An Jiowa We Kapas Mi Manau

Menlapen Poraus Seni Ewe Puken Esra

EWE puken Esra sopwosopwoloon ewe poraus lon Oruuen Kronika. Ewe samol fel Esra a makkei ei puk mi poputa ren porausen ewe allukun King Sairos lon Persia mi atufichi ekkoch chon Jus mi eolo lon Papilon ar repwe liwinsefalliiti fonuer. Ewe poraus a muchulo ren porausen an Esra alimelima chokkewe mi limengauolo pokiten ar chiechi ngeni chon lukun. Ei puk a awewei ussun met a fisita lon ekkewe 70 ier lefilen 537 me 468 B.C.E.

Esra a makkei ei puk ren an epwe aiti ngeni meinisin ifa ussun Jiowa a apwonueta an we pwon pwe epwe angasalo noun kewe aramas mi eolo lon Papilon me poputasefalli fel mi enlet lon Jerusalem. Iwe, ina popun Esra a menlapei ekkewe chok poraus mi weneiti ekkena mettoch. Ewe puken Esra a aporausa ifa ussun ewe imwen fel a fforsefal me ifa ussun fel ngeni Jiowa a poputa sefal inaamwo ika noun Kot kewe aramas mi apwangapwang me ekkoch nouwis ra u ngeni ewe angang. Ewe puk a lamot ngenikich pokiten iei pwal eu fansoun ffor-sefal. Chommong ra feffeita ngeni “chukun ewe Samol mi Lapalap.” Iwe, arapakan chok, “an chon fanufan silei lingen ewe Samol mi Lapalap epwe alolon usun matau a alolon.”​—Aisea 2:2, 3; Apakuk 2:14.

EWE IMWENFEL A KAUSEFAL

(Esra 1:1–6:22)

Arapakan 50,000 chon Jus mi eolo ra liwinsefalliiti Jerusalem fan an Kepina Serupapel, are Sespasar emmwen pokiten an Sairos alluk. Ra muttir senata ewe rongen asor me a poputa sefal asor ngeni Jiowa.

Eu ier mwirin ena, ekkewe chon Israel ra fori longolongun imwen Jiowa we. Chon oputeer ra aosukosuka ar we angang. Lo, lo, lo, ra sopwoch pokiten ewe king a fori alluk mi unusen pinei ewe angang. Ekkewe soufos Akai me Sekaraia ra apochokkula letipen ekkewe aramas ngeni ar repwe poputa sefalli ar angang inaamwo ika ewe king a pinei ar angang. Ekkewe chon oput ra niu me ra chok fanafanelo pokiten ra silei pwe an Sairos alluk mi ffor akkom ese tongeni siwil. Eu atittin a pwaralo an Sairos alluk “fan iten ewe imwen Kot lon Jerusalem.” (Esra 6:3) Iwe, ar we angang a feffeita tori a wes ewe imwen fel.

Poluen Ekkewe Kapas Eis Ussun Ewe Paipel:

1:3-6​—Mi apwangapwang lukuen ekkewe chon Israel rese mochen liwinlo fonuer? Saminne meinisin ekkewe rese mochen liwinlo Jerusalem ra akkomwa wou me pisek are rese aucheaani fel mi enlet. Ttamen ar repwe sai ewe 1,000 mwail ngeni Jersualem, ruaanu are limu maram. Pwal och, epwe lamot angang weires ren ar repwe fonueni sefal eu fonu a poonulo ren 70 ier. Ina popun, ekkoch rese tongeni liwiniiti fonuer pokiten semmwen, chinnap, are wiiser lon famili.

2:43​—Io ekkewe chon angang ngeni ewe imwen fel (Nethinim)? Ir chon angang lon ewe imwen fel nge esap ir chon Israel. Ekkoch leir mwirimwirin ekkewe chon Kipia lon ranin Josua. Pwal ekkoch, “ir mwirimwirin chokewe Tafit me noun kewe nouwis ra awisa pwe repwe alisi ekewe mwan seni ainangen Lefi.”—Esra 8:20.

2:55​—Io mwirimwirin noun Solomon kewe chon angang? Ir aramas mei wor wiiser kewe fan iten Jiowa nge esap ir chon Israel. Neman ra eani wiiser soumak are nouwis lon ewe imwen fel.

 2:61-63​—A kawor ngeni ekkewe chon eolo mi liwinlo Jerusalem ewe Urim me Tumin ra nounou lupwen repwe eani kapas eis ngeni Jiowa? Lupwen ese ffat tettelin samasamen ekkewe samol fel, repwe tongeni annetata pwe ir samol fel ren ewe Urim me Tumin. Iei met Esra a apasa pwe repwe fori, nge lon ena fansoun are mwirin, esor porausen ar nounou Urim me Tumin lon ewe Paipel. Me ren uruwoon chon Jus, ewe Urim me Tumin ra morolo lupwen a talo ewe imwen fel lon 607 B.C.E.

