Tüttümünü seni Etipetipaen Aramas

A SOKKOFESEN ekiekin aramasen fönü me fönü usun met a fich me met ese fich, pwal met a mürinnö me met a ngaw. A pwal siwil ekiekiir mwirin och fansoun. Ina popun, lupwen sia älleani pworausen minne a fis me loom lon Paipel, sisap chök eäni pwisin ekiekich, nge sipwe äfänni ekiekin aramas lon na fansoun me met ra aücheani.

Äwewe chök, sipwe käeö usun met aramas ra ekieki usun assamol me ässäw pwe sipwe wewefichiti ekkewe pworaus lon ewe Tesin Krik mi kapas usun assamol me ässäw.

Mettoch Aramas Ra Aücheani le Manauen Ekkewe Aposel

Emön sou käeö a apasa pwe “Chon Kris, chon Rom, me chon Jutia ra kükkütta ling, süföl, iteföüloor, me itöchür, iwe, a nemeni minne ra filatä lon manauer. Ra pwal mwo nge tongeni mälo ren ar achocho le kükkütta ekkena mettoch.” Ina minne, ra kon alamota met aramas ra ekieki usur.

Ra fokkun kükkütta iter, wis tekia, me assamol, ina popun, ra kon ekkekieki tettelin nonnomun aramas seni ekkewe samol feitiw woon ekkewe slave. Aramas rese chök ekieki pwisin aüchear me rer, nge pwal aüchear me ren aramas. Ar asamolu emön a wewe ngeni ar pwäri pwe emönnewe a föfföri minne mi fich me rer. Ra pwal äfänni are asamolu i pun ra ingeiti wöüöchün, tekian, are itöchün. Aramas ra tongeni küna assamol ren ar föfföröch are ar lipwäköch lap seni ekkewe ekkoch. Iwe nge, a fokkun ässäw ika emön a küna esiit, turunufas, me kapwüng mwen mesen aramas.

Lon fansoun Jises we, än emön “mottiu won ewe lenien mot än ekewe aramas tekia” lon eü kametip a wewe ngeni iteüöchun. Nge an mwotiw “won eu lenien mot mi tekison” a wewe ngeni itengawan me ren ekiekin aramas. (Luk 14:8-10) Nöün Jises kewe chon käeö ra äninifengen fän fite ika “iö epwe lap me leir.” (Luk 9:46; 22:24) Ra tipetipelo ren met ekkewe chon Jus ra kon alamota. Ekkewe nöüwisin lamalamen Jus ra lamalam tekia me emmiisfengen, iwe, ra meefi pwe än Jises angangen afalafal a ekisaalo än aramas asamoluur me ar nemenem woor. Iwe nge, atun ra sotun akkufu Jises ren ar wippin ngeni mwen mesen aramas, nge fen iir ra kkuf ren.​—Luk 13:11-17.

Chon Jus, chon Kris, me chon Rom ra pwal meefi pwe a fokkun ässäw än emön epwe “ares, fööfö, me kalapus pokiten an föfföringaw.” Ikaamwo esaamwo küna kapwüng, nge an fis ngeni ekkena mettoch a ässäwa mwen mesen chienan kewe, chon an famili, me chon fönüan. An küna itengaw a ekisaalo an aücheani pwisin i me angawa an riri ngeni aramas. A watte ässäwen an kawet lap seni an fööfö, iwe, a efisi än aramas esiita me turunufaseei, nge resap chüen asamolu.

Än emön ninniilo woon efoch irään ninni a ngaw me ässäw lap seni meinisin.  Martin Hengel, emön sou käeö, a apasa pwe “ina met a fis ngeni ekkewe slave, a wewe ngeni ässäw me riäfföü chapur.” Aramas ra etipetipa chienen me familien emön mi ninniilo woon efoch irään ninni pwe repwe amamesini. Iwe, pokiten a ina usun än Kraist ninni, meinisin mi mochen wiliti Chon Kraist lon ena fansoun ra küna esiit me turunufas lein aramas. Lap ngeni aramas ra meefi pwe emön a umwes ika a äppirü emön mi küna ena esin ninni. Ewe aposel Paul a makkeei pwe Chon Kraist ra arongafeili pworausen än Kraist mälo woon efoch irään ninni, iwe, “chon Juta ra chepetek ren, nge ekewe chon lükün Israel ra apasa pwe och kapas mi umwes.” (1 Kor. 1:23) Iwe, ifa usun ekkewe Chon Kraist ra ataweei ena osukosuk?

A Sokkolo Minne Ra Aücheani

Ekkewe Chon Kraist loom ra älleasochisi ewe allük me tümünü pwe rete föfföringaw me säw ren. Ewe aposel Piter a makkeei: “Are eman me leimi a küna riaföü, esap itä pokiten i eman chon niela aramas, ika eman chon solä, ika eman chon föföringau, ika eman chon etilepat.” (1 Pit. 4:15) Iwe nge, Jises a oesini pwe nöün kewe chon äppirü repwe küna riäfföü fän itan. (Jon 15:20) Piter a pwal makkeei pwe “Are emon epwe kuna riaffou pokiten i emon Chon Kraist, iwe, esap sau ren, nge epwe chok alingalo Kot pokiten ei it.” (1 Pit. 4:16, TF) Än emön Chon Kraist ese säwäsini an küna riäfföü mwääl a wewe ngeni pwe ese tipeeü ngeni ekiekin aramas lon ena fansoun.

