Manauen Aramas A Wesewesen Wor Lamotan?

“MI WOR lamoten manauen aramas?” Chommong ra eäni ena kapas eis. Nge a eletipechou pun ese lifilifil ar ekiek usun manau nge ra chüen meefi mefien ei tokter seni Austria itan Victor E. Frankl pwe manauer “a pöön me lamot mwääl.”

Pwata a ina usun meefien chommong? Eü popun, pun nonnomun manauen fite million aramas woon fönüfan a fokkun weires me attong. Iteiten rän ra küna koput, föfförün akkachofesa, wöüngaw me semmwen. Hiop a erä pwe manauen aramas a “uren weires.” (Hiop 14:1) Ra achocho pwe repwe chök tongeni manau lon eü me eü rän.

Nge ren pwal ekkoch ra wöüöch. Usun itä manauer a nükünüköch me repwe tongeni meefi menemenöch. Nge pwata chök chommong ese ina usun meefier? Pun fän chommong a fis ngeniir “fitikoko me noninen” mi attai ar nükünüköch, äwewe chök ren ngawoloon ar moni tolong me fisitään och mettoch mi alolilen ren mäloon nöür semirit.​—Kölfel 90:10, Ewe Kapasen God.

A pwal wor eü popun mi fokkun ämeef ngeni aramas pwe manauer “a pöön me lamot mwääl.” Met ena? Ina mwochomochen manau. Chommong rese weweiti ika pwata a chök mwoch manauen aramas nge ra tufichin föri sokkopaten mettoch. Inamwo ika ra kinamwe lon änein manauer, nge repwe chüen mälo me pöüt seniir mettoch meinisin.​—Än Salomon Afalafal 3:19, 20.

Itä Manauen Aramas Epwe Chök Lalamot Mwääl?

Salomon, ewe kingen Israel loom a apüngalo och mettoch usun manauen aramas. Lon fansoun we a küna än aramas angang weires, äeä tufichiir, ar lipwäköch lon pekin atake, kaü imw me tümünü famili usun chök met sia föfföri ikenäi. Usun itä a eäni ei kapas eis,  ‘A ifa me lamoten ekkeei esin angang?’ Iwe, a erä mettoch meinisin aramas ra föri “a pön, a usun chök turufi asepwäl.”​—Än Salomon Afalafal 2:17.

Iwe nge, King Salomon a lükü pwe mettoch meinisin aramas ra föri “a pön, a usun chök turufi asepwäl” iteitan? Aapwi. A chök äweweei pwe ina met a kan fis lon manauen aramas lon ei fönüfan mi ngaw. Iwe nge än Kot we Kapas a alükülükükich pwe esap ina usun iteitan!

Ifa usun kopwe lükülük pwe manauach mi tongeni wor lamotan? Kese mochen kopwe älleani ekkewe ruu lesen mwirin ei. Repwe tongeni älisuk le weweiti pwata manauen aramas a lamotongaw, ifa usun epwe siwil me met kopwe föri pwe epwe wor lamoten manauom pwal mwo nge ikenäi.