Ewe Älillis A Siwili Manauan

“Ü A FOKKUN mwötöres le apworausa ngeni äi famili ussun ekkewe rüüemön ‘chonläng’ Kot a tinato.” Ina met emön mwän a mak ngeni Chon Pwäratä Jiowa mwirin rüüemön föpwül ra chuuri i. Fitu wiik me mwan, pwülüwen ewe mwän a mälo. Ra fen pwüpwülü 45 ier. Iwe, ewe mwän a fokkun letipechou. Nöün ewe mwän ra aururu i nge, imwer kewe ra fokkun towau seni imwan. Pwal och, chienan me chon orun kewe rese chuuri i.

Ewe mwän a ereni ekkewe föpwül, “Üse chüen mochen fos ngeni Kot.” Ekkewe föpwül ra tongei ewe mwän me ra likiti ngeni eü tract itelapan, Ifa Ewe Apilukuluk ren Atongach kewe mi Malo? Ewe mwän a älleani, iwe, ewe pworaus a aururu letipan.

Ekiselo chök, ekkewe ruuemön föpwül Chon Pwäratä ra liwinto. Ra chechchemeni pwe ewe mwän a fokkun letipechou me ra mochen silei ika a pöchökkül. Iei alon ewe mwän, “Üa fokkun nenneiruk pwe ruuemön aramas üse lien silei ra tongeiei me ra mochen silei ika ngang mi pöchökkül.” A pöchökkülelo ren ekkewe pworaus seni Paipel ra äiti ngeni. Ekkewe föpwül ra apasa pwe repwe liwinto. Ewe mwän a fokkun pwapwa. Ina popun a makkei ewe taropwe sia pworaus ussun asan ngeni ewe Kingdom Hall.

Mwen a mwöküt ngeni eü leeni mi kan ngeni nöün kewe, ei mwän a fiti eü mwich än Chon Pwäratä Jiowa me a möngö ren familien emön lein ekkewe föpwül. Iwe, iei met a mak lon ewe taropwe: “Üpwe mwöküt seni ei leeni nge, ekkena föpwül me ämi imwen fel repwe nonnom lon letipei me lon äi iotek. Ewer, üa iotek fän chommong iei. Üa fokkun siwili manauei. Ekkena föpwül ra älisiei le föri ena, iwe, üpwe kilisou ngeniir feilfeilo.”