An Jiowa We Kapas Mi Manau

Menlapen Poraus Seni Ewe Puken Numperis

MWIRIN ar towu seni Isip, chon Israel ra fen kkotol ngeni eu muu. Ekiselo chok mwirin ena, repwe ita fonueni ewe Fonu Mi Pwonetiu nge ese fis. Ra wiisen saifetal arapakan faik ier lon “ewe fanuapo mi watte o eniwokus.” (Tuteronomi 8:15) Pwata? Porausen uruwoon Israel lon ewe puken Numperis a awewe ngenikich met a fen fisita. Ena poraus epwe menlapei ewe lamoten ach sipwe alleasochisi Jiowa Kot me sufoliiti ekkewe aramas ra tupuni i.

Moses a makkei ewe puken Numperis lon ewe fonupoon me won ewe sonosonochun Moap. Ewe puk a awewe won met a fis atun 38 ier me 9 maram​—seni 1512 B.C.E. tori 1473 B.C.E. (Numperis 1:1; Tuteronomi 1:3) Iten ewe puk a pop seni ekkewe ruu fansoun a fen fis alleaan choochoon chon Israel, ewe oruuan allea 38 som ier mwirin ewe aewin. (Sopwun 1-4, 26) Mei wor ulungat kinikinin ei awewe. Ewe aewin a awewe won met a fis unukkun ewe Chuuk Sainai. Ewe oruuan, met a fis atun an Israel saifetal lon ewe fonupoon. Me ewe aulungatin kinikin, met a fis lupwen ra nonnom won ewe sonosonochun Moap. Atun om alleaani ei poraus, kopwe tongeni pwungupwung won ekkeei kapas eis: ‘Met ua tongeni kaeo seni met a fen fisita? Mei wor kapasen alongolongun alluk mi tongeni efeiochuei lon ei fansoun?’

UNUKKUN EWE CHUUK SAINAI

(Numperis 1:1–10:10)

Ewe aewin alleaan choochoon chon Israel a fen fisita atun ar nonnom unukkun ewe Chuuk Sainai. Choochoon ekkewe mwan mi lu seni 20 ierir, nge ese kapachelong ekkewe chon Lifai, a tori 603,550. Ei alleaan aramas a fisita fan iten ar repwe silei fitemon repwe tongeni wiliiti sounfiu. Neman choochoon ir meinisin, kapachelong fefin, semirit, me ekkewe chon Lifai epwe fen lu seni ulungat milion aramas.

Mwirin alleaan ekkewe aramas, ra angei alluk mi weneiti ifa ussun repwe kkotoch le fetal, porausen wiisen ekkewe chon Lifai mi angang lon ewe imw mangaku, alluk mi weneiti ifa ussun chon semmwen repwe aimu seni ekkewe ekkoch, alluk mi weneiti osukosuk pokiten lolowo, me ekkewe pwon an ekkewe chon Nasir. Sopwun 7 a kapachelong porausen an ekkewe samolun einang asor lupwen ra poputa aean ewe rong, me sopwun 9 a awewei ifa ussun repwe chechchemeni ewe Pasofer. A pwal wor poraus ren ifa ussun ewe mwichen aramas repwe akkotaochu ar leenien asoso me ifa ussun repwe feilo seni ena leeni.

Poluen Ekkewe Kapas Eis Ussun Ewe Paipel:

2:1, 2​—Ikkefa ekkewe ‘asissil’ eu me eu kumiin ulungat einang epwe nonnom unukkun lupwen repwe asoso atun ar saifetal lon ewe fonupoon? Ewe Paipel ese awewe lapalapen ekkeei esissin. Iwe nge, aramas rese ekieki pwe ir esissin mi pin are pisek fan iten fel. Ir mi lamot pokiten ra alisi aramas ar repwe silei ia a nonnom ie leenier.

Ekkewe Lesen Fan Itach:

6:1-7. Ekkewe chon Nasir resap ochoch kreip are met a ffor seni kreip me resap unumi sokkun sakau meinisin. A lamot nemenem won ar mochen. Resap fichi mokur​—esissinnen ar anomuur fan an Jiowa nemenem, ussun chok ekkewe fefin repwe anomuur fan nemenien puluwer are semer. Ekkewe chon Nasir repwe amwochu limoch ren ar resap attapa soma, pwal mwo nge inisin aramaser kewe. Ekkewe pioneer ikenai ra pwarata ena  esin ekiek ren ar pennukuolo ekkewe mettoch ra mochen eani are fori pokiten ar anomuur fan Jiowa me an kewe kokkot. Fan ekkoch ra wiisen feilo ngeni eu fonu mi towau seni fonuer me epwe weires are esap tufich ar repwe liwinlo pwal mwo nge lupwen a malo emon attonger we.

