Sylvia, emén fefin mi angang lón pekin pioing, a apasa: “Atun ua sukul lón college, chómmóng chienei kewe ra erá pwe ra péchékkúl lón pekin lamalam. Iwe nge, ra chúri lón ám test me áeá ekkewe sáfei ese mumutá me ren allúkún mwú. Ese wor manamanen ar kewe lamalam lón manawer.”

Emén mwán itan Lionel a apasa: “Chienei kewe chón angang ra mmen chofona, me ra kan kékkéri ám we leenien angang me apasa pwe ra semmwen nge rese wesewesen semmwen. A wor ar lamalam, nge rese alamota. A chék usun och pisekin lón imw mi ling nge ese wor a áeá.”

Ese kon wor manamanen lamalam lón manawen lape ngeni aramas. Chómmóng aramas ikenái ra pwomweni pwe ra manaweni ewe manaw mi fich ngeni Kot, nge “manamanan ra pöütala.” (2 Timoty 3:5) Néúr kewe néúwisin lamalam rese isetiw leenien áppirú mi múrinné. Pwal eú, rese áiti ngeni ekkewe chón fiti ar lamalam ekkewe kapasen emmwen seni Paipel mi lamot pwe repwe eáni féffér mi pwúng lón manawer. Iwe, esap eú minen ámáirú án chómmóng ra lúkú pwe Kot ese pwal ekieki ewe esin manaw ra manaweni.

Ewe Paipel a affata pwe Kot a tongeni meefi pwapwa are letipechou me ach féffér a fókkun lamot ngeni. Lupwen ekkewe chón Israel lóóm ra ú ngeni Kot, ra “achouu” letipan. (Kölfel 78:40) Iwe nge, a “wor watten pwapwa lon läng” lupwen emén a enletin siwili an féffér mwáál. (Lukas 15:7) Lupwen emén a aúcheani napanapen Kot kewe mi fókkun echipwér, an tong ngeni Kot epwe péchékkúleló, iwe, epwe amwékútú le tongei met Kot a tongei me oput met Kot a oput.​—Amos 5:15.

Ewe simpúng itelapan Deseret News lón Salt Lake City, Utah lón Merika a apasa pwe Chón Pwáraatá Jiowa ra kan “álisatá péchékkúlen ririin famili me álisi aramas ar repwe chón wilipos mi wenechar me tinikken.” Ena simpúng a pwal apasa: “Chón fiti ena lamalam ra álleasochisi kapasen emmwen usun féffér mi pwúng me mwáál. Ra lúkú pwe ún suupwa, únnúpuch, áeámwáállin sáfeien opuchopuch, ppet wóón moni, lisowumwáál, me féfférún sikepwach lefilen mwán me mwán, fefin me fefin, ra tongeni atai ar riri ngeni Kot.”

Ifa usun káéén napanapen Kot kewe a álisi ekkewe Chón Pwáraatá? Sylvia, ewe sia pwóróus usun lepoputáán ei lesen a apasa: “Angangen chúri a mmen chéú lón pekin angangen pioing. A mmen mecheres án emén epwe fitaaló. Nge ai weweiti meefien Jiowa * usun a álisiei ai upwe féri minne mi pwúng. Ua pwapwa me ua meefi kinamwe lón letipei.” Sylvia a lúkúlúk pwe an etipeeúfengeni manawan me minne a lúkú lón an we lamalam a amúrinnéló manawan.