Ekkewe Chinnap—ir Eu Kinikin Mi Auchea Lon Ewe Mwichen Pwipwi An Chon Kraist

“Ir mi fotutiu lon imwen ewe SAMOL, ra chommongelo. . . . Ra chuen uwa lon ar ier chommong.”​—KÖLFEL 92:13, 14.

1. Ifa ekiekin chommong aramas ussun ekkewe mi chinnap?

 JIOWA a tongei noun kewe chon angang mi tuppwol meinisin, kapachelong chokkewe mi chinnap. Nge ekkoch nouwis ra esissin pwe iteiten ier orun esop milion chinnap lon Merika ra riaffou pokiten tumunungau are kirikiringau. Pwal ekkoch poraus mi wewe chok seni ekis meinisin won fonufan a pwarata pwe kirikiringau ngeni ekkewe chinnap ina eu osukosuk won unusen fonufan. Eu mwicheich a apasa pwe ei osukosuk a pop seni “chommongun an aramas kewe ekiek . . . pwe aramas mi chinnap rese chuen lamot, rese chuen tongeni angang me a kon watte ewe alillis ra osupwang ren.”

2. (a) Ifa ekiekin Jiowa ussun noun kewe chon angang mi chinnap mi tuppwol? (b) Menni awewe lon Kol Fel 92:12-15 a apwapwai letipach?

² Jiowa Kot a aucheaani noun kewe chon angang mi chinnap mi tuppwol. A anefota “letipach”​—lapalapach lon pekin ngun​—nge esap ach kewe apwangapwang. (2 Korint 4:16) Lon an we Kapas, ewe Paipel, sia tongeni alleaani ekkeei kapas mi alukulukukich: “Ekkewe aramas mi pung ra chommongelo usun chok ekkewe rupung, o ra mamarita usun chok efoch ira sitar lon Lepanan. Ir mi fotutiu lon imwen ewe SAMOL, ra chommongelo usun lon ekkewe weip fel an ach Kot. Ra chuen uwa lon ar ier chommong, fansoun meinisin ra ur ren apach, o ar chon mi arauarau, pwe repwe pwarata pwe ewe SAMOL a pung.” (Kol Fel 92:12-15) Ach kaeo ussun ekkeei wokisin epwe pwarata sokkopaten mettoch mi auchea ami chinnap oua awora ngeni ewe mwichen pwipwi an chon Kraist.

“Ra Chuen Uwa Lon Ar Ier Chommong”

3. (a) Met popun ekkewe mi pwung ra ussun chok ekkewe rupung? (b) Ifa ussun ekkewe chinnap repwe tongeni “chuen uwa lon ar ier chommong”?

³ Ewe sou mak kol mi fel a alollo ekkewe mi pwung ngeni ekkewe rupung ‘mi fotutiu lon ekkewe weip fel an ach Kot.’ Ra “chuen uwa lon ar ier chommong.” Kese tipeeu pwe ei poraus a apochukalakich? Aramas lon fansoun ewe Paipel ra fotuki ekkewe rupung mi lingoch me tekia lon kianin leenier kewe. Ekkewe rupung rese chok ling nge, aramas ra aucheaaniir pokiten ra uwaoch, me ekkoch ira ra uwa ren lap seni ipuku ier. * Ren om nukuchar  le fotutiu lon fel mi enlet, kopwe pwal “uwa lon sokkun angang mi murinno meinisin.”​—Kolose 1:10.

4, 5. (a) Menni uwa mi lamot ekkewe chon Kraist repwe uwaani? (b) Apasawu porausen ekkoch chinnap lon Paipel mi uwaani ‘uwan tinauer.’

⁴ Jiowa a kutta seni ekkewe chon Kraist ar repwe uwaani ‘uwan tinauaer’​—ekkewe kapas sia apasawu le mwareiti i me an kewe kokkot. (Ipru 13:15) Ei poraus a weneituk pokiten en emon mi watte ierum? Fokkun ewer.

