Lón ekkewe lesen mwan tori ei, sia fen kúkkútta pélúwen ei kapas eis, Ié ewe Kot? Sia poputá ren ach káé seni Paipel pwe iten ena Kot, Jiowa me ewe ákkáeúin napanap a eáni, ina tong. Sia pwal káé met a fen féri, me met epwe féri pwe aramas meinisin repwe feiéch. Inaamwo ika a chúen wor chómmóng mettóch sipwe káé usun Kot, nge eli ka ekieki ika epwe met sókkun feiéch kopwe kúna seni óm féri ena.

Jiowa a pwonei pwe “are ka kul ngeni Kot, i epwe etiwok.” (1 Kronika 28:9) Kopwe ekieki liffangom we mi aúchea atun ka achocho le silei Jiowa, ina óm “chiechifengen” me I! (Kölfel 25:14) Met ena esin chiechi epwe atoto ngonuk?

Pwapwa mi enlet. Jiowa i emén Kot mi pwapwa. (1 Timoty 1:11, NW) Ach chiechi ngeni Kot me áppirú i epwe atoto ngenikich pwapwa mi enlet, iwe epwe álisikich lón pekin memmeef, pekin ekiek, me pekin inis. (Kölfel 33:12) Ka pwal tongeni eáni pwapwa lón manawom ren an áiti ngonuk le túmúnuk seni óm manaweni ewe sókkun manaw mi efeiengaw, eérenaaló ekkewe sókkun féffér epwe échituk, me óm kinamwe ngeni aramas. Kopwe tipeeú ngeni alon ewe soumakken kélfel ei: “A mürina pwe üpwe kan ngeni Kot.”​—Kölfel 73:28.

Án Kot pwisin túmún ngonuk me áfánnuk. Jiowa a pwon ngeni néún kewe aramas: “Üpwe öüröürok o mamasok.” (Kölfel 32:8) Weween pwe Jiowa pwisin epwe áfánni emén me emén néún kewe chón angang me awora met ewe ra wesewesen osupwang ren. (Kölfel 139:1, 2) Lupwen ka ámááraatá óm ririéch ngeni Jiowa, iwe kopwe kúna pwe a chék mómmólnetá le álisuk.

Manaw mi amwarar lón mwachkkan. Me lúkún án Jiowa Kot álisuk le eáni eú manaw mi pwapwa me menemenéch lón ei fansoun, a pwal suuki ngonuk eú ápilúkúlúk mi amwarar lón mwachkkan. (Aisea 48:17, 18) Ewe Paipel a apasa: “Iei manau esemüch: Ar repwe silei en, ewe eman chök Kot mi let, repwe pwal silei Jesus Kraist, ewe ka tinato.” (Johannes 17:3) Lón ei fansoun mi áweires, ewe ápilúkúlúk Kot a awora a chék usun efóch angké mi túmúnúkich pwe sipwe “allükülük o nüküchar.”​—Ipru 6:19.

Ikkena chék ekkóch me lein ekkewe chómmóng popun mi lamot óm kopwe silefichi Kot me ámááraatá óm ririéch ngeni. Ka ketiw le fós ngeni ekkewe Chón Pwáraatá Jiowa are tétá wóón jw.org ren pwal och pwóróus mi tongeni álisuk.