Alingalo Kot “Ren Eu Chok Ngingi”

“Ren eu chok ngingi oupwe alinga ewe Kot me Semen ach Samol Jises Kraist.”​—ROM 15:6, NW.

1. Ifa ewe lesen Paul a aiti ngeni chienan kkewe chon luku ussun ach pwakini osukosuk pokiten mi sokkofesen ekiekin emon me emon?

 SAP MINNE epwe lollo chok minne emon me emon Chon Kraist epwe filata are efich. Iwe nge, a lamot ngeni Chon Kraist meinisin ar repwe tipeeufengen lon ar feffetal, afaran ngeni afaran, won ewe al mi alelo ngeni manau. Mei tufich ena mettoch? Ewer, ika sisap mut ngeni ekkewe kukkun osukosuk ar repwe wakattelo. Ina ewe lesen ewe aposel Paul a aiti ngeni chienan kewe chon luku lon ewe aeuin senturi. Ifa ussun an a awewei ei lesen mi lamot? Iwe, epwe ifa ussun ach sipwe tongeni apwonueta an na fon mi popu seni Kot lon ach ei fansoun?

Lamoten ewe Mettoch Tipeeufengen Lefilen Chon Kraist

2. Ifa ussun Paul a menlapei lamoten ewe mettoch tipeeufengen?

² Paul a silei ewe lamoten epwe wor tipeeufengen lefilen Chon Kraist, ina minne, a awora kapasen fon mi murinno pwe epwe alisi Chon Kraist ar repwe pwakini ar kewe osukosuk. (Efisus 4:1-3; Kolose 3:12-14) Iwe nge, mwirin an a poputaani chommong mwichefel me alisi pwal ekkoch lap seni 20 ier, a silei pwe epwe weires ar repwe akkamwochu tipeeuin lefiler. (1 Korint 1:11-13; Kalesia 2:11-14) Ina minne, a pesei chienan kewe chon luku mi nonnom lon Rom: “Iwe, amwo ewe Koten likiitu o aururu a atipeeu-fengenni-kemi . . . pwe ren eu chok ngingi oupwe alingalo ewe Kot me Semen ach Samol Jises Kraist.” (Rom 15:5, 6, NW) Ikenai, a pwal lamot ach sipwe alingalo Jiowa Kot “ren eu chok ngingi” ussun chok eu mwichen noun kewe aramas mi tipeeufengen. Iwe, ifa ukuukun watten ach foffori ena mettoch?

3, 4. (a) Ifa sokkofesennin nonnomun manauen ekkewe Chon Kraist lon Rom? (b) Epwe ifa ussun ekkewe Chon Kraist lon Rom repwe tongeni angang ngeni Jiowa “ren eu chok ngingi”?

³ Chommong Chon Kraist lon Rom, ir chiechien Paul. (Rom 16:3-16) Inaamwo ika a sokkofesen nonnomun manauer, nge Paul a etiwa pwiin kewe Chon Kraist meinisin ussun “noun Kot kewe mi achengicheng.” Iwe, a makkei: “Upwe apasa ai kilisou ngeni ai Kot ren Jises Kraist fan asengesimi meinisin, pokiten porausen ami luku a choufetal won unusen fonufan.” A ffat pwe ekkewe chon Rom ra isetiu eu leenien appiru mi murinno lon chommong mettoch. (Rom 1:7, 8; 15:14) Nge a pwal enlet pwe mi sokkofesen ekiekin emon me emon chon ewe mwichefel won ekkoch mettoch. Pokiten a pwal sokkofesen nonnomun manauen Chon Kraist ikenai, me a pwal sokkofesen lapalapen ar lewo, ar kaeo an Paul we kapasen fon mi popu seni ngunun Kot ren ifa ussun repwe tongeni pwakini ekkewe osukosuk lefiler epwe alisiir le fos “ren eu chok ngingi.”

