“A kinas pokiten ach pupungau, a tatakis pokiten ach föföringau. . . . ren an kinas kana a mola ach samau.”​—AIS. 53:5.

1. Met sipwe ekieki atun ach fiti ewe Ächechchem, me menni oesini epwe älisikich le föri ena?

 REN ACH fiti ewe Ächechchem, sia chechchemeni än Kraist mälo me met an we mälo me manausefäl ra apwönüetä. Ewe Ächechchem a ächchema ngenikich ussun ffateloon än Jiowa pwüüng le nemenem, piniloon itan we, me pwönüetään an we kokkot, kapachelong amanauen chon fönüfan. Eli ewe oesini lon Aisea 53:3-12, ina ewe a kon aliosu än Kraist asor me met ena asor a apwönüetä. Aisea a oesini ussun än ewe Chon Angang kewe riäfföü me titchikin pworausen napanapen än Jises mälo, me ifa ussun an mälo a efeiöchü pwiin kewe mi kepit me nöün kewe ‘ekoch sip.’​—Jon 10:16.

2. Ewe oesini lon Aisea a ännetatä met, me ifa ussun ena oesini epwe achchüngükich?

² Füpükü ier mwen än Jises uputiu woon fönüfan, Jiowa a amwökütü Aisea an epwe oesini pwe Nöün we Chon Angang mi fil epwe tuppwöl tori mälo. Ei mettoch a ännetatä pwe Jiowa a unusen lükülük woon än nöün we tuppwöl. Ren ach käeöfichi ei oesini,  letipach epwe ur ren kilisou me ach lükü epwe pöchökkül.

“A Unusen Itengaü” me Ra Ekieki “Esap Wor Aüchean”

3. Pwata chon Jus repwe itä fen etiwa Jises, nge met chök ra fen för ngeni?

³ Älleani Aisea 53:3. Ekieki mwo meefien nöün Kot we äläemön lupwen a pennükü ewe pwapwa le angangfengen me Seman we, pwe epwe feitiu fönüfan, fangolo manauan, me angasalo aramas seni tipis me mälo! (Fil. 2:5-8) An we asor a kawor fän iten enletin omusomusen tipis, nge ekkewe asorun man fän ewe allükün Moses resap tongeni, pwe iir eü lios chök. (Ipru 10:1-4) Itä ürürün ekkewe chon Jus repwe etiwa me aitöchü i, pun ra fen witiwiti ewe Messaia mi pwonetiu. (Jon 6:14) Nge chon Jus ra fen ‘aitengaua’ me ra ekieki pwe “esap wor aücheaan,” ussun met Aisea a fen oesini. Ewe aposel Jon a erä: “A tori fanüan, nge aramasan resap etiwa.” (Jon 1:11) Ewe aposel Piter a ereni ekkewe chon Jus: “Än ach kewe lewo we Kot a alingala nöün Chon Angang Jesus. Nge ämi oua atolonga lepöün ekewe souemwenin chon Juta o amamäsini i me mwen Pilatus, oua fen mwo nge föri ei, lupwen Pilatus a ekiekin angasala i. Jesus a pin o pwüng, nge ämi oua amamäsini i.”​—Fof. 3:13, 14.

4. Ifa ussun Jises a eöreni an nom lon semwen, cheuch, me riäfföü?

⁴ Aisea a pwal oesini pwe Jises epwe “eman mwän mi örüni an nom lon cheuch me riaföü.” Pwüngün pwe Jises a meefi pekkus fän ekkoch lupwen a afalafal, nge esor pworaus a mak pwe a samau fän eü. (Jon 4:6) Nge a küna än aramas kewe sokkopaten semwen atun a afalafal ngeniir. A tonger me echikaratä chommong. (Mark 1:32-34) Ina popun, Jises a apwönüetä ewe oesini mi apasa: “Ellet, a uwei ach samau o mwärei ach cheuch.”​—Ais. 53:4a; Mt. 8:16, 17.