3:12​—Met popun “ekewe chinlap mwan mi kuna ewe aewin imwen fel, ra leuomong le kechu”? Ekkeei mwan ra chechchemeni amwararen ewe imwen fel Solomon a aueta. Longolongun ewe minefoon imwen fel a “lapalapangau” me rer. (Akai 2:2, 3) Lingen ewe minefoon imwen fel esap ussun chok lingen ewe minen loom. Ina popun ra letipechou me ra kechiu.

3:8-10; 4:23, 24; 6:15, 16​—Fitu ier ra angang won ewe imwen fel? Ra fori longolongun ewe imwen fel lon 536 B.C.E. “lon ewe aruuen ierin ar liwinla.” Ra ukutiu le angang lon ranin King Artaksasta, lon 522 B.C.E. Pinepinin ewe angang a sopwosopwolo tori 520 B.C.E., ewe oruuen ierin King Tarius. Ewe imwen fel a wes lon ewe awonuen ierin an nemenem are 515 B.C.E. Iwe, ttamen ar angang won ewe imwen fel, orun 20 ier.

4:8–6:18​—Met popun ekkeei wokisin ra mak lon fosun Aramaik? Ewe puken Esra a kapachelong ekkoch taropwe ekkewe king me nouwis ra makkei. Esra a kapiini ekkeei taropwe mi mak lon fosun Aramaik, ewe fos fan iten ekkewe nouwisin muu me ekkewe chon business lon ranin we. Pwal ekkoch kinikinin ewe Paipel a mak lon fosun Aramaik, Esra 7:12-26, Jeremaia 10:11, me Taniel 2:4b–7:28.

Ekkewe Lesen Fan Itach:

1:2. Met Aisea a oesini 200 ier me mwan a fisita. (Aisea 44:28) Ekkewe oesini meinisin lon ewe Paipel mi enlet.

1:3-6. Ussun chok ekkewe chon Israel ra nomolo lon Papilon, ekkewe Chon Pwarata Jiowa ikenai rese tongeni pioneer are mwokut ngeni pwal eu fonu ra chuen alisi me apochokkula chokkewe mi tongeni fori ena me ra awora monien asor fan iten kalisitaan angangen ewe Muu.

3:1-6. Lon 537 B.C.E., ewe afisuen maram (Tishri are October/​September), ekkewe chon Israel mi liwin ra eani ewe aewin asor. King Nepukatnesar a keni Jerusalem lon 607 B.C.E., lon ewe alimuen maram (Ab are July/​August). (2 King 25:8-17) Muchuloon ekkewe 70 ier Jerusalem epwe poonulo a pwonueta ussun chok a fen oesini. (Jeremaia 25:11; 29:10) Mettoch meinisin Jiowa a oesini lon ewe Paipel epwe pwonueta.

4:1-3. Chon Israel mi tuppwol rese etiwa eu atipeeu lefiler me chokkewe ra fel ngeni kot chofona. (Ekistos 20:5; 34:12) Chon fel ngeni Jiowa ikenai rese fiti fel lon ekkewe ekkoch lamalam.

5:1-7; 6:1-12. Jiowa a tongeni emmweni met epwe fis fan iten sopwochun noun kewe aramas.

6:14, 22. Achocho lon an Jiowa angang a wato an chen me feioch.

6:21. Chon Samaria me ekkoch chon Israel ra fen kkuf ren fel chofona ra mochen siwili manauer lupwen ra kuna feffeitaan an Jiowa we angang. Iwe, sipwe achocho le fiti ekkewe angang Kot a awiisa ngenikich, kapachelong ewe angangen afalafala ewe Muu.

ESRA A TORI JERUSALEM

(Esra 7:1–10:44)

Lime ier ra fen lo seni efinunen imwen Jiowa mi fo. Lon 468 B.C.E., Esra fengen me pwal ekkoch noun Kot kewe aramas ra feilo seni Papilon ren ar repwe uwei monien asor ngeni Jerusalem. Met a fiffis lon Jerusalem?

 Ekkewe nouwis ra ereni Esra: “Ekewe aramasen Israel, ekewe souasor me ekewe mwan seni ewe ainangen Lefi resap aimwurela seni aramasen ekewe fanu unukuur. . . . Ra chok fori ekewe fofor mi anioput ir ra fori.” Pwal och, “ei lapalap mi ngau ekewe nouwis me ekewe samol ra akom le fori.” (Esra 9:1, 2) Esra a ruko. A lamot pwe Esra epwe “pochokkul” me mwokutukut. (Esra 10:4) Esra a peseer ar repwe awenechara manauer, iwe, ekkewe aramas ra tipeeu.

Poluen Ekkewe Kapas Eis Ussun Ewe Paipel:

7:1, 7, 11​—Ekkeei wokisin ra weneiti ewe Artaksasta a pinei ewe angang won ewe imwen fel? Aapw. Artaksasta iten are itelapen ruuemon kingen Persia. Ewe emon a pinei ewe angang won ewe imwen fel lon 522 B.C.E., Kaumata are Partiya. Artaksasta Longimanus a nemenem lupwen Esra a feilo Jerusalem.