⁴ Lon Rom, a wor chon Jus me chon Jentail mi luku. (Rom 4:1, 11:13) Ekkoch chon Jus Chon Kraist rese tongeni ukutiu seni ar foffori ekkoch eoreni ra pin foffori me lom fan ewe Allukun Moses, inaamwo ika repwe ita silei pwe ekkena foffor rese lamot fan iten amanauer. Iwe nge, pwal ekkoch chon Jus Chon Kraist ra nguuri ewe poraus pwe an Kraist we asor a angaserelo seni ekkewe mettoch mi pinepin me rer me mwen ar ra wiliti Chon Kraist. Ina popun, ra siwili ar kkewe eoreni me foffor. (Kalesia 4:8-11) Iwe nge, Paul a aiti ngeniir pwe ir meinisin “noun Kot kewe mi achengicheng.” Ir meinisin repwe tongeni alingalo Kot “ren eu chok ngingi” ika repwe akkamwochu ekiekoch lefiler. Ikenai,  eni epwe pwal sokkofesen ach ekiek won ekkoch mettoch, ina minne, epwe murinno ach sipwe afanniochu ifa ussun an Paul awewei ena popun alongolongun alluk mi auchea.​—Rom 15:4.

“Oupwe Etiwa Emon me Emon Lefilemi”

5, 6. Pwata a wor ekiek mi sokkofesen lon ewe mwichefelin Rom?

⁵ Lon noun we taropwe ngeni ekkewe chon Rom, Paul a kapas ussun eu poraus aramas ra eani sokkopaten ekiek ussun. A makkei: “Emon a luku pwe a tongeni mongo sokkun mongo meinisin, nge atewe mi apwangapwang a mongo chok uwan ira o uwan atake.” Pwata a ina ussun? Iwe, fan ewe Allukun Moses, ese mumuta ngeni aramas ar repwe ochoch fituken pik. (Rom 14:2; Lifitikos 11:7) Iwe nge, rese chuen nom fan nemenien ena Alluk mwirin an Jises we malo. (Efisus 2:15) Iwe, ulungat esop ier mwirin maloon Jises, emon chonlang a ereni ewe aposel Piter pwe me ren ekiekin Jiowa, resap chuen ekieki pwe och mongo mi limengau. (Fofor 11:7-12) Pokiten ra silei ekkeei mettoch, eni ekkoch chon Jus Chon Kraist ra meefi pwe mi mumuta ngeniir ar repwe ochoch fituken pik​—are ani pwal ekkoch mongo mi fen pinepin fan ewe Alluk.

⁶ Iwe nge, epwe annou ngeni pwal ekkoch chon Jus Chon Kraist ar repwe ekiekin ani ekkewe sokkun mongo mi pin limengau ngeniir. Eni chokana repwe meefi osukosuk ar repwe kuna pwiir kewe chon Jus lon Kraist ar repwe ani ekkena sokkun mongo. Pwal eu, eni ekkoch chon Jentail Chon Kraist rese weweiti ar na osukosukfengen pun ra pin fiti eu lamalam ikewe ie ese pinepin och sokkun mongo lon. Pwungun pwe esap mwaal an emon esap ani ekkoch sokkun mongo, chilon chok ika epwe anicho pwe a lamot an aramas resap ani och sokkun mongo fan iten ar repwe kuna manau. Iwe nge, epwe fen mecheres ekkena ekiek mi sokkofesen ar repwe efisata aninifengen lon ewe mwichefel. Iwe, a lamot ngeni ekkewe Chon Kraist lon Rom ar repwe tumunu pwe ekkena sokkun tipefesen esap pinei ar repwe alinga Kot “ren eu chok ngingi.”