Ussun Itä “Kot a Ariaföüü”

5. Ifa ekiekin chommong chon Jus ussun än Jises mälo, iwe pwata ena mettoch a fen achoualo letipan?

⁵ Älleani Aisea 53:4b. Ewe täppin aramas lon fansoun Jises rese weweiti ewe popun Jises a küna riäfföü me mälo. Ra ekieki Kot a apwüngü ren minne a föri, ina popun a ussun itä Kot a eriäfföü ren semwen mi chou. (Mt. 27:38-44) Ekkewe chon Jus ra etipisi Jises pwe i emön chon turunufasei Kot. (Mark 14:61-64; Jon 10:33) Pwüngün pwe Jises esap i emön chon tipis are chon esiita Kot. Nge a fen fokkun tongei Seman we, ina popun a chou letipan lupwen a küna kapwüngün mälo ren ar tipimwääl ngeni pwe i chon esiita Kot. Iwe nge, Jises a tipeeü le apwönüetä letipen Jiowa.​—Mt. 26:39.

6, 7. Ifa ussun Jiowa a ‘akinasa’ nöün we mi tuppwöl, me pwata ei mettoch a “apwapwai” Jiowa?

⁶ Sia weweiti pwe än Aisea we oesini a apasa pwe “Kot a ariaföüü” Kraist, nge eli a weires ach sipwe weweiti ika pwata Aisea a pwal oesini pwe “Iei, [apwapwaan, NW] letipen ewe Samol mi Lapalap, pwe a kinas o cheuch.” (Ais. 53:10) Ifa ussun Jiowa a pwapwa ren än Nöün we epwe “kinas o cheuch” nge a fen apasa: “Iei i nei we chon angang . . . üa afili, üa unusen pwapwa ren”? (Ais. 42:1) Ifa ussun  sia tongeni apasa pwe ina apwapwaan letipen Kot?

⁷ Ren ach sipwe weweiti ei oesini, mi lamot ach sipwe chechchemeni pwe Setan a ü ngeni än Jiowa nemenem, me efisatä ewe pworaus pwe nöün Kot kewe chon angang woon läng me fönüfan resap tongeni tuppwöl ngeni Kot. (Hiop 1:9-11; 2:3-5) Nge än Jises tuppwöl tori mälo a unusen pölüweni än Setan pworaus. Ina minne, inaamwo ika Jiowa a mutatä chon koputan ar repwe nielo Jises, nge i a chök fokkun riäfföü ren an küna ninniiloon nöün we. Iwe nge, Jiowa a mmen pwapwa lupwen a küna pwe Jises a unusen tuppwöl ngeni. (SalF. 27:11) Pwal och, Jiowa a pwapwa ren an silei pwe aramas repwe feiöch seni mäloon nöün we.​—Luk 15:7.

“A Kinas Pokiten Ach Pupungau”

8, 9. (a) Ifa ussun Jises “a kinas pokiten ach pupungau”? (b) Ifa ussun Piter a alükülükü ei mettoch?

⁸ Älleani Aisea 53:6. Ekkewe aramas mi tipis ra ussun chök sip mi mwälechelo me ra resin kütta alen ngaselo seni tipis me mälo ra angei seni Atam. (1 Pit. 2:25) Pokiten sise unusöch, esor me lein mwirimwirin Atam kewe a tongeni möönisefäli met a pöüt seni Atam. (Kölf. 49:7) Pokiten watteen än Kot tongekich, Jiowa a anomu “ach pwüngingau meinisin” woon nöün we Chon Angang mi fil. Ren an älleasochis ngeni an epwe “kinas pokiten ach pupungau,” me “tatakis pokiten ach föföringau,” Kraist a uweiretä ach tipis woon irään ninni me a mälo fän itach.

