1. Pwata sia fókkun lúkú pwe sia nónnóm lón “ekewe ränin lesopolan”?

IKA ka fen uputiw mwirin ewe ier 1914, iwe ka fen nónnóm lón “ekewe ränin lesopolan” ótóten ei fénúfan. (2 Tim. 3:1) Meinisin kich sia fen rong fisin ekkewe mettóch Jesus a fen oesini pwe repwe fis lón ei fansoun. Áwewe chék ren choweán maun, lengita, chechchechin fénú, málapalap, lapólóón féfférún akkachofesá, me angangen eriáfféwúmwááli néún Jiowa kewe aramas. (Mat. 24:3, 7-9, 12; Luk. 21:10-12) Sia pwal kúna féfféringawen aramas usun met aposel Paulus a fen oesini. (Ppii ewe pwóór “ Napanapen Aramas lón Ei Fansoun.”) Kich Chón Pwáraatá Jiowa sia fókkun lúkú pwe sia nónnóm lemuchúlóón “ekkeei ránin lesópwólóón.”​—Mik. 4:1, NW.

2. Ikkefa ekkewe kapas eis mi lamot sipwe silei pélúwer?

² Pokiten a fen fite ier ra ló seni ewe 1914, iwe sia lúkú pwe sia nóm lemuchúlóón “ekewe ränin lesopolan.” Pokiten a fókkun arapoto ewe sópwólóón, mi lamot sipwe silei pélúwen ekkóch ekkeei kapas eis mi lamot: Ikkefa ekkewe mettóch repwe fis lemuchúlóón “ekewe ränin lesopolan”? Met Jiowa a mochen ach sipwe féri atun sia witiwiti an epwe fis ekkena mettóch?

3. Ifa ewe esilesil chón ekkewe mwú repwe esilei me ren ewe oesini lón 1 Tesalonika 5:1-3?

³ Álleani 1 Tesalonika 5:1-3. Paulus a fós usun “ewe rän ach Samol” are ránin Jiowa we. Lón ena wokisin, ránin Jiowa we a weneiti ewe atun epwe poputá ren án ekkewe mwú maunei “Papilon mi lapalap,” ewe mwicheichen lamalam chofona, me  epwe much ena rán ren ewe Armaketon. (Pwär. 16:14, 16; 17:5) Me mwen ena “rän” epwe poputá, ekkewe mwú repwe esilesil: “Mettoch meinisin a kinamwe o nükünüköch”! Fán ekkóch, ekkewe sounemenemen fénúfan ra néúnéú ena esin kapas atun ra fós usun ar repwe anúkúchara ririin ekkewe mwú lefiler. * Iwe nge, epwe sókkóló ewe esilesil Paipel a fós usun pwe “mettoch meinisin a kinamwe o nükünüköch.” Pwata? Lupwen epwe fis ena kékké, aramas repwe tongeni ekieki pwe ekkewe sounemenemen fénúfan ra fen anúkúnúkú nónnómun fénúfan. Nge ren enletin, “feiengau epwe müttir toriir,” atun ewe riáfféú mi lapalap.​—Mat. 24:21.

4. (a) Met sisaamwo silei usun pwóróusen ewe esilesil pwe “mettoch meinisin a kinamwe o nükünüköch”? (b) Met sia fen silei usun ena esilesil?

⁴ Sia silei ekkóch pwóróus usun ewe esilesil pwe “mettoch meinisin a kinamwe o nükünüköch.” Nge mi pwal wor ekkóch mettóch sise silei usun. Sise silei met epwe efisi án ekkewe mwú esilei ena esilesil. Me sise silei ika epwe wor fitu esilesil repwe chék akkatapw are epwe chék wor eú esilesil. Ese lifilifil met epwe fis, nge iei met sia silei: Sisap tupuló ren ach ekieki pwe ekkewe sounemenemen fénúfan ra fen atoto kinamwe wóón fénúfan. Nge ina ewe esilesil ewe Paipel a fen erenikich ach sipwe ésúkúsúkú. Ina ewe esissil pwe ránin Jiowa we epwele poputá!

5. Ifa usun 1 Tesalonika 5:4-6 a álisikich ach sipwe mmólnetá fán iten ránin Jiowa we?

⁵ Álleani 1 Tesalonika 5:4-6. Án Paulus kapasen éúréúr a áiti ngenikich met mi lamot sipwe féri ren ach sipwe mmólnetá ngeni ránin Jiowa we. Mi lamot “sisap möür usun pwal ekoch, nge sipwe nenela” me mammasafichi. Áwewe chék, mi lamot sipwe túmúnú seni efeiengawen ach angolong lón politics are mwékútúkútún fénúfan. Ika sia angolong lón, iwe sia wiliti emén mi “pop seni ei fanüfan.” (Joh. 15:19) Nge sia silei pwe Mwúún Kot we chék a tongeni atoto kinamwe wóón fénúfan.

