Forien Kot Kewe Ra Aporausa Lingan!

“Ekkewe lang ra aporausa usun lingen Kot; o masouen lang a apasata porausen angangen poun.”​—KÖLFEL 19:1.

1, 2. (a) Met popun aramas rese tongeni kuna lingen Kot ren meser? (b) Ifa ussun ekkewe 24 elters ra alinga Kot?

 “NGE kosap tongeni kuna won mesei, pun esap wor eman epwe manau ika epwe kuna won mesei.” (Ekistos 33:20) Iei ussun Jiowa a ouroura Moses. Aramas ir fituk mi apwangapwang me rese tongeni kuna Kot ren meser. Iwe nge, ewe aposel Jon a kuna Jiowa won an leenien mottun king mi ling lon eu langepwi.​—Pwarata 4:1-3.

² Ekkewe chonlang ra sokko seni chon fonufan. Ir mi tongeni nengeni mesen Jiowa. Me leir mei wor “rue-me-fomon elter” mi liosueta ekkewe 144,000. (Pwarata 4:4; 14:1-3) Ifa ussun letiper mwirin ar kuna lingen Kot? Me ren Pwarata 4:11, ra apasa: “Mi fich ngonuk, ach Samol o ach Kot, pwe kopwe angei ling o iteuoch o manaman, pun ka fen forata mettoch meinisin, o mettoch meinisin a fis o a nom ren letipom.”

Ewe Popun “Rese Tongeni Chuen Kapas Och”

3, 4. (a) Met popun an emon luku Kot esap u ngeni science? (b) Fan ekkoch, meeta ewe longolongun an emon ese luku Kot?

³ Ka mochen alinga Kot? Lape-ngeni aramas rese mochen me ekkoch leir ra apasa pwe esor emon Kot. Ren chok awewe, emon sou kaeo fuu a makkei: “Kot ewe emon a serochun forata lang me fonufan ren an epwe efeiochukich? . . . Mwa met ren ochchun ena ekiek. Nge ai luku pwe ena ekiek a chok otupu aramas. . . . Fisitaan lang me fonufan esap awewelo ren ach kapas ussun Kot.”

⁴ Science mi aukuk ngeni minne aramas ra tongeni kuna me kaeo. Lukun ekkena mettoch, aramas ra tongeni esissin chok. Science ese tongeni kaeo Kot pokiten “Kot mi Ngun.” (Jon 4:24) Ina popun a ekis lamalam tekia an aramas apasa pwe lukuluk lon Kot ese tipeeu ngeni science. Emon scientist itan Vincent Wigglesworth seni Cambridge University a apasa pwe lapalapen an science kaeo mettoch a wewe ngeni “eu lamalam.” Ifa ussun? Science “a alongolong won ewe luku aramas rese tipemwareiti pwe angangen ekkewe manamanen lang me fonufan ra tipeeu ngeni ‘allukun fonufan.’” Iwe, lupwen emon a poutalo lukuluk won Kot, esap pwe a chok siwili an luku ngeni pwal eu? Fan ekkoch an  emon luku pwe esor emon Kot a wewe ngeni an poutalo poraus mi enlet. Ewe soumak kol mi fel a makkei: “Pokiten lamalam tekian won-meser, ekkewe mi ingau rese mo kukkuta i; iei chok ar ekiek meinisin: ‘Ese mo wor emon Kot.’”​—Kol Fel 10:4.

5. Pwata esor popun an aramas apasa pwe rese luku Kot?

⁵ Lukuluk lon Kot ese wewe ngeni ewe sokkun luku esor longolongun. Mei wor chommong pisekin annet mi anneta pwe a wor Kot. (Ipru 11:1) Sou kaeo fuu Allan Sandage a apasa: “Use tongeni luku pwe kkotochun lang me fonufan a pop seni fitikoko. Epwe wor eu popun a kokkotoch. Me rei, Kot eu mettoch mi monomonolo, nge Kot chok ewe awewe ren ewe popun a wor mettoch.” Ewe aposel Paul a ereni ekkewe chon Kraist lon Rom pwe “ekkewe sokkosokkun Kot rese tongeni kuna, an we manaman esemuch o pwal lapalapan feilfeilo chok. Iei popun rese tongeni chuen kapas och.” (Rom 1:20) Seni chok ‘ewe fansoun Kot a forata fonufan’​—akkaewin seni forutaan aramas mi mirit, mi tongeni miritiiti pwe a wor emon chon Forata​—a fen ffat pwe a wor emon chon Forata mei wor an manaman wachemuk, emon Kot mi fich ngeni ach fel. Chokkewe rese esinna lingen Kot, rese tongeni apasa och. Iwe nge, ifa ewe pisekin annet forien Kot kewe ra awora?

