1, 2. (a) Pwata a lamot ach sipwe ‘mamasakich pwe epwe tongeni fis ach iotek’? (b) Ikkefa ekkewe kapas eis usun iótek sipwe pwisin eisinikich?

 EMÉN mi piin chón angangen lepwin a erá: “Ewe fansoun a kon áweires án emén epwe nenneló, ina wilingáách me mwen an epwele rániló.” Ese mwáál chókkewe a lamot ngeniir ar repwe nenneló unusen pwiin ra pwal tipeeú ngeni ena. A pwal ina usun ren ekkewe Chón Kraist ikenái, a lamot ngeniir ar repwe nenneló lón ei fansoun sia nóm lesopwuchikin ránin án Satan ei ótót. (Rom 13:12) A ifa me efeiengawan ika sia annutoló lón pekin lúkú lón ei fansoun sia nóm lón kirochen ei ótót! A mmen lamot ach sipwe ‘püsin nemeni letipach o mamasakich, pwe epwe tongeni fis ach iotek.’​—1 Pet. 4:7.

² Pokiten a arapakkanoto sópwólóón án Satan ei ótót, sipwe tipachem ach sipwe pwisin eisinikich: ‘Ifa usun, ua kan mammasa lón ai iótek? Ua kan eáni ekkewe sókkun iótek meinisin me ikkiótek iteitan? Ua kan iótek fán iten ekkewe ekkóch, are ai kewe iótek ra chék weneiti pwisin ai osupwang me ai mochen? Ifa úkúkún lamoten iótek ren ai upwe kúna manaw?’

3. Ikkefa ekkewe pwal ekkóch sókkun iótek?

³ Lón néún ewe aposel Paulus we taropwe ngeni chón Efisos, a fós usun “sokkun iotek . . . meinisin.” (Ef. 6:18, Testament Mi Fö) Lón ach iótek, eli sia kan tingorei Jiowa an epwe álisikich lón ach osupwang are pwákini ach kewe osukosuk. I ewe Chón “aüselinga iotek,” a tongekich me epwe aúseling ach tingoren álillis. (Kölf. 65:2) Iwe nge, a lamot sipwe pwal achocho le eáni ekkewe pwal ekkóch sókkun iótek, áwewe chék ren iótekin mwareiti, kilisou me tingormaú.

4. Pwata a lamot sipwe mwareiti Jiowa fán chómmóng lón ach iótek?

 ⁴ A wor chómmóng popun ach sipwe apachaalong lón ach iótek ekkewe kapasen mwareiti Jiowa. Áwewe chék, lupwen sia ekieki án Kot “kewe föför mi manaman” me “an tekia esap wor aükükün,” a amwékútúkich ach sipwe mwareiti i. (Álleani Kölfel 150:1-6.) Enlet, ekkewe wonu wokisin lón Kölfel sópwun 150 ra pesekich le mwareiti i fán engol me úlúngát! Pwal emén soumakken Kölfel a pwáraatá an súfél mi alóllóól ngeni Kot lupwen a kélú ei kél: “Üa mwareituk fan fisu lon eu rän fän iten om kewe allük mi pwüng.” (Kölf. 119:164) A fókkun fich ngeni Jiowa án aramas repwe mwareiti i. Ina minne, mi lamot sipwe mwareiti i lón ach iótek “fan fisu lon eu rän,” weween fán chómmóng.

5. Ifa usun ach akkapasaatá ach kilisou lón iótek epwe túmúnúkich?

⁵ Iótekin kilisou, ina pwal eú sókkun iótek mi lamot. Paulus a pesei ekkewe Chón Kraist lón ewe telinimw Filipi: “Ousap lolilenäsini och mettoch, nge lon ämi osupwang meinisin oupwe iotek o tüngor ngeni Kot pwe epwe alisikemi. Oupwe tüngor fansoun meinisin fän kilisou.” (Fil. 4:6) A eú minen túmún ngenikich lupwen sia apasaatá ach enletin kilisou ngeni Jiowa lón iótek. A mmen lamot ena, ákkáeúin lón ekkeei ránin lesópwólóón aramas “resap sile kilisou.” (2 Tim. 3:1, 2) Pwúngún, lap ngeni aramas rese sile kilisou. Ika sise túmúnúéch, sia tongeni poputá le eáni ena napanap. Ach apasaatá ach kilisou ngeni Kot epwe álisikich ach sipwe menemenéch me sisap ngúnúngúnúngaw ren nónnómun manawach. (Jut. 16) Pwal och, lupwen ewe mékúren famili epwe apachaalong an kapasen kilisou ngeni Kot atun ar iótekfengen, epwe álisi chón an famili ar repwe pwal eáni ena napanap.

