666 Esap Eu Esissin Mi Lamot Kisikis

“Esap wor emon epwe tongeni kamo are amomo ika ewe esisin ese nom ren. Iei ewe esisin: iten ewe manmocho, are nampaan itan we. Mi wor lamoten tipatchem iei. Eka e wewe ren epwe alleani nampaan ewe manmocho, pun an we nampa mi nampaan emon aramas; iei an we nampa: wonupuku-wone-me-wonu.”​—Pwarata 13:17, 18.

ESE wor poraus lon Paipel a fen aosukosuka are luki letipen aramas lap seni ewe oesini ussun ewe esissin mi monomonolo, are iten ewe “manmocho”​—ewe nampa 666. Won TV, Internet, lon kachito, puk, me chassi, aramas ra fos chommong ussun ekiekir won weween ewe nampa.

Ekkoch ra luku pwe 666 a wewe ngeni ewe antikraist lon Paipel. Pwal ekkoch ra apasa pwe a wewe ngeni eu allukun muu fan iten sileloon aramas, ussun chowean tattoo are eu microchip mi fotolong lon inisin aramas a esissinata pwe ir noun ewe manmocho chon angang. Mei wor chokkewe mi luku pwe 666 a weneiti nouwisin ewe lamalam Katolik. Ika ra siwili ekkewe mesen mak ren itelapen ewe papapin, Vicarius Filii Dei (An Noun Kot Nouwis) ren nampaan Rom, me ekis siwiliir, iwe, ra kuna 666. A wor aramas ra apasa pwe repwe alleaani 666 seni iten ewe Kepinan Rom, Diocletian lon fosun Latin me seni iten Nero Sisar lon fosun Ipru. *

Ekkeei awewe mi amairu forien aramas ra fokkun sokko seni ewe awewe lon ewe Paipel ussun chok sipwe kuna lon ewe poraus mwirin ei. A pwa lon ewe Paipel pwe chokkewe mei wor ewe esissin repwe kuna an Kot song lupwen epwe awesalo ei otot won fonufan. (Pwarata 14:9-11; 19:20) Ina popun, ach weweiti weween 666 a fokkun lamot seni ach silei weween eu esissin. Sia pwapwa pwe Jiowa Kot, ewe liosun tong me ewe Popun saram lon pekin ngun, ese mochen amwochu seni noun kewe chon angang weween ei poraus mi lamot.​—2 Timoti 3:16; 1 Jon 1:5; 4:8.

[Pwóróus fan]