“Fansoun ami iotek, ousap apiapini.”​—Mateus 6:7, Testament Mi Fö.

Jiowa ese mochen ach sipwe epinipini ekkewe iótek sia chék amwéchúnnúkú are álleanawu seni eú puken iótek. Nge a mochen ach sipwe iótek ngeni i seni letipach. Epwe met meefiom ika emén chienom a chék epinipini ngonuk meefian iteiten rán? Chókkewe mi chiechiéchfengen repwe fóffósfengen seni enletin meefier. Atun sia fós lón pwisin ach kapas lón ach kewe iótek ngeni Semach we lón láng, a pwá pwe i enletin chiechiach.

“Lupwen oua tüngor, ousap angei och, pun oua tüngor fän ämi ekiek mi ngau.”​—James 4:3.

Sia weweiti pwe Kot esap pélúweni ach kewe tingor lón iótek ika sia tingorei och mettóch ese mochen ach sipwe féri are eáni. Áwewe chék, ika emén a ppet wóón moni nge a iótek ngeni Kot an epwe álisi le win, iwe itá epwe pélú an na tingor? Jiowa a fen affata ngenikich ach sisap tipemmóng me sisap lúkúlúk wóón met mi riri ngeni angangen roong pwe itá epwe asopwéchúkich. (Aisea 65:11; Lukas 12:15) Sise fókkun tongeni lúkú pwe Jiowa epwe pélúweni ekkena sókkun tingor! Ika sia mochen án Kot epwe pélúweni ach kewe iótek, iwe a lamot pwe ach kewe tingor repwe tipeeú ngeni met a erenikich lón ewe Paipel.

 “Are eman esap aleasochisi ekewe allük, Kot epwe oput an iotek.”​—Än Salomon Fos 28:9.

Lón fansoun lóóm, Kot ese pélúweni iótekin chókkewe mi álleasolapa an kewe allúk mi pwúng. (Aisea 1:15, 16) Ese siwil meefien Kot. (Malakai 3:6) Ika sia mochen pwe Kot epwe pélúweni ach kewe iótek, a lamot ach sipwe achocho le álleasochisi an kewe allúk. Nge ifa usun ika sia féri met mi ngaw me lóóm? Itá a wewe ngeni pwe Jiowa ese tongeni aúselinga ach kewe iótek? Esap ina weween! Kot epwe omusaaló ach kewe tipis fán tong ika sia aier me achocho úkúkún ach tufich le apwapwaai letipan.​—Föför 3:19.