A MMEN weires ngeni ekkoch aramas ar repwe ekilonei eü pworaus. Ra ekieki pwe ekilon, ina eü sokkun angang mi chou me rer pokiten repwe afota unusen ekiekiir woon eü mettoch. Lupwen ra älleani lamoten än emön ekilonei eü pworaus, ra meefi säü pokiten iir pwisin rese apwönüetä. (Filipai 4:8) Iwe nge, a mmen apwapwa ach sipwe äeä ach fansoun le ekiekifichi ekkewe pworaus mi enlet sia fen käeö usun Jiowa, napanapen kewe mi echipwör, amwararen an kewe föfför, an kewe emmwen me an we kokkot mi lingemwarar. Pwata?

Jiowa Kot i ewe mi Tekia Seni Meinisin lon läng me woon fönüfan me a akkangang fän iten pwönüetään an we kokkot mi lap. (Jon 5:17) Inaamwo ika a chommong än Jiowa angang nge a chüen awora an fansoun le aüseling ngeni än emön me emön chon fel ngeni ekiek lon letipan mi monomon. Ewe sou mak köl Tafit a silei ei me iei alon fän emmwenien Kot: “Ai Samol mi Lapalap, en ka atittinaei, ka pwal sileei. Ka silei fansoun ai mottiu me ai ütä, ka silei ai ekiek kana me toau.”​—Kölfel 139:1, 2.

Akkomwan, eli emön epwe wewengaweiti alon Tafit na. Neman epwe ekieki: ‘Inaamwo Kot mi “toau” nge a silei eü me eü ai ekiek mi ngaw.’ A pwal mürinnö ena pokiten epwe tongeni älisikich le akkufu ekiek mi ngaw me pwäratä ach tipis ngeni Jiowa. Sia pwal lükülük pwe epwe omusalo ach kewe tipis ren ach lükü än Jises asorun möön kepich. (1 Jon 1:8, 9; 2:1, 2) Iwe nge, sipwe chechchemeni pwe Jiowa a etittina ekkewe chon fel ngeni lon an äfänni ar ekiek mi pwüng. A nennengeniöchü ach eäni eü ekiek mi pwäralo ach kilisou ngeni.

Nge neman kopwe eis: “Ächiöü pwe Jiowa a wesewesen äfänni meinisin än ekkewe fitu million chon fel ngeni ekiek mi pwüng?” Fokkun ewer. Jises a menlapei än Jiowa äfänni aramas lupwen a apasa pwe a mwo nge aücheani ekkewe kükkün nichok, me a pwal apasa: “Oua aüchea seni chomong nichok.” (Luk 12:6, 7) Ekkewe nichok rese tongeni ekieki usun Jiowa. Iwe ika pwe Jiowa a aücheani ekkena nichok, nge epwele fen ifa me watteen an aücheanikich me pwapwaiti än emön me emön leich ekilonei usun I! Ewer, sia lükülük le iotek usun chök Tafit: “Amwo . . . ekiekin lelukei epwe mürina me fän mesom, ai Samol mi Lapalap, ai achau me ai chon amanau.”​—Kölfel 19:14.

Ewer, Jiowa a äfänni ekilonen nöün kewe chon fel mi tuppwöl. A pwal pwälo ena ren alon ewe soufos Malakai ei fän emmwenien Kot lon an we oesini usun ach ei fansoun: “Mürin, chokewe mi niuokusiti ewe Samol mi Lapalap ra kapasfengen lefiler, nge ewe Samol mi Lapalap a afäliir o aüselinga ar kapas. A wor eu puken achechem me fän mesan, a makelong iten chokewe mi niuokusiti i, ewe Samol mi Lapalap, o chechemeni itan.” (Malakai 3:16) Epwe eü minen apwapwa ngenikich ika sipwe chechchemeni pwe Jiowa a ‘afäli’ ach ekilonei usun I. Ina minne, sipwe pwal meefieni meefien ewe sou köl ei, a makkeei: “Üpwe ekieki usun om kewe föför meinisin o ekiek won om kewe föför mi amwarar.”​—Kölfel 77:12.