Oupwe Ammonlata Ngeni Ranin Jiowa We

“Oupwe pwal ammolata, pun ouse sinei menni fansoun ewe Noun-Aramas epwe feito.”​—MATTU 24:44.

1. Met popun sipwe fokkun afanni ranin Jiowa we?

 EPWE eu ranin maun me song, aurek me osukosuk, kiroch me kata. An Jiowa we ran mi “lapalap, . . . o eniwokus” epwe feito won ei otot mi ngau, ussun chok ewe Nooter a ataielo ewe fonufan mi ngau lon ranin Noa we. Sise tongeni su seni. Iwe nge, “io epwe kori iten ewe Samol mi Lapalap [iten Jiowa, New World Translation] epwe manau.” (Sowel 2:30-32; Amos 5:18-20) Kot epwe ataielo chon koputan me amanaua noun kewe aramas. Ewe soufos Sefanaia a apasa ren ngunun mi atapwalapwal: “Ewe ran mi lap, ranin ewe Samol mi Lapalap a arapoto, a arapoto o muttirito.” (Sefanaia 1:14) Iwe, ineet epwe fis ei ranin kapwung seni lang?

2, 3. Met popun a lamot pwe sipwe ammonlata fan iten ranin Jiowa we?

² Jises a apasa: “Nge ren ranin are fansoun, esor emon mi sinei usun, esap ekkewe chonlang, esap pwal ewe Nau, pwe ewe chok Sam.” (Mattu 24:36) Pokiten ese titchik ach  silei ussun kulokun, a mmen lamot ach lefareni ekkewe kapas lon ach we lesenin ier fan iten 2004: “Oupwe mammasa . . . Oupwe mmonleta.”​—Mattu 24:42, 44.

³ Jises a affata ukuukun muttirin tumunun chokkewe mi mmonleta me muttirin poutuloon ekkewe ekkoch ren ekkeei kapas: “Lon ewe fansoun, ruemon repwe nomfengen le malamal, epwe uweialo emon nge likiti emon; ruemon fefin repwe pofengen won eu nif, epwe uweialo emon nge likiti emon.” (Mattu 24:40, 41) Lon ena fansoun mi lamot, epwe ifa ussuch? Sipwe fen mmonleta, are ewe ran epwe waroto lupwen sise kon afanni? Mi lamot met sia foffori iei mwo. Ika sia fen mmonleta lupwen ranin Jiowa we a waroto, sipwe ti senikich eu sokkun ekiek a choufetal ikenai, u ngeni ach turulong lon och lapalap lon pekin ngun mi efeiengau, me kul seni ekkoch lapalapen manauen aramas.

Ousap Ussun Chokkewe Rese Meefi Och

4. Ifa ekiekin ekkewe aramas lon ranin Noa we?

⁴ Ekieki mwo ekkewe ranin Noa. Ewe Paipel a apasa: “Kot a fonou Noa usun ekkewe mettoch mi aramas resaamo kuna. Iwe, Noa a auseling ren luku, o a forata ewe waim, pwe epwe amanaua chon le imwan.” (Ipru 11:7) Ewe waaimw a fokkun sokkolo lapalapan me aramas mi tongeni kuna. Pwal och, Noa emon “sounpetak mi pung.” (2 Piter 2:5) Nge an Noa falei ewe waaimw are an afalafal ese tongeni amwokutu ekkewe aramas ar repwe siwili manauer. Pwata? Pokiten ra “momongo o ukkun, [me] ra pwal pupulufengen.” Chokkewe Noa a afalafal ngeni ra kon osukosuk ren pwisin manauer me pwisin ar pwapwa pwe “rese meefi och, tori fansoun ewe noter a fis, o a uweiirelo meinisin.”​—Mattu 24:38, 39.

5. Ifa ekiekin ekkewe aramasen Sotom lon ranin Lot we?

⁵ A ussun chok lon ranin Lot we. Ewe Paipel a apasa: “Pwal usun minne a fis lon ekkewe ranin Lot​—ra momongo, ra ukkun, ra amomoto, ra amomolo, ra fotukatiu, ra auta im; nge lon ewe chok ran Lot a tou seni Sotom, ekkei o primiston a pungutiu seni lang, o a niirelo meinisin.” (Luk 17:28, 29) Mwirin ekkewe chonlang ra fen ouroura Lot ussun ewe kata epwe feito, Lot a fos ngeni puluwen noun kewe fefin ussun met epwe fis. Me ren ekiekir a ussun ita pwe Lot “a chok urumwot.”​—Keneses 19:14.