6. Met sia mochen álisi aramas ar repwe féri, me pwata?

⁶ Me lúkún pwisin ach sipwe nenneló are mammasa, sia pwal mochen álisi aramas ar repwe nenneló are mammasa me silei met Paipel a fen oesini usun met epwe fis wóón fénúfan lón mwachkkan. Sipwe chechchemeni pwe mi lamot ach sipwe féri ei angang iei pún lupwen ewe riáfféú mi lapalap epwe poputá, esap chúen suuk ngeni aramas ar repwe poputá le fel ngeni Jiowa. Ina popun ach angangen afalafal a mmen atapwal! *

7. Met Jiowa a mochen ach sipwe féri iei?

⁷ Lón ei lusun fansoun mi chék mwochomwoch me mwen ránin Jiowa we epwe poputá,  Jiowa a mochen ach sipwe akkachocho lón ach angangen afalafal. Mi lamot sipwe ‘alapalafochei ach achocho lon ewe angangen ach Samol.’ (1 Kor. 15:58) Jesus a oesini met sipwe féri. Iei met a pwal apasa lupwen a fós usun meinisin ekkewe mettóch mi lamot repwe fis atun ekkewe ránin lesópwólóón: “Ewe Pworausen Manau epwe akom tori aramasen fanüfan meinisin.” (Mark. 13:4, 8, 10; Mat. 24:14) Ekieki mwo, iteiten fansoun ka ló afalafal, ka álisatá pwénútáán ena oesini lón Paipel!

8. Ifa usun a sópwósópwóló feffeitáán ewe angangen afalafal usun Mwúún Kot we?

⁸ Met sia tongeni apasa usun feffeitáán ewe angangen afalafal usun Mwúún Kot we? Iteiten ier, ena angang a chék lallapóló. Áwewe chék, ekieki usun lapólóón chóchóón ekkewe chón afalafal wóón unusen fénúfan lón ekkeei ránin lesópwólóón. Lón ewe 1914, a wor 5,155 chón afalafal lón 43 fénú. Lón ei fansoun, a wor 8.5 million som chón afalafal lón 240 fénú! Nge mi chék sópwósópwóló ach angang. Mi lamot sipwe akkachocho le esilefetálei pwóróusen án Kot we Mwú pwe ina chék met epwe pwákini meinisin án aramas kewe osukosuk.​—Kölf. 145:11-13.

9. Pwata a lamot ach sipwe akkachocho le afalafala pwóróusen án Kot we Mwú?

⁹ Ach angangen afalafal usun Mwúún Kot we esap wes tori án Jiowa epwe apasa pwe a wes. Ifa úkúkún ewe lusun fansoun fán iten án aramas repwe silei Jiowa Kot me Jesus Kraist? (Joh. 17:3) Sise silei. Nge sia silei pwe me mwen poputáán ewe riáfféú mi lapalap, a chúen suuk ngeni meinisin “chókkewe letiper a páái ngeni ar repwe etiwa ewe enlet mi atoto manaw esemuch” ar repwe filatá le fel ngeni Jiowa. (Föf. 13:48, NW) Ifa usun sipwe álisi ekkena aramas me mwen an epwe serlupwan?

10. Ifa ewe álillis Jiowa a kan awora ngenikich ren ach sipwe áiti ngeni aramas ewe enlet?

¹⁰ Jiowa a kan awora ngenikich ren an we mwicheich, meinisin met mi lamot ren ach sipwe áiti ngeni aramas ewe enlet. Áwewe chék, sia angei káit iteiten wiik lón ach mwich lón weekday. Ena mwich a álisikich ach sipwe silei met sipwe apasa atun sia kerán chuuri aramas, me lupwen sia liwinitiir. A pwal áiti ngenikich ifa usun sipwe asukula aramas ewe Paipel. Án Jiowa we mwicheich a pwal awora ekkewe minen álillis lón ewe Pwórun Asukul. Ekkena mettóch ra álisikich le . . .

•   poputááni ach pwóróusfengen me aramas,

• fós lón ewe napanap aramas repwe pwapwaiti ewe pwóróus ren,

• álisi aramas ar repwe mochen alapaaló ar sile,

• áiti ngeni ekkewe chón káé usun ewe enlet, me

• etiwa chókkewe mi sani ewe pwóróus ar repwe tétá wóón ach we website me fiti ach kewe mwich lón ewe Leenien Mwich.

