An Jises Kewe Manaman Ra Wesesewen Fisita?

“RA WALO ren i [Jises Kraist] chommong ekkewe mi waananu, o a asulo ekkewe anu ren eu chok kapas, o a pwal apochokkulata ekkewe mi samau meinisin.” (Mattu 8:16) “[Jises] a pwata, o a apungu ewe asapwal, o a pwal kapas ngeni ewe sat, ‘Kopwe fanafanelo, kopwe chok mosonosonelo!’ O ewe asapwal a moluelo, o a fis lua chapur.” (Mark 4:39) Ifa om ekiek ussun ekkena poraus? Om luku pwe ekkena poraus ra awewei minne a wesewesen fisita, pwe ir uruwo enlet, are om luku pwe ir kapas monomon are tutunlap chok?

Chommong aramas ikenai ra tipemwaramwar ussun an Jises kewe manaman. Lon ei fansoun feffeitaan science lupwen a wor pongkio me microscope, me an aramas sailo lon space are atittina ekkewe kifetin inisich mi kukkun seni meinisin, a ussun ita pwe aramas rese chuen tongeni lukuluk won fisitaan manaman me fofforun Kot kewe mi amwarar.

Ekkoch ra meefi pwe ekkena manaman rese tongeni fisita are pwe ir chok kapas monomon. Me ren emon sou makken eu puk a ita pwaralo ngenikich ewe “enletin” poraus ussun Jises, porausen an Kraist kewe manaman ir chok “advertise” fan iten afeffeitaan ewe lamalamen Kraist.

Pwal ekkoch ra apasa pwe an Jises kewe manaman ir eu rau. Mei wor chokkewe mi tipi ngeni Jises pwe a otupu aramas. Me ren Justin Martyr lon ewe oruuen senturi C.E., chokkewe mi  tipi ngeni Jises “ra sotun apasa pwe Jises emon sou assosson mi otupu aramas. Ekkoch ra apasa pwe Jises “esap soufosun Jus, nge emon sou likotupotup mi fen kaeo lon an ekkewe chon lukun imwen fel.”

Weween ‘Ese Tufich’

Neman kopwe ekieki pwe a wor popun an aramas tipemwaramwareiti fisitaan manaman. Ra weiresin luku, are rese mwo tongeni luku pwe och mettoch rese tongeni kuna are weweiti a efisi ekkewe manaman. Emon aluwon mi eani ewe luku pwe aramas rese tongeni silei Kot a apasa: “Esor mananan.” Mwirin a aloni alon emon sou silelap seni Scotland itan David Hume, ewe a fen makkei: “Eu manaman a u ngeni allukun fan lang me fonufan.”

Iwe nge, chommong aramas repwe mwaal ika ra apasa pwe eu mettoch ese tongeni fisita. The World Book Encyclopedia a awewei pwe eu manaman “a wewe ngeni eu foffor sise tongeni awewei me ren ekkewe allukun fan lang me fonufan sia silei.” Me ren ena awewe, an aramas sailo lon space, me ar silei polu won sat ren alillis seni satellite repwe wewe ngeni “eu manaman” ipuku chok ier me loom. Pwungun pwe ese och ach apasa pwe ekkewe manaman rese tufich pokiten sise tongeni awewei ifa ussun ra fisita me ren ach sile lon ei fansoun.

Lupwen sia atittina ekkoch ekkewe pisekin annet lon Paipel ussun ekkewe manaman Jises a fori, met sipwe kuna? An Jises kewe manaman ra wesewesen fisita?