6. Met sokkun ekiek sipwe ti senikich?

⁶ Jises a apasa pwe ussun chok lon ranin Noa me ranin Lot, “epwe fakkun iei usun ren an ewe Noun-Aramas waroto.” (Mattu 24:39; Luk 17:30) Pwungun pwe ekiekin chommong aramas ikenai a ussun chok ekkewe aramas rese meefi och. Sipwe tumunu pwe ena esin ekiek esap etipetipakich. Esor ngauen ach pwapwaiti anach mongo me unumach ika sipwe aukuukuochuur. Pwal ussun chok ren pupulu; ina eu kokkot seni Kot. Iwe nge, ika anach me unumach ir ekkewe mettoch mi lamot seni meinisin lon manauach me mettochun ngun ra fen kisikisilo lamoter, sia wesewesen mmonleta fan iten ranin Jiowa we mi aniuokkus?

7. Ifa ekkewe kapas eis mi lamot sipwe eisinikich mwen sipwe fori och mettoch, me met popun?

⁷ Ewe aposel Paul a apasa: “Ewe fansoun a chok mochomoch. Iwe, seni iei fefeilo, ir ekkewe mi wor puluer repwe usun chok nge esor puluer.” (1 Korint 7:29-31) A ekis chok ewe fansoun lusun fan iten ewe angangen afalafal Kot a awiisa ngenikich. (Mattu 24:14) Paul a apasa pwe chokkewe mi pupulu resap kon afanni puluwer pwe angangen ewe Muu esap chuen lamot seni meinisin. A ffat pwe ewe sokkun ekiek Paul a mochen sipwe eani a unusen mwaalfesen me ekiekin ekkewe aramas rese meefi och. Jises a apasa: “Oupwe kuttafichi lom an mu o an pung.” (Mattu 6:33) Lupwen sipwe filata are mwen sipwe achocho ngeni och mettoch, iei ewe kapas eis mi lamot sipwe eani, ‘Ifa ussun filiei are foriei epwe kku ai achocho le kutta loom ewe Muu?’

8. Ika mettochun manauach a fen wiliiti met sia lolileniesini lap seni meinisin, met sipwe fori?

⁸ Ifa ussun ika sia esinna pwe sia kon osukosuk  ren fofforun manauach ran me ran me sise chuen tawe ngeni ekkewe mettochun ngun? A kisikis chok sokkofesennin lapalapen manauach me lapalapen manauen chon oruch, chokkewe rese silei ewe Paipel me rese esileifeili porausen ewe Muu? Ika a ina ussun, mi lamot ach iotek ussun ei mettoch. Jiowa a tongeni alisikich ach sipwe eani ekiek mi pwung. (Rom 15:5; Filipai 3:15) Jiowa a tongeni alisikich ach sipwe kutta loom ewe Muu, foffori minne mi pwung, me apwonueta wiisach ngeni i.​—Rom 12:2; 2 Korint 13:7.

U Ngeni Molulu Lon Pekin Ngun

9. Me ren Pwarata 16:14-16, met popun a lamot pwe sipwe u ngeni molulu lon pekin ngun?

⁹ Ewe oesini ussun ewe “maun lon ewe ran mi lap, ranin Kot mi Lapalap” lon Armaketon, a ourourakich pwe ekkoch resap nennelo. Ewe Samol Jises Kraist a apasa: “Nengeni, upwe feiliu, usun chok emon chon sola! Mi feioch ir mi mamasa o amwochu ar mangaku pwe rete selelo le fefetal o aramas rete nengeni ar sau.” (Pwarata 16:14-16) Ewe mangaku lon ei wokisin a weneiti met a esissinnata pwe kich Chon Kraist, Chon Pwarata Jiowa. Ekkewe esissin repwe kapachelong ach esileifeili porausen ewe Muu me ach kewe foffor mi fich ngeni Chon Kraist. Ika sia molululo me ese chuen wor ach angang me foffor, iwe, eli aramas resap chuen esinna pwe kich Chon Kraist. Sipwe sau me sipwe tongeni feiengau. Sipwe u ngeni molulu me chipwang. Ifa ussun sipwe u ngeni ekkena mettoch?

