Öttüres Le Fiffiti Ewe Angangen Räs

“Oupwe alapalafochei ämi achocho lon ewe angangen ach Samol.”​—1 KOR. 15:58.

1. Met Jises a etiwa nöün kewe chon käeö le föri?

 ARAP ngeni muchuloon ewe ier 30 C.E., Jises a fetälelong Sameria, iwe, a asösö ünükün eü ito kkan ngeni ewe sopw Saikar. Me ikena ie, a ereni nöün kewe chon käeö: “Oupwe nenengeniöchu ekewe tanipi, pun üän irän lon ra nupula, pwe ra öchün ar repwe kinikin.” (Jon 4:35) Ese kapas usun wesewesen eü angangen räs, nge a wewe ngeni eü angangen ioifengenin aramas mi letipwenechar pwe repwe wiliti nöün chon käeö. Ren alon na, a etiwa nöün kewe chon käeö le fiti ena angang. A watte ewe räs, nge a mwochomwoch ewe fansoun le ataweei!

2, 3. (a) Met a pwäratä pwe sia fen nonnom lon ewe fansoun räs? (b) Met sipwe käeö lon ei lesen?

² Alon Jises usun eü räs a wor watteen weween lon ach ei fansoun pun aramas ikenäi ra usun chök eü tänipi, “ra öchün ar repwe kinikin.” Iteiten ier, fite million aramas ra ketiw le käeö ewe enlet mi emmwen ngeniir manau, iwe, chommong me leir ra papataiselo. Mei wor wisach mi aüchea le fiti ewe angangen räs fän emmwenien Jiowa Kot, ewe Samolun räs. Oua kan “alapalo ami föri” ewe angangen räs?​—1 Kor. 15:58.

³ Lon ekkewe ülüngät esopw ier Jises a afalafal woon fönüfan, a ammolnatä nöün kewe chon käeö ar repwe wisen chon angangen ewe räs. Lon ei pworaus, sipwe käeö ülüngät me lein ekkewe lesen mi lamot Jises a äiti ngeni nöün kewe chon käeö. Eü me eü lesen a menlapei eü napanap mi aüchea lon ach achocho le ionifengeni chon käeö ren unusen tufichich. Sipwele käeö eü me eü ekkena napanap.

A Fokkun Lamot Tipetekison

4. Ifa usun Jises a äweweei lamoten tipetekison?

⁴ Anchangei mwo: Ekkewe chon käeö ra kerän änini ika iö leir a lapalap. Eli ra chüen wowongaw me meseafochfengen. Ina popun, Jises a körato emön semirit me aüetäi leir. A apasa: “Iö a püsin atekisona pwe epwe wewe ngeni ei semirit, i ewe mi lap seni meinisin lon Mwün Läng.” (Älleani Mattu 18:1-4.) Ekkewe chon käeö resap eäni ekiekin chon fönüfan mi alamota pöchökküler, pisekiir, me wiser, nge repwe weweiti lamoten ar pwisin atekisoneretiw mwen mesen aramas. Jiowa epwe chök ekkefeiöchüür me nönnöünöü iir ika pwe ra enletin tipetekison.

5, 6. Pwata a lamot tipetekison pwe sipwe fiti ewe angangen räs ren unusen tufichich? Äweweei mwo.

⁵ Tori ikenäi, chommong aramas ra fen äeä unusen manauer le kükkütta iter, wöüür, me wis tekia. Ina popun, esor ar fansoun le käeö usun Jiowa me angang ngeni. (Mt. 13:22) Iwe nge, nöün Jiowa kewe aramas ra pwapwa le pwisin atekisoneretiw mwen mesen aramas pwe repwe angei feiöch me chen seni Kot, ewe Samolun räs.​—Mt. 6:24; 2 Kor. 11:7; Fil. 3:8.

⁶ Ekieki pworausen Francisco, emön elter lon South America. Le alüwölün, a towu seni sukul tekia pwe epwe wiliti emön pioneer. A äweweei: “Mwirin ai kofot, ua tongeni künökün ai angang pwe epwe watte tufichin manauem. Iwe nge, äm aua filatä pwe aupwe akisaalo äm angangen moni me sopwelo le fiti ewe angangen pioneer. Mwirin,  aua nöüni ülümön ät me emön nengngin, iwe, a weiresilo nonnomun manauem. Nge Jiowa a älisikem pwe aupwe chök menemenöch.” Iwe, Francisco a pwal erä: “Ren ükükün 30 ier, ua pwapwa le wiseni chommong wis, kapachelong ewe wis elter. Ause mwo nge niamam fän eü ren äm menemenöch ren minne chök a lamot ngenikem.”

