1, 2. (a) Apwóróusa eú pwóróus mi áiti ngenikich lamoten ach sipwe lipwákéch le kapas eis. (Ppii ewe sasing lepoputáán ei lesen.) (b) Pwata sisap pireir le fós ngeni aramas wóón ekkewe pwóróus mi tongeni weires?

 FITU ier a ló, emén Chón Kraist fefin a fós ngeni pwúlúwan we usun ewe Paipel, nge pwúlúwan na a fiti pwal eú lamalam. Atun ar pwóróusfengen, pwúlúwan na a erá pwe a lúkú ewe Trinitas. Neminna a mirititi pwe eli pwúlúwan we ese kon lien weweiti ewe afalafal usun Trinitas, iwe fán mennin a eisini, “Ka lúkú pwe Kot i Kot, Jesus pwal i Kot, me ewe ngún mi fel pwal i Kot? Iwe nge esap úlúmén Kot nge emén chék?” Pwúlúwan we a máirú me apasa, “Aapw, esap ina met ua lúkú!” Iwe, ra meseik le pwóróusfengen usun ié wesewesen Kot.

² Ena pwóróus a pwáraatá lamoten ach sipwe lipwákéch le kapas eis fiti mennin. A pwal menlapei ei mettóch: Sisap pireir le fós ngeni aramas wóón ekkewe pwóróus mi tongeni weires, áwewe chék ren ewe afalafal usun Trinitas, ekkein ell, are usun an wor emén Chón Fératá. Ika sia lúkúlúk wóón Jiowa me ewe káit sia angei seni, fán chómmóng sia tongeni áweweei ewe enlet lón ewe napanap epwe achchúngú letipen chón aúseling ngenikich. (Kol. 4:6) Iei, sipwele ppii met ekkewe chón afalafal  mi lipwákéch ra féri lupwen ra fós ngeni aramas wóón ekkena esin pwóróus. Sipwe káé ifa usun sipwe: (1) áeá ekkewe sókkun kapas eis epwe álisi aramas le uwawu meefier, (2) néúnéúfichi ekkewe wokisin lón Paipel le áweweei eú pwóróus, (3) áeá kapas áwewe pwe epwe affataéchú eú pwóróus.

3, 4. Pwata a lamot ach sipwe áeá kapas eis pwe sipwe silei met ewe emén a lúkú? Áweweei.

³ Ach áeá kapas eis epwe álisikich le silei met emén a eáni lúkú. Pwata a lamot ena? Än Salomon Fos 18:13 a erá: “Are eman aramas a pälüeni mwen esamwo rongorong, ina an tiparoch epwe pwal säw.” Ewer, me mwen ach sipwe pwóróusfengen me emén usun och pwóróus lón Paipel, epwe múrinné ika sipwe akkomw silei met a wesewesen lúkú, pwe site asolapaaló ach fansoun le áweweéchú mwáállin och pwóróus nge esap fen ina met a lúkú!​—1 Kor. 9:26.

⁴ Áwewe chék, neman sia pwóróusfengen me emén usun ell. Esap meinisin ra lúkú pwe ell wesewesen eú leenien ekkei ia aramas mi ngaw repwe riáfféú ie. Chómmóng ra pwal lúkú pwe án emén nónnóm lón ell a wewe ngeni an imuló seni Kot. Ina minne, sia tongeni apasa: “Pokiten a sókkópat án aramas ekiek usun ell, nge en met meefiom?” Mwirin ach silei meefian, iwe sia tongeni álisi an epwe weweiti met ewe Paipel a apasa.

5. Ifa usun kapas eis a tongeni álisikich le silei ewe popun emén a lúkú minne a lúkú?

⁵ Ach lipwákéch le áeá kapas eis fiti mennin a pwal tongeni álisikich le silei ewe popun emén a lúkú minne a lúkú. Áwewe chék, epwe ifa ika sia chuuri emén lón ewe angangen afalafal nge a erá pwe ese lúkú Kot? Eli epwe mecheres ach sipwe ekieki pwe ena emén a fen tipetipeló ren ewe afalafal pwe ménúmanaw ra pwisin fisitá. (Kölf. 10:4) Iwe nge, ekkóch aramas rese chúen lúkú Kot pokiten ra kúna watteen riáfféú lón pwisin manawer are lón manawen ekkewe ekkóch. Eli a weires ar repwe lúkú pwe emén Chón Fératá mi tong a tongeni mut ngeni aramas ar repwe kúna watteen riáfféú. Ina pwata ika ewe chón imw ese lúkú pwe mi wor emén Kot, iwe sia tongeni eisini: “Ina chék usun meefiom seni lóóm?” Ika a erá aapw, sia tongeni eisini ika met a efisi an esap lúkú pwe mi wor emén Kot. Minne a apasa a tongeni álisikich le silei ifa usun sipwe álisi.​—Álleani Än Salomon Fos 20:5.