10. Met popun alleaan Paipel iteiten ran epwe alisikich ach sipwe nennelo lon pekin ngun?

¹⁰ Fan fitu ewe Paipel a menlapei ewe lamoten ach sipwe nennelo me mammasa. Ren chok awewe, ewe Kapas Allim a achema ngenikich: “Oupwe chok mamasa” (Mattu 24:42; 25:13; Mark 13:35, 37); “oupwe pwal ammolata” (Mattu 24:44); “oupwe tumunukemi o mamasa” (Mark 13:33); “oupwe pwal ammolata” (Luk 12:40). Mwirin an apasa pwe ranin Jiowa we epwe feito won fonufan lupwen aramas rese mwo ekieki, ewe aposel Paul a pesei chiechian chon luku: “Iei minne, sisap okonnut usun ekkewe ekkoch, nge sipwe mamasa o forfichi.” (1 Tesalonika 5:6) Lon ewe saingoon puken Paipel, Jises Kraist mi fen lingelo, a menlapei muttirin an feito: “Upwe muttirito.” (Pwarata 3:11; 22:7, 12, 20) Chommong lein ekkewe soufos chon Ipru ra awewei me ouroura ussun ewe ranin an Jiowa kapwung mi lapalap. (Aisea 2:12, 17; Jeremaia 30:7; Sowel 2:11; Sefanaia 3:8) Akkalleaan an Kot we Kapas, ewe Paipel, iteiten ran me ekkekiekin ewe poraus sia allea epwe alisikich ach sipwe nennelo lon pekin ngun.

11. Met popun ach pwal alaemon le kaeo ewe Paipel a lamot ika sipwe nennelo lon pekin ngun?

¹¹ Ewer, a ifa me watteen ewe alillis fan iten ach sipwe nennelo lon pekin ngun sia angei seni ach kaeo ewe Paipel ren nounoun puken aweween Paipel “ewe chon angang mi tuppwol o tipatchem” a awora! (Mattu 24:45-47) Ika ach kaeo epwe uwaoch, epwe feffeita me epwe fis iteitan. (Ipru 5:14–​6:3) Sipwe angei mongo mi pochokkul lon pekin ngun iteitan. Ikenai, epwe tongeni weires ach kuna nafochun fansoun ren ach sipwe fori. (Efisus 5:15, 16) Iwe nge, ach alleaani Paipel me ekkewe puk me chassi lupwen sia tawe ngeni esap naf. Ach kaeo mi fiffis iteitan a lamot ika sipwe “pochokkul” lon luku me nennelo.​—Taitos 1:13.

12. Ifa ussun an chon Kraist kewe mwich me mwichelap ra alisikich ach sipwe fiu ngeni molulu lon pekin ngun?

¹² An chon Kraist mwich me mwichelap ra pwal alisikich le fiu ngeni molulu lon pekin ngun. Ifa ussun? Ren ewe emmwen sia angei. Atun ekkeei mwich, esap pwe sia rongorong kapasen achechchem pwe ranin Jiowa we mi arapoto? Ekkewe mwich mi fiffis iteiten  wiik ra atufichikich ach sipwe ‘apochokkula emon me emon lefilach lon tong o fofor-murinno.’ Ei apochokkul epwe alisata ach nennelo lon pekin ngun. Sisap mairu ussun ewe alluk mi allukukich ach sipwe mwimmwichfengen lupwen sia “nengeni pwe ewe Ran a arapoto.”​—Ipru 10:24, 25.

13. Ifa ussun an chon Kraist angangen afalafal epwe alisata ach nennelo lon pekin ngun?

¹³ Sia pwal kuna alillis fan iten ach sipwe nennelo lupwen sia angolong lon ewe angangen afalafal ren unusen letipach. Ach afalafala aramas ussun ekkewe esissin me weweer nampa eu le alisata ach chechchemeniir. Me lupwen sia kuna feffeitaan chokkewe mi kaeo ewe Paipel me ar mwokutukut me ren minne ra kaeo, ach ngunun atapwalapwal a lapalapelo. Ewe aposel Piter a apasa: “Oupwe rifengenni lukanapen letipemi, oupwe ononoto.” (1 Piter 1:13) “Fansoun meinisin oupwe alapalo ami fori angangen ach we Samol” ina eu safei fan iten molulu lon pekin ngun.​—1 Korint 15:58.

