Ika ka mochen silefichi emén, epwe éch ika kopwe silei met a fen féri me ekkewe minen eppet a fen pworacho ngeni. Pwal ina chék usun ren ach mochen silefichi Kot, mi lamot sipwe silei met a fen féri. Lón óm féri ena, neman kopwe máirú le silei ifa usun met a fen féri me lóóm a fen atoto feiéch ngenikich iei me epwe pwal kkúú met epwe fis ngenikich lón mwachkkan.

Jiowa Kot i ewe Chón Fératá mi Lap, iwe “aramas ra tongeni silei usun Kot ren ekewe mettoch i a föri.” (Rom 1:20) “Kot a föri fanüfan ren an manaman, a anüküchara ren an tipachem. A ameresala ekewe läng ren an weweöch.” (Jeremaia 10:12) Amwararen férien Kot kewe a pwáraatá pwe a áfánnikich.

Ekieki ifa usun Jiowa a féri pwe manawach epwe kkóló aúchean ren an férikich “lon püsin lapalapan.” (Keneses 1:27) Weween a atufichikich le mwaren áppirú i me napanapeni napanapan kewe ese wor táppin. A fang ngenikich ewe tufich le weweiti an ekiek me met a aúcheani. Lón ach achocho le manaweni manawach mi tipeeú ngeni ekkena mettóch, iwe sia pwapwaiti lapólóón ach pwapwa me aúchean manawach. Nge lap seni ena, a atufichikich le ámááraatá ach ririéch ngeni.

Ewe fénúfan a pwári meefien Kot usuch. Iei alon aposel Paulus pwe Kot a “pwärätä usun lapalapan ren an föri ekewe mettoch mi mürina: A fang ngenikemi üt seni läng, pwal kiniemi ua lon fansoun räs, a ngenikemi enemi o aura lelukemi ren pwapwa.” (Föför 14:17) Kot a awora ngenikich lap seni met mi lamot ngenikich ren ach sipwe manaw. Minne a awora a somwoló me sókkopat pwe sipwe tongeni pwapwaiti manaw. Nge minne Kot epwe wesewesen awora ngenikich lón mwach epwe fen lululó seni ekkena.

 Jiowa a fératá fénúfan pwe aramas repwe manaw wóón tori feilfeiló chék. Ewe Paipel a erá: “Fanüfan a ngeni aramas,” me “esap föri pwe epwe kotongau, nge a föri pwe lenien aramas.” (Kölfel 115:16; Aisea 45:18) Ié kewe repwe nónnóm wóón me ifa úkúkún ttaman? “Ekewe chon pwüng repwe fanüeni ewe fanü o nonom won tori feilfeilachök.”​—Kölfel 37:29.

Iwe, Jiowa a fératá ekkewe popun mwán me fefin, Atam me Efa, me a eleenier lón eú paratis wóón fénúfan pwe repwe “tanipini o tümwünü.” (Keneses 2:8, 15) A ewisa ngeniir ekkeei ruu wis mi ámmeseik, a ereniir: “Oupwe nöünöü o achomongakemi pwe fanüfan epwe masou remi o nom fän nemeniemi.” (Keneses 1:28) Ina minne, Atam me Efa ra eáni ewe ápilúkúlúkún pwapwaiti manawer wóón fénúfan tori feilfeiló chék. A elichippúng pwe ra filatá le álleasolapa Kot, iwe a péút seniir ar repwe tongeni kapachelong lein “ekewe chon pwüng” le “fanüeni ewe fanü.” Iwe nge, sipwele kúna pwe minne ra féri ese atai minne Jiowa a tipeni fán itach me ei fénúfan. Nge akkomw, sipwe pwóróus wóón pwal eú mettóch Kot a fen féri.

Aramas ra pwal silei pwe ewe Paipel a iteni Kapasen Kot. Pwata Jiowa a awora ewe Paipel fán itach? Ákkáeúin popun, pwe sia tongeni káé usun I. (Än Salomon Fos 2:1-5) Pwúngún, ewe Paipel ese pélúweni iteiten eú me eú ach kewe kapas eis usun Kot, ese wor eú puk epwe tongeni féri ena. (Än Salomon Afalafal 3:11) Nge meinisin masouen ewe Paipel a álisikich le silei Kot. Sia silei Kot ren féfférún kewe ngeni aramas. Sia kúna met sókkun aramas a pwapwaitiir me oput. (Kölfel 15:1-5) Sia káé an ekiek usun fel, minne mi pwúng me minne mi mwáál, me mettóchun aion. Pwal och, ren pwóróusen án Néún we Jesus Kraist kapas me féffér lón ewe Paipel, a atufichikich le wesewesen silefichi pwisin napanapen Jiowa kewe.​—Johannes 14:9.

Pwal eú popun Jiowa a awora ngenikich an we Kapas ewe Paipel, pwe sipwe tongeni silei ifa usun sipwe eáni ewe sókkun manaw mi wor pwapwaan me aúchean. Jiowa a erenikich me ren ewe Paipel ifa usun ach famili epwe pwapwa, ifa usun sipwe meefi menemenéch, me ifa usun sipwe likiitú fán aúrek. Ei puk epwe áweweéchú lón ekkan lesen mwirin pwe Paipel a awora pélúwen ekkewe kapas eis mi lamot lón manawach, áwewe chék ren: Pwata a chéúfetál watteen riáfféú? Me met epwe fis lón fansoun mwach? A pwal áweweei met Kot a féri pwe epwe pwénútá met a tipeni me lepoputáán.