7. Ikkefa ekkewe ekiek mi sokkofesen ussun an aramas asamolu eu ran iteiten wiik?

⁷ Paul a eani ei oruuan kapas awewe: “Emon a asamolu eu ran lap seni ekkewe ekkoch ran, nge pwal emon a asamolu ran meinisin.” (Rom 14:5a) Fan ewe Allukun Moses, a pinepin angang lon ewe Ranin Pin. A pwal mwo nge fokkun aukuk an aramas sai lon ena ran. (Ekistos 20:8-10; Mattu 24:20; Fofor 1:12) Iwe nge, lupwen a morelo ewe Alluk, a pwal molo ekkena minen pinepin.  Iwe nge, eni ekkoch chon Jus chon Kraist rese meefi kinamwe ar repwe foffori och angang ese lifilifil met sokkun, are ar repwe sai touau lon eu ran ra fen pinini me lom. Eni pwal mwo nge mwirin ar wiliti Chon Kraist, ra asamolu ewe efisuen ran fan iten ekkewe mettochun ngun, inaamwo ika me ren Kot ese chuen wor an ewe Alluk nemenem wor. Mei mwaal ar fori ena mettoch? Aap, chilon chok ika repwe anicho pwe Kot a kutta seni aramas ar repwe chuen pinini Ranin Pin. Ina minne, pokiten a afanni miritin letipen chienan kewe Chon Kraist, Paul a makkei: “Emon me emon epwe wesewesen achifoua lon letipan.”​—Rom 14:5b.

8. Inaamwo ika repwe tongeni pwarata pwe ra afanni miritin letipen ekkewe ekkoch aramas, nge ifa ewe mettoch ekkewe chon Rom Chon Kraist resap fori?

⁸ Iwe nge, inaamwo ika Paul a pesei chienan kewe Chon Kraist ar repwe mosonottam ngeni ekkewe mi weiresin filata minne miritin letiper epwe mutata, Paul a fokkun apwungu ir kewe mi sotun eriani chiener kewe chon luku ar repwe alleasochisi ewe Allukun Moses fan iten repwe kuna amanau. Awewe chok, orun 61 C.E., Paul a makkei ewe puken Ipru, echo taropwe mi manaman ngeni ekkewe chon Jus Chon Kraist mi affataochu pwe ese wor lamoten ar repwe alleasochisi ewe Allukun Moses pun Chon Kraist ra eani eu apilukuluk allim mi murinno seni mi alongolong won an Jises we asorun moon kepich.​—Kalesia 5:1-12; Taitos 1:10, 11; Ipru 10:1-17.

9, 10. Ifa ewe mettoch Chon Kraist resap foffori? Awewei mwo.

⁹ Ussun sia fen silei, an Paul a apasa pwe filien emon me emon mi sokkofesen nge esap atai ar tipeeufengen ika ese u ngeni ekkewe popun alongolongun alluk lon Paipel. Ina minne, Paul a eisini ekkewe Chon Kraist mi eani miritin letiper mi apwangapwang: “Iwe, pwata kopwe apwungu pwiom?” Iwe, a pwal eisini ekkewe mi eani miritin letiper mi pochokkul (weween, miritin letiper a mut ngenir ar repwe ani ekkoch mongo mi pin fan ewe Alluk are fori ekkoch angang lon Raninfel): “Pwata kopwe turunufasei pwiom?” (Rom 14:10) Me ren Paul, ekkewe Chon Kraist mi apwangapwang miritin letiper resap apwungu pwir kewe mi eani ewe sokkun miritin letip mi mut ngeniir ar repwe foffori ekkoch mettoch. Nge pwal ussun chok, ekkewe Chon Kraist mi pochokkul miritin letiper resap turunufasei ekkewe mi eani eu miritin letip mi apwangapwang won ekkoch mettoch. Ir meinisin repwe sufoluti an ekkewe ekkoch ekiek mi fich me resap “ekieki ren pwisin i mi tekia seni minne mi fich.”​—Rom 12:3, 18.