Poutalo Ewe Sokkun Manau Mi Efeiengauakich Lon Pekin Ngun

14. Jises a ourourakich ussun met sokkun lapalapen manauach lon Luk 21:34-36?

¹⁴ Mei wor pwal eu kapasen ourour lon an Jises we oesini mi lapalap ussun an nonnom. Jises a apasa: “Oupwe pwisin tumunukemi, pwe letipemi ete chourek pokiten mongommong, are unupuch, are aurekin ei manau, o ewe ran ete muttir torikemi usun chok eu ser. Pun epwe tori ir meinisin mi nonnom won unusen fonufan. Nge ami oupwe mamasa fansoun meinisin, o ikiotek, pwe oupwe pochokkul, o oupwe ngaselo seni ekkewe mettoch meinisin mi epwe fis; o ami oupwe uta mwen mesen ewe Noun-Aramas.” (Luk 21:34-36) Mei fokkun pwung an Jises awewei ewe sokkun manau aramas ra kan kutta: mongommong, unnupuch, me ewe sokkun manau mi wato aurek.

15. Met popun sipwe ti senikich mongommong me unummong?

¹⁵ Mongommong me unummong rese tipeeu ngeni ekkewe kapasen alongolongun alluk lon ewe Paipel. A mak lon ewe Paipel: “Kosap chiechi ngeni ekewe mi unumong wain ika ekewe mi ochomong fituk.” (An Salomon Fos 23:20) Ach mommongo me un esap mwo tori ena ukuukun mwen epwe tongeni efeieingauakich lon pekin ngun. A tongeni efisi ach molulu  me chipwang mwen sia mongommong me unummong. Iei alon eu mwiitun lon ewe Paipel: “Emon chon chipwang a mwarakichiti mettoch, nge esap angei och.” (An Salomon Fos 13:4) Neman ena esin aramas a mochen fori letipen Kot, nge an mochen ese pwonuta pokiten an tumunungau.

16. Ifa ussun sipwe tongeni ti senikich ach sipwe choutiu ren aurek ussun ach famili?

¹⁶ Ikkefa ekkewe aurekin manauach Jises a fos ussun? Ra weneiti ekkewe mettoch mi kkukich ussun chowean ach angang le atufichi ewe famili me metakan. Ese och ika sipwe mut ngeni ekkeei sokkun mettoch ar repwe achoukichetiu! Jises a eani kapas eis: “Io leimi epwe tongeni alangattamalo manauan ukukun emwanu ren an aurek?” A pwal peseikich: “Oute aureki o apasa, ‘Meeta sipwe ani?’ are ‘Meeta sipwe unumi?’ are, ‘Meeta sipwe ufeni?’ Pun ekkewe re Jentail ra kukutta ekkeei mettoch meinisin, nge Sememi lang a sinei pwe mi wor ami osupwang ren ekkeei mettoch meinisin.” Ach kuttafichi lom ewe Muu me ach lukuluk pwe Jiowa epwe awora minne sia osupwang ren epwe nemeni aurek me alisikich ach sipwe nennelo lon pekin ngun.​—Mattu 6:25-34.

17. Ifa ussun chei pisek a tongeni wato aurek?

¹⁷ Aurek a pwal tongeni fisita seni ach chei pisek. Ekieki mwo ifa ussun a fitikokolo manauen ekkoch pokiten ra liwinimmang chommong pisek rese tufichin mooni. Pwal ekkoch ra kkuf ren ekkewe kokkot fan iten ar repwe muttir wouochulo are ra mooni sea lon company mi osukosuk. Sukul a wiliiti eu ssar lupwen aramas ra sukul fan iten ar repwe tongeni kutta angang mi tekia. Pwungun pwe sukul a lamot ika emon a mochen angang. Iwe nge, ekkoch ra fen feiengau pokiten watteen ewe fansoun a pout seniir ren ar feilo sukul  tekia. Sise mochen apwangapwang lon pekin ngun lupwen ranin Jiowa we a arapoto! Ewe Paipel a ourourakich: “Nge ir mi mochen pisekisekilo repwe turutiu lon sosot, lon ser, lon chommong sokkun mochenia mi umwes o afeiengau, ekkewe sokkun mochenia mi akokatiu aramas lon feiengau o kiteter.”​—1 Timoti 6:9.