6, 7. Met weween ach sipwe tingormaú ngeni Jiowa, iwe met sia tongeni tingormaú ngeni?

⁶ Lupwen sia sié fiti memmeef mi alóllóól ngeni Kot lón iótek, sia tingormaú ngeni. Met sia tongeni tingormaú ngeni Jiowa? Sipwe sié ngeni Jiowa an epwe álisikich atun sia kúna riáfféú mwáál are atun a úrikich eú semmwen mi chou. Lón ekkena atun, ese mwáál sipwe tingormaú ngeni Kot. Nge ikkena chék ekkewe atun sia tongeni tingormaú ngeni Jiowa?

⁷ Lón án Jesus we iótek, nengeni met a apasa usun iten Kot we, an we Mwú me letipan. (Álleani Mateus 6:9, 10.) Ei fénúfan a úr ren féfféringaw me ekkewe mwúún aramas rese mwo nge tufichin awora ekkewe mettóch aramas meinisin ra enletin osupwangan. Ina popun, a lamot sipwe iótek pwe iten Semach we lón láng epwe piniló me an we Mwú epwe amóeló án Satan nemenem wóón fénúfan. Iei pwal ewe atun sipwe tingormaú ngeni Jiowa pwe letipan epwe fis wóón fénúfan usun chék lón láng. Ina minne, sipwe mammasa pwe sipwe ákkáeáni meinisin ekkewe sókkun iótek.

8, 9. Pwata sisap mwittir apwúngú Petrus me ekkewe pwal ekkóch aposel ren ar annutoló me lón ewe tánipiin Ketsemane?

⁸ Inaamwo ika ewe aposel Petrus a éúréúra ekkewe Chón Kraist ar repwe ‘mamasa pwe epwe tongeni fis ar iotek,’ nge lón eú atun pwisin i a túmúnúngaw. I emén me lein néún Jesus kewe chón káé a annut lón ewe atun Jesus a iótek lón ewe tánipiin Ketsemane. Inaamwo ika Jesus a fen ereniir ar repwe “mamasa o iotek [“ikkiótek iteitan,” NW],” nge rese féri.​—Álleani Mateus 26:40-45.

⁹ Nge ren ach sisap fen apwúngú Petrus me ekkewe pwal ekkóch aposel ren ar rese nenneló, sipwe chechchemeni pwe lón ena  ránin iir ra fókkun osukosuk me ra pekkus. Lón ewe pwinin mwen ar féri ewe Pasofer, ra angang pwe repwe ammólnatá fán itan. Mwirin ena, Jesus a poputááni ewe Fááfen ach Samol, ina eú minen áppirú pwe repwe silei ifa usun repwe féfféri iteiten ier. (1 Kor. 11:23-25) Mwirin ar “eäni echö kölün kilisou, ra towu seni ewe imw o feila won ewe Chukun Olif,” nge ren ar repwe tori ena chuuk ra fetál wóón ekkewe alen Jerusalem mi chékúkkún. (Mat. 26:30, 36) Iwe, eli lón ena atun a fen lu seni lukenipwin. Ika sia nóm rer lón ena pwinin, lón ewe tánipiin Ketsemane, eli sipwe fen pwal annutoló. Iwe, Jesus ese esiita ekkewe aposel mi mélúlú, nge a fen kirekiréch ngeniir me apasa pwe inaamwo ika ra “mochen pwora, nge ewe fituk a apwangapwang.”

10, 11. (a) Menni lesen Petrus a káé seni minne a fis ngeni lón ewe tánipiin Ketsemane? (b) Met ka tongeni káé seni minne a fis ngeni Petrus?

¹⁰ Minne a fis ngeni Petrus lón ewe tánipiin Ketsemane a ámeteki letipan, nge a pwal káé och lesen seni ren an ese mammasa. Me mwen a fis ena, Jesus a erá: “Lepwinei ämi meinisin oupwe sü seniei o likitieila.” Nge Petrus a erá: “Ikamwo ir meinisin repwe likitukela, ngang üsap fokun likituk.” Iwe, Jesus a ereni Petrus pwe i epwe amamesini i fán úlúngát. Nge Petrus ese lúkú alon na me a apasa: “Are mwo üpwe fen etuk le mäla, üsap fokun amamäsinuk.” (Mat. 26:31-35) Iwe nge, minne Jesus a apasa a pwénútá. Petrus a fókkun riáfféú ren an a amamesini Jesus, iwe “a fokun kechü.”​—Luk. 22:60-62.