7. Ifa usun ka achocho le apwönüetä ewe fön lon Rom 12:16?

⁷ Rom 12:16 a apasa: “Ousap lamalamtekia, nge oupwe tipeni le föri angang mi tekisoson.” Ika kopwe apwönüetä ena fön, kopwe tongeni küna chommong feiöch me wis aüchea lon ewe angangen räs.​—Mt. 4:19, 20; Luk 18:28-30.

Öttüres A Atoto Feiöch

8, 9. (a) Menlapei än Jises kapas äwewe usun ekkewe ülümön chon angang. (b) A äkkäeüin apöchökküla iö?

⁸ A pwal lamot sipwe öttüres le fiti ewe angangen räs. Jises a affata ena lon an kapas äwewe usun ülümön chon angang. * Me mwen än emön masta säi ngeni fönü towau, a awisa ngeni ülümön nöün kewe chon angang ar repwe tümünü pisekin kewe meinisin. A ngeni emön nimu ngeröü föün moni silifer, a pwal ngeni emön ruu ngeröü, nge ewe aülümönün, engeröü. Mwirin än ewe masta a säi, ewe äemönün me ewe arüüemönün ra öttüres me mwittir “anganga ewe moni.” Iwe nge, ewe aülümönün a chipwang. A ireelo ewe moni fän pwül. Atun ewe masta a liwinto, a efeiöchü ewe äemönün me ewe arüüemönün chon angang ren an seikiiretä ‘woon chommong mettoch.’ Nge a angei ewe moni seni ewe aülümönün me a oturawu ätena lükün.​—Mt. 25:14-30.

⁹ Ese mwääl, ka mochen äppirü ekkewe chon angang mi öttüres lon än Jises kapas äwewe me achocho le föralo chon käeö ren unusen tufichum. Nge kopwe fet ika nonnomun manauom a aükükü met ka tufichin föri? Eli ka angang weires fän iten tufichin om famili pokiten ngawoloon pekin moni. Are, kese chüen meefi pöchökkül pokiten a wattelo ierum. Ika ina, än Jises kapas monomon epwe apöchökküloketä.

10. Ifa usun ewe masta lon ena kapas äwewe a pwäratä mirit, iwe, pwata ena pworaus a apöchökkülok?

¹⁰ Nengeni pwe ewe masta lon ena kapas äwewe a mirititi pwe a sokkolo tufichin ekkena  chon angang ren an awisa ngeni emön me emön leir “ükükün mine a tufich ngeni.” (Mt. 25:15) Winnen ewe äemönün chon angang a lap seni winnen ewe arüüemönün. Iwe nge, ewe masta a pwäratä pwe a aücheani ar öttüres ren an kör ngeniir me rüüemön “chon angang mi mürina o allükülük,” me an ngeniir eü chök sokkun liwin. (Mt. 25:21, 23) Pwal ina chök usun, Jiowa Kot, Mastaan ewe räs, a silei pwe nonnomum a aükükü om tufichin angang ngeni. Epwe äfänni om angang ngeni ren unusen tufichum, me epwe liwinuk.​—Mark 14:3-9; Älleani Luk 21:1-4.

11. Äweweei ifa usun öttüres fän osukosuken nonnomun manauach a atoto chommong feiöch.

¹¹ Pworausen emön pwiich seni Brazil itan Selmira a pwäratä pwe ach öttüres le angang ngeni Kot ese longolong woon nonnomöchüch. Rüwe ier loom, emön chon solä a nielo pwülüwen Selmira we. Selmira a atufichi manauer me nöün kewe ülümön kükkün nengngin ren an angang ngeni eü famili. Iwe, a kan akkangang fite, fite awa, me a fokkun pekkus le fiti waa mi ur ren aramas. Inaamwo ika a weires nonnomun, nge a akkota pwe epwe pioneer. Mwirin, rüüemön me lein nöün kewe ra fiti le pioneer. Iei alon: “Lon ekkewe ier ra lo, ua käeö ngeni lap seni 20 aramas me usun itä nge iir chon ai we famili. Tori ikenäi, ua pwapwaiti ar tong me chiechiöch mi fokkun aüchea ese mö ren moni.” Ewe Samolun räs a fokkun efeiöchü än Selmira öttüres!

