a) Met weween tong mi “enlet”? (b) Ikkefa ekkóch pwóróus mi pwári tipitipin tong?

⁶ Ewe aposel Johannes a erá pwe a lamot ach tong “epwe ennet o epwe pwȧpwȧno non ach föfför.” Iwe, ach tong “epwe fokun wenechar” me “enlet.” (Rom 12:9; 2 Kor. 6:6) Fán ekkóch, neman emén epwe tipin pwári tong. Nge mi enlet me wenechar an na tong? Met popun a féri ena? Án emén tipitipin  tong esap ina tong mi enlet. Tipitipin tong a chék lamotmwáál.

⁷ Sipwele etittina pwóróusen ekkóch mi pwári tipitipin tong. Lupwen Satan a fós ngeni Efa lón ewe tánipiin Eten, a ámmeef ngeni pwe a mochen met epwe feiéch ren. Nge minne a féri a pwáraatá pwe esap ina enletin met a mochen. (Ken. 3:4, 5) Lupwen Tafit a wiseni ewe wis king, a wor emén chienan itan Ahitofel. Nge Ahitofel a afangemá Tafit fán iten pwisin feiéchún. Minne a féri a pwáraatá pwe esap i chiechi mi enlet. (2 Sam. 15:31) Lón ach ei fansoun, ekkewe chón rikiló me pwal ekkóch mi efisi tipefesen lefilen chón ewe mwichefel ra kan eáni “kapas motoutou me kapas amichimich.” (Rom 16:17, 18) Ra tongeni tipin tongei ekkewe ekkóch, nge ren enletin, ra chék kútta pwisin feiéchúúr.

8. Menni kapas eis sipwe pwisin eisinikich?

⁸ Tipitipin tong a fókkun ássáw pokiten aramas ra kan áeá le otupu aramas. Ena sókkun a tongeni otupu aramas, nge ese tongeni otupu Jiowa. Jesus a erá pwe chókkewe mi likótuputup repwe kúna kapwúng mi fókkun watte. (Mat. 24:51) Kich chón angang ngeni Jiowa sise fókkun mochen ach sipwe likótuputup. Iwe, sipwe pwisin eisinikich, ‘Mi enlet ai tong, are ua ekieki chék pwisin ngang me use wenechar?’ Sipwe káé tiu mettóch sia tongeni pwári tong mi “enlet” lón.

9. Met tong mi enlet epwe amwékútúkich le féri?

⁹ Kopwe pwapwa le angang pwal mwo nge ika ese wor emén a kúnók. Sipwe tipemecheres le féri ekkewe mettóch mi pwári tong me kirekiréch, nge aramas rese pwal silei usun. (Álleani Mateus 6:1-4.) Ese ina usun án Ananias me Safira ekiek. Lupwen ra asor moni, ra mochen pwe aramas repwe silei usun. Ra chofona wóón úkúkún ewe liffang ra eáni, iwe ra angei kapwúngún ar likótuputup. (Föf. 5:1-10) Nge ika sia enletin tongei pwiich kewe, iwe sipwe chék pwapwa le féri mettóch fán kirekiréch fán iter me sisap mochen án aramas repwe silei met sia féri. Sia tongeni káé seni chókkewe mi álisi ewe Mwichen Soupwúngúpwúng le ammólnatá ekkewe mwéngé lón pekin lúkú. Rese kan apaaretá, me rese kan affata ngeni aramas met ra wisen angang wóón.

10. Ifa usun sia tongeni asamolu ekkewe ekkóch?

¹⁰ Asamolu ekkewe ekkóch. (Álleani Rom 12:10.) Jesus a asamolu néún kewe aposel ren an télú pecher. (Joh. 13:3-5, 12-15) Mi lamot sipwe angang weires ren ach sipwe tipetekison usun Jesus me angang fán iten ekkewe ekkóch. Ren och fansoun, ekkewe aposel rese unusen weweiti minne Jesus a féri tori ewe atun ra angei ewe manaman mi fel. (Joh. 13:7) Sia asamolu ekkewe ekkóch ren ach sise ekieki pwe sia fen múrinné seniir pokiten úkúkún ach sukul, wéúch, are wisach. (Rom 12:3) Sise pwal lólówó lupwen aramas ra ingeiti  ekkewe ekkóch, nge sia fen fitiir le pwapwa pwal mwo nge atun sia meefi pwe itá úrúrún aramas repwe pwal ingeitikich.

