1, 2. Met ekkóch aramas ra ekieki usun Kot?

 CHÓMMÓNG aramas ra ekieki pwe ese pwal lamot ngeni Kot ar kewe féffér. Me rer pwe Kot ese fókkun ekieki met a fis ngeniir. Áwewe chék, mwirin án eú taifun mi fókkun péchékkúl atai eú watteen kinikinin Philippines lón November 2013, emén mayor lón eú telinimw watte a apasa: “Ese mwáál Kot a nóm ekis.”

² Ekkóch aramas ra ekieki pwe Kot ese kúna minne ra féfféri. (Ais. 26:10, 11; 3 Joh. 11) A pwal ina usun ekiekin ekkóch aramas lón fansoun aposel Paulus we. Iei met a apasa usur: “Ekei aramas resap fokun mochen amwöchü lon letiper mine ra silei usun Kot.” Iir aramas mi ngaw, tipemmóng, me féfféringaw.​—Rom 1:28, 29.

3. (a) Ikkefa ekkewe kapas eis sia tongeni pwisin eisinikich? (b) Lón ewe Paipel, met “pöün” Kot a kan soun weneiti?

³ Nge kich, met sia ekieki? Sia silei pwe Jiowa a kúna mettóch meinisin sia féfféri. Nge met, kich mi lúkú pwe i a chúngúkich? Sia kúna angangen péún Kot lón manawach? Lón Paipel ewe kapas “pöün” Kot, a kan soun weneiti an féri eú manaman. A áeá an manaman le álisi néún kewe chón angang me okkufu chókkewe  mi oput i. (Álleani Tuteronomi 26:8.) Jesus a erá pwe ekkóch aramas repwe “küna Kot.” (Mat. 5:8) Kich mi kapachelong lein chókkana? Ifa usun sia tongeni “küna Kot”? Iei sipwele káé seni lón Paipel pwóróusen chókkewe mi kúna lón manawer angangen péún Kot me chókkewe rese. Sipwe pwal káé ifa usun lúkú a álisikich le kúna angangen péún Kot.

4. Pwata chókkewe mi oputa Israel rese mochen kúna angangen péún Kot?

⁴ Lóóm lóóm, chómmóng aramas ra tufichin kúna me rong ifa usun Kot a álisi chón Israel. Jiowa a áeá an manaman le angasaaló néún kewe aramas seni lón Isip, me okkufu chómmóng king me lón ewe Fénúen Pwon. (Jos. 9:3, 9, 10) Inaamwo ika ekkóch ekkewe king ra fen kúna me rong ifa usun Jiowa a angasaaló néún kewe aramas, nge “ra chufengen o tipeeufengen pwe repwe fiu ngeni Josua me chon Israel.” (Jos. 9:1, 2) Lupwen ekkena king ra maun ngeni chón Israel, itá úrúrún repwele mirititi angangen péún Kot. Ren án Jiowa manaman mi péchékkúl, ewe “akkar a üla pwal ewe maram, tori ekewe chon Israel ra akufu chon oputeer.” (Jos. 10:13) Nge Jiowa a chék esen ngeni tipeférean leluken chókkewe mi oputa chón Israel, ina minne ra maun ngeni Israel. (Jos. 11:20) Iir ra kkuf lón ena maun pún rese lúkú pwe Jiowa a wisen mammaun fán iten néún kewe aramas.

5. Met ewe king mi ngaw Ahap ese mochen lúkú?

⁵ Iwe, ló, ló, ló, a suuk ngeni ewe king mi ngaw Ahap, an epwe kúna fán chómmóng angangen péún Kot. Elias a ereni: “Esap püngütiu amurenipwin ika üt lon kei ier tori üpwe kapasefäl.” (1 King 17:1) A chék tongeni fis ena ren angangen péún Kot, nge Ahap ese mochen lúkú. Mwirin, Elias a iótek ngeni Jiowa, me I a pélúweni ren an tiinatiw ekkei seni láng. Ahap a kúna minne a fis. Iwe, Elias a ereni pwe Jiowa epwe áwesaaló ewe pwás me apúngatiw rán. (1 King 18:22-45) Ahap a kúna meinisin ekkena manaman nge a chúen lúkú pwe rese fis ren manamanen Jiowa. Met sia tongeni káé seni ekkeei pwóróus? A lamot sipwe mirititi angangen péún Kot lón manawach.

6, 7. Met ekkewe chón Kipeon me Rahap ra mirititi?

⁶ Ekkewe chón Kipeon ra fókkun sókkóló seni chón ekkewe ekkóch mwú únúkkúr. Ra kúna angangen péún Jiowa. Ekkena chón Kipeon rese mochen maun ngeni chón Israel, nge ra fen ló kútta ar repwe kinamwefengen. Pwata? Ra erá pwe pokiten ra rongorong usun Jiowa me mettóch meinisin a féri. (Jos. 9:3, 9, 10) Ra mirititi pwe Jiowa a wisen mammaun fán iten chón Israel.

⁷ Rahap a pwal kúna angangen péún Jiowa. I esap chón Israel, nge a rongorong ifa usun Jiowa a angasaaló néún kewe aramas seni lón Isip. Lupwen ekkewe rúúemén spai ra tori imwan we, i a ereniir: “Üa silei pwe ewe Samol mi Lapalap a ngenikemi ei fanü.” Rahap a lúkú pwe Jiowa a tongeni amanawa me an we famili. A pwári an lúkúlúk wóón Jiowa inaamwo ika a silei pwe an féri ena epwe atoto feiengaw.​—Jos. 2:9-13; 4:23, 24.