⁵ Ewe Paipel a masou ren porausen chokkewe mi chinnap mi afalafal ussun iten Jiowa me an kewe kokkot fan pwora. Moses a fen lu seni “fiik” ierin lupwen Jiowa a awiisa ngeni ewe wiis soufos me chon tupuni i. (Kol Fel 90:10; Ekistos 4:10-17) An ewe soufos Taniel chinnapelo ese pinei an afalafal fan pwora ussun an Jiowa pwungun nemenem. Taniel a fen 90 som ierin lupwen Pelsassar a tiiti i pwe epwe awewei ekkewe mesen mak mi monomon won ewe tikot. (Taniel, sopwun 5) Nge ifa ussun ewe aposel mi chinnap itan Jon? Le muchuloon an angang fan tuppwol mi langattam, a kalapus won ewe to itan Patmos “fan asengesin an Kot we kapas o an Jises Kraist we pwarata.” (Pwarata 1:9) Ese mwaal ka tongeni chechchemeni chommong mi mak iter lon Paipel mi fen uwaani ‘uwan tinauer’ lupwen ra chinnapelo.​—1 Samuel 8:1, 10; 12:2; 1 King 14:4, 5; Luk 1:7, 67-79; 2:22-32.

6. Ifa ussun Jiowa a awiisa ngeni ekkewe “mwan chinnap” ar repwe oesini lon ekkeei ran le sopwolon?

⁶ Ewe aposel Piter a aloni alon ewe soufos chon Ipru itan Sowel lupwen a apasa: “Kot a apasa, pwe lon ekkewe sopolon ran, upwe niinatiu Nguni won sokkun fituk meinisin [kapachelong ekkewe mwan mi chinnap], . . . repwe tana ekkoch tan.” (Fofor 2:17, 18; Sowel 2:28) Ina popun lon ekkeei ranin le sopwolon, Jiowa a nounou ekkewe mi chinnap lon ewe mwich mi kepit me chokkewe lein ekkewe “ekkoch siip” ar repwe esineifetallei an kewe kokkot. (Jon 10:16) Ekkoch me leir ra fen tuppwol le uwaani uwaan ewe Muu ren ier chommong.

7. Awewei ifa ussun ekkewe chinnap ra sopweilo ar uwaani uwaan ewe Muu inaamwo ika mi apwangapwang inisir.

⁷ Ekieki ussun Sonia, emon a wiliiti chon afalafala ewe Muu full-time lon 1941. Inaamwo ika a semmwen ren fansoun langattam nge, a kakkaeo ngeni aramas ussun ewe Paipel lon imwan. Sonia a apasa: “Ai afalafala ewe kapas allim kinikinin manauei. Pwungun pwe ina manauei. Use mochen retire.” Kanoto chok, Sonia me pwiin we watte, itan Olive, ra aporausa ngeni Janet, emon mi uri semmwen mi chou ewe apilukuluk lon Paipel lupwen ra chuuri lon ewe leenien witiwit lon pioing. Inen Janet, emon mi achocho lon ewe lamalam Katolik, a fokkun ingeiti ewe tong ra pwarata ngeni noun we pwe a tipeeu le kaeo Paipel me iei a feffeita. Kopwe pwal achocho le uwaani uwaan Muu?

8. Ifa ussun ewe chinnap Kalep a pwarata an lukuluk won Jiowa, me ifa ussun ekkewe chon Kraist mi chinnap repwe tongeni appiru an foffor?

⁸ Ren ach pworacho le afalafala ewe Muu inaamwo ika sia ppet ren chommongoloon ierich, ekkewe chon Kraist chinnap ra tapwelo lon ipwen ewe chon Israel mi tuppwol iten  Kalep, emon mi fiti Moses lon ewe fonu poon ren ukuukun faik ier. Kalep a 79 ierin lupwen a feilo pekiloon ewe Chanpupu Jorotan me a tolong lon ewe Fonu mi Pwonetiu. Mwirin an fiti an Israel mwichen sounfiu mi win ren wonu ier, ita epwe fen tongeni menei ren met a fen fori me asosolo. Nge ese fori ena, a pwora le eani ewe wiis mi weires, wiisan le akkuffu ekkewe “telinimw ra watte o pochokul tittir” lon ewe leeni mi chukuchukuta lon Juta, leenien ekkewe mwannammong iter, chon Anak. Ren alillisin Jiowa, Kalep a “asurela, usun [Jiowa] a fen apasa.” (Josua 14:9-14; 15:13, 14) Kopwe lukuluk pwe Jiowa a nonnom reom, ussun chok a nonnom ren Kalep, lupwen ka sopweilo le uwani uwan ewe Muu lupwen ka chinnap. Me ika ka amwochu om tuppwol, epwe mutata om kopwe nonnom lon ewe fonufan sefo a fen pwonetiu.​—Aisea 40:29-31; 2 Piter 3:13.