¹⁰ A iei ussun an Paul a awewei ewe ekiek mi itepok me ruuepek: “Ewe emon mi mongo esap turunufasei atewe mi sap mongo, o atewe mi sap mongo esap apungu ewe emon mi mongo, pun Kot a fen etiwa i.” Iwe, a pwal apasa: “Kraist a fen etiwakemi ngeni lingen Kot.” Pokiten Kot me Kraist ra etiwa ekkewe mi pochokkul me ekkewe mi apwangapwang mwelien letiper, sipwe pwal eani ena sokkun ekiek me etiwa “emon me emon.” (Rom 14:3, 15:7) Io esap tongeni tipeeu ngeni ena?

Tongen Pwipwi Epwe Efisata Tipeeufengen Ikenai

11. Ifa ewe mettoch mi sokkolo a fis lon ranin Paul we?

¹¹ Lon noun we taropwe ngeni ekkewe chon Rom, Paul a kapas ussun eu lapalap mi sokkolo. Jiowa a koran amoielo eu pwon me foratiu eu minefo. Iwe, a weires ngeni ekkoch ar repwe etiwa ewe pwon mi fo. Ese wesewesen ina ussun ikenai, nge fan ekkoch epwe tongeni fis ekkoch osukosuk mi ussun chok.

12, 13. Ifa ussun Chon Kraist ikenai repwe tongeni pwarata ar sufoluti miritin letipen chiener kewe Chon Kraist?

¹² Awewe chok, eni emon fin Kraist a pin fiti eu lamalam mi alamota ewe sokkun uf ese kon lien foutout. Nge lupwen a nguuri ewe enlet, eni epwe ekis weires ngeni an epwe siwili an ekiek pwe esap pin an epwe ufouf sokkun uf mi ling are anuepat ika mi fich me limelimoch are aea makeup ika mi fich. Pokiten ese atai eu popun alongolongun alluk lon Paipel, esap pwung an emon epwe sotun echimwa ena fin Kraist an epwe u ngeni mwelien letipan. Pwal eu, ena fefin epwe weweiti pwe esap pwung an epwe esiita chienan kewe fin Kraist ika mwelien letiper epwe mut ngeniir ar repwe aea ekkena sokkun mettoch.

 ¹³ Iwe, ekieki mwo pwal eu kapas awewe. Eni emon mwan Chon Kraist a mammarita lein aramas mi meefi pwe a ngau an aramas ukkunumi sakau. Mwirin an silei ewe enlet, a kuna pwe ewe Paipel a apasa pwe wain, ina eu liffang seni Kot me mei mumuta an aramas unumi ika repwe aukukochu. (Kol Fel 104:15) A nguuri ena ekiek. Iwe nge, pokiten an we ekiek lom, a pwisin filata pwe esap ukkunumi sakau, nge ese turunufasei chokewe mi unumi ika repwe aukukuochu. Iwe, a apwonueta alon Paul: “Sipwe chok tapwei ekkewe mettoch epwe efisata kinamwe, o pwal ekkewe mettoch sipwe fefeita ren.”​—Rom 14:19.

14. Lon met sokkun lapalap Chon Kraist repwe tongeni apwonueta ngunun an Paul we kapasen fon ngeni ekkewe chon Rom?

¹⁴ Epwe tongeni fisita pwal ekkoch fansoun ach sipwe apwonueta an Paul kapasen fon ngeni Chon Rom. Ewe mwichefelin Chon Kraist a masou ren chommong aramas, iwe, epwe sokkofesen ekiekin emon me emon. Ina minne, eni epwe pwal sokkofesen filier​—awewe chok, ren ufer me fouter. Pwungun pwe ewe Paipel a affata ekkewe popun alongolongun alluk meinisin Chon Kraist mi letip-wenechar repwe tongeni akkapwonueta. Esap fich ngeni emon leich epwe ufouf och sokkun uf are lapalapen meten mokurach mi tarotarongau, sikepwach, are ameef ngeni aramas pwe kich mi chieneni chon fonufan mi ngau. (1 Jon 2:15-17) Fansoun meinisin, pwal mwo nge atun kukkunou, ekkewe Chon Kraist repwe chechemeni pwe ir chon angang mi tupuni ewe mi Unusen Tekia. (Aisea 43:10; Jon 17:16; 1 Timoti 2:9, 10) Iwe nge, lon chommong kinikinin manauach, mei fich ngeni Chon Kraist chommong sokkopaten mettoch repwe tongeni filata. *

