Künasefäli Äpilükülüköch me Tong

SAM me in, sense, me pwal ekkewe ekkoch mi sotun älisi ekkewe säräfö ra mirititi pwe rese tongeni siwili osukosuken ei fönüfan. Nge mei wor chommong mettoch sia tongeni föri le älisi ekkewe säräfö pwe repwe pwapwa, pöchökkül, me äsimaü.

Ürürün ekkewe sam me in repwe ekiekiöchü ifa usun nonnomur me met ra akkomwa lon manauer a kan anapanapa ekiekin me föfförün nöür kewe. E fen öch repwe emiritiir seni le kükkünür lap seni ar repwe achocho le älisiir nge a fen ser lupwan. Ika a wor tong me tümün lon imwer, nöür kewe repwe meefi nükünüköch, iwe, ina ewe äkkäeüin mettoch epwe eppeti ar ekiekin efeiengawa pwisin iir. A fokkun lamot ngeni ekkewe säräfö än emön epwe akkaüseling ngeniir. Ika ekkewe sam me in rese ina usun, iwe, eli ekkoch aramasangaw repwe wisen äfänniir.

Met weween ngeni ekkewe sam me in ikenäi? Oupwe awora fansoun fän iten nöümi kewe atun a fokkun lamot, weween, seni chök le kükkünür. Ei mettoch ese mecheres ngeni chommong famili pun ekkewe sam me in ra öttüres le awora tufichin ar famili. Chokkewe mi pennüküolo pwisin mocheniir pwe repwe alapalo ar fansoun ngeni nöür kewe ra küna pwe ekkena nau ra sopwöch. Iwe nge, usun met a fen affat me mwan, fän ekkoch, a chüen fis ngeni ekkewe nau osukosuk inaamwo ika ekkewe sam me in ra apwönüetäöchü wiser.

Chiechiach me Ekkewe Watte Ra Tongeni Awora Älillis

Ika a fis maun, achomanau, me kirikiringaw ngeni ekkewe nau, iwe, ekkewe watte repwe fokkun achocho le älisiir. Eli, säräfö mi rükö ren ekkena esin mettoch resap etiwa ach älillis. A wewe ngeni ach sipwe awora watteen ach fansoun me achocho. Sisap fokkun äkkäpiir are tunarelo pwe esap ina ewe alen tipatchem are tong. Pwata sise alapalo ach achocho le pwäratä kirekiröch me tong ngeni chokkana mi küna ekkena esin riäfföü?

Esap chök ekkewe sam me in pwe pwal unusen ewe famili me chiechier kewe repwe ppiiöchü ika epwe pwälo apwangapwangen me osukosuken meefien ekkewe nau. Ika a ppiitä esissillan, iwe, mwittir aüselingöch. Ika mi tufich, sotun kapas eis ngeniir woon ar kewe osukosuk fän kirekiröch pwe kopwe alükülükü ngeniir pwe en enletin chiechier. Eli, chiechier are märäriir kewe repwe tongeni älisi ekkewe sam me in ren ei osukosuk mi weires, iwe nge, repwe tümünüöch pwe rete angei seniir wiser. Fän chommong, än ekkewe säräfö sotun pwisin nirelo, ina esissillen ar kökköri semer kewe me iner pwe repwe äfänniir.

 Eü liffang mi mürinnö seni meinisin emön a tongeni ngeni ekkewe nau, ina ewe äpilükülükün pwapwa lon mwachkkan me popun manauer. Chommong säräfö ra mirititi pwüngün än Paipel pwon usun eü otot mi mürinnö a chök arapoto.

Ngaselo Seni Ar Mochen Pwisin Nirelo

Emön nengnginin Japan a ekiekin pwisin nielo fän chommong, iwe, iei alon: “Fän fite ai mochen nieilo. Lekükküni, emön ua lükülükü a kirikiringaw ngeniei. Me loom, ese lea ai makkeei, ‘Ua mochen nieilo,’ pun a kon chommong. Iei ua fen  wiliti emön Chon Pwäratä Jiowa, me ua fiti ewe angangen pioneer, nge fän ekkoch, ai na memmeef a chüen piitä. Nge Jiowa a mut ngeniei ai upwe manau me usun itä a kan ereniei fän pwetete, ‘Kosap nikelo pun manauom mi aüchea.’”