¹¹ Petrus a káé eú lesen seni met a féri pwe esap kon lúkúlúk wóón pwisin i. A ffat pwe iótek a álisi Petrus lón ei mettóch, ina popun a tongeni fénékich ach sipwe ‘mamasa pwe epwe tongeni fis ach iotek.’ Sia apwénúetá ei pesepes? Pwal och, sia ikkiótek iteitan me pwáraatá pwe sia lúkúlúk wóón Jiowa? (Kölf. 78:7) Sipwe pwal chechchemeni án aposel Paulus ei kapasen fén: “Iei mine iö a ekieki pwe a nüküchar, epwe fokun tümwünüfichi pwe esap turula.”​—1 Kor. 10:12.

12. Pwata Nehemia a eú leenien áppirú mi múrinné ngenikich?

¹² Nengeni pwóróusen Nehemia, i chón ammólnatá únúmen ewe Kingen Persia itan Artaksasta órun 450 ier mwen Kraist. Nehemia a isetiw eú leenien áppirú usun emén mi iótek ngeni Kot seni enletin letipan. Ren fitu rán a kan “echikefel me iotek fän mesen ewe Koten läng” fán iten nónnómungawen ekkewe chón Jus lón Jerusalem. (Ne. 1:4) Lupwen Artaksasta a eisini  ika pwata a wololilen, mwittir chék a “iotek ngeni ewe Koten läng.” (Ne. 2:2-4) Iwe, met mwirilóón? Jiowa a pélúweni an kewe iótek me a álisi Néún kewe aramas. (Ne. 2:5, 6) Ese mwáál ei mettóch a apéchékkúla án Nehemia lúkú!

13, 14. Met sipwe féri pwe sipwe akkamwéchú ach lúkú mi péchékkúl me fiu ngeni án Satan kewe sóssót le elichippúngúkich?

¹³ Ach áppirú Nehemia le ikkiótek epwe álisikich le akkamwéchú ach lúkú mi péchékkúl. Satan a fókkun kirikiringaw, fán chómmóng a sótunikich atun sia apwangapwang. Áwewe chék, ika sia fókkun letipechou are samau, neman sipwe poputá le ekieki pwe Kot ese kon aúcheani ewe fansoun sia áeá le afalafal iteiten maram. Neman ekkóch leich, sia chúen meefi riáfféú ren ekkóch mettóch mi ngaw mi fis ngenikich me lóóm. Satan a mochen ach sipwe meefi pwe ese wor aúcheach. A mochen sipwe ákkáeáni ekkena ekiek ese pwúng pwe epwe apwangapwang ach lúkú. Iwe nge, ika sia ‘mamasa pwe epwe tongeni fis ach iotek’ sia tongeni akkamwéchú ach lúkú mi péchékkúl. Iwe, lúkú ina ewe ‘epetin maun, pwe sipwe tongeni kunu ngeni ekewe föün esefich mi pulopulen ekkei seni ewe Eman mi Ngau.’​—Ef. 6:16.

¹⁴ Ika sia ‘mamasa pwe epwe tongeni fis ach iotek,’ sisap ttur lón och sóssót pokiten ach túmúnúngaw me sise mmólnetá ngeni. Lupwen a torikich sóssót, sipwe chechchemeni pwóróusen Nehemia me mwittir kuliiti Kot lón iótek. Sia tongeni akkufu ekkewe sóssót me likiitú ngeniir ren chék án Jiowa álillis.

