Arap Ngeni Kot

‘A Äpweteteei Letipen Jiowa’

“ESE wor aücheai,” iei alon emön mwän mi määritä lon ewe enlet nge ren och fansoun, ese chüen älleasochisi än Kot allük. Atun a ekieksefäl, a niuokkus pwe Kot esap omusalo. Nge ena chon tipis mi aiersefäl a küna äpilükülüköch seni pworausen Manasa we mi mak lon 2 Kronika 33:1-17. Ika ka meefi pwe esor aücheom pokiten om kewe tipis me loom, eli pworausen Manasa epwe pwal aururuk.

Chon än Manasa we famili ra fel ngeni Jiowa. Hesekaia, seman we, i emön me lein ekkewe kingen Juta mi kkolo mürinnöön. Manasa a uputiw ina epwe ülüngät ier mwirin än Jiowa föri eü manaman le attamaalo manauen seman we. (2 King 20:1-11) Ese mwääl, Hesekaia a ekieki pwe nöün na, eü liffang seni än Kot ümöümöch. Iwe, a achocho le äiti nöün we pwe epwe tongei fel mi limelimöch. Nge pworausen Manasa a äiti ngenikich pwe esap fansoun meinisin ekkewe nau repwe äppirü semer kewe me iner mi tuppwöl ngeni Kot.

Ese mwo lu seni 12 ierin Manasa atun seman we a mälo. Solapan pwe Manasa a “föri mine a ngau me fän mesen ewe Samol mi Lapalap.” (Wokisin 1, 2) Itä Manasa a tipetipelo ren ekkewe sou fön rese süföliti fel mi enlet? Ewe Paipel ese affata. Nge a erä pwe Manasa a fel ngeni ululun, me a kirikiringaw. A aüetä rongen asor ngeni kot chofona, asoresini nöün kewe ät, föfföri angangen rong, me anomu eü ululun lon än Jiowa we imwen fel lon Jerusalem. A tipeförea, me ese älleasochisi ekkewe kapasen öüröür a piin rong me rong seni Jiowa, ewe Kot mi atufichi an epwe uputiw ren an attamaalo manauen seman we.​—Wokisin 3-10.

Iwe, Jiowa a mutatä pwe Manasa epwe föfö me kekiilo ngeni Papilon. Atun a fötek ikena ie, a ekieksefäl usun minne a fen föri lon manauan. Eli a weweiti pwe esor manamanen nöün kewe ululun pun rese tümünü. Eli a chechchemeni ekkewe mettoch seman we a fen äiti ngeni me le kükkünün. Ese ffat ika a ina usun, nge Manasa a siwili an ekiek. Ewe Paipel a apasa, “A tüngor pwe [Jiowa] än an kewe lewo we Kot epwe ümöümöch ngeni, a pwal fokun atekisonätiu me fän mesan. A iotek ngeni Kot.” (Wokisin 12, 13) Lon fosun Ipru, ewe pworaus mi erä, ‘A tüngor pwe Jiowa epwe ümöümöch ngeni’ a wewe ngeni pwe ‘a äpweteteei woon mesen Jiowa,’ weween, ‘a äpweteteei letipan.’ Nge itä Kot epwe tongeni omusalo ena mwän mi föri tipis mi kon annou?

A chchüng letipen Jiowa ren än Manasa aier seni wenecharen letipan. A aüselinga än Manasa tingor an ümöümöch, me “a aliwinisefäliela Jerusalem, pwe epwe nemenisefäli mwün.” (Wokisin 13) Manasa a ännetatä pwe a aiersefäl ren an äwena mwäällin, limetawu fel ngeni ululun seni fönüan, me pesei nöün kewe aramas le ‘angang ngeni Jiowa.’​—Wokisin 15-17.

Ika ka meefi pwe kese fich ngeni än Kot chen pokiten om kewe tipis me loom, iwe, amwo pworausen Manasa lon Paipel epwe apöchökkülok. (Rom 15:4) A ffat pwe Jiowa a mochen sipwe silei pwe a kan “amusala tipis.” (Kölf. 86:5) Ese chök nennengeni ewe tipis emön a föri, nge a pwal älleani letipan. Emön chon tipis mi iotek fän aierin letipan, likitalo an föfför mi ngaw, me achocho le föri minne mi pwüng a tongeni ‘apweteteei letipen Jiowa,’ usun met Manasa a föri.​—Aisea 1:18; 55:6, 7.