6. Met sipwe féri mwirin ach kapas eis ngeni emén?

⁶ Mwirin ach kapas eis ngeni emén, mi lamot sipwe aúseling ngeni met a apasa me ereni pwe sia súféliti meefian. Áwewe chék, eli emén epwe erá pwe a poputá tipemwaramwar ika mi wor emén Kot mi tong lupwen a kúna watteen riáfféú lón manawan. Me mwen ach sipwe ánneta ngeni pwe mi wor emén Kot, epwe éch ika sipwe ereni pwe sia weweiti meefian me alúkúlúkú ngeni pwe ese wor ngawen an epwe ekieki pwata sia kúna riáfféú. (Ap. 1:2, 3) Ach mosonottam ngeni ena emén me tongei i epwe tongeni amwékútú an epwe mochen sópweló le akkaúseling ngenikich. *

7. Lipwákéchúch lón ewe angangen afalafal a lóngólóng wóón met?

⁷ Iei sipwe káé ifa usun sipwe néúnéú ewe Paipel le áweweei eú pwóróus. Pwúngún pwe ewe Paipel, ina ewe minen álillis mi fókkun lamot lón ach angangen afalafal.  A álisikich ach sipwe “fokun tufich o lipwäköch ngeni sokun angang mürina meinisin.” (2 Tim. 3:16, 17) Lipwákéchúch lón ewe angangen afalafal ese lóngólóng wóón chómmóngun wokisin sia álleani ngeni ewe chón imw, nge a lóngólóng wóón ach angangéch le néúnéú me áweweéchú ekkewe wokisin sia állea ngeni. (Álleani Föför 17:2, 3.) Áwewe chék, sipwe nengeni ekkeei úlúngát pwóróus.

8, 9. (a) Ifa usun sipwe álisi emén mi lúkú pwe Jesus me Kot iir léllé chék? (b) A pwal wor ekkóch áwewe usun ei pwóróus ka kúna pwe a mmen álilliséch ngeni ewe chón imw?

⁸ Pwóróus 1: Lón ach angangen afalafal, sia chuuri emén mi lúkú pwe Kot me Jesus iir léllé chék. Menni wokisin sia tongeni néúnéú le áweweei ei mettóch? Sia tongeni etiwa ewe chón imw an epwe álleani alon Jesus we lón Johannes 6:38, a erá: “Üa feitiu seni läng pwe üpwe föri letipen ewe mi tiniei, nge sap püsin letipei.” Mwirin ach álleani sia tongeni eisini: “Ika Jesus, i Kot, iwe ié a tiinatiw i seni láng ngeni fénúfan? Esap pwe ena Emén epwe lap seni Jesus? Pún ewe chón akúné epwe tekia seni ewe emén i a akúnééi.”

⁹ Sia pwal tongeni álleani pwóróusen án Jesus papatais lón Lukas 3:21, 22, a erá: “Lupwen Jesus a iotek, läng a sukula o ewe Ngünmifel a feitiu won usun lapalapen eman lisom. Iwe, eu möngüngü a feitiu seni läng a apasa, ‘En nei mi fokun achengicheng, üa unusen pwapwa reöm.’” Ren ach sipwe álisi emén le ekieki ena wokisin, sia tongeni apasa: “Ika Jesus i Kot, iwe ié chék Jesus a iótek ngeni? Nengeni pwe lón ei wokisin emén a fósetiw me láng. Nge ika Jesus i Kot, ié na a wisen apasa ekkena kapas?” Ika ewe chón imw a súféliti án Kot we Kapas me a letip wenechar, ena sókkun áwewe a tongeni amwékútú i an epwe etittinaéchú ei pwóróus.​—Föf. 17:11.

10. (a) Ifa usun sipwe álisi emén mi lúkú ekkein ell? (b) Met sókkun áwewe ka kúna pwe a mmen álilliséch lupwen ka fós usun ekkein ell?