15. Ikkefa ekkewe kapas eis sipwe pwisin eisinikich usun ach ikkiótek fán iten ekkewe ekkóch?

¹⁵ Jesus a iótek fán ásengesin Petrus pwe esap apwangapwangoló an lúkú. (Luk. 22: 32) Emén Chón Kraist mi tuppwél itan Epafras a áppirú Jesus ren an achocho le iótek fán ásengesin pwiin kewe chón lúkú lón Kolose. Iei met Paulus a makkeei ngeniir: “A fokun achocho le iotek fän itemi o tüngor ngeni Kot an epwe anükücharakemi, pwe oupwe mirit lon ämi souläng, nge ousap tipemwaramwar, oupwe pwal fokun aleasochisi letipen Kot.” (Kol. 4:12) A lamot sipwe pwisin eisinikich: ‘Ngang mi achocho le iótek fán iten pwii kewe wóón unusen fénúfan? Ua kan apachaalong lón ai iótek chienei kewe chón lúkú, chókkewe mi kúna weires seni ekkewe feiengaw watte? Ineet ewe sáingoon atun ua achocho le iótek fán iten chókkewe mi watte wiser lón án Jiowa we mwicheich? Ngang mi iótek fán iten chón ewe mwichefel mi nóm fán weires iei? Ineet ewe atun ua fen féri ena?’

16. Mi wor lamoten ach iótek fán ásengesin pwiich kewe Chón Kraist? Áweweei.

¹⁶ Ach iótek ngeni Jiowa fán ásengesin ekkewe ekkóch a wesewesen tongeni álisiir. (Álleani 2 Korint 1:11.) Jiowa ese chék mwékút me pélúweni án néún kewe aramas tingor pokiten chék chómmóngun chón ikkiótek usun. Iwe nge a áfánni me pwapwaiti ar chúngúfengenniir lupwen a pélúweni ar iótek. Ina popun sipwe fókkun alamota wisach we le iótek fán ásengesin ekkewe ekkóch. Usun chék Epafras, sipwe pwáraatá ach tong enlet me ekieki pwiich kewe Chón Kraist ren ach akkachocho le iótek fán iter. Ach féri ena epwe atoto ngenikich pwapwa, pún “sia feiöch ren ach fang lap seni ach angei mettoch.”​—Föf. 20:35.

17, 18. Ifa usun ach ‘mamasa pwe epwe tongeni fis ach iotek’ epwe álisikich?

¹⁷ Me mwen án Paulus apasa pwe ewe “pwin a arap ngeni chök epwe le la, nge rän epwe le war,” a makkeei: “Oua silei pwe ewe fansoun a arapoto, pwe ämi oupwe pwätä seni möür. Pun ewe ränin än Kot amanauakich a kaneto iei lap seni ewe fansoun sia popuetä le lükü Jesus Kraist.” (Rom 13:11, 12) Ekiseló chék, án Kot we pwon usun ewe fénúfan sefé epwele pwénútá, me ach kúna manaw a arapakkan lap seni met eli sia ekieki. A lamot sisap annutoló lón pekin lúkú me sisap mut ngeni ei fénúfan an epwe erikikicheló pwe esap chúen wor atun sipwe áláeménúló le iótek ngeni Jiowa. Nge sipwe fen ‘mamasa pwe epwe tongeni fis ach iotek.’ Ach féri ena epwe álisikich ach sipwe “manaueni eu manau mi pin mi nonom fän nemenien Kot” atun sia witiwiti ránin we. (2 Pet. 3:11, 12) Napanapen ach manaweni manawach a pwáraatá ika sia nenneló lón pekin lúkú, are ika sia wesewesen lúkú pwe a arapakkan katalóón ei ótót mi ngaw. Ina minne, a lamot sipwe “iotek fansoun meinisin.” (1 Tes. 5:17) Sipwe pwal achocho le áppirú Jesus ren ach sipwe áláeménúló pwe sipwe iótek. Atun sia iótek ngeni Jiowa nge sise atapwalapwal lón ach fós, epwe péchékkúleló ach ririéch ngeni i. (Jas. 4:7, 8) A ifa me feiéchúch ika sia ina usun!

¹⁸ Ewe Paipel a apasa: “Lon fansoun än Jesus manau won fanüfan, a iotek o tüngor fän mwelian mi leüömong, a pwal kechü ngeni Kot, ewe mi tongeni amanaua i seni mäla. Iwe, Kot a aüselinga i, pun a meniniti i.” (Ipru 5:7) Jesus a apasaatá an iótek me tingormaú, me a pwal akkamwéchú an tuppwél ngeni Kot tori muchúlóón manawan wóón ei fénúfan. Iwe, Jiowa a amanawasefáli Néún na áchengicheng ngeni manaw lón láng me esap tongeni máló sefál. Sia pwal tongeni tuppwél ngeni Semach we lón láng ese lifilifil ika met sókkun sóssót epwe torikich lón mwach. Enlet, sia tongeni angei ewe liffang manaw esemuch ika sia ‘mamasa’ me achocho le ikkiótek.