⁹ Ewe aposel Piter a makkei: “Pun iei mine Kot a körikemi ren, pun Kraist a pwal riaföü fänäsengesimi o likiti ngenikemi eu lenien apirü, pwe oupwe tapwela mürin lon ipwan. Kraist a püsin uwei ach kewe tipis won inisin o uweiretä won ewe iräpenges, pwe kich sipwe mäla seni tipis o manau ngeni pwüng.” Iwe mwirin, Piter a aloni ewe oesini lon Aisea, “Ren an kinas kana sia küna pöchökül.” (1 Pit. 2:21, 24; Ais. 53:5) Ei mettoch a suuki ewe alen chäsefäl ngeni Kot. Iei ussun met Piter a pwal apasa: “Pun Kraist a mäla fän iten tipis fän eu chök, nge a naf ngeni fansoun meinisin, ewe chon pwüng fän iten ekewe chon tipis, pwe epwe emwenikich ngeni Kot.”​—1 Pit. 3:18.

Ra Emmwenalo I Ussun Emön Lam Pwe Epwe Ninniilo

10. (a) Met Jon Papatais a apasa ussun Jises? (b) Pwata alon Jon kewe a kon weneiti Jises?

¹⁰ Älleani Aisea 53:7, 8. Lupwen Jon Papatais a küna Jises pwe a feffeito, a apasa: “Iei i ewe Lamen Kot a uweela tipisin chon fanüfan.” (Jon 1:29) Lupwen Jon a fos ussun Jises ewe lam, eli a chemeni met Aisea a erä: “Usun eman nienifön sip [lam] aramas ra emwenala pwe epwe ninnila.” (Ais. 53:7) Aisea a oesini: “Pun a fangala manauan o mäla.” (Ais. 53:12) Lon ewe pwinin a poputäni ewe Ächechchemenien an we mälo, a ngeni nöün kewe 11 aposel mi tuppwöl ewe kapen wain me a apasa: “Pun iei chai a allükülükü än Kot we pwon mi fö ngenikemi, a ninnila fänäsengesin chomong aramas, pwe amusamusen ar tipis kana.”​—Mt. 26:28.

11, 12. (a) Än Aisek tipeeü pwe epwe eü asor a liosuetä met ussun än Jises fangolo manauan? (b) Met sipwe ekieki ussun Jiowa, ewe Apraham mi Lapalap, lupwen sipwe föri ewe Ächechchem?

¹¹ Ussun chök Aisek, Jises a fiti letipen Jiowa pwe epwe eü asor woon ewe rongen asor. (Ken. 22:1, 2, 9-13; Ipru 10:5-10) Aisek a tipeeü pwe i epwe ewe asor, nge Apraham a wisen asoresini Aisek. (Ipru 11:17) Pwal ussun chök, Jises a tipeeü ngeni an epwe mälo, nge Jiowa I ewe Sou Föratä ewe kokkot fän iten ewe möön kepich. Än Jiowa asoresini nöün we a pwäratä watteen an tong ngeni fönüfan.

¹² Jises a pwisin apasa: “Pun iei usun Kot a echeni chon fanüfan, pwe a fangala Nöün Aleman, pwe meinisin mi lükü i resap pöütmwälila, pwe repwe eäni manau esemüch.” (Jon 3:16) Aposel Paul a makkei: “Nge Kot a  pwäri ngenikich ükükün an echenikich, pwe lupwen sia chüen nonom lon tipis, Kraist a mäla fänäsengesich.” (Rom. 5:8) Iwe, inaamwo ika sipwe asamolu Kraist ren ach chechchemeni an we mälo, nge sisap fokkun mönükalo Jiowa Kot, ewe Apraham mi Lapalap, ina I ewe a föri kokkot fän iten ewe möön kepich. Sia föri ewe Ächechchem ren ach sipwe mwareiti I.

Ewe Chon Angang Epwe Efisatä “an Chomong Aramas Pwüng”

13, 14. Ifa ussun nöün Jiowa Chon Angang a efisatä “an chomong aramas pwüng”?