 Ürürün Chon Kraist resap mut ngeni än aramas ekiek an epwe nemeni föfförür kewe. Me loom, aramas ra ekieki pwe a fokkun umwes än Chon Kraist lükü emön Messaia mi mälo woon efoch irään ninni. Ina eü sossot ngeni Chon Kraist ika repwe tipetipelo ren ekiekin aramas. Iwe nge, ar lükü pwe Jises i ewe Messaia a amwökütüür le äppirü i, nge meit ika aramas ra esiiter. Jises a apasa: “Are eman a säwäsiniei me ai kewe kapas me lein ei täppin aramas mi kirikiringau me tipis ngeni Kot, Nöün Aramas epwe pwal säwäsini lupwen epwe war me ekewe chon läng mi pin lon lingen Saman.”​—Mark 8:38.

Ikenäi, eli aramas repwe sotun pesekich le likitalo ewe lamalamen Chon Kraist. Eli chienach kewe chon sukul, chon angang, are chon oruch repwe etipetipakich le föri minne mi ngaw, limengaw, are chofona. Eli repwe sotun ässäwakich pun sia üppos fän iten minne mi pwüng. Met sipwe föri?

Sipwe Äppirü Chokkewe Rese Lolileniesini Ässäwer

Jises a küna ewe sokkun ninni mi ösüfölüngaw lap seni meinisin fän iten an epwe amwöchü pwüngün enletin an tuppwöl ngeni Jiowa. A ‘likitu won ewe irään ninni . . . ese mwo lolileliesini asauan.’ (Ipru 12:2, TF) Chon oputa Jises ra pösapei, attufa, kamwei seni üfan, awata, eittiwatä, me esiita. (Mark 14:65; 15:29-32) Nge Jises ese ekieki itengawan me ren chokkewe mi sotun ässäwa. Met weween? Ese fangetä ren ar eriäfföüü. Jises a silei pwe ese pöüt seni süfölün mwen mesen Jiowa, me ese kütta ling seni aramas. Inaamwo ika Jises a määni mään emön slave, nge Jiowa a elingalo ren an amanauatä me eleenia lon eü leeni mi assamol ünükün I. Filipai 2:8-11, TF, a erä pwe Jises Kraist a “atekisonatiu o a chok alleasochik tori malo; ewer, malo won ewe [irään ninni]. Ina popun Kot a pwal fakkun atekiata i, o a pwal liffang ngeni i ewe it mi tekia seni ekkewe it meinisin, pwe iteiten pwosuk meinisin repwe fotopwosukutiu fan iten Jises, lon lang, won fonufan, pwal fan fonufan, o iteiten chönmongo meinisin repwe pwarata pwe Jises Kraist mi ewe Samol, ngeni lingen Kot ewe Sam.”

Jises a silei pwe epwe itengaw ren an ninni woon efoch irä. A lolileniesini än aramas repwe ösüfölüngawa Seman we ren ar tipimwääl ngeni Jises pwe a eäni kapasen turunufas. Iwe, a iotek ngeni Jiowa pwe epwe eppeti ren an erä: “Kose mochen kopwe angei seniei ei kapen riaföü.” Nge Jises a chök föri letipen Kot. (Mark 14:36) Ese tipetipelo me ese fokkun lolileniesini ässäwan. Chokkewe mi alamota minne aramas ra ekieki repwe meefi säw nge a ffat pwe Jises ese ina usun.

Nöün Jises kewe chon äppirü ra küna ösüfölüngaw mwen mesen aramas pun ra pwal ares me kawet. Ra aücheangaw me ur ren koput, nge rese tittiap ren ekkena mettoch. Rese tipetipelo ren ekiekin aramas, me rese meefi säw. (Mt. 10:17; Fof. 5:40; 2 Kor. 11:23-25) Ra silei pwe wiser ar repwe ‘mwärei än Jises irään ninni me tapwelo mwirin.’​—Luk 9:23, 26.

Nge met meefiach ikenäi? Ekkewe mettoch chon fönüfan ra ekieki pwe ra umwes, apwangapwang, me ässäw, ra fen tipatchem, pöchökkül, me assamol me ren Kot. (1 Kor. 1:25-28) Esap pwe sia umwes ika sia tipetipelo ren ekiekin aramas?

Chokkewe mi mochen aramas repwe asamoluur repwe alamota ekiekin aramas usur. Nge sia mochen chieneni Jiowa usun chök Jises me nöün kewe chon käeö. Ina minne, sipwe asamolu met I a asamolu me eäni an ekiek usun met mi ässäw.

[Sasing lon pekin taropwe 21]

Jises ese tipetipelo ren ekiekin aramas usun met mi ässäw