Itá Ei Fénúfan Epwe Morolo?
Neman ka silei án Paipel fósun án ei fénúfan morolo. (1 Johannes 2:17) Itá weween pwe Paipel a erá pwe esap chúen wor aramas wóón ei fénúfan? Itá ei fénúfanen pwúl epwe unusen péénnúló are taló?
PÉLÚWEN EKKENA RUU KAPAS EIS ME REN PAIPEL, AAPW!
Met Esap Morolo?
ARAMAS
Minne Paipel a apasa: Kot ‘a föri fanüfan o anüküchara. Esap föri pwe epwe kotongau, nge a föri pwe lenien aramas.’—AISEA 45:18.
FÉNÚFAN
Minne Paipel a apasa: “Eu täppin aramas ra morola, eu täppin ra fisitä, nge fanüfan a chök nonomfochofoch.”—ÄN SALOMON AFALAFAL 1:4.
WEWEEN: Me ren ewe Paipel, fénúfan esap fókkun taló, aramas me man repwe chék nónnóm wóón. Iwe, met úchék weween sópwólóón ei fénúfan?
EKIEKI: Ewe Paipel a apasa pwe warotoon sópwólóón ei fénúfan epwe usun met a fis lón fansoun Noa we. Lón ena atun, fénúfan “a uren föförün mwäneson.” (Keneses 6:13) Iwe nge, Noa emén aramas mi pwúng. Ina popun, Kot a amanawa me an we famili, nge a arosaló ekkewe aramas mi ngaw ren eú noter. Iei met Paipel a apasa usun met a fis lón ena atun: “Ren koluk, iei kolukun ewe noter, ewe fanüfan me lomlom a tala ren.” (2 Petrus 3:6) A ina sópwólóón ewe fénúfan lón ena atun, nge met a rosoló lón ena atun? Esap wesen ei fénúfan, nge ekkewe aramas mi ngaw. Ina popun, lupwen ewe Paipel a fós usun sópwólóón ei fénúfan, ese fós usun talóón wesen ei fénúfan, nge a fósun rosolóón ekkewe aramas mi ngaw me ótóten ei fénúfan.
Met Epwe Sópwóló?
OSUKOSUK ME FÉFFÉRINGAW
Minne Paipel a apasa: “Lon fansoun mochomoch echök ekewe aramasangau resap chüen nom. Inamwo are kopwe küttafichiir lon lenier, nge resap nom ikenan. Nge ekewe chon tipetekison repwe fanüeni ewe fanü o pwapwaäsini ar feiöch me kinamwe mi somwola.”—KÖLFEL 37:10, 11.
WEWEEN: Ewe Noter lón fansoun Noa we ese áwesaaló féfféringaw meinisin. Mwirin ewe Noter, aramas mi ngaw ra pwal poputá le áweiresi manawen aramas. Nge ekiseló chék, Kot epwele asopwaló féfféringaw. Iei met ewe soumakken kélfel a erá: “Ekewe aramasangau resap chüen nom.” Kot epwe áeá an we Mwú le asopwaló féfféringaw, ina eú mwú epwe nemenem seni láng wóón aramas mi pwúng.
EKIEKI: Itá ekkewe sounemenemen fénúfan repwe pwapwa le onómuur fán án Kot we Mwú? Ewe Paipel a erá pwe resap. Repwe umwes le ú ngeni án Kot we Mwú. (Kölfel 2:2) Met epwe fis ren ar féri ena? Án Kot we Mwú epwe ataieló meinisin mwúún aramas, me “epwe püsin nom tori feilfeilachök.” (Taniel 2:44) Nge pwata a lamot án mwúún aramas repwe kamwóóló?
MINNE A LAMOT—Wesilóón án Aramas Nemenem
Minne Paipel a apasa: “Aramas resap püsin nemeni manauer, resap pwal tongeni akota mine repwe föri.”—JEREMAIA 10:23.
WEWEEN: Aramas rese fférútá pwe repwe pwisin nemeniir. Ra nemenemengaw wóón ekkóch aramas me rese tufichin pwákini ar kewe osukosuk.
EKIEKI: Ewe puk itan, Britannica Academic a erá pwe eú me eú ekkewe mwúún aramas, rese tufichin “pwákini án aramas kewe osukosuk, áwewe chék ren, mwelele, echik, samau, feiengaw watte, maun are pwal ekkóch féfférún akkachofesá.” A pwal erá: “Ekkóch . . . ra lúkú pwe eú chék sókkun mwú mi nemeni unusen fénúfan a tongeni atawefóchei ekkena osukosuk.” Iwe nge, inaamwo ika meinisin mwúún aramas ra tipeeúfengen, nge ei fénúfan a chúen nóm fán nemenien aramas rese unuséch, iir kewe rese tufichin ataweei ekkena osukosuk. Mwúún Kot we, ina chék ewe nemenem mi tufichin unusen áwesaaló meinisin osukosuken fénúfan.
Ina popun, sópwólóón ei ótóten fénúfan mi ngaw, esap ina eú pwóróus mi eniwokkus, nge fen ina eú mettóch sia ésúkúsúkú, pokiten án Kot we ótót mi fé mi fókkun amwarar, epwe ina ekkesiwilin ei ótót mi ngaw!
Ineet epwe fis ekkena mettóch? En lesen mwirin, epwe áweweei pélúwan me ren Paipel.