Mi pwúng, ese chék naf an epwe nóm rech ekkena minen álillis, nge mi lamot ach sipwe kan nénnéúnéú. * Áwewe chék, lupwen oua fósfengen me emén chón imw mi fókkun sani ewe pwóróus, ka likit ngeni eché tract are eú puk pwe epwe sópwósópwóló le álleani pwal och pwóróus usun Paipel tori óm chuurisefálli. Pwisin wisach ach sipwe akkachocho le afalafal úkúkún ach tufich iteiten maram.

11. Pwata a kawor ewe Online Bible Study Lessons?

¹¹ Pwal eú alen án Jiowa ákkálisi aramas le silei ewe enlet, ina ren álillisin ewe Online Bible Study Lessons wóón jw.org^®. (Ttiki BIBLE TEACHINGS > ONLINE LESSONS.) Pwata a kawor ekkena lesen? Iteiten maram, fitengeréú aramas wóón unusen fénúfan ra tétá wóón ewe Internet me kútta ekkewe lesen lón Paipel. Ekkewe lesen wóón ach we website ra tongeni álisi ekkena aramas le poputá le silei usun ewe enlet lón án Kot we Kapas. Ekkóch aramas ka fós ngeniir neman ra pireir le etiwa ar repwe káé reom ewe Paipel. Ika ina, iwe áiti ngeniir ekkena lesen seni ach we website are tiin ngeniir ewe link pwe repwe tongeni katol ekkena lesen lón ach we website. Ika mi tufich, ka tongeni áiti ngeniir ekkewe lesen lón ewe fós ra weweiti. *

12. Met aramas ra tongeni káé seni ewe Online Bible Study Lessons?

¹² A wor ekkeei itelap lón ach we Online Bible Study Lessons: “The Bible and Its Author,” “The Bible’s Main Characters,” me “The Bible’s Message of Hope.” Me lón ekkena itelap, ra áiti ngenikich:

• Ifa usun Paipel a tongeni álisi aramas

• Ié Jiowa, Jesus me ekkewe chónláng

• Pwata Kot a fératá aramas, me

• Pwata a fis riáfféú me féfféringaw

Ekkena lesen ra pwal áiti ngenikich ifa usun Jiowa epwe . . .

• áwesaaló riáfféú me máló,

• amanawasefáli ekkewe mi máló, me

• siwili mwúún aramas mi sópwongaw ngeni án Kot we Mwú.

13. Itá ekkewe online lesen ra siwili ewe kkótun káéén Paipel? Áweweei.

¹³ Ekkewe online lesen rese siwili ewe kkótun káéén Paipel. Jesus a fen ewisa ngenikich ach sipwe álisi aramas le wiliti néún chón káé. Sia áneán pwe aramas mi pwapwaiti pwóróusen Paipel repwe káé ekkewe online lesen, sani met ra fen káé seni, me mochen alapaaló ar sile. Ika ina, iwe neman repwe etiwa ach sipwe káé ngeniir ewe Paipel. Lesópwólóón eú me eú lesen, a suuk ngeni ewe chón állea an epwe tiinaaló eú an tingor án emén epwe chuuri me álisi lón an káé Paipel. Lap seni 230 aramas wóón unusen fénúfan ra kan tingor iteiten rán wóón ach we website ar repwe káé Paipel! A mmen lamot ach pwisin káé ngeni emén!

14. Met sipwe achocho le féri úkúkún ach tufich me ren án Jesus we kapasen éúréúr lón Mateus 28:19, 20, me pwata?

¹⁴ Álleani Mateus 28:19, 20. Lupwen sia káé ngeni aramas ewe Paipel, sia achocho úkúkún  ach tufich le “asoulängala” aramas me ‘afalafaleer pwe repwe aleasochisi meinisin mine [Jesus a] allükü.’ A lamot ach sipwe álisi aramas le weweiti úkúkún lamoten ar repwe filatá le fel ngeni Jiowa me penaatá an we Mwú. Weween, sipwe achocho le achchúngú letiper le apwénúetá met ra káé lón manawer, fangóló manawer ngeni Jiowa, me papatais. Iwe, repwe chék tongeni kúna manaw lón ránin Jiowa we ika pwe ra féri ekkena mettóch.​—1 Pet. 3:21.

15. Met ese wor ach fansoun le féri, me pwata?

¹⁵ Usun met ei lesen a fen apasa, pwe a chék fókkun mwochomwoch ewe fansoun me mwen katalóón ei ótót. Ina popun ese wor ach fansoun le sópwósópwóló le káé Paipel ngeni ekkewe sókkun aramas rese ekiekin wiliti néún Jesus chón káé. (1 Kor. 9:26) Ach angang a atapwal! A chúen wor chómmóng chókkewe mi lamot ar repwe rong pwóróusen án Kot we Mwú me mwen an epwe tori án Jiowa áwesi ewe angangen afalafal.