Tumunu Pwe Sisap Oturukapa Ekkewe Ekkoch

15. Fan met sokkun lapalap emon Chon Kraist esap anganga an pwung le fori ekkoch mettoch fan iten kalisataan pwiin kewe?

¹⁵ Mei wor pwal eu popun alongolongun alluk mi lamot Paul a menlapei lon an kapasen fon ngeni ekkewe Chon Kraist lon Rom. Eni fan ekkoch emon Chon Kraist mi murinno miritin letipan epwe filata an esap fori minne esap mwaal an epwe fori. Pwata? Popun, pun a weweiti pwe an aleni ewe al epwe tongeni efeiengaua pwal ekkoch aramas. Ika a ina ussun, met sipwe fori? Paul a apasa: “Epwe murinno are kosap mongo fituk, are unumi wain, are fori och, minne pwiom epwe turukap ren.” (Rom 14:14, 20, 21) Iwe, “kich mi pochokkul sipwe mosonoson ngeni mwalin ekkewe aramas mi apwangapwang. Sisap apwapwai pwisin kich, nge sipwe apwapwai en me chon orun, pwe epwe murinnolo o fefeita.” (Rom 15:1, 2) Ika mwelien letipen emon chienach we Chon Kraist epwe tongeni feiengau ren minne sipwe fori, ach tongen pwipwi  epwe amwokutukich ach sisap fori minne epwe tongeni aosukosuka ekkewe ekkoch. Awewe chok, ren ewe mettoch ukkunumi sakau. A mumuta ngeni Chon Kraist ar repwe unumi wain ika repwe aukukuochu. Nge ika an unumi epwe tongeni oturukapa emon, esap anicho pwe mei wor an pwung an epwe ukkun.

16. Ifa ussun sipwe pwarata ach afanni meefien ir mi nonnom lon ach kewe leenien afalafal?

¹⁶ Ei popun alongolongun alluk a pwal tongeni weneiti ach kewe foffor lukun ewe mwichefelin Chon Kraist. Awewe chok, sipwe era pwe sia nonnom lon eu fonu ikkewe ie ewe lamalam mi watte an nemenem won chommong aramas a aiti ngeni ir mi choni ar repwe pinini eu ran lon eu wiik pwe epwe eu ranin asoso. Pokiten ena, fan iten ach sisap oturukapa chon oruch kewe me efisata eu minen eppet ngeni ach angangen afalafal, eni ukuukun ach tufich, sisap fori minne epwe aosukosuka chon oruch kewe lon ena ran. Pwal eu kapas awewe, sipwe era pwe emon Chon Kraist mi woummong a mwokut ngeni eu leeni mi nafangau ekkewe chon afalafal ie, nge chon ena fonu ra woungau. Eni epwe filata an epwe afanni chon orun kewe mi fo ren an esap ufouf ekkewe sokkun uf mi liwinimmong are ren an epwe menemenoch ren minne mi chok lamot ngeni manauan inaamwo ika a woummong.

