Ekkewe Fefin Mi Tuppwol​—Chon Fel Ngeni Kot Mi Auchea

“Liewokekei mwakel chok, pwal lioch pon chok. Nge eman fefin mi niuokusiti ewe Samol mi Lapalap, iei i sipwe mwareiti.”​—ÄN SALOMON FOS 31:30.

1. Ifa ussun ekiekin Jiowa ussun fouten aramas a sokko seni an fonufan ekiek?

 EWE fonufan a fokkun alamota fouten aramas, akkaewin ren fouten ekkewe fefin. Iwe nge, Jiowa a nennengeni masouen letipen emon, eu mettoch a tongeni liochulo lupwen emon a chinnapelo. (An Salomon Fos 16:31) Ina popun, ewe Paipel a pese ngeni ekkewe fefin: “Foutemi esap fouten lukun, ren firesin mokuremi, are fouten gold, are ufouf mangaku mi lingoch, nge epwe fouten letipemi mi monomon ren ewe fout mi esap morelo, fouten ngunumi mi mosonoson o tipemecheres​—ei sokkun fout mi fakkun auchea fan mesen Kot.”​—1 Piter 3:3, 4.

2, 3. Ifa ussun ekkewe fefin ra alisata feffeitaan ewe kapas allim lon ewe aewin senturi, me ifa ussun ewe Paipel a oesini ei mettoch?

² Chommong fefin mi mak iter lon ewe Paipel ra pwarata ena esin lapalap mi murinno. Lon ewe aewin senturi, ekkoch me leir ra alisi Jises me noun kewe chon kuno. (Luk 8:1-3) Mwirin, ekkewe fefin chon Kraist ra wiliiti chon afalafal mi tinikken; ekkoch ra awora alillis mi auchea ngeni ekkewe mwan chon Kraist mi emmweni ewe angang, kapachelong ewe aposel Paul; me ekkoch ra fokkun awasolaochu aramas, me ra pwal mwo nge suuki imwer pwe chon ewe mwichefel repwe tongeni mwich fengen ie.

³ Ewe Paipel a oesini pwe ekkewe fefin repwe fori angang mi amwarar ren pwonuetaan an Jiowa kokkot. Ren chok awewe, Sowel 2:28, 29 a oesini pwe ekkewe mwan me fefin, kukkun me sarafo, repwe angei ngun mi fel me repwe esileifeili ewe kapas allim ussun ewe Muu. Ewe oesini a poputa le pwonuta lon Pentekos 33 C.E. (Fofor 2:1-4, 16-18) Ekkoch fefin mi kepit ren ngun ra angei liffang mi amwarar, ussun chok ewe liffangen oesini. (Fofor 21:8, 9) Pokiten ar tinikken lon ewe angangen  afalafal, ei mwichen sounfiu, eu mwichen fefin mi lapalap me tuppwol, ra amuttiri choufetalin ewe lamalamen Kraist lon ewe aewin senturi. Ren enletin, orun 60 C.E., ewe aposel Paul a mak pwe ewe kapas allim a fen “afalafalafeili ekis meinisin fan lang.”​—Kolose 1:23.

Apunga Ir Fan Iten Ar Pwora, Tinikken, Me Ar Awasola Aramas

4. Ikkefa ekkewe popun Paul a apunga fitemon fefin lon ewe mwichefelin chon Kraist lon ewe aewin senturi?

⁴ Ewe aposel Paul, i emon mi aucheaani an ekkewe ekkoch fefin angangen afalafal​—ussun chok ekkewe overseer chon Kraist ikenai ra aucheaani ewe angangen afalafal ekkewe fefin mi tinikken ra fori. Paul a kapas ussun “Traifina o Traifosa, ekkena fefin ir chon angang lon ewe Samol,” me “neminna mi achengicheng, Persis, neminna mi achocho le angang lon ewe Samol.” (Rom 16:12) Paul a makkei pwe Iuotia me Sintike ra ‘fen eti i lon angangen ewe kapas allim.’ (Filipai 4:2, 3) Priska, kapachelong puluwan we, Akwila, “ra peluku manauer” fan asengesin Paul, iwe a amwokutu i le makkei: “Iwe, sap ngang chok upwe kilisou ngenir, pwe pwal ekkewe mwichefelin Jentail meinisin.”​—Rom 16:3, 4; Fofor 18:2.

5, 6. Ifa ussun Priska a isetiu eu leenien appiru mi murinno fan iten ekkewe sister ikenai?