11. Pwata a lamot an epwe enlet ach kapasen apúnga?

¹¹ Enletin apúnga ekkewe ekkóch. Kútta atun óm kopwe tongeni apúnga ekkewe ekkóch. Kich meinisin sia silei pwe kapasen apúnga ina ewe “sokun kapas mi afefetai aramas.” (Ef. 4:29) Nge sia mochen túmúnú pwe minne sia apasa epwe pop seni enletin letipach nge sisap sópweei ach ingeiti ekkewe ekkóch. Sisap erá och mettóch esap wesewesen seni letipach are ttiisenikich wisach le áwena emén atun mi lamot. (SalF. 29:5) Sipwe otuputup ika sia apúnga aramas nge mwirin sia esiiter atun sise nóm rer. Án ewe aposel Paulus tong a enlet. Lupwen a mak ngeni ekkewe Chón Kraist lón Korint, a apúnger wóón ekkewe mettóch mi éch ra féri. (1 Kor. 11:2) Nge lupwen a lamot an epwe áwener, a affataéchú ngeniir popun fán kirekiréch.​—1 Kor. 11:20-22.

12. Ifa usun sia tongeni pwári tong mi enlet lupwen sia awasélaéchú aramas?

¹² Kopwe awasélaéchú aramas. Jiowa a erenikich ach sipwe fangafangéch ngeni pwiich kewe. (Álleani 1 Johannes 3:17.) Nge a lamot an epwe pwúng ewe popun sia awasélaéchú aramas. Sia tongeni eisinikich: ‘Ua kan chék etiwa lón imwei chókkewe ua chiechiéch ngeniir are chókkewe ua meefi pwe iir mi aúchea lón ewe mwichefel? Ua chék etiwa chókkewe ua ekieki pwe repwe pwal liwini kirekiréchúi ngeniir? Are ua kan fangafangéch ngeni pwii kewe use kon sissileer are chókkewe rese tongeni liwini ngeniei minne ua féri?’ (Luk. 14:12-14) Ekieki ekkeei mettóch: Epwe ifa usun ika emén pwiich a osupwangen álillis ren an kefilingaw? Are met sipwe féri ika sia etiwa emén ngeni imwach we nge ese pwári kilisou? Jiowa a erenikich: “Oupwe etiwafengenikemi lefilemi, nge ousap lal ren.” (1 Pet. 4:9) Sipwe pwapwa ika sia fang ren ewe popun mi pwúng.​—Föf. 20:35.

13. (a) Ineet atun neman epwe lamot ngenikich watteen mosonottam? (b) Ifa usun sia tongeni álisi ekkewe mi apwangapwang?

¹³ Álisi ekkewe mi apwangapwang. Án Paipel éúréúrakich usun ach sipwe “alisi ekewe chon apwangapwang” me “mosonotam ngeni aramas meinisin” a tongeni pwári ika mi wesewesen enlet ach tong. (1 Tes. 5:14) Chómmóng pwiich kewe mi piin apwangapwang ra péchékkúleló lón ar lúkú. Nge mi pwal wor ekkóch mi lamot ach sipwe sópweló le álisiir fán tong me mosonottam. Ifa usun sia tongeni álisiir? Sia tongeni néúnéú ewe Paipel le apéchékkúler, etiwer ach sipwe mwin le afalafal, are sia  chék tongeni aúseling ngeni meefier. Pwal eú, sisap chék ekieki pwe pwiich kewe ra péchékkúl are ra apwangapwang. Nge sipwe fen mirititi pwe emén me emén kich a wor met a péchékkúl wóón me apwangapwang wóón. Pwal mwo nge ewe aposel Paulus a erá pwe a wor an kewe apwangapwang. (2 Kor. 12:9, 10) Mi lamot ngeni oukich meinisin ach sipwe álillisfengen me apéchékkúlafengenikich.

14. Met a lamot sipwe tipemecheres le féri ren ach sipwe chék kikkinamwefengen me pwiich kewe?

¹⁴ Efisi kinamwe. A mmen aúchea ach kinamwefengen me chienach kewe Chón Kraist. Sipwe achocho úkúkún ach tongeni le efisi kinamwe, pwal mwo nge atun sia meefi pwe aramas ra wewengaweitikich are ra kirikiringaw ngenikich. (Álleani Rom 12:17, 18.) Ika sia ekinása letipen emén, neman ach omusomus ngeni ina met epwe ataweei. Nge a lamot pwe ach omusomus epwe seni letipach. Áwewe chék, epwe éch sipwe affata ach tipis ren ach erá, “Omusaaló ua tipis ngonuk ren met ua apasa,” lap seni ach erá, “Omusaaló ika ua tipis ngonuk.” A ákkáeúin lamot kinamwefengen lefilen pwúpwúlú. Ese pwúng án ekkewe rúúemén repwe chék tipin tongefengeniir lein aramas, nge lupwen ra chék rúúeménúló, ra éménúngawfesen, eáni fós mi ámmetek lefiler, are fen kawet.

