Kot a pwon ngeni ewe mi tuppwél Apraham pwe ewe oesini usun ewe ‘mwirimwir’ epwe emén seni mwirimwirin kewe. Nge pokiten ena emén, aramasen unusen “ekewe mwü” repwe angei feiéch seni. (Keneses 22:18) Jakop néún néún Apraham we a mwékút ngeni Isip, ikewe ie an we famili a watteeló me wiliti ewe mwúún Israel.

Mwirin lón Isip, ekkewe chón Israel ra wiliti slave fán nemenien Farao ewe mi kirikiringaw tori ewe fansoun Kot a filatá ewe soufós Moses átewe a emmwenawu ewe mwú seni lón ewe Setipar mi imufesen ren ewe manaman. Mwirin ena, Kot a ngeni ekkewe chón Israel ekkewe allúk pachelong ewe Allúk Engol pwe epwe emmweniir me túmúnúúr. Ekkena allúk ra tichiki ekkewe asor fán iten omusomusen tipis. Fán emmwenien Kot, Moses a ereni ekkewe chón Israel pwe Kot epwe tiinaaló ngeniir pwal emén soufós. Ena soufós epwe ewe ‘mwirimwir’ mi pwonetiw.

Lap seni 400 ier mwirin, Kot a pwone ngeni King Tafit pwe ewe emén epwe feito, ina i ewe ‘mwirimwir’ a fen oesini lón Eten pwe epwe nemenem lón ewe mwú epwe nónnóm tori feilfeiló. Ena emén ina i ewe Messaia, ewe a kefilitá me ren Kot pwe epwe ewe Chón Amanawa aramas me eliwinato ewe Paratis ngeni fénúfan.

Me ren Tafit me ekkewe ekkóch soufós, a lallapóló án Kot pwáraaló usun ewe Messaia. Ra oesini pwe epwe tipetekison me kirekiréch me fán nemenian esap wor echik, pwúngúngaw me maun. Aramas meinisin repwe kinamwefengen lefiler pwal mwo nge ngeni ekkewe man. Semmwen, riáfféú me máló esap iir kinikinin minne Kot a tipeni seni me lepoputáán, nge iir repwe móróló me ekkewe aramas mi máló repwe manawsefálitá wóón fénúfan.

Kot a oesini me ren ewe soufós Mika pwe ewe Messaia epwe uputiw lón Petleem. Nge ewe soufós Taniel a oesini pwe mwirin epwe ninniiló. Nge Kot a amanawasefáli ewe Messaia seni máló me seikaatá pwe epwe King lón láng. Taniel a pwal oesini pwe ewe chék Mwúún Messaia epwe unusen siwili meinisin ekkewe mwú. Itá ewe Messaia a wesewesen war usun a fen oesini?

—A lóngólóng wóón Keneses sópwun 22-50 pwal Ekistos, Tuteronomi, 2 Samuel, Kölfel, Aisea, Taniel, Mika, Sekaraia 9:9.