¹⁰ Pwóróus 2: Emén chón imw mi achocho lón an lamalam a weires an epwe lúkú pwe ekkewe aramas mi ngaw resap riáfféú fóchófóch lón ekkein ell. Eli a lúkú ekkein ell pokiten a mochen pwe ekkewe aramas mi ngaw repwe kúna chappen ar féffér mi ngaw. Ifa usun sipwe álisi ena esin aramas mi eáni ena sókkun ekiek? Sipwe akkomw alúkúlúkú ngeni pwe chón féfféringaw repwe kúna kapwúng. (2 Tes. 1:9) Mwirin, sia tongeni állea ngeni Keneses 2:16, 17, ewe a apasa pwe liwinin tipis máló. Sia tongeni áweweei pwe pokiten án Atam tipis, aramas meinisin ra álemwiri tipis. (Rom 5:12) Nge sia tongeni áiti ngeni pwe esap fán eú án Kot fós usun kapwúng lón ekkein ell.  Iwe, sipwe eisini, “Ika pwe riáfféú fóchófóch ina kapwúngún Atam me Efa ika repwe atai án Kot allúk, iwe itá esap pwúng án Kot epwe éúréúrer usun?” Mwirin sia tongeni álleani Keneses 3:19. Lón ei wokisin Kot a ereni Atam pwe kapwúngún an tipis, epwe liwiniti pwúl. Nge ese fós usun ekkein ell. Iwe sipwe pwal eisini, “Itá epwe pwúng án Kot apasa ngeni Atam pwe epwe liwiniti pwúl ika pwe epwe wesewesen kóturulong lón eú ekkein ell?” Ika ewe chón imw a letip wenechar, ena kapas eis a tongeni álisi an epwe ekiekiéchú ei pwóróus.

11. (a) Ifa usun sipwe álisi emén mi lúkú pwe aramas meinisin mi múrinné repwe feitá láng? (b) Mei wor och áwewe ka kúna pwe a álilliséch ngonuk lupwen ka fós usun án aramas repwe feitá láng?

¹¹ Pwóróus 3: Lón ach angangen afalafal sia chuuri emén mi lúkú pwe aramas meinisin mi múrinné repwe feitá láng. Ika emén a eáni ena sókkun ekiek epwe tongeni wewengaweiti ekkóch wokisin lón Paipel. Áwewe chék, sia áiti ngeni eménna Pwärätä 21:4. (Álleani.) Iwe eli epwe ekieki pwe ekkeei feiéch ei wokisin a áweweei usun ra weneiti ewe manaw lón láng. Ifa usun sipwe álisi? Sia tongeni áweweéchú ena wokisin lap seni ach sipwe pwal álleani pwal ekkóch wokisin. Ena wokisin a erá pwe “esap chüen wor mäla.” Sia tongeni eisini: “Ka tipeeú pwe ren ach sipwe tongeni erá pwe och mettóch esap chúen wor, mi lamot an epwe akkomw wor?” Ese mwáál epwe apasa ewer. Iwe, sia tongeni áiti ngeni pwe a chék wor máló wóón ei fénúfan, nge ese wor máló lón láng. Ina popun, sia weweiti pwe Pwärätä 21:4 a fós usun ekkewe feiéch epwe fis wóón fénúfan lón mwachkkan.​—Kölf. 37:29.

12. Pwata Jesus a áeá kapas áwewe?

¹² Me lúkún án Jesus áeá kapas eis lón an afalafal, a pwal áeá kapas áwewe. (Álleani Mateus 13:34, 35.) Ren án Jesus áeá kapas áwewe, a tongeni pwáló masouen letipen chókkewe mi aúseling ngeni. (Mat. 13:10-15) Aramas ra pwal pwapwaiti me chechchemeni minne Jesus a afalafala lupwen a áeá kapas áwewe. Ifa usun sipwe pwal tongeni áeá kapas áwewe lón ach asukula aramas?

13. Menni kapas áwewe sipwe áeá epwe pwáraatá pwe Kot a tekia seni Jesus?

¹³ A éch ach sipwe áeá ekkewe sókkun kapas áwewe mi mecheres. Áwewe chék, lupwen sia mochen áweweei pwe Kot a tekia seni Jesus, sia tongeni erá pwe Kot me Jesus ra fen eáni áwewe ewe riri lefiler ngeni ewe riri lón famili. Kot a fen erá pwe Jesus i Néún, me Jesus a fen apasa pwe Kot ina i Seman. (Luk. 3:21, 22; Joh. 14:28) Mwirin, sia tongeni eisini ewe chón imw: “Ika ka mochen áiti ngeniei pwe mi chék léllé rúúemén aramas, menni riri lón famili ka tongeni áeá pwe kopwe áwewe ngeniei?” Ewe chón imw a tongeni erá eli ewe riri lefilen pwipwi are pwal lefilen nippwe. Mwirin sia tongeni erá: “A éch ena kapas áwewe. Iwe, ika sia tongeni mwittir áeá ena sókkun kapas áwewe, esap pwe Jesus, ewe Sense mi Lap seni meinisin, epwe pwal áeá ena kapas áwewe? Jesus ese apasa ena, nge a fen erá pwe Kot ina i Seman. Ina minne, Jesus a áweweei pwe Kot a watte seni i me a pwal watte an nemenem seni.”