¹³ Älleani Aisea 53:11, 12. Jiowa a apasa ngeni nöün we Chon angang mi kefil: “Nei chon angang mi pwüng epwe afisätä an chomong aramas pwüng.” Ifa ussun? Le sopwoloon wokisin 12 a älisikich ren pölüwan. Ewe Chon Angang a “iotek fän iten chon pupungau.” Meinisin mwirimwirin Atam kewe ir chon tipis, “chon pupungau,” ina minne repwe angei “liwinin tipis,” weween mälo. (Rom. 5:12; 6:23) A lamot ngeni chon tipis ar repwe chäsefäl ngeni Jiowa. Sopwun 53 lon än Aisea oesini a aweweei ifa ussun Jises a “iotek fän iten’’ aramas mi tipis lupwen a erä: “Liwinin ach tipis a nonom won pwe sipwe küna kinamwe, nge ren an kinas kana a mola ach samau.”​—Ais. 53:5.

¹⁴ Ren an uwei tipisich me mälo fän itach, Kraist a efisatä “an chomong aramas pwüng.” Paul a makkei: “Pun iei püsin än Kot akot, pwe unusen lapalapen Kot epwe unusolong lon Nöün we. Ren Nöün we Kot a akota pwe epwe achäsefäli mettoch meinisin ngeni püsin i. Kot a afisätä kinamwe ren chaan Nöün we mi pupula me won ewe [irään ninni] o a achäsefäli mettoch meinisin won fanüfan pwal lon läng ngeni püsin i.”​—Kol. 1:19, 20.

15. (a) Iö ekkewe ‘mettoch lon läng’ Paul a kapas ussun? (b) Iö kewe chök repwe tongeni möngö ewe pilawa me ün ewe wain, iwe, pwata?

¹⁵ Ekkewe ‘mettoch lon läng’ ra chäsefäl ngeni Jiowa ren chchaan Jises we, iir ekkewe chon Kraist mi kepit repwe eti Jises le nemenem lon läng. Ekkewe chon Kraist “mi pwal kö me ren Kot” repwe küna pwüng ren unusen manauer. (Ipru 3:1; Rom 5:1, 18) Iwe, Jiowa a nöüniir pwe repwe nöün kewe me ren ewe ngün mi fel. Ewe ngün mi fel a pwäri pwe iir chon “eti Kraist,” repwe wisen sou nemenem me souasor lon Mwuun we lon läng. (Rom 8:15-17; Pwar. 5:9, 10) Repwe choni ewe mineföön “Israelin Kot,” me ra tolong lon “eu pwon mi fo.” (Jer. 31:31-34; Kal. 6:16, TF) Pokiten iir chon ewe “pwon mi fö,” mei wor ar pwüng lon fansoun Ächechchem ar repwe äeä ewe pilawa me ewe wain mi par, pun iei alon Jises ussun ewe wain: “Ei kap än Kot we pwon mi fö mi fis ren chai a ninila fän itemi.”​—Luk 22:20.

16. Ikkefa ekkewe “mettoch meinisin won fanüfan,” me ifa ussun repwe küna pwüng me ren Jiowa?

¹⁶ Ekkewe “mettoch meinisin won fanüfan,” iir ekkewe nöün Kraist ekkoch sip, ekkewe ra eäni äpilükülükün manau esemuch woon fönüfan. Nöün Jiowa Chon Angang a efisatä ar repwe pwal küna pwüng me ren Jiowa. Pokiten ra lükülük woon än Kraist möön kepich, “ra limeti üfer o apwecher lon  chaan ewe Lam,” iir ra küna pwüng me ren Kot pwe iir chiechian kewe, nge sap iir nöün Kot mi kepit. Iwe, a pwal suuk ngeniir ewe äpilükülük ar repwe manauewu seni “ewe riaffou mi lapalap.” (Pwar. 7:9, 10, 14; Jem. 2:23) Pokiten ekkewe ekkoch siip rese nom lon ewe pwon mi fö, esor ar äpilükülükün manau lon läng, iwe, fansoun ewe Ächechchem, iir resap möngö ewe pilawa me ün ewe wain, nge repwe chök katol fän süföl.