8:25, 26. Mi alluk pwe mwan chinnap repwe retire seni wiiser ussun chok chon Lifai pokiten ar apwangapwangen chinnap me fan iten an epwe chuen fisoch ewe angang. Iwe nge repwe tongeni volunteer le alisi ekkewe ekkoch chon Lifai. Lon ach ei fansoun aramas rese retire seni wiiser le esilefeili ewe Muu, nge ewe kapas ei alluk a alongolong won a aiti ngenikich eu lesen mi auchea. Ika emon chon Kraist a chinnapelo me ese chuen tongeni apwonueta ekkoch wiisan kewe, iwe, epwe chok achocho ngeni met a tongeni fori.

SAIFETAL LON EWE FONUPOON

(Numperis 10:11–21:35)

Lupwen ewe kuchu won ewe imw mangaku a feita, ekkewe chon Israel ra poputa ar fetal me ewe kuchu a emmwen ngeniir ewe sonosonochun Moap mwirin 38 ier eu are ruu maram. Kopwe tongeni nengeni alen ar fetal lon pekin taropwe 9 lon ewe puk “See the Good Land,” forien Chon Pwarata Jiowa.

Lupwen ra feilo ngeni Kates, lon ewe fonupoon an Paran, mei wor ulungat porausen ar lalangau. A wes ar lalangau akkom lupwen Jiowa a tiinato ekkei pwe epwe nnielo ekkoch ekkewe aramas. Oruuen, ra lalangau pokiten ra mochen ochoch futuk me Jiowa a tiinato ekkewe matchang iter kweil. Miriam me Aaron ra lalangau ngeni Moses me Miriam a uri rupun pwotur.

Seni Kates, Moses a tiinalo 12 mwan ren ar repwe spai lon ewe Fonu Mi Pwonetiu. Ra liwin mwirin 40 ran. Ekkewe aramas ra lukuluk won ekkewe poraus mi ngau seni engol lein ekkewe spai me ra mochen monei ngeni fau Moses me Aaron, fengen me ekkewe spai mi tuppwol, Josua me Kalep. Jiowa a ekiekieta pwe epwe kku ekkewe aramas ren eu matter nge Moses a affor fan iter, me Jiowa a apasa pwe repwe saifetal lon ewe fonupoon ren 40 ier​—tori chokkewe ra fen allea ra malo.

Jiowa a awora pwal ekkoch alluk. Kora me ekkoch mwan ra u ngeni Moses me Aaron, nge ekkewe chon u ngeniir ra malo lon ekkei are ewe fonufan a suukulo me a ussun ita oromalo ir. Lon ewe soran unusen meinisin ra lalangau ngeni Moses me Aaron. Pokiten ena, 14,700 ra malo pokiten eu semmwen seni Jiowa. Ren an epwe affata pwe io filian fan iten ewe wiis samol fel, Jiowa a efisi pwe wokun Aaron we epwe fasar. Jiowa a pwal awora alluk mi weneiti wiisen ekkewe chon Lifai ar repwe alimelima ekkewe aramas. Aean falangen ewe kou mi par a liosueta ewe alimelim a fisita ren an Jises we asor.​—Ipru 9:13, 14.

Noun Israel kewe ra liwinlo Kates, me ina ewe leeni ia Miriam a malo ie. Ewe mwichen aramas ra lalangau sefal ngeni Moses me Aaron. Ewe popun: nafangauen konik. Pokiten Moses me Aaron rese epini iten Jiowa lupwen ewe konik a kawor, a pout seniir ar tufichin tolong lon ewe Fonu Mi Pwonetiu. Israel a  feilo seni Kates, me Aaron a malo lupwen ra nonnom unukkun ewe Chuuk Hor. Lupwen ra pwellifeili Etom, ekkewe chon Israel ra achanu me a pop sefal ar lalangau ngeni Kot me Moses. Jiowa a tiinalo ekkewe serepenit mi poison ren an epwe apwunguur. Moses a affor sefal fan iter, me Kot a era pwe Moses epwe fori eu serepenit seni kapa me eitiuata won efoch ira pwe aramas mi feiengau repwe chikar ren ar nengeni ewe serepenit. Ewe serepenit a liosueta Jises mi eitiueta won efoch ira fan itach pwe sipwe angei eu feioch mi nomofoch. (Jon 3:14, 15) Israel a akkufu ekkewe kingen Amor iter Sihon me Ok me ra fonueni fonuer.