“Fansoun Meinisin Ra Ur Ren Apach, O Ar Chon Mi Arauarau”

9, 10. Ifa ussun ekkewe chon Kraist mi chinnap repwe tumunu pochokkulen ar luku me amwochu ar pochokkul lon pekin ngun?

⁹ Lupwen ewe sou mak kol mi fel a mak ussun uwaochun noun Jiowa kewe chon angang mi chinnap, a koluwu: “Ekkewe aramas mi pung ra chommongelo usun chok ekkewe rupung, o ra mamarita usun chok efoch ira sitar lon Lepanan. Ra chuen uwa lon ar ier chommong, fansoun meinisin ra ur ren apach, o ar chon mi arauarau.”​—Kol Fel 92:12, 14.

¹⁰ Ifa ussun kopwe tongeni amwochu om pochokkul lon pekin ngun inaamwo ika ka chinnapelo? Lingen ekkewe rupung a feito seni chommongun konik mi murinno. Ussun we chok, kopwe tongeni angei pochokkul seni ewe konik mi enlet seni Paipel ren om kaeo an Kot Kapas me ren om chiechi ngeni an we mwicheich. (Kol Fel 1:1-3; Jeremaia 17:7, 8) Ka wiliiti emon mi auchea ngeni chienom chon luku pokiten om pochokkul lon pekin ngun. Ekieki ifa ussun fofforun ewe Samol Fel mi Lapalap mi chinnap itan Jehoiata a annetata ena mettoch.

11, 12. (a) Ifa ewe wiis mi lamot Jehoiata a wiiseni lon uruwoon ewe muun Juta? (b) Ifa ussun Jehoiata a eani wiisan pwe epwe alisata fel mi enlet?

¹¹ Ese mwaal pwe Jehoiata a lap seni ipuku ierin lupwen ewe kiwin mi ekimmong itan Atalia a angei nemenemen Juta ren an nnielo noun noun kewe. Met ewe chinnap Jehoiata a tongeni fori? Ren wonu ier, ir me puluwan we ra aopalo Joas, ewe epwe alemwiri ewe wiis king, lon ewe imwen fel. Mwirin, Jehoiata a esileifeili pwe ewe at Joas, fisu ierin, epwe king me a era pwe Atalia epwe nninniilo.​—2 Kronika 22:10-12; 23:1-3, 15, 21.

¹² Jehoiata a chuen tumunu ewe king, me a eani wiisan le alisata fel mi enlet. A “fori eu pwon lefilen i me ekewe aramas meinisin pwal ewe king, pwe ir repwe noun ewe Samol mi Lapalap aramas.” Me ren allukun Jehoiata, ekkewe aramas ra ataietiu imwen ewe kot mi chofona Paal me atatakisi ekkewe rong, ekkewe uluulun, me nnielo ewe sou asor. Pwal och, Joas fan emmwenien Jehoiata, a poputa sefalli ekkewe angang ra fiffis lon ewe imwen fel me a fforsefalli minne mi ta lon ewe imwen fel. “Joas a fori mine mi pwung me fan mesen ewe Samol mi Lapalap lon ranin manauan meinisin, pun ewe souasor Jehoiata a ouroura.” (2 Kronika 23:11, 16-19; 24:11-14; 2 King 12:2) Lupwen Jehoiata a malo lupwen a 130, aramas ra alinga i ren ar peiasini lein ekkewe king pokiten “a fori fofor mi murina ngeni chon Israel, ngeni Kot me ewe imwenfel.”​—2 Kronika 24:15, 16.

13. Ifa ussun ekkewe chon Kraist repwe tongeni ‘foffor murinno ngeni Kot me ewe imwenfel’?

¹³ Eli semmwen are pwal ekkoch osukosuk ra aukuuku met ka tongeni fori le alisata fel mi enlet. Nge inaamwo ika a ina ussun nonnomum, kopwe chuen tongeni ‘foffor murinno ngeni Kot me ewe imwenfel.’ Kopwe tongeni pwarata tinikken fan  iten imwen Jiowa lon pekin ngun ren om fiffiti ekkewe mwich me ewe angangen afalafal iteiten fansoun ka tufich le fori. Om tipemecheres le etiwa fon seni Paipel me om tuppwol le alisi ewe “mwich mi tuppwol o tipachem” me ewe mwichefel epwe apochokkulata an chon Kraist mwichen pwipwi. (Mattu 24:45-47) Kopwe pwal alololaata chiechiom chon luku “lon tong o fofor-murinno.” (Ipru 10:24, 25; Filemon 8, 9) Me kopwe efeiochu aramas ika ka atipeeufengenni om foffor ren an ewe aposel Paul fon: “Ekkewe mwan mi chinnap repwe mosonoson, o manauer epwe ammafel, repwe mirit, repwe pochokkul lon luku, lon tong, o lon likiitu. Pwal usun chok, ekkewe fefin mi chinnap​—ar kewe fofor epwe fich ngeni aramas mi fel, resap luapas, are nom fan nemenien wain; nge repwe afalafala ekkewe mettoch mi murinno.”​—Taitos 2:2-4.