⁵ Met popun Priska a tinikken me pwora? Fofor 18:24-26 a aiti ngenikich pwe a fiti puluwan we le alisi Apollos, emon mi lipwakoch le afalafal, pwe epwe ffat ngeni ewe poraus a keran katowu ussun ewe enlet. Weween pwe, Priska emon chon kaeo mi achocho ussun an Kot Kapas me aitien ekkewe aposel. Iwe, mwiriloon a amaaraata ekkewe lapalap mi murinno me a wiliiti emon mi auchea ngeni Kot, puluwan we, me ewe mwichefel. Mi pwal auchea ekkewe sister chon Kraist mi achocho ikenai mi tinikken le kaeo ewe Paipel me pwal angei mongo lon pekin ngun Jiowa a awora ren ewe “chon angang mi tuppwel.”​—Luk 12:42.

⁶ Akwila me Priska ra fokkun awasolaochu aramas. Paul a nonnom lon imwer lupwen ra akkangangfengen le fori imw mangaku lon Korint. (Fofor 18:1-3) Lupwen ekkewe pupulu ra mwokut ngeni Efisus me mwirin ngeni Rom, ra sopweilo le awasolaochu aramas, me ra pwal mwo nge suuki imwer pwe chon ewe mwichefel repwe tongeni mwichfengen lon. (Fofor 18:18, 19; 1 Korint 16:8, 19) Nimfa me Meri, inen Jon Mark ra pwal suuki imwer pwe chon ewe mwichefel repwe tongeni mwichfengen ie.​—Fofor 12:12; Kolose 4:15.

Eu Minen Alillis Mi Auchea Ikenai

7, 8. Menni angang mi fel chommong fefin chon Kraist ra fori ikenai, me met repwe tongeni lukuluk won?

⁷ Ussun chok lon ewe aewin senturi, ekkewe fefin chon Kraist mi tuppwol ikenai ra eani eu wiis watte lon pwonuetaan an Kot kokkot, akkaewin lon ewe angangen afalafal. Mwa met ren angangochun ekkeei fefin! Ekieki mwo ussun Gwen, emon mi angang ngeni Jiowa fan tuppwol ren lap seni 50 ier tori an malo lon 2002. Puluwan we a apasa: “Gwen a itefoulo lon am we tenilimw pokiten an achocho lon ewe angangen afalafal. Gwen a ekieki pwe aramas meinisin ra tufichin angei an Kot tong me an kewe pwon. An tuppwol ngeni Kot, an we mwicheich, me ngeni am famili​—pwal an apochokkul mi fiti tong lupwen am aua letipechou​—a alisiei me noum kewe lon unusen manauem mi murinno me pwapwa. Am aua fokkun posiiti i.” Gwen me puluwan we ra pupulu ukuukun 61 ier.

⁸ Ekkewe fefin chon Kraist, lipich me pupulu, fitu kit ra eani ewe wiis pioneer me misineri, me ra menemenoch ren met a nonnom rer lupwen ra esileifeili porausen ewe Muu lon telinimw me ekkewe leeni mi towau. (Fofor 1:8) Chommong ra pennukuolo ar repwe mooni pwisin imwer are nounou pwe repwe tongeni alapalo ar angang ngeni Jiowa. Mei wor chokkewe mi alisi puluwer kewe fan tuppwol mi eani ewe wiis overseer mi saifetal, me fite ngerou sister ra angang lon Bethel won unusen fonufan. Pwungun pwe, ekkeei fefin mi pennukuolo manauer ir  mi kapachelong lein “ekkewe mettoch mi auchea seni muu meinisin” repwe amasoua imwen Jiowa ren ling.​—Akai 2:7.

9, 10. Ifa ussun ekkoch lon famili ra pwarata ar kilisou fan iten fofforochun ekkewe fin pupulu chon Kraist me ekkewe inelap?