Lang Me Fonufan Ra Aporausa Lingen Kot

6, 7. (a) Ifa ussun ekkewe lang ra aporausa lingen Kot? (b) Met popun a ussun ita pwe chommong kapas ra katowu seni lang?

⁶ Kol Fel 19:1 a polueni: “Ekkewe lang ra aporausa usun lingen Kot; o masouen lang a apasata porausen angangen poun.” Tafit a miritiiti pwe ekkewe fuu me fonu mi tittin seni lang ra anneta pwe a wor emon Kot mi fokkun amwarar. A sopweilo: “Ran a kapas ngeni ran, o lepwin a afalafala lepwin.” (Kol Fel 19:2) Le ran me le pwin, ekkewe lang ra pwaralo an Kot tipatchem me watteen an manaman. A ussun ita pwe a wor chommong kapasen mwareiti Kot ra katowu seni ekkewe lang.

⁷ Iwe nge, a lamot mirit ika sipwe rongorong ei pwarata seni lang. “Esor alor, ese pwal wor ar kewe fos; sise tongeni rong mongungur.” Iwe nge, ei pwarata sise rongorong ren selingach mi manaman. “Nge ngingir a chok feilo won fonufan meinisin, o ar kewe fos a tori le sopun fonufan.” (Kol Fel 19:3, 4) A ussun ita pwe ekkewe lang ra mochen pwe ar afalafal aramas rese rongorong ren selinger epwe tori le sopun fonufan.

8, 9. Ikkefa ekkoch poraus mi amawrar ussun ewe akkar?

⁸ Tafit a awewei won ekkewe mettoch mi amwarar Kot a fen forata: “A fen isetiu lon ekkewe  lang eu im mangaku ren ewe akkar, ewe mi feito usun chok emon mwan mi apupulu-sefo, lupwen a tou seni lon weipan, ewe mi pwapwaesini an sa won an we al, usun chok emon mwan mi pochokkul. A tota seni le sopolon ekkewe lang, o a salo tori le sopolor; ese wor och mettoch a tongeni op seni an pwichikar.”​—Kol Fel 19:4-6.

⁹ Lein ekkewe fuu meinisin ach we akkar ese kon lien watte. Iwe nge, a fokkun amwarar me a fokkun watte seni ekkewe fonufan mi pweppwelli. Emon a apasa pwe choun ewe akkar “ruu bilion, bilion, bilion ton me choun a wewe ngeni 99.9 percentin choun ewe akkar fengen me ekkewe fonufan me mettoch mi pweppwelli! Towauen ewe fonufan seni ewe akkar 93 milion mwail nge manamanan a chuen ofi fonufan. Pokiten ena manaman ewe fonufan a chok pweppwelli ewe akkar nge ese sa seni are sa ngeni. Eu kukkun kinikinin manamanen ewe akkar a tori fonufan nge a naf pwe epwe amanaua manau meinisin won fonufan.

10. (a) Ifa ussun an ewe akkar tolong me towu seni an we “imwen mangaku”? (b) Ifa ussun ewe akkar a sa ussun chok “emon mwan mi pochokkul”?

¹⁰ Ewe soumak kol mi fel a eani kapas awewe lupwen a fos ussun ewe akkar. A apasa pwe ewe akkar a ussun chok “emon mwan mi pochokkul” mi sa seni eu epiinen ngeni ewe eu le ran me a feilo lon an “im mangaku” le pwin. Lupwen ei fuu mi manaman a feitiu fan epiinen fonufan, a ussun ita pwe a feilo asoso lon eu “im mangaku.” Lesossorun ewe soran, a muttir towu seni, me a tittinoch ussun chok “emon mwan mi apupulu-sefo lupwen a towu seni lon weipan.” Pokiten Tafit emon chon masen siip, epwe silei watteen ewe fou le pwin. (Keneses 31:40) A chechchemeni ifa ussun ewe akkar a tongeni apwichikkara ewe fonu ikewe a nonnom ie. A ffat pwe ewe akkar ese molululo seni an “sai” seni otiu tori notou nge a ussun chok “emon mwan mi pochokkul,” me a mmonleta an epwe sai sefal.

