Ren án Jesus manawsefál, néún kewe chón káé ra uroló ren lúkú me tinikken. Ákkáeúin ewe aposel Paulus a sái lón unusen Asia Minor me ewe Mediterranean, a akkótaéchú ekkewe mwichefel me apéchékkúla ekkewe Chón Kraist pwe repwe úppós fán sóssótun liméchún manawer me riáfféú mi akkachofesá. Inaamwo ika ra kúna ekkena mettóch nge chómmóng ra wiliti Chón Kraist.

Mwirin, pwisin Paulus a kalapus. Pwal mwo me ikena ie a makkeei taropween apéchékkúl me fén ngeni ekkewe mwichefelin Chón Kraist. A éúréúrer usun eú feiengaw watte, ina ewe chón rikiló. Fán emmwenien án Kot we manaman mi fel, Paulus a fen silei pwe “aramas mi wewe ngeni wolif mwacho” repwe tolong leir me “repwe atokala ekewe chon lükü Jesus pwe repwe etiir.”​—Föför 20:29, 30.

Lemúchúlóón fansoun ekkewe aposel, a poputá angangen ekkewe chón rikiló. Órun ena fansoun, Jesus ewe a manawsefál a ngeni ewe aposel Johannes ewe Pwáraatá, weween liosun met epwe fis lón mwachkkan. Iwe, Johannes a makkeei pwe ekkewe chón ú ngeni me ekkewe sense mi chofona rese tongeni eppeti Kot seni an epwe unusen apwénúetá minne a tipeni seni me lóóm fan iten fénúfan me aramas meinisin. Chón fénúfan, mwich me einang repwe rongorong ewe pwóróus allim usun án Kot we Mwú. (Pwärätä 14:6) Fénúfan epwe wilisefáliti eú Paratis me chókkewe mi mochen féri letipen Kot iir mi tongeni nónnóm lón!

Itá ina eú pwóróus allim ngonuk? Ika ina, alapaaló óm káé usun án Kot we pwóróus fán iten aramas a nóm lón ewe Paipel me ifa usun a tongeni efeiéchuk iei me lón mwachkkan.

Ka tongeni pwisin álleani ewe Paipel lón arapakkan 50 fósun fénúfan wóón internet lón www.dan124.com. Wóón ewe Web site, ka pwal tongeni ppii ei brochure Pwóróus Allim seni Kot! me ei puk Met ewe Paipel A Wesewesen Apasa? kapachelong ekkewe puk mi apwóróusa ewe popun sia tongeni lúkúlúk wóón Paipel me ifa usun sia tongeni apwénúetá ekkewe fén mi álilliséch lón ach famili me lón pwisin manawach. Are ka tongeni eisini ekkewe Chón Pwáraatá Jiowa ren pwal ekkóch pwóróus.

—A lóngólóng wóón Föför, Efisos, Filipi, Kolose, Filimon, 1 Johannes, Pwärätä..