Pölüwen Rüänü Kapas Eis Usun ewe Sopwoloon

JISES KRAIST a oesini usun sopwoloon ei fönüfan. A äweweei: “Pun riaföün lon ekana rän epwe fen lap seni ekewe riaföü mi fen fis seni lepoputän fanüfan tori ei fansoun, esap pwal fissefäl ena sokun lon ekewe fansoun repwe feito.”​—Mattu 24:14, 21.

Alon Jises na me pwal ekkoch wokisin lon Paipel usun ewe sopwoloon, a epiietä chommong kapas eis mi lamot. Pwata kese suuki nöüm Paipel me ppii pölüwen ekkena kapas eis?

1 Met Epwe Talo?

Ewe Paipel ese apasa pwe wesewesen ei fönüfan epwe talo. Ewe sou mak köl fel a makkeei: ‘Kot a anükätiu fanüfan won longolongun kewe, pwe esap fokun mwökütüküt tori feilfeilachök.’ (Kölfel 104:5) Ewe Paipel ese pwal apasa pwe mettoch meinisin mi manau woon fönüfan repwe kitetterilo. (Aisea 45:18) Pwisin Jises a erä pwe ekkoch aramas repwe küna manau. (Mattu 24:21, 22) Nge, met chök epwe talo me ren ewe Paipel?

Mwuun aramas mi sopwongaw epwe sopwolo. Fän än Kot emmwen, Taniel a makkeei: “Ewe Koten läng epwe aüetä eu mwü esap tongeni tala, esap pwal wor eu mwü epwe tongeni akufu. Iwe, ei mwü epwe ataela o arosala ekewe lusun mwü, nge epwe püsin nom tori feilfeilachök.”​—Taniel 2:44.

Maun me limengawen fönü repwe wesilo. Kölfel 46:9 a äweweei met Kot epwe föri: “A aükätiu maun won unusen fanüfan, a kupi ekewe likapich o pwülü ekewe siles, a fisi ngeni ekkei ekewe wokenin maun.” Ewe Paipel a pwal apasa pwe Kot epwe “afeiengaua chokewe mi afeiengaua fanüfan.”​—Pwarata 11:18.

Atai allük me pwüngüngaw repwe wesilo. Än Kot kapas a pwonei: “Pun ekewe chon pwüng repwe fanüeni ewe fanü, pwal ekewe aramas mi wenechar repwe nonom lon. Nge ekewe aramasangau repwe kärila seni ewe  fanü, pwal chokewe resap allükülük repwe üttütä seni me lon, usun irä ra üttütä seni pwül.”​—Än Salomon Fos 2:21, 22.

2 Ineet Epwe War ewe Sopwoloon?

Jiowa Kot a fen filatä ewe “fansoun” epwe asopwalo föfföringaw me aüetä an we Mwu. (Mark 13:33) Nge ewe Paipel a affata pwe sise tongeni silei titchikin ränin ewe sopwoloon. Jises a apasa: “Esap wor eman a silei ewe rän are ewe kulok ekei mettoch repwe fis lon, sap mwo nge ekewe chon läng are ewe Nau, nge ewe Sam echök a silei.” (Mattu 24:36) Iwe nge, Jises me nöün kewe chon käeö ra oesini met epwe fis woon fönüfan mwen warotoon ewe sopwoloon. Ika meinisin ekkewe oesini ra pwönüetäppök woon unusen fönüfan, iwe a arapoto ewe sopwoloon.

Watteen siwil lon mwökütükütün fönüfan mi kkolo seni meinisin. Iei met Jises a pölüwen ngeni än nöün kewe chon käeö kapas eis usun ewe sopwoloon: “Ekewe fanü repwe fiufengen o ekkewe mwü repwe maunfengen. Epwe wor chechen fanü me lengita ekis meinisin. Ekei riaföü ra usun chök ekewe metek eman fefin a eäni mwen an epwe nöünöüla.” (Mark 13:8) Aposel Paul a makkeei: “Lon ekewe ränin lesopolan epwe wor fansoun weires. Aramas repwe ekieki chök püsin ir, repwe efich moni, repwe tunomong me lamalamtekia, repwe turunufas o aleasolap ngeni semer me iner, resap sile kilisou, resap meniniti lamalam, resap eäni tong, resap amusala tipisin aramas, ra luapas, resap tongeni püsin nemeni inisir, ra lingeringerikai, ra oput mine a mürina, ra rawangauei aramas, ra rochongau o uren lamalamtekia, ra efich pwapwan fanüfan, nge resap echeni Kot.”​—2 Timoti 3:1-5.

Angangen afalafal mi fiffis woon unusen fönüfan lon sokkopaten fos. Jises a erä: “Aramas repwe afalafalafeili ewe Pworausen Manau usun ewe Mwün Kot won unusen fanüfan, pwe epwe eu minen pwärätä ngeni aramas meinisin. Mürin epwapw tori fansoun sopolan.”​—Mattu 24:14.

