Ka Mochen Epwe Wor Chiechiom mi Mürinnö?

LAPE ngeni aramas ra mochen epwe wor chiechier kewe mi mürinnö. Om kopwe aiti ngeni chiechiom mi ächengicheng ussun met künaen manauom epwe alapalo om aücheani manauom. Nge ifa ussun om kopwe küna emön chiechi mi mürinnö? Arapakkan 2,000 ier loom, Jises a affata pwe ewe kiien sopwöch lon än aramas chiechi, ina ewe tong mi enlet. A apasa: “Iwe, minne oua mochen pwe aramas repwe fori ngenikemi, epwe chok iei usun ami oupwe fori ngenir.” (Luk 6:31) Ei pworaus a iteni ewe Allük mi Fakkun Aüchea, iwe, a pwäratä lamoten kopwe kisäseü, pwe epwe wor chiechiom kewe. Ren enletin, fän iten an epwe wor chiechiom, a lamot kopwe emön mi chiechiöch. Ifa ussun?

Sise tongeni mwittir efisatä chiechi mürinnö ngeni emön. Pwüngün pwe chiechiach kewe ra fakkun aüchea lap seni ekkewe aramas sise kon sisileer. Ikkena ir ekkewe ka ririöch ngeniir. A lamot achocho fän iten ach sipwe ämäraatä me amwöchü ririöch lefilen chiechi. Fän chommong, chiechiöch a wewe ngeni om kopwe akkomwa än chiechiom kewe osupwang lap seni pwisin om kinamwe. Chiechi mürinnö rese chök silefengenni ar kewe pwapwa nge pwal ar kewe fansoun letipechou.

Ka tongeni emön chiechi mi enlet, äkkäeüin ren om awora älillis lon pekin memmef me met ewe emön a eäni osupwang. Än Salomon Fos 17:17 a apasa: “Eman chiechiach a tongeekich fansoun meinisin, nge pwiich a nom rech pwe epwe alisikich lon fansoun riaföü.” Pwüngün pwe epwe tufich ewe riri lefilen chiechi epwe pöchökkül lap seni ekkoch riri lon famili. Än Salomon Fos 18:24, NW a apasa: “Mei wor ekkoch chiechi ra atatafengen lefiler, nge mei wor emön chiechi a pache ngeni lap seni wesewesen emön pwiin.” Ka mochen silei ifa ussun sipwe ämäraatä chiechi mürinnö? Ka mochen kopwe emön me lein ei mwichen aramas mi iteföülo ren ar eäni tong lefiler? (Jon 13:35) Ika ina, Chon Pwäratä Jiowa lon leeniom we repwe pwapwa le älisuk ika ifa ussun om kopwe küna chiechiom mi enlet.