16. Met mi lamot kich meinisin sipwe féri me ren Pwärätä 18:2, 4, 5, 8? (Pwal ppii ewe footnote.)

¹⁶ Álleani Pwärätä 18:2, 4, 5, 8. Ekkeei wokisin ra affata pwal eú mettóch Jiowa a mochen án néún kewe aramas repwe féri. Mi lamot Chón Kraist mi enlet meinisin repwe fókkun atowauereló seni Papilon mi Lapalap. Me mwen án emén chón káé Paipel káé ewe enlet, neman i chón eú lamalam mi chofona. Neman a fiffiti ar fál me mwékútúkútún. Are neman a fen akkasor lón an na lamalam. Nge me mwen án emén chón káé epwe tongeni wiliti emén chón afalafal esaamwo papatais, mi lamot an epwe unusen úkú seni mwékútúkútún lamalam chofona. Mi lamot epwe mak ngeni an we lamalam me lóóm are pwal ekkóch pekin mi riri ngeni Papilon mi Lapalap, pwe epwe affata pwe esap chúen chóni ar na lamalam are ar kewe pekin. *

17. Met sókkun angangen moni emén Chón Kraist epwe fókkun túmúnú seni, me pwata?

¹⁷ Mi lamot emén Chón Kraist mi enlet epwe fókkun túmúnú an esap eáni ewe sókkun angangen moni mi riri ngeni Papilon mi Lapalap. (2 Kor. 6:14-17) Áwewe chék, eménna esap emén chón angang ngeni eú fál. Pwal och, emén Chón Kraist mi angang lón eú kompeni esap mochen oluóló an fansoun angang lón eú leeni nge mi álisatá fel mi chofona. Pwal och, ika a wor pwisin án emén Chón Kraist angangen pekin business, iwe itá esap angang are kútta an moni tolong seni eú pekin mi riri ngeni Papilon mi Lapalap. Pwata sia fókkun tipeppós  lón ena mettóch? Pokiten sise mochen kkan ngeni are eti féfférún me tipisin ekkewe mwicheichen lamalam mi fókkun limengaw mwen mesen Kot.​—Ais. 52:11. *

18. Ifa usun emén pwiich a tipeppós wóón án Paipel kewe emmwen mi weneiti an angangen moni?

¹⁸ Lón ekkewe ier ra ló, emén chón táikú a tingorei emén mwán mi ásimaw mi pwisin wor an kompenien táikú ika epwe tongeni féri ekis angang lón eú fál lón sópwun we. Ewe chón táikú a silei pwe ena mwán mi ásimaw ese kan etiwa ekkewe sókkun angang wóón fál. Nge lón ei atun, ewe chón táikú a fókkun osupwangen chón angang. Inaamwo ika a ina usun, nge pwiich na a chék tipeppós wóón án Paipel kewe emmwen me ese etiwa ena angang. Iwe, mwirin eú wiik, a peres sasingin emén chón táikú lón eú simpung lón leenian we an pacheetá efóch irápenges wóón ewe fál. Iwe, ika pwiich na a etiwa ena angang, epwe fen nóm sasingin lón ena simpung. Epwele ia me itengawan me lein chienan kewe Chón Kraist! Epwele pwal ifan me meefien Jiowa.

19-20. (a) Met sia fen káé lón ei lesen? (b) Met mi pwal lamot sipwe silei?

¹⁹ Me ren án Paipel oesini, ewe mettóch mi watte epwe fis mwirin ekiseló chék, ina án ekkewe mwú esilesil pwe “mettoch meinisin a kinamwe o nükünüköch.” Pokiten Jiowa a fen áiti ngenikich, sia silei pwe mwúún aramas resap atoto ewe sókkun kinamwe mi enlet me nómoffóch. Met mi lamot sipwe féri me mwen ena esilesil me ewe kitetter epwe mwittir fis mwirin? Jiowa a mochen ach sipwe akkachocho le afalafala pwóróusen an we Mwú me ákkálisi aramas le wiliti néún Jesus chón káé. Pwal och, mi lamot sipwe atowauakicheló seni meinisin kinikinin lamalam chofona. A wewe ngeni ach sipwe towu seni ena lamalam me sisap eáni eú angang mi riri ngeni Papilon mi Lapalap.

²⁰ Mi pwal wor ekkóch mettóch repwe tapw mwirin atunen lemuchúlóón “ekewe ränin lesopolan.” Nge mi pwal wor met Jiowa a mochen ach sipwe féri. Met ekkena, me ifa usun sipwe tongeni pwisin ammólnakichetá fán iten meinisin ekkewe mettóch repwele fis? Sipwe ppii lón en lesen mwirin ei.