⁹ Pwungun pwe, chommong fefin chon Kraist ra wiisen tumunu ar famili; nge, ra akkomwa wiiser mi weneiti ewe Muu. (Mattu 6:33) Emon sister mi lipich mi pioneer a apasa: “Pokiten an inei luku mi pochokkul me fofforun mi murinno, ina ewe mettoch a alisiei le wiliiti emon regular pioneer.” Emon mwan pupulu a apasa ussun puluwan we, inen nimmon nengngin mi watte: “Imwem a limelimoch me torotoroch iteitan. Bonnie a tumunu pwe ese fitikoko me ese chommong pisek lon pwe am famili epwe tongeni akkomwa wiisem lon pekin ngun. An tumunuochu noum moni a atufichi ai angang part-time ren ukuukun 32 ier, me ua tongeni alapalo ewe fansoun ua nonnom ren ai famili me fan iten wiisei kewe lon pekin ngun. Puluwei a pwal alisi noum kewe pwe repwe chofo le angang. Ua fokkun mwareiti puluwei.” Ikenai ekkewe pupulu ra angang lon ewe ofesilap an Chon Pwarata Jiowa.

¹⁰ Emon mwan pupulu a makkei ei poraus ussun puluwan we, inen emon at me nengngin mi watte: “Ewe lapalap Susan a lapalapeni ua fokkun ingeiti seni meinisin, ina an tong mi alollon fan iten Kot me aramas, pwal an weweoch, wewefich, me wenechar. A kan meefi pwe mi fich ngeni Jiowa ekkewe mettoch mi murinno seni meinisin sipwe tongeni ngeni​—eu alongolongun alluk a apwonueta ussun chok emon chon angangen Kot me emon in.” Ren alillisin puluwan, ei mwan pupulu a fen tongeni eani sokkopaten wiis lon pekin ngun, ussun chowean elter, pioneer, chon wii ewe circuit overseer, me a fiti ewe Hospital Liaison Committee. Mwa met ren aucheaan ekkena esin fefin ngeni puluwer kewe, ngeni chiener kewe chon Kraist, me lap seni meinisin, ngeni Jiowa!​—An Salomon Fos 31:28, 30.

Ekkewe Fefin Mi Auchea Nge Esor Puluwer

11. (a) Ifa ussun Jiowa a fen pwarata an tong fan iten ekkewe fefin mi tuppwol, akkaewin ekkewe fefin mi ma puluwer? (b) Ekkewe chon Kraist fefin mi ma puluwer me ekkewe sister mi tuppwol esor puluwer repwe lukuluk won met?

¹¹ Fan chommong Jiowa a pwarata an tong fan iten ekkewe fefin mi ma puluwer. (Tuteronomi 27:19; Kol Fel 68:5; Aisea 10:1, 2) Jiowa ese siwil. A chuen pwarata tong esap chok fan iten ekkewe fefin mi ma puluwer nge pwal ngeni inelap esor puluwer me fefin mi lipich pokiten ina filier are pokiten resaamwo kuna emon chon Kraist mi fich repwe tongeni puluweni. (Malakai 3:6; Jemes 1:27) Ika en emon me lein chokkewe mi angang ngeni Jiowa fan tuppwol nge esor puluwom, kopwe tongeni lukuluk pwe en mi auchea mwen mesen Kot.

12. (a) Ifa ussun ekkoch sister chon Kraist ra pwarata ar tuppwol ngeni Jiowa? (b) Ekkoch ekkewe sister ra likiitu fan met sokkun meefier?

¹² Ren chok awewe, ekieki mwo pwiich kewe chon Kraist rese pupulu pokiten ra tuppwol le alleasochisi an Jiowa fon pwe repwe pupulu nge “lon chok ewe Samol.” (1 Korint 7:39; An Salomon Fos 3:1) An Kot Kapas a alukulukuur: “Ai Samol mi Lapalap, ka allukuluk ngeni ir mi allukuluk.” (2 Samuel 22:26) Nge, fan iten chommong leir, ar repwe lipich a weires. Emon sister a apasa: “Ua apposa letipei pwe upwe chok pupulu nge lon ewe Samol, nge ua kechiu fan  chommong lupwen chienei kewe ra puluweni ekkewe mwan chon Kraist mi murinno, nge ngang mi chuen lipich.” Pwal emon sister a apasa: “Ua fen angang ngeni Jiowa ukuukun 25 ier. Ua apposa letipei pwe upwe tuppwol ngeni, nge fan chommong ua letipechou pokiten ua ppos.” A pwal apasa: “Ekkewe sister ussun chok ngang mi osupwangen kapasen pesepes.” Ifa ussun sipwe tongeni alisi ekkena sister mi tuppwol?

13. (a) Met sia kaeo seni fofforun chokkewe mi chuuri noun Jepta we fopwul? (b) Pwal ifa ussun sipwe tongeni pwarata tong ngeni ekkewe sister mi lipich lon ach mwichefel?