Poluwen Ekkewe Kapas Eis Ussun Ewe Paipel:

12:1​—Met popun Miriam me Aaron ra lalangau ngeni Moses? Ewe popun wesewesan pwe Miriam a mochen alapalo an nemenem. Lupwen puluwen Moses we, Sipora, a fitisefalli Moses lon ewe fonupoon, eli Miriam a ekieki pwe aramas resap chuen ekieki pwe i ewe fefin mi foummong seni meinisin lein ekkewe aramas.​—Ekistos 18:1-5.

12:9-11​—Met popun Miram chok a uri rupun pwotur? Ese mwaal Miriam ewe emon a poputani ei lalangau me a etipetipa Aaron an epwe peni i. Aaron a pwarata ekiek mi murinno lupwen a pwari an tipis.

21:14, 15​—Ifa ewe puk lon ei wokisin? Mei wor porausen sokkopaten puk lon ewe Paipel me chokkewe mi makkei ewe Paipel ra nounou ekkena puk ren ar repwe kutta poraus. (Josua 10:12, 13; 1 King 11:41; 14:19, 29) “Ewe puken maun an ewe Samol mi Lapalap” eu me leir. A mak lon ei uruwo porausen ekkewe maunen noun Jiowa kewe aramas.

Ekkewe Lesen Fan Itach:

11:27-29. Moses a isetiu eu leenien appiru mi murinno ren met sipwe fori lupwen aramas ra angei wiiser mi auchea lon an Jiowa angang. Moses ese lolowo. Ese kutta pwe i chok epwe lingelo. Moses a pwapwa lupwen Eltat me Metat ra wiiseni wiiser.

12:2, 9, 10; 16:1-3, 12-14, 31-35, 41, 46-50. Jiowa a mochen pwe chokkewe mi fel ngeni repwe sufoliiti nemenem seni lang.

14:24. Eu alillis fan iten ach sipwe u ngeni etipetipaen fonufan a kawor lupwen sia amaaraata ‘ekiek mi sokola.’ Ekiekich esap ussun ekiekin fonufan.

15:37-41. Ewe fout le pwulun ufen chon Israel epwe achema ngeniir pwe ir eu aramas mi kaimulo fan iten ar repwe fel ngeni Kot me alleasochisi an kewe alluk. Sisap pwal manaueni manauoch me ren an Kot kewe minen aukuk mi aimukichelo seni fonufan?

WON EWE SONOSONOCHUN MOAP

(Numperis 22:1–36:13)

Lupwen Israel a nonnom won ewe sonosonochun Moap, ekkewe chon Moap ra niuokkus. King Pelak seni Moap a tiiti Pelam me a mochen pwe Pelam epwe anumamaua Israel. Nge Jiowa a eriani Pelam an epwe efeiochu Israel. Fin Moap me Mitian ra michi ekkewe re Israel  me ra kkuf ren lisowu mwaal me fel ngeni uluulun. Ina popun Jiowa a nnielo 24,000 chon tipis. Ewe nninni a wes lupwen Fineas a pwarata an tuppwol ngeni Jiowa.

Ewe oruuen alleaan choochoon aramas a pwalo pwe ese wor mwan mi chuen manau seni ewe aewin alleaan aramas, chinon chok Josua me Kalep. Josua a seikita fan iten an epwe wi Moses. Kot a awewei ifa ussun chon Israel repwe eani sokkopaten asor me ifa ussun repwe pwon ngeni Kot. Aramasen Israel ra liwiningau ngeni chon Mitian. Rupen me Kat me lesopwun ewe einangen Manasa ra fonueni ewe fonu otiuen ewe chanpupu Jortan. A wor poraus ren ifa ussun Israel epwe pwerelo ewe chanpupu Jortan me fonueni ewe fonu. A ffatolo kiannin ewe fonu. Ewe fonu epwe ainet ren uttut. Mei wor 48 telinimw fan iten ekkewe chon Lifai me wonu leir repwe wiliiti telinimwen op.

