Iotek

2 Sipwe Iotek ngeni Iö?

INAAMWO ika aramas ra iotek ngeni sokkopaten kot mi sokkolo iter nge Kot epwe etiwa meinisin iotek? A ina usun meefien chommong aramas ikenäi, ra sani ar lamalam repwe nofitfengen, me eäni ewe ekiek pwe lamalam meinisin mi mürinnö nge meit ika ar lükü mi sokkofesen. Iwe nge, mi pwüng ei ekiek?

Ewe Paipel a äiti ngenikich pwe ese pwüng än chommong aramas iotek. Lon fansoun loom, aramas ra kan iotek ngeni ekkewe ululun. Nge, fän chommong, Kot a fen öüröürer usun ena föfför. Äwewe chök, Kölfel 115:4-6 a erä: “A wor selinger, nge resap tongeni rongorong.” A kon ffat ei wokisin, pun epwe met lamoten än emön iotek ngeni emön kot esap tongeni rongorong?

Eü pworaus lon Paipel a äweweöchü ei mettoch. Elias, emön soufos mi enlet a ereni ekkewe soufosun Paal ar repwe iotek ngeni ar kot, iwe mwirin i epwe pwal iotek ngeni an Kot. Elias a erä pwe ewe Kot mi enlet epwe pölüweni an iotek nge ewe kot chofona esap pölüweniir. Iwe, ekkewe soufosun Paal a ttam ar iotek me püpüchör le siö, nge ese pölü! Iei pworauser: “Esap wor och möngüngü, esap wor eman a päpälü ika aüseling.” (1 King 18:29) Iwe nge, ifa usun än Elias we iotek?

Elias a iotek, me an we Kot a mwittir pölüweni, a tinatiw ekkei seni läng me kenalo ewe asor. Ifa sokkofesenin än Elias iotek me än ekkewe soufosun Paal? Än Elias iotek lon 1 King 18:36, 37 * a affata pölüwen ena kapas eis. A mwoch an iotek, a chök orun 30 kapas lon fosun Ipru, nge lon ena ükükün, a köri iten Kot Jiowa fän ülüngät.

Paal a wewe ngeni “chon nemeni” are “masta.” I koten Kenaan, nge ekkewe ekkoch fönü a pwal wor ar kot usun chök Paal. Iwe nge, ren Jiowa, itan we mi kkolo aüchean pun a chök weneiti I woon unuselapen läng me fönüfan. Iei alon ngeni nöün kewe aramas: “Ngang ewe Samol mi Lapalap [Jiowa], iei chök itei. Iwe, üsap ngeni eman kot ai ling.”​—Aisea 42:8.

Pwata Kot a etiwa än Elias iotek nge ese etiwa än ekkewe soufosun Paal iotek? Pokiten fel ngeni Paal a elimengawa manauen ekkewe chon fel ren ar föri lisowu mwääl atun ar fel pwal mwo nge eäni asor aramas. Nge mi sokkolo ewe fel ngeni Jiowa, pun a fen elimöchüolo manauen nöün kewe chon Israel me angaserelo seni ekkewe föfför mi limengaw. Ekieki mwo: Ika ka mak taropwe ngeni emön chiechiom mi ämmäfel me makkeei itan woon ewe futo, ka ekieki epwe lo ngeni pwal  emön mi fokkun aramasangaw mi kon itengaw mi ü ngeni meinisin minne chiechiom we a lükü? Aapwi!

Ika ka iotek ngeni Jiowa weween ka iotek ngeni ewe Chon Föratä, Semen aramas meinisin. * Iei alon ewe soufos Aisea lon an iotek: “Äm Samol mi Lapalap [Jiowa], en semelapem.” (Aisea 63:16) I ewe Jises a fos usun lupwen a ereni nöün kewe chon käeö: ‘Üpwe feitä ren Semei pwal Sememi, ren ai Kot pwal ami Kot.’ (Jon 20:17) Jiowa, ina I Semen Jises. Jises a iotek ngeni I me äiti ngeni nöün kewe chon käeö ar repwe pwal iotek ngeni.​—Mattu 6:9.

Ewe Paipel a äiti ngenikich ach sipwe iotek ngeni Jises, Maria, ekkewe aramas mi pin are ekkewe chonläng? Aapwi, ngeni chök Jiowa. Ekieki ekkeei ruu popun pwata a ina usun. Äeüin, iotek ina kinikinin ach fel, me Paipel a erä pwe sipwe fel ngeni Jiowa chök. (Ekistos 20:5) Oruuan, Paipel a pwäratä pwe itelapen Kot Chon “aüselinga iotek.” (Kölfel 65:2) Jiowa ese ewisa ngeni pwal emön ei angang, inaamwo ika a ewisa chommong angang ngeni ekkoch. I ewe Kot mi pwonei pwe epwe pwisin aüselinga ach kewe iotek.

Ika ka mochen Kot epwe aüselinga om iotek, chechchemeni ei kapasen fön: “Iö epwe köri iten ewe Samol epwe manau.” (Fofor 2:21) Nge Jiowa a etiwa meinisin iotek? Are mei pwal wor och mettoch mi lamot sipwe silei pwe Jiowa epwe aüselinga ach iotek?

[Ekkewe pwóróus fan]

[Sasing lon pekin taropwe 5]

Än Elias appölüwa ekkewe soufosun Paal a ännetatä pwe Kot ese etiwa meinisin iotek