An Jiowa We Kapas Mi Manau

Menlapen Poraus Seni Ewe Puken Ester

EWE kokkot esap tongeni sopwongau. Chon Jus meinisin seni India tori Itiopia repwe nninniilo lon eu chok ran mi fen filita. A ina ekiekin ewe chon rauangau. Nge, atewe a tunalo pwe ewe Koten lang a tongeni amanaua noun kewe aramas seni ese lifilifil menni osukosuk are feiengau. Porausen an Kot amanaueer a nom lon ewe puken Ester.

Ewe puken Ester porausen met a fisita lon 18 som ierin nemenien ewe kingen Persia, Asuworos are Xerxes I. Ewe chon Jus mi chinnap itan Mortekai a makkei ewe puk. Ei poraus a pwaralo ifa ussun Jiowa a amanaua noun kewe aramas seni rauangauen chon koputeer, pwal mwo nge lupwen ra toropasfetal lon ekkewe chommong fonu fan an Persia nemenem. Ewe poraus lon ewe puken Ester epwe apochokkula lukuen noun Jiowa kewe aramas ikenai mi angang lon 235 fonuen fonufan. Pwal och, mei wor fofforun ekkoch aramas lon ewe puken Ester sipwe appiru, nge pwal ekkoch foffor sipwe tumunu seniir. Pwungun pwe, “ewe kapasen Kot mi manau o manaman.”—Ipru 4:12.

EWE KIWIN EPWE ALISIIR

(Ester 1:1–5:14)

King Asuworos a fori kametip lon ewe aulungatin ierin an nemenem (493 B.C.E.). Kiwin Fasti a fokkun lioch, nge neminnewe a asonga ewe king. Ina popun a pout seni wiisan. Ewe fin Jus, Hatasa, a filita seni ekkewe fopwul mi lioch meinisin ren an epwe siwili Fasti. Mortekai a ereni Hatasa pwe esap pwaralo pwe i fin Jus. Iwe, Hatasa a nounou itan we lon fosun Persia, Ester.

Lo, lo, lo, emon mwan mi lamalam tekia itan Haman a seikita nouwis mi tekia fan ewe king. Haman a song lupwen Mortekai esap “fotopwasuk mwen Haman” me a akkota ifa ussun chon Jus lon Persia meinisin repwe nninniilo. (Ester 3:2) Haman a etipetipa Asuworos, iwe, ewe king a fori alluk pwe chon Jus meinisin repwe nninniilo. Mortekai a “ufouf uf seni tuk o uwata falangen ekkei won mokuran.” (Ester 4:1) Iei ewe fansoun Ester a wiisen alisi noun kewe aramas. A etiwa ewe king me noun we nouwis mi tekia ngeni eu kametip. Iwe, ra fiti fan pwapwa. Atun ewe kametip, Ester a etiwasefalliir ngeni pwal eu kametip sorota ewe soran. A fokkun watte an Haman chengel. Iwe nge, a chuen song pwe atewe Mortekai ese asamolu i. Haman a rauangau ren an epwe nnielo Mortekai mwen ewe oruuen kametip.

Poluen Ekkewe Kapas Eis Ussun Ewe Paipel:

1:3-5​—Ttamen ewe kametip 180 ran? Ewe poraus ese affata pwe ttamen ewe kametip 180 ran, nge ewe king a pwaralo an kewe pisek me lingen ewe fonu ngeni noun kewe nouwis ren 180 ran. Ika ina ewe fansoun ewe sou kaeo uruwo, Herodotus, a awewe won, ei mwichelap a fisita pokiten Xerxes a ammonlata ngeni an epwe maunei Kris. Ewe king a etiwa noun kewe nouwis meinisin pun a mochen sikasini lingen me pochokkulen muun we ren an epwe alukulukuur pwe epwe tongeni akkufu Kris. Ika mei pwung ena awewe, wokisin 3 me 5 ra fos ussun ewe kametip, ttaman 7 ran, a fisita le muchuloon ewe 180 ran.

 1:10-12​—Met popun Kiwin Fasti ese feito lupwen ewe king a korato? Ekkoch sou kaeo ra apasa pwe ewe kiwin “a saueiti an epwe pwalo mwen mesen chienen ewe king mi unnupuch.” Are, eli ei kiwin mi lioch a lamalam tekia. Ewe popun ese mak lon ewe Paipel. Iwe nge, ekiekin ekkewe sou awora fon lon ena fansoun pwe ewe king ese tongeni tunalo an Fasti alleasolap. Ra pwal luku pwe met Fasti a fori epwe etipetipa ekkewe fin pupulu meinisin lon unusen Persia.