14. Met ekkewe chon Kraist overseer mi fen eani wiiser ren fansoun langattam repwe tongeni fori le alisata fel mi enlet?

¹⁴ Ka fen eani ewe wiis elter lon ewe mwichefel ren fansoun langattam? Emon a fen eani ewe wiis elter ren fansoun langattam a apasa: “Nounouochu ewe tipatchem ka fen amaaraata. Awiisa ngeni aramas ekkoch wiiser, me aiti ngeni aramas mi mochen kaeo met ka silei . . . Kutta met aramas ra tufichin fori. Alapalo me amaaraata ekkena tufich. Ammonlata fan iten mwach kkan.” (Tuteronomi 3:27, 28) Om tinikken fan iten angangen ewe Muu mi lallapelo epwe uwani chommong feioch fan iten aramas lon ewe mwichen pwipwi an chon Kraist.

“Repwe Pwarata Pwe Ewe SAMOL A Pung”

15. Ifa ussun ekkewe chon Kraist mi chinnap repwe tongeni “pwarata pwe ewe SAMOL a pung”?

¹⁵ Noun Kot chon angang mi chinnap ra pwapwa le apwonueta wiiser le “pwarata pwe ewe SAMOL a pung.” Ika en emon chon Kraist mi chinnap, om kewe kapas me foffor repwe tongeni pwarata ngeni aramas pwe ‘Jiowa chok om achau, o esor och mi mwal ren i.’ (Kol Fel 92:15) Ewe ira rupung ese tongeni kapas nge a pwarata ussun lapalapen ewe Chon Forata mi lapalap seni meinisin. Nge Jiowa a atufichuk om kopwe pwarata ussun i ngeni chokkewe mi etiwa fel mi enlet. (Tuteronomi 32:7; Kol Fel 71:17, 18; Sowel 1:2, 3) Met popun a lamot?

16. Menni poraus lon Paipel a pwarata ewe lamoten ach “pwarata pwe ewe SAMOL a pung”?

¹⁶ Lupwen Josua, ewe sou emmwen lon Israel, a “fokun chinlap,” a “korifengeni chon Israel meinisin, nour kewe souemwen me souakom, nour kewe soukapwung me nour kewe meilap,” pwe epwe achema ngeniir fofforun Kot kewe mi pwung. A apasa: “Iteiten ekewe pwon a eani ngenikemi ra pwonueta, nge sap wor eu me leir esap pwonueta.” (Josua 23:1, 2, 14) Ren ekkoch fansoun, ekkeei kapas ra apochokkulata an ekkewe aramas mochen amwochu ar tuppwol. Iwe nge, mwirin maloon Joshua, “a marita eu pilon . . . resap silei ewe Samol mi Lapalap, resap pwal silei ekewe fofor a fori fan iten chon Israel. Murin, ekewe aramasen Israel ra fori mine a ngau me fan mesen ewe Samol mi Lapalap o angang ngeni ekewe anu Paal.”​—Soukapwung 2:8-11.