12. Ifa usun sia tongeni pwäratä pwe sia öttüres le afalafal?

¹² Ika nonnomun manauom a aükükü om fansoun afalafal, ka chüen tongeni alapalo om fiti ewe angangen räs ren om lipwäköchülo. Atun ka apwönüetäöchü ekkewe kapasen emmwen ra kan katowu iteiten wiik lon ewe Service Meeting, kopwe sipeöchülo me eäni ekkoch mineföön sokkun napanapen afalafal. (2 Tim. 2:15) Iwe, ika a tufich, ka pwal tongeni siwili kokkotun om fansoun are ükütiw le föri mettoch rese kon lamot pwe kopwe tongeni fiffiti än ewe mwichefel angangen afalafal.​—Kol. 4:5.

13. Met epwe atufichi ach alapalo me sopwelo ach öttüres?

¹³ Chechchemeni pwe öttüres a pop seni ach tong me kilisou ngeni Jiowa seni letipach. (Kölf. 40:8) Ewe aülümönün chon angang lon än Jises we kapas äwewe a niuokkusiti nöün we masta, a ekieki pwe a tipepöchökkül me eipö. Ina popun, ena chon angang a ireelo ewe moni, nge ese fen anganga pwe epwe alapalo wöün nöün we masta. Ren ach sisap ina usun lon wisach, a lamot sipwe ämääratä me akkamwöchü ach ririöch ngeni Jiowa, Mastaan ewe räs. Awora fansoun le käeö me ekilonei napanapen Jiowa kewe mi amwarar, usun choweän tong, mosonottam, me ümöümöch. Ika ka ina usun, letipom epwe amwökütuk le angang ngeni Jiowa ren unusen tufichum.​—Luk 6:45; Fil. 1:9-11.

“Oupwe Pin”

14. Met chokkewe mi mochen fiti ewe angangen räs repwe föri?

¹⁴ Ewe aposel Piter a aloni alon ewe Tesin Ipru lon an makkeei met letipen Kot ngeni nöün kewe chon angang woon fönüfan, a erä: “Oupwe pin lon mettoch meinisin mine oua föri, usun chok Kot, ewe mi körikemi, a pin. Pun a mak lon ekewe Toropwe mi Pin, ‘Oupwe pin, usun ngang üa pin.’ (1 Pit. 1:15, 16; Lif. 19:2; Tut. 18:13) Ena pworaus a menlapei lamoten än ekkewe chon angangen räs repwe limelimöch lon manauer me lon ar lükü. Iwe, sia tongeni elimelimakich lon kapas monomon. Ifa usun? Ren älillisin än Kot we kapas mi enlet.

15. Met manamanen än Kot we kapas mi enlet a tongeni föri fän itach?

¹⁵ Än Kot kapas mi enlet a usun chök konikin  elimelim. Äwewe chök, ewe aposel Paul a makkeei pwe ewe mwichefelin Chon Kraist mi kepit a limelimöch mwen mesen Kot. A usun chök emön fin apwüpwülü fän iten Kraist, ewe a elimöchü “ren koluk, iei an kapas, fän iten an epwe . . .  pin o unusöch.” (Ef. 5:25-27) Jises a fen kapas usun manamanen ewe kapasen Kot le elimelim. A ereni nöün kewe chon käeö: “Ämi oua fen limöch pokiten ekewe kapas üa ürenikemi.” (Jon 15:3) Ina minne, ewe enlet lon än Kot kapas a wor manamanan le elimöchü manauach me ach lükü. Ika pwe sipwe limelimöchülo ren än Kot kapasen enlet, epwe etiwa ach fel ngeni.