7:28–8:20​—Met popun chommong chon Jus lon Papilon rese mochen feilo Jerusalem ren Esra? A chokisikis choochoon ekkewe aramas lon Jerusalem inaamwo ika a fen lo wone ier seni fansoun ekkewe chon Jus ra liwiniiti fonuer. Esap mecheres me kinwamwe manauen ekkewe aramas ra fiti Esra ren ar repwe nonnom lon Jerusalem. Resap tufich lon Jerusalem ussun chok ra tufich lon Papilon. Pwal och, repwe tongeni feiengau atun ewe sai. A lamot pwe ekkewe aramas ra fiti Esra repwe lukuluk won Jiowa, achocho ngeni fel mi enlet, me pwora fan iten ar repwe mwokut ngeni Jerusalem. Pwal mwo nge Esra a apochokkula an luku. Pokiten Esra a peseer, 1,500 famili, choochoor 6,000 aramas ra mochen feilo Jerusalem. Mwirin Esra a kutta-sefalli aramas, 38 chon Lifai, me 200 Nethinim ra apasa pwe repwe feilo Jerusalem.

9:1, 2​—Ifa ukuukun watteen ewe feiengau a tongeni pop seni pupulufengen me aramasen ewe fonu? Ita ei muu mi fforsefal epwe tumunu fel ngeni Jiowa tori a war ewe Messaia. Ar pupulufengen me chon lukun a tongeni alimengaua fel mi enlet. Pokiten ekkoch ra puluweni aramas mi fel ngeni lios, iwe, neman, lo, lo, lo, unusen Israel epwe ussun chok ekkewe fonu unukkur. Fel mi enlet a tongeni unusen morolo seni fonufan. Iwe, epwe wor aramas ewe Messaia epwe afalafaleer lupwen a war? Ina popun Esra a fokkun ruko me osukosuk ren met a kuna!

10:3, 44​—Met popun ekkewe mwan ra poutalo nour kewe fengen me puluwer? Ese mwaal puluwer repwe liwin pokiten ra posiiti nour kewe mi nomelo. Pwal och, ekkewe semirit ra kan osupwangen tumun seni iner kewe.

Ekkewe Lesen Fan Itach:

7:10. Pokiten Esra emon chon kaeo mi tinikken me emon sense mi lipwakoch, iwe, a isetiu eu leenien appiru mi murinno fan itach. A iotek ren an epwe ammonlata letipan lupwen epwe kaeo Allukun Jiowa. Lupwen a kakkaeo, Esra a ekiekifichi met Jiowa a apasa. Esra a pwal apwonueta minne a kaeo, me a fokkun achocho le asukula aramas.

7:13. Jiowa a acheni chon angang mi tipemecheres.

7:27, 28; 8:21-23. Esra a apasa pwe Jiowa a alisi i. A pwal tingor an Jiowa alillis mwen a sailo Jerusalem. A akkomwa an alinga Kot lap seni pwisin an kinamwe. Iwe, a isetiu eu leenien appiru mi murinno fan itach.

9:2. Sipwe chechchemeni an Kot kapas pwe sipwe pupulu “lon chok ewe Samol.”​—1 Korint 7:39.

9:14, 15. Chiechi mi ngau a tongeni asonga Jiowa.

10:2-12, 44. Chokkewe mi puluweni fin ekis ra aier fan tipetekison me ra kul seni ar kewe fofforingau. Mei murinno ar ekiek me foffor.

Jiowa A Apwonueta An Kewe Pwon

A ifa me watteen aucheaan ewe puken Esra ngenikich! Lon ewe fansoun mi filita, Jiowa a apwonueta an we pwon le angasalo noun kewe aramas mi eolo lon Papilon me poputasefalli fel mi enlet lon Jerusalem. Ei poraus a kan apochokkula ach lukuluk won Jiowa me ach luku pwe Jiowa epwe apwonueta an kewe pwon meinisin?

Ekieki mwo ekkewe pisekin nengeni mi murinno ra kapachelong lon ewe puken Esra. Tong wachemuk fan iten Jiowa a pwalo ren an Esra me ekkewe chon Israel feilo Jerusalem ren ar repwe apochokkula sefalli fel mi enlet ikewe ie. Ei puk a pwal fos ussun ewe luku mi pochokkul an chommong chon ekis me an ekkewe chon tipis mi aier ekiek murinno. Pwungun pwe ekkewe kapas Esra a makkei ra anetata pwe “ewe kapasen Kot mi manau o manaman.”​—Ipru 4:12.

[Sasing lon pekin taropwe 29]

Cyrus

[Sasing lon pekin taropwe 29]

Eorenien muun Persia ar repwe aliwinalo chon eolo ngeni fonuer a mak won an Sairos we fau (Cyrus Cylinder)

[Sasing lon pekin taropwe 29]

Cylinder: Photograph taken by courtesy of the British Museum

[Sasing lon pekin taropwe 30]

En mi silei ewe popun Esra emon sense mi lipwakoch?