17. Ifa ussun fofforun Jiowa ngeni noun kewe aramas lon ei fansoun?

 ¹⁷ Tuppwolun ewe mwichefelin chon Kraist ikenai ese alongolong won met noun Jiowa kewe chon angang mi chinnap ra apasa. Nge, ach luku won Jiowa me an kewe pwon a pochokkulelo lupwen sia rongorong porausen ewe “fofor mi manaman” a fori fan asengesin noun kewe aramas lon ekkeei ranin sopwolon. (Soukapwüng 2:7; 2 Piter 1:16-19) Ika ka fen fiti an Jiowa mwicheich ren chommong ier, eli kopwe chechchemeni ewe fansoun lupwen mei wor chokisikis chok chon afalafala ewe Muu lon leeniom are fonuom are lupwen aramas ra fokkun u ngeni ewe angangen afalafal. Feil, feil, ka fen kuna ifa ussun Jiowa a amoielo ekkoch minen eppet me a ‘amuttiri’ chommongoloon chochoon ekkewe chon afalafal. (Aisea 54:17; 60:22) Ka fen kuna ffatoloon ekkewe enlet lon Paipel me ifa ussun an Kot mwicheich won fonufan a murinnoolo ekis me ekis. (An Salomon Fos 4:18; Aisea 60:17) Ka sotun apochokkulata aramas ren om aporausa ngeniir ekkewe mettoch mi weneiti fofforun Jiowa kewe mi pwung? A ifa me murinnoon ewe apochokkul epwe kawor ngeni ewe mwichen pwipwi an chon Kraist!

18. (a) Awewei mwiriloon ach “pwarata pwe ewe SAMOL a pung.” (b) Ifa ussun ka fen pwisin kuna an Jiowa pwung?

¹⁸ Ifa ussun ekkewe fansoun ka fen kuna an Jiowa tumun me emmwen mi tong lon manauom? (Kol Fel 37:25; Mattu 6:33; 1 Piter 5:7) Emon sister mi chinnap itan Martha a fen apochokkula aramas ren an apasa: “Ese lifilifil met a fis nge, kesap likitaalo Jiowa. Epwe alisuk.” Ei fon a fokkun alisi Tolmina, emon noun Martha chon kaeo mi papatais lon 1960. Tolmina a apasa: “Lupwen puluwei a malo, ua fokkun letipechou, nge ekkena kapas a apposa letipei pwe usap etiwalo ekkewe mwich. Me Jiowa a fokkun apochokkulaei pwe upwe tongeni likiitu.” Tolmina a aloni alon Martha ren an epwe alisi noun kewe chon kaeo. Pwungun pwe ren om pesei aramas me aporausa fofforun Jiowa kewe, kopwe tongeni apochokkula lukuen chienom kewe chon luku.

Jiowa A Aucheaani Ekkewe Chinnap Mi Tuppwol

19, 20. (a) Ifa an Jiowa ekiek ussun fofforun noun kewe chon angang mi chinnap? (b) Met sipwe kaeo lon ewe lesen mwirin ei?

¹⁹ Ewe fonufan ikenai a sinnelo ren nafangauen kilisou, me aramas rese afanni ekkewe mi chinnap. (2 Timoti 3:1, 2) Fan chommong aramas ra chechchemeniir pokiten met ra fen fori me loom nge esap met ra foffori iei. Mi mwaalfesen met a mak lon ewe Paipel: “Pun Kot mi pung, o esap monukalo ami angang me tong fan asengesin itan, mi ami oua pwaralo lon ami angang ngeni ekkewe aramas mi fel, seni lom tori ikenai.” (Ipru 6:10) Pwungun pwe Jiowa Kot a chechchemeni ekkewe angang mi tuppwol ka fen fori. Nge a pwal aucheaani minne ka chuen fori lon an angang. Ewer, a eani ewe ekiek pwe ekkewe chinnap mi tuppwol ra uwaoch, pochokkul lon pekin ngun, me ir chon Kraist mi tinikken​—aramas mi pwarata ussun an manaman.​—Filipai 4:13.

²⁰ Ka eani an Jiowa ekiek ussun ekkewe chinnap lon ewe chon Kraist mwichen pwipwi? Ika pwe wuu, epwe amwokutuk le pwarata om tongeer. (1 Jon 3:18) Ewe lesen mwirin ei epwe aitingenikich ifa ussun sipwe pwarata ena tong lupwen sia alisiir.

[Pwóróus fan]

Ikkefa Poluan Me Reom?

• Ifa ussun ekkewe chinnap ra “chuen uwa”?

• Met popun an ekkewe chinnap chon Kraist pochokkul lon pekin ngun eu minen feioch mi auchea?

• Ifa ussun ekkewe mi chinnap repwe tongeni “pwarata pwe ewe SAMOL a pung”?

• Met popun Jiowa a aucheaani noun kewe chon angang mi fen angang ngeni ren fansoun langattam?

[Ekkewe Kapas Eis fan Iten ewe Lesen]

[Sasing lon pekin taropwe 8]

Ekkewe chinnap ra uwani uwan Muu mi auchea

[Sasing lon pekin taropwe 10]

An ekkewe chinnap pochokkul lon pekin ngun eu minen feioch mi auchea