Ekkewe Fuu Me Mwichen Fuu Mi Amwarar

11, 12. (a) Met popun sia ingelo ren an ewe Paipel aririfengenni ekkewe fuu ren ppien aroset? (b) Neman epwe ifa me watteen ekkewe lang?

¹¹ Esor noun Tafit pongkio nge a chuen tongeni kuna fite ngerou fuu. Iwe nge, me ren eu kaeoon fuu, choochoon ekkewe fuu aramas mi tongeni kuna ren pongkio a tori 70 sextillion​—ena nampa a wewe ngeni 22 chero mwirin ewe nampa 7! Jiowa a pwari pwe a fokkun chommong choochoon ekkewe fuu lupwen a awewe ngeniir “pien aroset.”​—Keneses 22:17.

¹² Ren fite ier, ekkewe sou kaeo fuu ra kuna “kukkun leenien saram rese kon lien ffat ngeni meser. Ekkewe scientist ra fen ekieki pwe ekkeei “spiral nebulae” ir ra nonnom lon ach we mwichen fuu itan ewe Milky Way. Lon 1924 ra kuna pwe ewe nebula mi ekis ffat ngeni aramas, Andromeda, wesewesen pwal eu mwichen fuu nge a towau senikich won ruu-milion light year! Chon science ra apasa pwe a wor fite bilion mwichen fuu me a wor ngerou​—fan ekkoch fite bilion​—fuu lor. Iwe nge, Jiowa a “filata iteiten ekkewe fu, a eiten ngenir iter meinisin.”​—Kol Fel 147:4.

13. (a) Met popun sipwe ingeiti ekkewe fuu mi nikinikin lios? (b) Ifa ussun a pwalo pwe ekkewe scientist rese kon lien silei “akoten lang”?

¹³ Jiowa a eisini Jop: “Ka tongeni fot fengeni ekkewe fuun mwariker are epichi feseni ririn ekkewe fuun mon?” (Hiop 38:31, Ewe Kapasen Kot) Ei sokkun mwichen fuu ra ussun ita riri fengen me ra ussun chok eu lios lon lang. Inaamwo ika ekkewe fuu ra fokkun towaufesen, a ussun ita pwe ra nonnom lon leenier lupwen sia kuneer seni fonufan. Pokiten leenier kewe mi titchik, ekkena fuu ra wewe ngeni “minen emmwen fan iten ekkewe astronaut lon rocket, me ra alisi ach esinna ekkewe fuu.” (The Encyclopedia Americana) Iwe nge, esor emon a unusen weweiti “ekkewe riri” mi aleenia ekkena fuu lon leenier. Pwungun pwe ekkewe scientist rese chuen tongeni polueni ewe kapas eis lon Hiop 38:33: “Ifa usun, ka silei akoten lang?”

14. Ifa ussun a monomonelo towufetallin saram?

 ¹⁴ Ekkewe scientist rese tongeni polueni pwal eu mettoch Kot a eisini Jop: “Ifa alen ewe leni ia saram a tota me ie pwe epwe tinfeil?” (Hiop 38:24) Emon soumak a apasa pwe ei kapas eis ussun saram ina eu kapas eis “a weneiti science mi alollon.” Mi mwaalfesen me ena poraus met ekkewe sou silelap lon Kris loom ra luku ussun saram. Ekkoch leir ra apasa pwe saram a ttinewu seni mesen aramas. Fite chok ier me loom, ekkewe scientist ra luku pwe a wor kukkun foun saram. Pwal ekkoch ra apasa pwe saram a mwokutukut ussun chok eu no. Iei, ekkewe scientist ra luku pwe saram a mwokutukut ussun chok eu no me a pwal ussun chok kukkun foun. Iwe nge, lapalapen saram me ifa ussun a “tinfeil” ese mwo unusen ffat.

15. Ussun chok Tafit, epwe ifa meefiach lupwen sia ekkekieki ekkewe lang?

¹⁵ Lupwen sia pwungupwung won ekkeei poraus meinisin, a pwal chung letipach ussun chok a chung letipen Tafit lupwen a apasa: “Lupwen ua nennengeni om kewe lang, foriom mesen poum, ewe maram pwal ekkewe fu ka fen iseniretiu lon leenier; meeta lamoten aramas, nge ka fen ekieki, pwal ewe noun-aramas, nge ka tumunu?”​—Kol Fel 8:3, 4.

Fonufan Me Ekkewe Monumanau Won Ra Alinga Jiowa

16, 17. Ifa ussun ekkewe “monun le matau” ra mwareiti Jiowa?