2:14-17​—Ester a lisowu mwaal ren ewe king? Aapw. Alon ewe poraus, lesessorun ewe soran, ekkewe ekkoch fefin ra feilong lon pwal eu imwen fefin fan tumunuen “noun ewe king chon angang mi wisen tumwunu ulupwuluen ewe king.” Ekkewe fefin mi nonnom ren ewe king unusen ewe pwin, ra wiliiti ulupwuluan. Iwe nge, Ester ese feilong lon ena imwen fefin mwirin a chuuri ewe king. Lupwen ewe king a kuna Ester, “a sani Ester lap seni ekewe fopwul meinisin, Ester a pwal kuna chen me kirikiroch me ren lap seni ekewe fopwul meinisin.” (Ester 2:17) Ifa ussun Ester a winneni an Asuworos “chen me kirikirioch”? Ussun chok a winneni chen me kirokiroch seni ekkewe ekkoch aramas. “Iwe, Hekai a tongei Ester o kirikiroch ngeni.” (Ester 2:8, 9) Hekai a tongei Ester pokiten a kuna liochun me lapalapan kewe mi murinno. Ren enletin, “Ester a kuna chenin me ren chokewe meinisin mi kuna.” (Ester 2:15) Iwe, ina pwal ewe popun ewe King a tongei Ester.

2:16​—Met popun ruaanu ier ra lo mwen a wor siwilin Kiwin Fasti? Ita ewe kokkot ren filin ewe minefoon kiwin epwe eu ier. A mmang pokiten ewe king a feilo maunei Kris. Ina ewe fansoun “an ewe king Asuworos song a kisikisila, a chechemeni Fasti me mine a fori ngeni, a pwal chechemeni ewe alluk a fis fan itan.”—Ester 2:1-3, 12.

3:2; 5:9​—Met popun Mortekai ese fotopwasuk mwen Haman? Chon Israel rese tipis ika ra chapetiu mwen nouwis mi tekia. Iwe nge, ren Haman, sipwe chechchemeni pwe atewe emon chon Akak are chon Amalek. Jiowa a akkota nninniiloon chon Amalek meinisin. (Tuteronomi 25:19) An Mortekai fotopwasuk mwen Haman a riri ngeni an tuppwol ngeni Jiowa. A apasa pwe esap fotopwasuk mwen Haman pokiten i emon chon Jus.—Ester 3:3, 4.

Ekkewe Lesen Fan Itach:

2:10, 20; 4:12-16. Ester a etiwa emmwen me fon seni emon chon fel ngeni Jiowa mi asimau. Mei murinno ach ‘alleasochisi ekkewe chon emmwenikich, o nonnom fan nemenier.’—Ipru 13:17.

2:11; 4:5. Sisap ‘tumunu chok pwisin pisekich, pwe sipwe pwal tumunufichi pisekin ekkewe ekkoch.’—Filipai 2:4.

2:15. Ester a tipetekison me a nemeniochu an kewe mochen. Ekkeei lapalap ra pwalo lupwen ese tingor pwal chommong ring, nana, earring are uf mi ling, lap seni met Hekai a awora. Ester a ussun chok Sara. ’Fouten letipan mi monomon . . . esap morelo, me fouten ngunun mi mosonoson o tipemecheres.’ Ina popun a winneni an ewe king chen.—1 Piter 3:4.

2:21-23. Ester me Mortekai ra awora eu pisekin nengeni ren ifa ussun sipwe ‘alleasochisi ewe mu mi nemenikich.’

3:4. Fan ekkoch, neman epwe och ach sisap apasa pwe kich Chon Pwarata, ussun chok Ester ese apasa pwe i fin Jus. Iwe nge, lupwen a lamot ach sipwe pwarata pwe sia pekini an Jiowa nemenem mi tekia are amwochu ach tuppwol, sise mochen pireir le affata pwe kich Chon Pwarata Jiowa.

4:3. Lupwen a ppiita sossot, sipwe iotek ngeni Jiowa ren ach sipwe kutta pochokkul me tipatchem.

4:6-8. Mortekai a kutta ifa ussun epwe tumunu aramasan kewe seni an Haman rauangau me ren allukun ewe fonu.—Filipai 1:7.

4:14. Sipwe appiru ifa ussun Mortekai a unusen lukuluk won Jiowa.

4:16. Ester a tongeni nninniilo. Iwe, a tuppwol me pwora pokiten a unusen lukuluk won Jiowa. A lamot ach sipwe kaeo ifa ussun sipwe lukuluk won Jiowa nge sap won pwisin ach kewe tufich.

MEINISIN A EKKESIWIL

(Ester 6:1–10:3)

Mettoch meinisin a ekkesiwil. Haman a eitiueta won ewe ira a ffot fan iten Mortekai. Ita Mortekai epwe nninniilo nge a seikita nouwis mi tekia fan ewe king! Nge ifa ussun ren nninniiloon  ekkewe chon Jus meinisin? Iwe, epwe pwal wor eu siwil mi lap ren ena kokkot.

