Ia a pop me ie ei afalafal mi mwääl? Eü puken äwewe a apasa: “Ekkewe popun Chon Kraist rese nöünöü ululun lon ar fel. . . . Iwe nge, ülüpükü som ier mwirin mäloon Jises, ewe tipitipin lamalamen Kraist a apwüngalo pwe chon ena pekin repwe poputä le nöünöü ululun lon ar fel. A apasa pwe epwe mecheres ngeni ekkewe aramas kisikis ar repwe käeö usun lamalamen Kraist seni ekkewe ululun lap seni ekkewe afalafal are puk.”​—Cyclopedia of Biblical, Theological, and Ecclesiastical Literature, makkeien McClintock me Strong, Puk 4, pekin taropwe 503 me 504.

Met ewe Paipel a apasa? “Kosap föri uluulun anümwäl fän itom, kosap pwal alapalapa och mettochun pekitä lon läng are och mettochun pekitiu won fanüfan are och mettochun lon lölön failol. Kosap chapetiu ngeniir are fel ngeniir.” (Ekistos 20:4, 5) Iei makkeien ewe aposel Jon ngeni ekkewe popun Chon Kraist: “Ämi nei kana, oupwe püsin tümwünükemi seni ekewe uluulun anümwäl.”​—1 Jon 5:21.

Ekkewe tipitipin lamalamen Kraist ra erä pwe ekkewe ululun, minen chök älillis le arap ngeni me asamolu met ra liosuetä, nge mei pwüng alor? Eü puken äwewe a apasa: “Eli, akkomwan, aramas ra erä pwe ra nöünöü lios me ululun fän iten chök minen eling are asukul. Iwe nge, lo, lo, lo, aramas ra poputä le fel ngeniir, äkkäeüin, ekkewe lamalam mi imu seni lamalamen Katolik (Eastern Orthodoxy).” (The Encyclopedia of Religion) Iwe nge, a pwüng än ewe soufos Aisea kapas eis: “Met om ekiek usun lapalapen Kot, ika iö kopwe awewe ngeni?”​—Aisea 40:18.

Apöpö ngeni ekkeei wokisin: Aisea 44:13-19; Fofor 10:25, 26; 17:29; 2 Korint 5:7

PWORAUS MI ENLET:

Kot ese tipeeü ngeni än aramas nöünöü ululun me lios

PÖÜTALO EKKEWE AFALAFAL MI MWÄÄL, NGE AKKAMWÖCHÜ MINNE MI ENLET

Seni ach ekis käeö ekkeei pworaus mi mwääl chommong lamalam ra chüen eäni afalafal, met sia tongeni apwüngalo? Ekkeei “tuttunlapen rochopwak [kapasen Krik, myʹthos] mi otuputup” ra kkuf ren ekkewe pworaus mi enlet seni Paipel mi ffatöch me aururukich.​—2 Piter 1:16, TF.

Ina popun, kopwe tipemecheres le apöpöfengeni met ka fen käeö seni om lamalam me met än Kot we Kapas mi enlet a apasa. (Jon 17:17) Iwe, kopwe küna pwönütään ei pwon mi erä: “Oupwe silei ewe let, nge ewe let epwe angasakemi.”​—Jon 8:32.

[Credit Line]

Pictorial Archive (Near Eastern History) Est.