¹⁶ Kol Fel 148 a eiteita ifa ussun forien Kot kewe ra apasawu lingan. Lon wokisin 7 sia alleaani: “Ami kena monun le matau o pwal ami kena leeni mi alollol meinisin, ami oupwe mwareiti ewe SAMOL seni won fonufan.” Ewer, ewe “matau” a ur ren monumanau mi amwarar mi menlapei an Kot tipatchem me manaman. Choun ewe blue raaw 120 tons​—a ussun chok choun 30 elefant! Choun foun ngasangasan chok a lap seni 1,000 pound me a tongeni pomwei 14,000 som pound chcha lon inisin! Ekkeei monun le matau mi mmang me a weires ar mwokutukut? Aapwi, ra “muttir sailo lon ekkewe saat,” alon eu repot forien Cetacean Bycatch Campaign. Sasing seni satellite a pwarata pwe “emon [raaw] a sailo lap seni 10,000 mwail lon 10 maram.”

¹⁷ Ewe bottle-nosed kku a kan tulong fan saat tori 150 feet, nge aramas ra fen kuna an emon tulong lon saat tori 1,795 feet! Ifa ussun ei man a tongeni chuen manau? Pichipichin foun ngasangasan a mmangolo lupwen a tulong, me chchaan a feilo ngeni foun ngasangas, ammat, me tupuw. A wor lon an kewe fouicho eu safei a isoni asapwal. Ekkewe elefant seal me sperm raaw mi tongeni tulong le saat lap seni ena. Alon ewe chassi Discover, “rese fiu ngeni pochokkulen saat nge ra mut ngeni ena pochokkul an epwe apoolaalo ammater.” Ewe asapwal epwe nonnom lon ar kewe fouicho. A ffat pwe ekkeei monun lon saat ra wewe ngeni eu pwarata mi manau ngeni tipatchemen emon Kot mi unusen manaman!

18. Ifa ussun saat mwo nge a pwaralo an Jiowa tipatchem?

¹⁸ Pwal mwo nge saat a pwarata an Jiowa tipatchem. Scientific American a apasa: “Iteiten chiin saat lon ewe 100 meter asan a wor fite ngerou kukkun sokkun iraan saat iter phytoplankton.” Ei “woluwol sise tongeni kuna” a limeti ach we asapwal ren an angei seni fite bilion ton kiiten asapwal. Ekkewe phytoplankton ra awora lesopwun ewe asapwal fan iten fonufan.

19. Ifa ussun ekkei me ais ra apwonueta letipen Jiowa?

¹⁹ Kol Fel 148:8 a apasa: “Ami kena ekkei me ut-fau, me sno, me amurenipwin mi afou, ami kena asapwalin molumol mi apwonueta an we alluk.” Ewer, Jiowa a pwal nounou ekkewe manamanen fonufan ren an epwe apwonueta  letipan. Ekieki ussun ekkei. Ren fite ier aramas ra eani ekiek pwe ekkei lon ekkewe woluwol ra fokkun ngau. Iei mwo, ekkewe sou kaeo ra luku pwe ekkei a wor wiisan mi lamot ren kataloon ira minen loom are chokkewe mi mammalo, kalisitaan maaritaan ekkewe kukkun pwikil, kaworen koyashi, me ren kisikisiloon ewe tufich pwe ekkei watte epwe poputa. Sno a pwal wor watte lamotan ren an achochonu me koyasini ewe ppwul, alolo ekkewe chanpupu me tumunu ekkewe ira me man pwe resap kon fou.

20. Ifa ussun ekkewe chuuk me ira ra efeiochu aramas?

²⁰ Kol Fel 148:9 a fos ussun “ekkewe chuuk o ekkewe chukuchukuta meinisin, ekkewe ira mi uwa o pwal ekkewe ira sitar meinisin.” Ekkewe chuuk mi tekia ra pwarata ussun manamanen Jiowa. (Kol Fel 65:6) Nge mei pwal wor lamoter. Eu poraus seni ewe Institute of Geography lon Bern, Switzerland, a apasa: “Le poputaan puachen ekkewe chanpupu mi watte meinisin won fonufan ra nonnom lon ekkewe chukuchukuta. Lesopwun chon fonufan ra kutta unumer konik seni minne a pungutiu won ekkewe chuuk . . . Ekkeei ‘tankun konik mi tekia’ ra lamot ngeni pochokkulen aramas.” Pwal mwo nge ekkewe ira ra alinga ewe Chon Foriireta. Eu poraus seni ewe United Nations Environment Programme a apasa pwe ekkewe ira “mi lamot ngeni pochokkulen aramas lon ekkewe fonu meinisin. . . . Chommong sokkun ira ra lamot ngeni woun ewe fonu ren ar awora sokkopaten pisek ussun chowean ira, uwaan ira, me sokkopaten apach. Won fonufan, 2 bilion aramas ra kutta amwuch fan iten ar repwe kuk mongo me fuel.”