Kiwin Ester a wiisen fos sefal ngeni ewe king. Chemeni mwo pwe Ester a tongeni nninniilo ika a feito mwen mesen ewe king lupwen ese korato. Iwe, ei fefin mi tuppwol a feilo fos ngeni ewe king ren an epwe tingor an alillis pwe esap fisita an Haman rauangau. Ewe king a silei ifa ussun epwe alisi aramasen Ester kewe. Lupwen a war ewe ran, ekkewe chon Jus rese nninniilo nge chokkewe mi mochen nniirelo ra malo. Mortekai a fori allukun pwe eu minefoon ran mi pin itan Purim, fan iten achechchemenien ei amanauen chon Jus, epwe fis iteiten ier. Pokiten Mortekai nampa ruu fan King Asuworos lon ewe muu, iwe, a angang fan iten ‘feiochun noun aramas, a pwal kutta kinamwen chon Juta meinisin.’—Ester 10:3.

Poluen Ekkewe Kapas Eis Ussun Ewe Paipel:

7:4​—Ifa ussun nninniilon ekkewe chon Jus epwe ‘aweiresi ewe king’? Ester a fokkun mirit ren an fos ussun winnen ewe king ika atewe epwe amomolo ekkewe chon Jus. Iei ussun Ester a menlapei met ewe king epwe lus ika ekkewe chon Jus meinisin ra nninniilo. Ekkewe 10,000 foun silfer Haman epwe ngeni ewe king ese akkarap ngeni ewe moni epwe tolong lon an ewe king kinko ika Haman a rauangau le amomolo ekkewe chon Jus. Ewe kiwin epwe pwal malo ika a pwonueta an Haman rauangau.

7:8​—Met popun ekkewe nouwis ra pwoluelo mesen Haman? Ra fori pokiten watteen an Haman sau are ren esissinnen an epwe feiengau. Me ren eu puk, “fan ekkoch ekkewe chon loom ra pwoluelo mokuren ekkewe aramas repwe nniirelo.”

8:17​—Met weween ewe poraus pwe ‘chomong aramas ra eti lamalamen chon Juta’? Iwe, chommong chon Persia ra fiti ewe lamalamen Jus pokiten ar luku pwe ewe minefoon alluk esissinnen an Kot acheni ekkewe chon Jus. Ina ekiekin ekkewe aramas lon an Sekaraia oesini: “Lon ekana ran engol mwan seni ekewe mwu mi sokola ar kapas repwe amwochu lepwulun ufen eman chon Juta o ura, ‘Kose mochen kopwe mwut ngenikem pwe aipwe etikemi, pun am aia rong pwe Kot a etikemi.’”—Sekaraia 8:23.

9:10, 15, 16​—Inaamwo ika ewe alluk a mutata ar repwe angei pisekin chokkewe ra nniirelo nge, met popun ekkewe chon Jus rese angei pisekir? Ar likitalo ekkewe pisek a pwaralo pwe ra ekiekin tumunu manauer nge esap pwe repwe wouochulo.

Ekkewe Lesen Fan Itach:

6:6-10. “Lamalamtekia a akom mwen feiengau, nge tunosikesik a akom mwen an eman tur.”—An Salomon Fos 16:18.

7:3, 4. Sia pwora le affata pwe kich Chon Pwarata Jiowa, pwal mwo nge lupwen aramas repwe eriaffoukich?

8:3-6. Mei pwung ach tingor alillis seni ekkewe nouwisin muu me sou kapwung ren ach sipwe kuna tumun seni chon oput kich.

8:5. Ester a mirit. Ese achema ngeni ewe king pwe chon Jus meinisin repwe malo pokiten pwisin an ewe king alluk. Iwe, sipwe mirit ussun chok Ester lupwen sia fos ngeni ekkewe nouwisin muu.

9:22. Sisap monuki ekkewe aramas mi woungau leich.—Kalesia 2:10.

Jiowa Epwe Awora ‘Alillis Me Ngaselo’

Mortekai a fos ussun ewe popun Kot a alisi Ester an epwe wiliiti kiwin. Ekkewe re Jus ra echikipin me iotek lupwen ra rongorong ussun ewe rauangau. Inaamwo ika ewe king ese korato Kiwin Ester nge, Ester a feilo fos ngeni. Ewe king a etiwa Ester. Lon ena pwin mi lamot, ewe king ese tongeni onnutulo. Iwe, ewe puken Ester a awewei ifa ussun Jiowa a angolong lon mwokutukutun aramas me muu ren an epwe efeiochu noun kewe aramas.

Ewe poraus lon ewe puken Ester a fokkun appochokkulakich mi manau atun “fansoun sopolan fonufan.” (Taniel 12:4) “Lon kan fansoun,” weween, lupwen ekkewe ranin le sopwoloon repwele muchulo, Kok seni Makok, Setan ewe Tefil, epwe maunei noun Jiowa kewe aramas. Epwe achocho an epwe nniirelo meinisin. Iwe, ussun chok lon ranin Ester, Jiowa epwe awora ‘alillis me ngaseloon’ chokkewe mi fel ngeni i.—Isikiel 38:16-23; Ester 4:14.