¹³ Ifa ussun sipwe fori a pwalo lon eu porausen loom. Lupwen noun Jepta fopwul a fangolo an tufichin pupulu, ekkewe aramas ra miritiiti watteen minne a fangelo. Met a alisi i? “Ekewe fopwulun Israel ra feila ekis lon ukukun ruanu ran iteiten ier, pwe repwe kechueiti [apunga, NW] ewe fopwul noun Jefta ewe re Kiliat.” (Soukapwung 11:30-40) Ussun we chok, sipwe apunga ekkewe sister mi lipich mi alleasochi allukun Jiowa ren tuppwol. * Ifa ussun sipwe pwal tongeni pwarata ach tongeer? A lamot pwe lon ach iotek sipwe tingorei Jiowa pwe epwe alisi ekkena sister mi achengicheng me tuppwol pwe repwe likiitu lon ar angang. Mi fich ngeniir ach sipwe alukulukuur pwe Jiowa me unusen ewe mwichefel ra tongeer me ra fokkun aucheaniir.​—Kol Fel 37:28.

Repwe Sopwoch Sam Me In Esor Puluwer

14, 15. (a) Met popun a lamot pwe ekkewe in chon Kraist esor puluwer repwe tingorei an Jiowa alillis? (b) Ifa ussun ekkewe sam are in esor puluwer repwe tongeni atipeeufengenni ar kewe foffor ren ar iotek?

¹⁴ Ekkewe inelap chon Kraist nge esor puluwer ra kuna chommong osukosuk. Iwe nge, ra tongeni tingorei Jiowa fan iten alillis ren amaarin nour kewe me ren ekkewe alongolongun alluk seni Paipel. Pwungun pwe ika en emon sam are in me esor puluwom, kese tongeni apwonueta ekkewe wiisen sam me in meinisin. Nge, Jiowa epwe alisuk om kopwe eani wiisom kewe mi chommong ika ka tingor an alillis ren luku. Awewe chok: Anchangei mwo pwe ka ekieta eu chota mi chou ngeni leeniom mi nonnom lon eu imw mei wor fitu sassar. Kopwe tota won efoch nate ika kopwe tongeni fiti ewe elevator? Aapwi! Pwal ussun chok, kesap sotun pwisin eki ekkewe osukosuk mi chou ika kopwe tongeni tingorei an Jiowa alillis. Ren enletin, a etiwok om kopwe fos ngeni. Kol Fel 68:19, NW, a apasa: “Jiowa epwe feioch, ewe mi uwei osach iteiten ran.” Pwal ussun chok, 1 Piter 5:7 a etiwok om kopwe likit ngeni Jiowa osom kewe meinisin pun “epwe amwochuk.” Ina popun lupwen ka chouchou ren om kewe osukosuk me aurek, iotek ngeni Semom mi nonnom lang, me kosap “ukutiu seni.”​—1 Tesalonika 5:17; Kol Fel 18:6; 55:22.

¹⁵ Ren chok awewe, ika en emon in, ese mwaal pwe ka lolileniesini etipetipaen chienen noum kewe lon sukul are ekkewe sossotun  luku repwe toriir. (1 Korint 15:33) Mei wor popun kopwe lolilen. Nge mei pwal wor popun kopwe iotek ussun ekkeei mettoch. Pwata kesap iotek ussun ekkeei mettoch me noum kewe mwen ra feilo sukul, eli mwirin oua fori ewe lesenin ran? Ekkewe iotek mi titchik mi feito seni letip repwe tongeni achungu letipen noum kewe. Nge lap seni meinisin, ka esenipato an Jiowa feioch lupwen ka mosonoson le fotukalong an we Kapas lon letipen noum kewe. (Tuteronomi 6:6, 7; An Salomon Fos 22:6) Chechchemeni, “mesen ewe Samol mi chok nennengeni ekkewe aramas mi pung, o selingan mi susuuk ngeni ar kewe iotek.”​—1 Piter 3:12; Filipai 4:6, 7.

16, 17. (a) Met emon mwan a apasa ussun ewe tong inan we a pwarata? (b) Ifa ussun met iner a achocho ngeni lon pekin ngun a kku letipen noun kewe?

