IEI alon Kot ngeni ekkewe chon Israel loom: “Esap wor eman epwe wöüngau leimi.” Lon ewe Allük Kot a ngeniir a wor allük fän iten tümünün ekkewe mi osupwang pwal mwo nge ewe kokkotun amusa liwinimmang. (Tuteronomi 15:1-4, 7-10) Ina minne, itä ürürün esap wor mi wöüngaw lein ekkewe chon Israel pokiten Jiowa a pwonei ngeniir pwe epwe efeiöchüür. Iwe nge, an efeiöchüür epwe longolong woon ar älleasochisi ewe Allük, nge chon Israel rese apwönüetä.

Iwe nge, esap weween pwe Kot a oput chokkewe mi osupwang, nge a efeiöchü ekkewe mi wöüöch. Chommong me lein nöün Jiowa kewe chon angang mi tuppwöl ra wöüngaw. Usun chök ewe soufos Amos, i emön chon masen siip mi osupwang me chon tümünü ekkewe irään fik. (Amos 1:1; 7:14) Lon fansoun ewe soufos Elijah, eü lengita a tori fönüen Israel. Elijah a manau ren kirekiröchün emön fefin mi osupwang nge mi mä pwülüwan. Ren eü manaman, ewe ekumwuch pilawa lon ewe sepi ese itelo pwal ewe ekis apüra lon ewe rume ese pöölo lon unusen fansoun ewe lengita. Sise tongeni erä pwe Elijah me ewe fefin mi mä pwülüwan ra wöü ren ei, nge Jiowa a chök awora minne mi wesewesen lamot ngeniir.​—1 King 17:8-16.

Osukosuk mi weiweitä epwe tongeni awöüngawolo aramas. Aksiten me samau epwe tongeni aükatiw emön seni an angangen moni ekis fansoun are fen towu seni. Än emön mälo epwe efisi än nöün kewe mäsen me än pwülüwan nipich. Ekkena sokkun osukosuk watte esap ina esissillen än Kot oputer. Pworausen Naomi me Rut a apöchökkülakich pwe Jiowa a fokkun tongei me tümünü ekkewe mi osupwang. Inaamwo ika Naomi me Rut ra wöüngawolo ren mäloon pwülüwer kewe, nge Jiowa Kot a efeiöchüür me awora met mi lamot ngeniir lon pekin aion.​—Rut 1:1-6; 2:2-12; 4:13-17.

A ffat pwe än emön wöüngaw esap ina esissillen än Kot oput i. Iwe nge, chokkewe mi tuppwöl ngeni Jiowa Kot ra tongeni lükülük lon alon ewe King Tafit ei: “Lupwen ngang üa eman alüal, tori iei üa chinlap, üsap küna mwo eman chon pwüng epwe sachawun, ika nöün kana repwe tütüngorfetal ener mongö.”​—Kölfel 37:25.

[Sasing lon pekin taropwe 7]

Inaamwo ika Naomi me Rut ra wöüngaw nge Kot a efeiöchüür me tümünüür fän tong