17. Pwata epwe pwung ach sipwe afanni meefien ekkewe ekkoch aramas ren minne sipwe filata?

¹⁷ Epwe pwung ach sipwe ekieki pwe “ekkewe mi pochokkul” ar repwe tipemecheres le siwili nonnomun manauer? Iwe, ekieki mwo ussun ei kapas awewe: Fan eu, atun sia sa won wach we won efoch al, sia nenneloi mwach ekkoch semirit mi fetal oroppen ewe al nge eni repwe tongeni feiengau. Sipwe chok sopweilo le muttir sassa pokiten chok ewe alluk a mutata ena ukukun ngenikich? Aap, sipwe ammangalo ach ssa fan iten an esap fis feiengau ngeni ekkewe semirit. Pwal ussun chok, fan ekkoch, lon ach riri ngeni chienach kewe chon luku are pwal ekkoch aramas, epwe lamot ach sipwe tipemecheres le siwili minne sia mochen fori are mutata pwonuetaan mochenin ekkewe ekkoch. Eni sia foffori eu mettoch mei wor ach pwung ach sipwe fori. Sise atai eu popun alongolongun alluk lon Paipel. Iwe nge, ika sipwe tongeni aosukosuka pwal ekkoch aramas are efeiengaua ekkewe mi apwangapwang mwelien letiper, tongen Kraist epwe amwokutukich pwe sipwe lom ekkekiekifichi ussun minne sipwe foffori. (Rom 14:13, 15)  Ach akkamwochu tipeeufengen me alisata angangen ewe Muu ra fokkun lamot lap seni ach akkapwonueta pwisin letipach pokiten chok mei wor ach pwung le fori.

18, 19. (a) Lon ach ekieki ekkewe ekkoch, ifa ussun sipwe appiru Jises? (b) Met sokkun foffor sipwe unusen tipeeufengen won, iwe, met sipwe kaeo lon ewe lesen mwirin ei?

¹⁸ Lupwen sipwe fori ena, sipwe appiru ewe mi murinno seni meinisin. Paul a apasa: “Pun Kraist ese mo apwapwai pwisin i, nge, usun a makketiu, ‘Minne ra lalingau ngonuk, ra pwal lalingau ngeniei.’” Jises a tipeeu ngeni an epwe asoresini manauan fan asengesich. Epwe pwung ach sipwe pwal tipemecheres le pennukuolo ekkoch mettoch sia mochen fori nge meit ika a wor ach pwung ach sipwe foffori, ika epwe atufichi “ekkewe mi apwangapwang” ar repwe etikich le alinga Kot fan tipeeu. Enlet, ach sipwe tipemecheres ngeni ekkewe Chon Kraist mi apwangapwang mwelien letiper​—are pwisin filata pwe sisap fori och mettoch​—epwe pwarata pwe sia eani ekiek “mi fich ngeni Kraist Jises.”​—Rom 15:1-5.

¹⁹ Inaamwo ika eni epwe sokkofesen ach ekiek won ekkewe mettoch ese kku eu popun alongolongun allukun Paipel, nge ren ach fel, sipwe unusen tipeeufengen. (1 Korint 1:10) Ena sokkun tipeeufengen a wesewesen pwapwalo, awewe chok, lon ach ekiek ussun ekkewe chon u ngeni ewe fel mi enlet. An Kot we Kapas a eita ngenir chon ekis me a ourourakich ach sipwe tumunukich seni “leuwen ekkewe chon ekis.” (Jon 10:5, NW) Epwe ifa ussun sipwe tongeni esinna ekkena chon ekis? Iwe, epwe ifa ach ekiek ussur? Sipwe afanni ekkeei kapas eis lon ewe lesen mwirin.

[Pwóróus fan]

Ifa Ussun Kopwe Polueni?

• Pwata an aramas eani ekiek mi sokkofesen esap atai ewe mettoch tipeeufengen?

• Pwata kich Chon Kraist sipwe pwarata tongfengen lefilach?

• Ifa ussun sipwe tongeni apwonueta an Paul we kapasen fon ussun ewe mettoch tipeeufengen ikenai, iwe, met epwe amwokutukich ach sipwe fori ena mettoch?

[Ekkewe Kapas Eis fan Iten ewe Lesen]

[Sasing lon pekin taropwe 22]

A fokkun lamot an Paul we kapasen fon ussun tipeeufengen lon ewe mwichefel

[Sasing lon pekin taropwe 24]

Chon Kraist ra tipeeufengen inaamwo ika a sokkofesen nonnomun manauer

[Sasing lon pekin taropwe 25]

Met ei chon unteng epwe fori iei?