16. Ifa usun sipwe akkamwöchü limöchüch mwen mesen Kot?

¹⁶ Ina popun, ren ach sipwe wiliti chon angangen ewe räs, sipwe akkomw pöütalo föfför mi limengaw meinisin. Ren ach sipwe fich le sopwosopwolo lon ena wis, sipwe fokkun älleasochisi än Jiowa kewe allük mi fel. (Älleani 1 Piter 1:14-16.) Usun chök ach tüttümünü limöchün inisich iteitan, sipwe pwal mut ngeni än Kot we kapas mi enlet an epwe ekkelimöchükich. A wewe ngeni ach sipwe äkkälleani Paipel me fiffiti ach kewe mwich iteitan. Sipwe pwal achocho le apwönüetä än Kot kewe kapasen ächechchem. Epwe atufichikich le fiffiu ngeni pwisin ach kewe apwangapwang me etipetipaen ei otot mi limengaw. (Kölf. 119:9; Jem. 1:21-25) Ewer, a fokkun aururukich le silei pwe ren älillisin än Kot kapas mi enlet, sia tongeni “limelimöchülo” seni pwal mwo nge tipis watte!​—1 Kor. 6:9-11.

17. Ikkefa än Paipel kewe kapasen fön sipwe älleasochisiir pwe sipwe akkamwöchü limöchüch?

¹⁷ Ka kan etiwa Kapasen Kot an epwe limeti manauom? Äwewe chök, met meefiom atun ka rongorong öüröür usun ekkewe minen apwapwa mi limengaw? (Kölf. 101:3) Ka kan tümünuk seni om chiechi ngeni chienom chon sukul me chon angang rese eäni om lükü? (1 Kor. 15:33) Ka kan achocho le pworaiti om kewe apwangapwang mi tongeni elimengawok mwen mesen Jiowa? (Kol. 3:5) Ka kan ikkimulo seni än ekkewe mwuun fönüfan kewe osukosuk me än aramas kon etekiatääi en me fönüan mi pwäpwälo lon ekkewe urumwot?​—Jem. 4:4.

18. Ifa usun limöchüch mwen mesen Kot epwe atufichikich le uwaöch lon ewe angangen räs?

¹⁸ Om äkkälleasochis epwe fokkun atoto feiöch. Jises a apöpööü nöün kewe chon käeö mi kepit ngeni palen irä, iwe, a erä: “[Semei] epwe pöküela ekewe palan meinisin mi nonom loi resap ua, nge ekewe palan meinisin mi ua, epwe limetiir, pwe epwe chomongola uar.” (Jon 15:2) Atun ka limelim ren konikin ewe enlet lon Paipel, kopwe uwaani chommong.

Feiöch Iei me lon Mwachkkan

19. Ifa feiöchün nöün Jises kewe chon käeö ren ar öttüres lon ewe angangen räs?

¹⁹ Ekkewe chon käeö mi tuppwöl mi älleasochisi äitien Jises ra angei än Kot manaman lon ewe Pentikos 33 C.E. pwe repwe chon pwäratä “lon unusen fanüfan.” (Fof. 1:8) Ra wiliti chon ewe mwichen sou pwüngüpwüng, misineri, me elter mi säifetäl, iwe, a watte wiser lon ewe angangen afalafala ewe  kapas allim “ngeni aramas meinisin won fanüfan.” (Kol. 1:23) A ifa me watteen feiöchür me ewe pwapwa ra atoto ngeni aramas!

20. (a) Ikkefa ekkewe feiöch ka angei seni om fiffiti ewe angangen räs ren unusen tufichum? (b) Met kopwe tipeppos le föri?

²⁰ Sipwe pwapwaiti watteen wisach lon ewe angangen räs mi fiffis iei ren ach pwäratä tipetekison, öttüres, me älleasochisi än Paipel kewe allük. Chommong ra letipengaw me weires ren ar chechchei pisek me pwapwaan fönüfan, nge kich sia menemenöch me küna pwapwa enlet. (Kölf. 126:6) Lap seni ena, sia silei pwe ‘esap lomotongau ach angang lon ach Samol.’ (1 Kor. 15:58) Jiowa Kot, Mastaan ewe räs, epwe efeiöchükich tori feilfeilo chök ren “ach angang me tong fan asengesin itan.”​—Ipru 6:10-12, TF.

[Pwóróus fan]

Ka Chechchemeni?

Atun ka achocho le fiffiti ewe angangen räs ren unusen tufichum . . .

• pwata a lamot kopwe tipetekison?

• ifa usun kopwe ämääraatä me akkamwöchü om öttüres?

• pwata a lamot kopwe akkamwöchü limöchün manauom me pwal om ririöch ngeni Kot?

[Ekkewe Kapas Eis Fan Iten Ewe Lesen]

[Sasing lon pekin taropwe 25]

Tipetekison epwe älisikich le akkomwa angangen ewe Mwu