Mi pwal wor chómmóng popun pwata sia silei pwe ewe Paipel ina eú puk mi fókkun amwarar mi feito seni Kot. Fáik mwán ra wisen makkeei nge ttamen an a mak a lap seni 1,600 ier, nge a chék itelapei eú pwóróus lón unusen ena puk pokiten Kot i wesewesen ewe Sounemenemen Makkan. (2 Timoty 3:16) Paipel ese usun ekkewe ekkóch puk minen lóóm, pún a fen túmún masouan an epwe chék pwúng seni lóóm tori ikenái, nge a fen leteló pwúngún ewe Paipel ren fite ngeréú kapiin kewe minen lóóm lóóm. Pwal och, ewe Paipel a fen pworacho ngeni án aramas achocho le pinei án ekkewe ekkóch afféúni, eineti me álleani. Lón ach ei fansoun ena puk a chúen chéúfetál wóón fénúfan lap seni puk meinisin, me ina ewe puk aramas ra afféúni lap seni meinisin. Woren ewe Paipel a ánnetatá pwe “alon ach we Kot epwe nonom tori feilfeilachök.”​—Aisea 40:8.

Pwal eú mettóch Kot a féri, ina an awora eú mettóch mi kkóló aúchean ren an epwe anúkúnúkú pwénúetáán minne a tipeni fán itach. Ei lesen a fen apasa pwe Kot a fen aota pwe aramas repwe manaw wóón fénúfan tori feilfeiló chék. Iwe nge, lupwen Atam a filatá an epwe álleasolapa Kot, a tipis me a péútúló ewe ápilúkúlúkún manaw esemuch esap chék seni i nge pwal seni mwirimwirin kewe. “Ren eman mwän tipis a tolong lon fanüfan, nge an tipis a atoto mäla. Iei popun mäla a tori aramas meinisin, pun ir meinisin ra tipis.” (Rom 5:12) Ina minne, án Atam álleasolap usun itá a eppeti pwénúetáán minne Kot a tipeni. Iwe met Jiowa a féri?

 Minne Jiowa a féri a tipeeú ngeni napanapan kewe. Fán pwúng, Jiowa a ngeni Atam me Efa chappen ar tipis, nge fán an tong a féri eú kókkót fán iten mwirimwiriir kewe. Ren án Jiowa tipachem, a apwúngaló ifa usun epwe ataweei ena minen eppet, me mwittir chék a esilei met epwe pwákini ewe osukosuk. (Keneses 3:15) Ewe alen ngaseló seni tipis me máló epwe kawor me ren Néún Kot we, Jesus Kraist. Met a kapachelong lón ena?

Ren án aramas repwe ngaseló seni pwúnúngawen án Atam féfférún ú ngeni, Jiowa a tiinatiw Jesus fénúfan pwe epwe áiti ngeni aramas ewe alen manaw me “fangala manauan fänäsengesin chomong aramas pwe möön manauer.” a (Mateus 20:28; Johannes 14:6) Jesus a tongeni awora ena méén kepich pokiten i mi unuséch usun chék Atam. Nge Jesus a unusen álleasochisi Kot pwal mwo nge tori máló, ese usun Atam. Pokiten ese fich ngeni Jesus an epwe máló, iwe Jiowa a amanawasefálietá ngeni manaw lón láng. Iwe, lón ena atun, Jesus a tongeni atufichi aramas mi álleasochis le kúna manaw esemuch, ewe mettóch Atam ese féri. “Pun usun aramas meinisin ra tipis pokiten än ewe eman mwän aleasolap, ina chök usun chomong aramas repwe pwal küna pwüng me ren Kot pokiten än ewe eman mwän aleasochis.” (Rom 5:19) Me ren án Jesus we asoren méén kepich, Kot epwe apwénúetá minne a pwonei pwe aramas repwe manaw tori feilfeiló chék.

Sia káé chómmóng mettóch usun Jiowa seni napanapen an ataweei osukosuken án Atam álleasolap. Sia kúna pwe ese wor a tongeni eppeti án Jiowa sópweló met a fen poputááni. An kapas epwe chék pwénútá. (Aisea 55:11) Sia pwal aúcheani úkúkún watteen án Kot tongekich. “Kot a pwäri an echenikich ren an tinato Nöün Aleman lon fanüfan, pwe kich sipwe manau ren. Iei wewen chen: Esap pwe kich sia echeni Kot, nge i a echenikich o tinato Nöün we pwe i popun pwe ach tipis kana ra musala.”​—1 Johannes 4:9, 10.

Kot “esap mwo nge amwöchü püsin Nöün, pwe a fangala fänäsengesich meinisin,” ina minne sia lúkúlúk pwe Kot epwe “pwal fang ngenikich mettoch meinisin” a fen pwonei. (Rom 8:32) Met Kot a fen pwonei an epwe féri fán ásengesich? Sipwe ppii lón en lesen mwirin.