18. Sipwe amaaraata met ika fonufan esap etipetipakich le akkomwa tongen pisek lon manauach?

¹⁸ Ika fonufan esap etipetipakich ngeni ach sipwe chei pisek, a lamot ach amaaraata ewe tufichin miritiiti minne mi pwung are mwaal lupwen a wor ach kefil. Ei tufich a maarita ren ach akkangei ‘mongo lon pekin ngun mi pochokkul fan iten aramas asimau’ fengen me ach ‘emiriiti ach tufichin emirit ren aeaan ena tufich’ lupwen sia pwungupwung won filiach. (Ipru 5:13, 14, NW) Ach esissinnata “minne mi lamot seni” lupwen sia filata met sipwe akkom le achocho ngeni lon manauach epwe pwal tumunukich seni ach filingau.​—Filipai 1:10, NW.

19. Ika sia miritiiti pwe a chok kisikis ewe fansoun a nom rech fan iten mettochun ngun, met sipwe fori?

¹⁹ Ach chei pisek a tongeni achunalokich, me ewe fansoun fan iten mettochun ngun epwe kisikisilo are esap chuen mwo wor. Ifa ussun sipwe tongeni atittina pwisin kich me ti senikich ena sokkun manau? Sipwe ekiekifichi fiti iotek ifa ussun me ifa ukuukun sipwe tongeni amecheresi manauach. Ewe king loom lon Israel itan Solomon a apasa: “Eman mi angang weires a mour kinamwe, ika a wor ekis chok anan ika chomong. Nge eman mi fokun woumong esap tongeni mour kinamwe ren an oureki woun.” (Än Salomon Afalafal 5:12) A fen pout senikich watte fansoun me pochokkul pokiten ekkoch pisekich kewe? Ren lapeloon ach kewe pisek, a pwal lapelo angang le atenekiir me tumunur, me moni towu fan iten insurance. Esap pwe manauach epwe tongeni mecheresilo ren ach amomolo ekkoch pisekich?

Oupwe Mmonleta

20, 21. (a) Ifa ussun Piter a alukulukukich ussun ranin Jiowa we? (b) Ikkefa ekkewe foffor sipwe achocho ngeni atun sia ammonlata ngeni ranin Jiowa we?

²⁰ A tori muchuloon ewe fansoun fan iten ewe fonufan lon ranin Noa we, me epwe pwal muchulo fan iten ei otot won fonufan ikenai. Ewe aposel Piter a alukulukukich: “Nge ranin ach Samol epwe feito usun chok emon chon sola, o lon ewe fansoun ekkeei lang repwe morelo ren akurang chapur, o ekkeei sokkun meinisin repwe itelo ren ekkei, o ei fonufan pwal ekkeei mettoch mi nonnom won epwe karelo.” Minne ekkewe lang ra liosueta​—ekkewe muu mi ngau​—me met ewe fonufan a liosueta​—aramas mi towau seni Kot​—resap manau seni pwichikaren an Kot song mi pulopul. Piter a apasa: “Are ekkeei mettoch meinisin epwe itelo iei usun, meet sokkun aramas ami oupwe wiliti lon manauemi mi fel o mi fich ngeni Kot? ren am witiwiti o amuttiri warotoon ewe ranin Kot.”​—2 Piter 3:10-12.

²¹ Ach fiffiti an chon Kraist kewe mwich me ewe angangen afalafala ewe kapas allim ir foffor mi kapachelong lon ach fel ngeni Kot. Amwo sipwe achocho le foriir ren unusen letipach atun sia witiwit fan mosonottam ren ranin Jiowa we mi lapalap. Sipwe unusen achocho pwe Kot epwe kuna pwe sia “nonnom fan kinamwe” me esap wor rech “och sor are tikitikipwul.”​—2 Piter 3:14.

En Mi Chechchemeni?

• Met popun sipwe ammonlata fan iten ranin Jiowa we?

• Ika sia chok lolileniesini nonnomun manauach ran me ran, met sipwe fori?

• Met epwe alisikich ach sipwe u ngeni molulu lon pekin ngun?

• Met sokkun lapalapen manau mi efeiengau sipwe poutalo, me ifa ussun?

[Ekkewe Kapas Eis fan Iten ewe Lesen]

[Sasing lon pekin taropwe 11]

Aramas lon ranin Noa we rese fen afanni ewe kapwung epwele feito​—nge en?

[Sasing lon pekin taropwe 12]

En mi tongeni akkotaochu manauom pwe epwe lapelo om fansoun fan iten met sipwe achocho ngeni lon pekin ngun?