Poluwen Ekkewe Kapas Eis Ussun Ewe Paipel:

22:20-22​—Met popun Jiowa a fokkun song ngeni Pelam? Jiowa a fen ereni Pelam pwe esap anumamaua Israel. (Numperis 22:12) Iwe nge, ewe soufos a fiti noun Pelak kewe mwan pokiten a mochen anumamaua Israel. Pelam a mochen apwapwai ewe kingen Moap me angei eu liffang seni atewe. (2 Piter 2:15, 16; Juta 11) Pwal mwo nge lupwen Pelam ese tongeni anumamaua Israel nge a efeiochuur, a chuen kutta ifa ussun epwe apwapwai i ren an ereni ewe king pwe ekkewe fefin mi fel ngeni Paal repwe konfengen me ekkewe re Israel. (Numperis 31:15, 16) An Pelam tipemmong ese aukuk ewe popun a fokkun pwichikkar an Kot song ngeni Pelam.

30:6-8​—Emon Mwan chon Kraist a tongeni awesi minne puluwan we a eani pwon? Lon ei fansoun, ren ekkewe pwon, Jiowa a angang ren emon me emon mi fel ngeni. Ren chok awewe, an emon fangolo manauan ngeni Jiowa eu pwon lefiler me ruuemon chok. (Kalesia 6:5) Emon mwan pupulu ese tongeni awesi eu mettoch puluwan we a fen pwonei. Iwe nge, pwal ussun chok emon fin pupulu epwe sotun an esap fori eu pwon mi u ngeni an Kot we Kapas are wiisan ngeni puluwan we.

Ekkewe Lesen Fan Itach:

25:11. A ifa me watteen ewe leenien appiru ren tinikken fan iten fel ngeni Jiowa Fineas a isetiu! Ren ach mochen pwe ewe mwichefel epwe limoch esap fen amwokutukich le affata ngeni ekkewe elter met sia silei ussun eu tipis mi watte?

35:9-29. Sia kaeo pwe manau eu mettoch mi fokkun pin me sia wiisen sufoliiti. Ei poraus a pwalo ren met emon a nnielo aramas nge aksiten chok epwe wiisen fori. Atewe a wiisen likitalo leenian me sulo ngeni ewe telimwen op me nonnom ie.

35:33. Ewe fonufan a fen limengauolo ren chchaan aramas esor tipisir me ena nni manau epwe tongeni tolulo ren chchaan ekkewe chon nni manau. A fen fich pwe Jiowa epwe nnielo ekkewe aramas mi ngau mwen fonufan a wiliiti eu paratis!​—An Salomon Fos 2:21, 22; Taniel 2:44.

An Kot We Kapas Mei Wor Manaman

Sipwe sufoliiti Jiowa me chokkewe ra eani wiiser seni Jiowa lein noun kewe aramas. Ewe puken Numperis a affata ei poraus ngenikich. A ifa me watteen ei lesen fan iten ach sipwe amwochu kinamwe me tipeeu lon ewe mwichefel!

Ekkewe poraus mi makketiu lon ewe puken Numperis ra pwarata ukuukun mecheresin ekkewe aramas mi tumunungau ngeni ar pochokkul lon pekin ngun ra tongeni turutiu pokiten tipis, ussun chowean ngunungunungau, lisowu mwaal, me fel ngeni uluulun. Ekkewe leenien appiru me ekkewe lesen seni ei puk lon ewe Paipel ra tongeni wiliiti longolongun ekkewe afalafal fan iten ewe Service Meeting an Chon Pwarata Jiowa, lupwen a wor lamoten poraus mi sokkolo lapalapan fan iten ewe mwichefel. Pwungun pwe “ewe kapasen Kot mi manau o manaman” lon manauach.​—Ipru 4:12.

[Sasing lon pekin taropwe 29]

Ren eu kuchu won ewe imwenfel, Jiowa a affata ineet repwe nonnom me ineet repwe sailo

[Sasing lon pekin taropwe 30]

Jiowa a fich ngeni ach alleasochis me a mochen pwe sipwe sufoliiti chokkewe ra tupuni i