Ewe Paipel a áiti ngenikich pwe ewe sópwólóón a wewe ngeni pwe epwe wor kata: “Pun riaföün lon ekana rän epwe fen lap seni ekewe riaföü mi fen fis seni lepoputän fanüfan tori ei fansoun . . . Are Kot esap amochomochala ekewe rän, esap wor eman aramas epwe manau.” (Mateus 24:21, 22) Nge Kot a pwon ngenikich pwe chómmóng aramas repwe kúna manaw: “Fanüfan me mettochun lon . . . repwe morola, nge iö a föri letipen Kot epwe manau tori feilfeilachök.”​—1 Johannes 2:17.

Ika ka mochen kúna manaw atun ótóten ei fénúfan epwe móróló me “manau tori feilfeilachök,” itá met kopwe féri? Itá kopwe poputá le ammólnatá chómmóng pisek are ammanawom? Aapw. Ewe Paipel a fókkun pesekich pwe sipwe akkomwa och mettóch mi sókkóló seni ekkena. A apasa: “Pokiten ekkeei mettóch meinisin repwe móróló, oupwe usuni sókkun aramas mi féfféri féffér mi fel o angang mi fich ngeni Kot, lupwen oua witiwiti o ekipwichi warotoon ewe ránin Jiowa.” (2 Petrus 3:10-12, NW) Ekkewe epwipwiin wokisin ra pwáraatá pwe “ekkeei mettóch meinisin,” ekkewe repwe móróló a kapachelong ekkewe nemenem lón ei ótót mi ngaw me chókkewe mi filatá ekkena sókkun nemenem lap seni án Kot nemenem. A ffat pwe ika sipwe ammólnatá chómmóng pisek ena mettóch ese tongeni selánikich seni ewe kata.

Ren enletin, ach kúna manaw a wewe ngeni ach tuppwél ngeni Jiowa Kot me kákkáé usun ewe sókkun manaw me féffér a apwapwaai i. (Sefanaia 2:3) Mi lamot sipwe “witiwiti o ekipwichi warotoon ewe ránin Jiowa.” Nge sisap fiti chómmóng aramas ikenái me tunaló ekkewe esissil mi éúréúrakich pwe sia nónnóm lón ei fansoun mi fókkun kkóló. Chón Pwáraatá Jiowa ra tongeni áiti ngonuk seni ewe Paipel ifa usun kopwe tongeni manawewu seni ewe sópwólóón.