Emön nengngin, 15 ierin seni Russia, a erä: “Atun a 8 ieri, ua poputä le ekieki pwe esor e aücheaniei. Ese mwo nge wor än semei kewe me inei fansoun le foffos ngeniei, me ua sotun pwisin ataweei ai kewe osukosuk. Ua chök pwouru. Iwe, ua chök äkkänini ngeni märäri kewe. Iwe, a ppiitä ewe ekiek ai upwe pwisin nieilo. A ifa me pwapwaai atun ua chuuri ekkewe Chon Pwäratä Jiowa!”

Alon Cathy seni Australia, 30 ierin, a pwäri pwe äpilükülüküngaw a tongeni wiliti äpilükülük allim. A erä: “Iteitan ua ekieki ika ifa usun upwe pwisin nieilo, iwe, mwirin, ua wesewesen sotun pwisin nieilo. Ua mochen sü seni ei fönüfan mi uren metek, lingeringer, me manau mi lamotongaw. Ua meefi pwe ua ttup lon eü ‘fäsin ninnim’ (spiderweb), nge letipengaw a äweiresiei le towu seni. Iwe nge, ua ekieki pwe ai sotun angealo manauei, ina pölüwen ai kewe osukosuk.

“Lupwen ua kerän rongorong pwe fönüfan a tongeni wiliti eü paratis mi uren kinamwe me pwapwa, ua fokkun mochen küna. Nge a usun eü chök ttan. Iwe nge, ekis me ekis, ua weweiti ekiekin Jiowa usun manau me aüchean emön me emön leich mwen mesan. Ua poputä le lükü pwe mei wor eü äpilükülüköch lon mwachkkan. Iwe, iei ua küna ifa usun upwe ngasewu seni ewe ‘fäsin ninnim,’ nge a chüen weires. Fän ekkoch, ua meefi letipechou me osukosuk. Iwe nge, ai afota ekieki woon Jiowa a älisiei le pacheöch ngeni me meefi lükülüköch. Ua kilisou ngeni Jiowa ren mettoch meinisin a fen föri fän itei.”

Ekkewe Säräfö Resap Chüen Pwisin Nirelo

Ren än emön säräfö käeö Paipel, a tongeni mirititi pwe a wor an äpilükülükün küna ewe “manau mi enlet” aposel Paul a kapas usun. A ereni Timoti: “Iwe, kopwe fonou ekkewe aramas mi pisekisek . . . rete apilukuluku pisek chok mi epwe morelo; nge repwe apilukuluku ewe Kot mi chok fafang ngenikich mettoch meinisin pwe sipwe pwapwa ren. Repwe fori minne mi murinno, repwe pisekisekilo ren ar fofor-murinno, . . . repwe iseni, fan asengesin pwisin ir, eu longolong mi murinno ngeni ewe fansoun epwe feito, pwe repwe amwochu o manaueni ewe manau mi enlet.”​—1 Timoti 6:17-19, TF.

Än Paul fön a wewe ngeni ach sipwe äkkälisi aramas le eäni ewe äpilükülük allim fän iten mwachkkan. Jiowa a pwonei “ewe manau mi enlet” lon “eü läng mi fö me eü fanüfan mi fö.”​—2 Piter 3:13.

Chommong säräfö mi piin ekiekin pwisin nirelo ra weweiti pwe ar äeämwäälli säfeien opuchopuch me lisowu mwääl, ina efoch alettam ngeni mälo, nge epwe chök mwocholo ika repwe pwisin niirelo. Ra pwal mirititi pwe epwele morolo ei otot fitifengen me maun, oput, kirikiringaw, me arochongaw. Ra käeö pwe esor emön aramas a tongeni siwilisefäli ei otot. Ra lefareni pwe än Kot we Mwu, ina chök ach we äpilükülüköch. Epwe awora eü mineföön otot ikewe meinisin mi älleasochis, pachelong ekkewe säräfö, resap chüen mälo ie, iwe, resap pwal chüen mwo nge mochen mälo.​—Pwarata 21:1-4.