14. Menni kapas áwewe a pwáraatá pwe ese pwúng ewe ekiek pwe Kot a ewisa ngeni ewe Tefil an epwe eriáfféwú aramas lón ekkein ell?

¹⁴ Nengeni pwal ei kapas áwewe. Ekkóch ra lúkú pwe Satan a nemeni ewe ekkein ell. Ei kapas áwewe a tongeni álisi emén sam are in le kúna pwe ese pwúng ewe ekiek pwe Kot a ewisa ngeni ewe Tefil an epwe eriáfféwú aramas lón ekkein ell. Sia tongeni apasa: “Anchangei pwe noum we a lúkúmacheló me a féfféringaw. Epwe  met meefiom?” Ese mwáál ewe sam are in epwe erá pwe epwe sótuni le áwena néún na. Epwe achocho le ákkálisi néún na pwe epwe úkútiw seni an kewe féffér mi ngaw. (SalF. 22:15) Iwe, sia pwal tongeni eisini ika met epwe féri ika néún we ese fókkun mochen siwili féfférún. Lap ngeni sam me in ra erá pwe repwe apwúngú néúr. Iwe sipwe eisini: “Met kopwe féri ika a pwá pwe emén aramas mi kirikiringaw a fen etipetipa noum we an epwe lúkúmach?” Ese mwáál ewe sam are in epwe song ngeni ena emén. Iwe, sipwe eisini: “Kopwe likiti ngeni ena emén mi kirikiringaw, ewe a etipetipa noum we an epwe wisen eriáfféwú pwe epwe kúna liwinin an tipis?” Ese mwáál epwe erá aapw. Iwe, a ffat pwe Kot esap tongeni néúnéú Satan an epwe wisen eriáfféwú ekkewe aramas i a fen etipetiper pwe repwe féfféringaw!

15, 16. (a) Pwata sisap ekieki pwe meinisin aramas sia afalafal ngeniir repwe etiwa ewe kapas allim usun ewe Mwú? (b) Mi lamot ach sipwe kon lipwákéch pwe epwe sópwéch ach angangen asukula aramas? (Ppii ewe pwóór itelapan “ Eú Minen Álillis pwe Sipwe Pélúwenéchú Aramas.”)

¹⁵ Ikaamwo sia angéch le áeá kapas eis, áweweéchú ekkewe wokisin lón Paipel me áeá ekkewe kapas áwewe mi fich, nge esap meinisin aramas sia afalafal ngeniir repwe etiwa ewe kapas allim usun ewe Mwú. (Mat. 10:11-14) Pwal mwo nge Jesus, ewe Sense mi Lapalap seni meinisin, mi chék chókúkkún chókkewe mi etiwa an afalafal.​—Joh. 6:66; 7:45-48.

¹⁶ Inaamwo ika sia meefi pwe sia tufichingaw, nge a chúen tongeni sópwéch ach angangen afalafal. (Álleani Föför 4:13.) Án Kot we Kapas a alúkúlúkúkich pwe “chókkewe mi fich ngeni manaw esemuch” repwe etiwa ewe kapas allim. (Föf. 13:48, NW) Ina minne, sipwe achocho le eáni ekiek pwúng usun pwisin kich me chókkewe sia afalafala ngeniir ewe kapas allim usun ewe Mwú. Amwo sipwe alamota ewe káit sia angei seni Jiowa, me lúkúlúk pwe kich me chókkewe mi aúseling ngenikich ousipwe kúna feiéch seni. (1 Tim. 4:16) Jiowa epwe álisikich le silei ifa usun sipwe “pölüeniöchü ngeni aramas meinisin.” Ewe lesen mwirin ei epwe áiti ngenikich eú alen ach sipwe sópwéch lón ach afalafal ren ach sipwe fiti án Jesus we kapasen pesepes usun féfférúch ngeni aramas.