21. Awewei ifa ussun echo choon ira a pwaralo pwe emon a fen alapalapa.

²¹ Tipatchemen ewe chon forata a pwalo ren lapalapen efoch ira. Ekieki mwo echo choon ira. A tukutuk ren och mettoch mi ussun chok tenin kanten pwe esap pwaselo. Fan ena tukutuk asan, mei wor chommong cell iter chloroplast. Eu mettoch itan chlorophyll a nom lon ekkeei cell me ena met a angei manamanan seni ewe saram. Photosynthesis ina iten eu angang a fiffis lon ewe choon ira. A wiliiti “leenien ffor mongo.” Waran kewe ra angei konik me, ren eu “kkotun paipen konik” mi tokorara, ewe konik a kekita ngeni choon ewe ira. Fite ngerou kukkun “pinepinen konik” ra suukulo me kapwungulo fan ewe choon ira. Iei ussun ewe kiiten asapwal are carbon dioxide a tolong. Saram a awora ewe manaman mi atufichi an ewe konik me carbon dioxide nofitfengen me a ffor mongoon ewe ira itan carbohydrate. Ewe ira a eani ewe mongo a ffor lon. Iwe nge, ei leenien ffor mongo ese akurang me a fokkun ling. Ese alimengaua ewe asapwal, a atowu asapwal mi murinno!

22, 23. (a) Ikkefa ekkoch ekkewe tufichin matchang me man toto? (b) Ikkefa pwal ekkoch kapas eis sia chuen wiisen pwungupwung won?

²² Kol Fel 148:10 a fos ussun “ekkewe man-mocho me ekkewe kou meinisin, ekkewe man totofeil me ekkewe man-susu!” Mei wor ekkewe lapalap me tufich mi amwarar ren chommong man totofeil me matchang. Ewe Laysan omo a tongeni sai ttam (emon a as 25,000 mwail lon 90 chok ran). Ewe blackpoll warbler a sai seni North tori South America, nge ese sotiu ren lap seni 80 awa. Ewe camel a isoni konik, sap lon pworun sokurun nge lon lukan, pwe a tongeni fetal towau nge ese pwaselo inisin. Sise mairu pwe ekkewe scientist ra kaeo ekkewe man me ira won fonufan lupwen ra alapalapa  mwesin mi fo. Emon soumak itan Gail Cleere a apasa: “Ika ka mochen fori och mettoch mi fetaloch . . . me ese efeiengau ewe konik, ppwul, are asapwal, ese mwaal kopwe kuna och kopwe tongeni lapalapeni lon ekkewe man are ira won fonufan.”

²³ Pwungun pwe forien Kot kewe ra aporausa lingan! Seni ekkewe fuu lon lang tori ekkewe man me ira, eu me eu leir a mwareiti ewe Chon Forata. Nge ifa ussun kich aramas? Ifa ussun sipwe tongeni fiti forien Kot kewe lon ar mwareiti Kot?

En Mi Chechchemeni?

• Met popun esap tongeni muselo chokkewe mi apasa pwe esor emon Kot?

• Ifa ussun ekkewe fuu me ekkewe ekkoch fonufan ra alinga Kot?

• Ifa ussun ekkewe monun saat me man totofeil ra aiti ngenikich ussun an ewe Chon Forata tong?

• Ifa ussun ekkewe manamanen fonufan ra apwonueta letipen Jiowa?

[Ekkewe Kapas Eis fan Iten ewe Lesen]

[Credit Line]

Frank Zullo

[Sasing lon pekin taropwe 18]

Ekkewe scientists ra esissin pwe a wor 70,000,000,000,000,000,000,000 fuu aramas mi tongeni kuneer!

[Sasing lon pekin taropwe 20]

Bottle-nosed kku

[Sasing lon pekin taropwe 21]

Echo choon sno

[Sasing lon pekin taropwe 21]

Laysan albatross mi kukkun

[Credit Line]

snowcrystals.net