15. Ifa usun sia tongeni pwári pwe sia enletin omusaaló tipisin emén?

¹⁵ Tipemecheres le omusaaló tipis. Ika emén a ámeteki letipach, sipwe omusaaló tipisin me likitaló ach song ren. Sipwe féri ena pwal mwo nge ika ese mirititi pwe i a ámeteki letipach. Sia tipemecheres le omusaaló tipisin aramas lón ach ‘echenifengenikich ren ach songomangfengen lefilach’ me ‘achocho le tümwünü ach tipeeufengen lon ewe Ngünmifel ren ewe kinamwe mi rifengenikich.’ (Ef. 4:2, 3) Ren ach sipwe enletin omusaaló tipisin eménnewe, mi lamot  sipwe úkútiw le ekieki met ewe a tipis ngenikich wóón. Tong “esap ekieki o chechemeni mine eman a mwäl ngeni won.” (1 Kor. 13:4, 5) Ika sia akkamwéchú ach song, sia tongeni atai ach riri ngeni pwiich kewe me pwal ach riri ngeni Jiowa. (Mat. 6:14, 15) Sia ánneta pwe sia enletin omusaaló tipis lupwen sia ióteki ewe emén mi ámetekikich.​—Luk. 6:27, 28.

16. Itá epwe met meefiach usun ekkewe wis sia wiseni lón ach angang ngeni Jiowa?

¹⁶ Pennúkú minne sia tongeni feiéch ren. Lupwen sia wiseni eú wis lón ach angang ngeni Jiowa, sia tongeni ánneta pwe mi enlet ach tong ren ach sisap ‘chök kütta püsin feiöchüch, nge sipwe pwal kütta feiöchün chiechiach souläng.’ (1 Kor. 10:24) Áwewe chék, lón ach kewe mwichelap, ekkewe chón etiwetiw ra kan akkomweiti ewe leeni, nge neman repwe mochen káimuló ar leenien mwoot me chón ar kewe famili ikewe chómmóng ra kan sani le momwoot ie. Nge chómmóng rese ina usun, nge ra fen filatá ekkewe sea chómmóng rese kon sani lón ewe kinikin ra wisen túmúnú. Ar féri ena, a pwári ewe sókkun tong ese akkomwa pwisin feiéchún. Ifa usun ka tongeni áppirú ar leenien áppirú mi múrinné?

17. Ika emén Chón Kraist a féri eú tipis mi chou, met tong mi enlet epwe amwékútú le féri?

¹⁷ Pwári me úkkú seni tipis mi monomon. Ekkóch Chón Kraist ra sótun aopaaló eú ar tipis mi chou. Neman ra sáw are rese mochen elichippúngú ekkewe ekkóch. (SalF. 28:13) Nge án emén aopa an tipis esap ina eú alen tong pún a efeiengaw ngeni pwisin i me pwal ekkewe ekkóch. Ifa usun? Jiowa a tongeni úkútiw le áeá an we manaman mi fel le efeiéchú ewe mwichefel me esap wor kinamwe lón. (Ef. 4:30) Iwe, ika emén Chón Kraist a féri eú tipis mi chou, enletin tong epwe amwékútú i le fós ngeni ekkewe mwán mi ásimaw me etiwa ewe sókkun álillis mi lamot ngeni.​—Jas. 5:14, 15.

18. Ifa úkúkún lamoten tong mi enlet?

¹⁸ Tong, ina ewe napanap mi lap seni meinisin. (1 Kor. 13:13) A esissillatá iir kewe mi wesewesen tapweló mwirin Jesus me ekkewe mi enletin áppirú Jiowa, ewe tong a pop seni. (Ef. 5:1, 2) Paulus a erá pwe ika ese wor an tong, iwe esap wor aúchean. (1 Kor. 13:2) Amwo emén me emén leich sipwe sópweló le pwári ach tong esap ren “kapas chok,” nge epwe pwal “ennet o epwe pwȧpwȧno non ach föfför.”