Kilisou Ngeni Jiowa me Nöün we Chon Angang mi Apwapwaai I!

17. Ifa ussun ach etittina än Aisea kewe oesini mi menlapei ewe Chon Angang a älisi ekiekich le mmolnetä ngeni ewe Ächechchem?

¹⁷ Ach etittina än Aisea kewe oesini mi menlapei ewe Chon Angang a älisi ekiekich le mmolnetä ngeni ewe Ächechchemenien än Jises mälo. A atufichikich ach sipwe “neneloi Jises, Samolun ach luku, o ewe chon Aunusochulo [ach luku].” (Ipru 12:2, TF) Sia fen käeö pwe nöün Kot ese älleasolap. Jises esap ussun Setan, i a fokkun mochen käeö me ren Jiowa pun a mirititi pwe Jiowa ewe Kot mi Lapalap seni meinisin. Sia silei pwe Jises a pwäratä kirekiröch ngeni iir kewe a afalafaler, a echikaratä me älisiir ar repwe chäsefäl ngeni Kot. Ina minne, a pwäratä met epwe föri lon wisan ewe king lon ewe otot sefö lupwen epwe “anüküchara pwüng won fanüfan.” (Ais. 42:4) Pokiten Jises a eü “saram ngeni chon ekewe mü,” a tinikken lon an afalafal ussun ewe Mwu. Iwe, sipwe pwal tinikken le esilefeili ewe kapas allim woon unusen fönüfan.​—Ais. 42:6.

18. Pwata än Aisea oesini a achüngü letipach pwe sipwe kilisou ngeni Jiowa me nöün we Chon Angang mi tuppwöl?

¹⁸ Än Aisea kewe oesini a älisikich le weweiti watteen än Jiowa asor lupwen a tinatiu Nöün we mi ächengicheng woon fönüfan pwe epwe küna riäfföü me mälo fän itach. Jiowa ese pwapwa ren riäfföün nöün we, nge a pwapwa ren an tuppwöl tori mälo. Sipwe pwal pwapwa ussun chök Jiowa pun sia weweiti pwe Jises a epinalo itan Jiowa we me mettoch meinisin a föri a ännetatä pwe Setan emön chon kapas chofona. Ina minne a ännetatä an Jiowa pwüüng le nemenem. Pwal och, Kraist a mwärei ach kewe tipis me mälo fän itach. Ina minne, a atufichi pwiin Jises kewe mi kepit me ekkewe ekkoch sip ar repwe üöch mwen mesen Jiowa. Amwo letipach epwe ur ren kilisou ngeni Jiowa me nöün we Chon Angang mi tuppwöl atun sia chufengen fän iten ewe Ächechchem.

Enniwilin Pworaus

• Ifa ussun Jiowa a pwapwa ren än Nöün we epwe “kinas o cheuch”?

• Ifa ussun Jises “a kinas pokiten ach pupungau”?

• Ifa ussun ewe Chon Angang a efisatä “an chomong aramas pwüng”?

• Ifa ussun ach käeö ekkewe oesini ussun ewe Chon Angang a ammolna ekiekich me letipach fän iten ewe Ächechchem?

[Ekkewe Kapas Eis fan Iten ewe Lesen]

[Sasing lon pekin taropwe 26]

“A unusen itengau, pwe sa ekieki esap wor aüchean”

[Sasing lon pekin taropwe 28]

“Pun a fangala manauan o mäla”

[Sasing lon pekin taropwe 29]

Ekkewe “pwal ekoch sip” ra fiti ewe Ächechchem, nge repwe chök katol fän süföl