¹⁶ Ekieki mwo porausen Olivia, inen emon at me nimmon nengngin. Puluwan ese fiti an luku me a likitiirelo mwirin ewe saingoon nengngin a uputiu, nge Olivia a tinikken le emiriti noun kewe lon alen Kot. Noun Olivia itan Darren, a limu ierin lon ena fansoun, nge iei a 31 ierin me a eani ewe wiis elter me pioneer. Darren a chuen osukosuk ren ewe semmwen a uri le kukkunun me ena semmwen a alapalo an Olivia aurek. Lupwen Darren a anchangei manauan le kukkunun, a apasa: “Ua chuen chechchemeni ai mommot lon ai pet lon ewe pioing me ai mwotores le witiwiti Mama. Epwe mot rei me alleaani ewe Paipel ngeniei iteiten ran. Mwirin epwe kol, ‘Sia Kilisou Jiowa.’ * Tori iei, ina ewe kol ua saani lap seni meinisin.”

¹⁷ An Olivia lukuluk me tong fan iten Jiowa a alisata an wiliiti emon in esor puluwan mi sopwoch. (An Salomon Fos 3:5, 6) Sia kuna an ekiek mi murinno lon ekkewe goal a isetiu mwen noun kewe. Darren a apasa: “Mama a peseikem le achocho ngeni ewe angangen afalafal full-time fansoun meinisin. Iwe, mwiriloon, ngang me fomon me lein fefinei kewe limmon, aua afalafal full-time. Nge, Mama ese sikasik ussun ekkeei mettoch ngeni aramas. Ua fokkun achocho le appiru lapalapan kewe mi murinno.” Pwungun pwe esap ekkewe nau meinisin ra maarita me angang ngeni Kot ussun chok noun Olivia kewe ra fori. Nge ika emon in a fori ukuukun an tufich le atipeeu manauan ngeni ekkewe alongolongun alluk seni ewe Paipel, iwe, epwe tongeni lukuluk won an Jiowa emmwen me alillis.​—Kol Fel 32:8.

18. Ifa ussun sipwe tongeni pwarata pwe sia aucheaani ewe mwichefelin chon Kraist Jiowa a awora?

¹⁸ Lape-ngeni ewe alillis seni Kot a kawor ren  ewe mwichefelin chon Kraist, ren ewe mongo lon pekin ngun a awora, ren ewe mwichen pwipwi chon Kraist, me ren “mwan mi ussun chok liffang” mi asimau lon pekin ngun. (Efisus 4:8, NW) Ekkewe elter mi tuppwol ra chofo le apochokkulata meinisin lon ewe mwichefel, me ra tumunufichi osupwangen “ekkewe semirit mi masen, o pwal ekkewe fefin mi malo puluer, lon ar fansoun riaffou.” (Jemes 1:27) Ina popun, kopwe fitipacheiti noun Kot kewe aramas, nge kosap imwulo seniir.​—An Salomon Fos 18:1; Rom 14:7.

Lingen An Kot Kokkot Fan Iten Emmwen Lon Ewe Famili

19. Met popun an ewe fefin anomu fan puluwan ese pwarata pwe mwan mi murinno seni fefin, me menni poraus lon ewe Paipel a pwarata pwungun ei mettoch?

¹⁹ Jiowa a fori ewe fefin pwe chon alillisin ewe mwan. (Keneses 2:18) Ina popun an ewe fefin nonnom fan nemenien puluwan ese wewe ngeni pwe mwan mi murinno seni fefin. Nge, a alingalo emon fefin, me a mut ngeni an aea chommong liffangan kewe me an kewe tufich fan tipeeu ngeni letipen Kot. An Salomon Fos sopwun 31 a awewei ekkewe wiisen emon fin pupulu mi lipwakoch lon Israel loom. A alisi ekkewe mi osupwang, a fotuki ekkewe atakeen krep, me a kamo fonu. Ewer, “pwuluan we a anomu an apilukuluk won, esap fokun wor an woungau.”​—Wokisin 11, 16, 20.

20. (a) Ita met ekiekin ekkewe fefin chon Kraist ussun ar kewe tufich are liffang seni Kot? (b) Ikkefa ekkewe lapalap mi murinno Ester a pwaralo, me ifa ussun Jiowa a tongeni nouni i noun chon angang?