3 Met Epwe Tapwoto Mwirin ewe Sopwoloon?

Ewe Paipel ese apasa pwe aramas mi mürinnö meinisin repwe feitä läng me nom lon tori feilfeilo chök. Nge, Jises a erä pwe epwe pwönüetä met Kot a fen akkota me le poputään fän iten aramas. “Ra feiöch chon tipetekison, pun ir repwe fanüeni fanüfan.” (Mattu 5:5; 6:9, 10) Ren iir kewe ra mälo mwen ewe sopwoloon, ewe Paipel a pwonei pwe repwe manausefälitä lon mwach kkan. (Hiop 14:14, 15; Jon 5:28, 29) Met epwe tapwoto mwirin ewe sopwoloon?

Jises epwe wisen King lon än Kot we Mwu lon läng. Iei makkeien Taniel: “Mürin üa küna me lon künaei lepwin eman a feito me lon kuchun läng, a usun chök lapalapen eman nöün aramas [Jises ewe mi fen manausefäl]. Iwe, ra emwenato ren Kot ewe mi nom seni me lomlom, pwe epwe nom fän mesan. Iwe, [Jises] a angei an nemenem me lingan me mwün, pwe aramasen fanü me mwü, pwal aramas mi eäni sokopaten fos repwe angang ngeni. An nemenem epwe nom tori feilfeilachök, esap tongeni wesila, nge mwün esap tongeni tala.”​—Taniel 7:13, 14; Luk 1:31, 32; Jon 3:13-16.

Aramas mi nom fän nemenien ewe Mwuun Kot repwe pwapwaiti pöchökküler, nükünüköchüür me manau esemuch. Iei makkeien Aisea: “Repwe aüetä imwer o nonom lon, repwe pwal fotuki irän wain o ochei uan. Esap fis pwe repwe aüetä imwer, nge eman lükür epwe nom lon. Esap pwal fis pwe repwe fotuki irä, nge eman lükür epwe mongö seni.” (Aisea 65:21-23) Iei makkeien ewe aposel Jon usun ena fansoun: “Nengeni,  imwen Kot a nom lein aramas! Iwe, Kot epwe nonom lefiler o ir repwe aramasan, nge püsin Kot epwe etiir pwe epwe ar Kot. Epwe talüpwasei chönün mas seni won meser meinisin. Esap chüen wor mäla ika letipeta ika kechü ika cheuch, pun ekewe mettochun lom ra morola.”​—Pwarata 21:3, 4.

4 Itä Met Kopwe Föri pwe Kopwe Küna Manau lon ewe Sopwoloon?

Aposel Piter a apasa pwe lon fansoun sopwoloon, epwe wor chon esiita ewe ekiek pwe Kot epwe siwili ototen ei fönüfan me amoielo föfför mi ngaw. (2 Piter 3:3, 4) Inaamwo ika ra ina usun, nge Piter a pesei chokkewe mi manau lon ei fansoun ar repwe föri ekkeei mettoch.

Käeö seni met a fen fis me loom. Aposel Piter a makkeei: “Kot esap achika ewe fanüfan me lom, nge a aworato ewe noter won ekewe aramas resap meniniti i. A chök amanaua Noa ewe chon afalafala usun pwüng me pwal füman aramas.” (2 Piter 2:5) Iei met a pwal apasa usun ekkewe chon esiit: “Ra apasa ei pokiten ra mochen manlükala pwe ren än Kot kapas läng me fanüfan ra fis. Fanüfan a fis seni koluk o pwal ren koluk. Iwe,  pwal ren koluk, iei kolukun ewe noter, ewe fanüfan me lomlom a tala ren. Nge ekewe läng me ei fanüfan * mi nom iei ra iseis ren ewe chök kapasen Kot pwe repwe tala ren ekkei. Ra nonom tori ewe rän, lupwen ekewe aramas resap meniniti Kot repwe küna kapwüng me mäla.”​—2 Piter 3:5-7.

Manaueni ewe manau mi apwapwaai Kot. Ekkewe mi mochen küna manau lon ewe sopwoloon repwe “manaueni eu manau mi pin mi nonom fän nemenien Kot.” (2 Piter 3:11) Nengeni pwe Piter a menlapei “manaueni eu manau mi pin.” Weween ese naf ach apasa pwe sia lükü Kot are mwittir siwili föfförüch mi ngaw pokiten chök sia mochen küna manau.

Met sokkun föfför Kot a pwapwaiti? Pwata kese alöllöfengeni sileom me met Paipel a apasa? Chon Pwäratä Jiowa ra pwapwa le älisuk. Tingorer ar repwe äiti ngonuk pölüwan seni nöüm Paipel. Ika kopwe föri ena, epwe tongeni älisuk le äpilükülüköch fän iten mwachkkan, inaamwo ika a chommong mettoch mi eniuokkus ra pwenikich.

[Ekkewe pwóróus fan]

[Ekis Pwóróus lón pekin taropwe 7]

Ewe fönüfan esap talo, nge ekkewe aramas mi elimengawa repwe mälo