Oesini 2. Lengita

“Epwe wor . . . lengita.”​—MARK 13:8.

● Emön mwän a sü ngeni ewe sopw Quaratadji lon Niger, Africa. Märärin, pwiin me fefinan kewe ra pwal sü seni leenier me feilo ikena pokiten lengita. Nge, ena mwän a chök äläemön le kokkoon lon kieki woon ewe pwül. Pwata a chök äläemön? “A riäfföü le nonnom ren an famili me nennengeni attonger ren ar echik pun ese chüen tongeni amöngöniir,” iei alon Sidi, samolun ewe sopw.

MET EKKEEI PWORAUS RA PWÄRATÄ? Woon unusen fönüfan, arapakkan emön me lein fümön aramas ese naf anan möngö lon eü rän. Nge a kon fen ssenük lon öörün Sahara lon Africa, pwe emön me lein ülümön aramas ra echik fansoun langattam. Ren ach sipwe weweiti ükükün watteen ei osukosuk, anchangei eü famili emön sam, in me nöür semirit. Ika ener möngö a chök naf fän iten rüüemön leir, iwe iö leir epwe äni ewe möngö? Ewe sam, ewe inelap are ewe semirit? Epwe iei ar kefil iteitan rän.

ALON EKKEWE RESE LÜKÜ. Ei fönüfan a uwaani chommong möngö mi lulo nafün ngeni meinisin, nge epwe chök lamot kkotöchün äeään masouen leset me lemal me metakkan.

MEI PWÜNG ALOR? Enlet, ekkewe chon atake ikenäi ra fokkun tufich lap seni loom ar repwe awora möngö. Itä ekkewe mwu repwe akokkotaöchü möngö pwe esor emön epwe echik. Iwe nge, inaamwo ika ra fen sotuni le pwäkini ei osukosuk ren fitepükü ier nge ese pwäk.

MET MEEFIOM? A fen pwöppwönütä alon Mark 13:8? Inaamwo ika a lapolo tipatchemen ei fönüfan, nge mi chüen wor riäfföün osupwangen möngö woon unusen fönüfan?

Chechchechin fönü me lengita a kan fis akkomw mwirin epwe tapw pwal eü napanapen ei rän le sopwoloon.

[Ekis Pwóróus lón pekin taropwe 5]

“Lap seni eü na aülüngätin lein ekkewe semirit ra mälo ren paikingin ammat, feilseni me pwal ekkoch semwen, itä repwe manau seni ika rese chök apwangapwangen nafangawen ener.”​—ANN M. VENEMAN, FORMER EXECUTIVE DIRECTOR OF THE UN CHILDREN’S FUND.

[Credit Line lon pekin taropwe 5]

© Paul Lowe/Panos Pictures