²⁰ Emon fefin mi tipetekison me niuokkusiiti Kot ese atekiata pwisin i are akkuffengen me puluwan we. (An Salomon Fos 16:18) Ese kukkutta minne epwe apwapwai pwisin i ren an chechchei mettochun fonufan nge epwe aea ekkewe liffang seni Kot ren an angang ngeni aramas, akkaewin an famili, chienan kewe chon Kraist, chon orun kewe, me lap seni meinisin, Jiowa. (Kalesia 6:10; Taitos 2:3-5) Ekiek ussun porausen Kiwin Ester lon ewe Paipel. Inaamwo ika a lioch, nge a tipetekison me alleasochis. (Ester 2:13, 15) Lupwen a pupulu, a pwarata sufol ngeni puluwan, King Ahasuerus, nge ese ussun chok puluwen ewe king loom itan Vashti. (Ester 1:10-12; 2:16, 17) Ester a pwal auseling fan sufol ngeni Mortekai, an we cousin mi watte seni, ussun ekkewe mettoch mi auchea​—pwal mwo nge mwirin an a wiliiti kiwin. Nge Ester ese nisimwa! A pwora le pwarata pwe Haman, emon mwan mi foummong me rochongau, a rauengau an epwe nnielo ekkewe chon Jus. Jiowa a nounou Ester noun chon angang fan iten tumunun noun kewe aramas.​—Ester 3:8–4:17; 7:1-10; 9:13.

21. Ifa ussun emon fefin chon Kraist epwe tongeni alapalo aucheaan ngeni Jiowa?

²¹ A ffat pwe me loom me ikenai, ekkewe fefin mi sufoliiti Kot ra fen pwarata ar tuppwol ren ar fel ngeni Jiowa chok. Ina popun, ekkewe fefin mi niuokkusiiti Kot ra auchea ngeni Jiowa. Ami kana sister chon Kraist, mut ngeni ngunun Jiowa an epwe alapalapakemi ekis me ekis ngeni eu “sepi” mi auchea, “mi ammolata ngeni sokkun angang murinno meinisin.” (2 Timoti 2:21; Rom 12:2) An Kot we Kapas a apasa ussun ena esin chon fel mi auchea: “Oupwe ngeni neminewe liwinin an angang. A fich ngeni pwe aramas meinisin repwe meniniti.” (An Salomon Fos 31:31) Amwo ina met epwe pwonueta won emon me emon leimi.

[Ekkewe pwóróus fan]

En Mi Chechchemeni?

• Ifa ussun ekkoch fefin chon Kraist ra auchea ngeni Jiowa lon ewe aewin senturi?

• Ifa ussun chommong fefin chon Kraist lon ei fansoun ra fokkun auchea ngeni Kot?

• Ifa ussun Jiowa a alisi ekkewe in esor puluwer me ekkewe sister mi lipich?

• Ifa ussun ekkewe fefin repwe pwaralo ar sufoliti an Kot kokkot fan iten emmwen lon ewe famili?

[Ekkewe Kapas Eis fan Iten ewe Lesen]

[Pwoor lon pekin taropwe 17]

Ekkewe Leenien Appiru Sipwe Ekieki Ussun

En mi mochen kaeo ussun pwal ekkoch fefin mi tuppwol a mak lon ewe Paipel? Ika pwe wuu, kose mochen alleaani ekkewe wokisin mi mak fan. Lupwen ka ekkekieki ussun emon me emon mi mak fan, ekieki ussun ekkewe kapasen alongolongun alluk kopwe tongeni alapalo le apwonueta lon manauom.​—Rom 15:4.

❖ Sera: Keneses 12:1, 5; 13:18a; 21:9-12; 1 Piter 3:5, 6.

❖ Ekkewe Fin Israel mi Kisaseu: Ekistos 35:5, 22, 25, 26; 36:3-7; Luk 21:1-4.

❖ Tepora: Soukapwung 4:1–5:31.

❖ Rut: Rut 1:4, 5, 16, 17; 2:2, 3, 11-13; 4:15.

❖ Fin Shunem: 2 King 4:8-37.

❖ Fin Kenan: Mattu 15:22-28.

❖ Marta me Meri: Mark 14:3-9; Luk 10:38-42; Jon 11:17-29; 12:1-8.

❖ Tapita: Fofor 9:36-41.

❖ Noun Filip kewe fomon nengngin: Fofor 21:9.

❖ Fipi: Rom 16:1, 2.

[Sasing lon pekin taropwe 15]

En mi kan apunga pwiich kewe fefin mi lipich fan iten ar tuppwol le alleasochisi an Kot kewe alluk?

[Sasing lon pekin taropwe 16]

Ikkefa ekkewe tingor mi titchik sipwe chechchemeni lon ach iotek mwen nouch kewe repwe feilo sukul?