8. Ifa usun ekkóch ekkewe chón Israel ra mirititi angangen péún Kot?

⁸ Ekkóch chón Israel rese usun ewe king mi ngaw Ahap. Pún ra mirititi pwe Kot i ewe a tiinatiw ewe ekkei seni láng, ina pélúwen án Elias we iótek. Ra púchérútá me apasa: “Ewe Samol mi Lapalap i chök Kot.” (1 King  18:39) A wesewesen ffatéch ngeniir pwe ra kúna án Kot manaman.

9. Lón ei fansoun, ifa usun sia tongeni kúna Jiowa me angangen péún?

⁹ Iei sia fen káé ekkóch pwóróus mi múrinné me mi ngaw mi álisikich le weweiti met weween ach “küna Kot” are kúna angangen péún Kot. Atun sia silei Jiowa me napanapan kewe, sia kúna angangen péún ren ‘mesen letipach.’ (Ef. 1:18) Ena mettóch a amwékútúkich ach sipwe mochen áppirú ekkewe aramas mi tuppwél lóóm me ikenái, iir kewe ra fen kúna ifa usun Jiowa a álisi néún kewe aramas. Iwe met, mi wor ach pisekin ánnet pwe Kot a kan ákkálisikich ikenái?

10. Mi wor ach pisekin ánnet pwe Jiowa a ákkálisi aramas ikenái? (Ppii ewe sasing lepoputáán ei lesen.)

¹⁰ A fókkun tepetep pisekin ánnet usun án Jiowa ákkálisi aramas ikenái. Sia kan rongorong usun pwóróusen chókkewe ra tingorei Kot an epwe álisiir me Kot a pélúweni ar iótek. (Kölf. 53:2) Áwewe chék, atun Allan a afalafal lón eú kúkkún fénú lón Philippines, i a chuuri emén fefin nge neminna a poputá le kechiw. Allan a apasa: “Lesossorun ena chék rán, neminna a iótek ngeni Jiowa pwe ekkewe Chón Pwáraatá repwe kúna i.” Lesáráféén neminna a káé ewe Paipel ren Chón Pwáraatá, nge atun a pwúpwúlú me mwékút ngeni ena fénú a kaúló le káé. A chúng letipen neminna ren mwittirin án Kot pélúweni an iótek. Iwe ese mwo tori eú ier nge a fangóló manawan ngeni Jiowa.

11, 12. (a) Ifa usun Jiowa a kan ákkálisi néún kewe chón angang? (b) Apwóróusa ifa usun Jiowa a álisi emén Chón Kraist.

¹¹ Chómmóng chón angang ngeni Jiowa ra fen meefi angangen péún atun ra úkútiw le féri ekkewe mettóch mi ngaw ren choweán úkkún suupwa, úkkún sáfei mi efeiengaw, are kakkatol sasingin me kachitoon kapasingaw. Ekkóch ra erá pwe me mwen ar resaamwo silei Jiowa ra resin achocho le úkútiw seni ekkena mettóch nge rese tongeni. Iwe nge, atun ra tingor án Jiowa álillis i a ngeniir an we “tufich mi somwola,” iwe ra kerán tufichin úkú seni ekkena mettóch mi ngaw.​—2 Kor. 4:7; Kölf. 37:23, 24.

¹² Jiowa a pwal álisi néún kewe chón angang ar repwe pworacho ngeni pwisin ar weires. Ina met a fis ngeni Amy. I a ketiw an epwe fiti ewe angangen kaú Leenien Mwich me imwen misineri lón eú fénú lón Pacific. Eérenien ena leeni a sókko seni eérenien fénúan, fán chómmóng ese wor fiifi are konik, a soun puu watteen konik wóón ekkewe al, a pwosiiti an famili, me a chék nónnóm lón eú kúkkún ruumw lón eú hotel. Eú rán, a chúwérúwér ngeni ewe ra angangfengen. A fókkun riáfféú ren met a féri. Atun a liwiniti ruumwan we mi kiroch, a iótek ngeni Jiowa me tingor an álillis. Iwe, atun a ttinetá ewe tengki a álleani eú pwóróus lón ewe Watchtower usun eú sochungio fán iten ewe sukulen Gilead. Ena pwóróus a fós usun ekkewe sókkun weires a pwal nóm lón. Neminna a apasa: “Ua meefi pwe Jiowa a fóffós ngeniei lón ena pwinin. A apéchékkúlaei ai upwe sópweló lón ai na angang.”​—Kölf. 44:25, 26; Ais. 41:10, 13.

13. Ifa ewe pisekin ánnet pwe Jiowa a álisi néún aramas ar repwe pwáraatá pwe mi wor ar pwúúng le afalafal?

¹³ Jiowa a pwal álisi néún kewe aramas ar repwe ánneta me anúkúcharatiw ewe kapas allim. (Fil. 1:7) Áwewe chék, atun ekkóch mwú ra sótun le aúkatiw ach angangen afalafal, sia pwisin pwáraatá lón kapwúng ach pwúúng le afalafal. Wóón unusen fénúfan a  fen wor 268 case sia winneni. Nge seni ewe ier 2000, sia winneni 24 me leir lón ewe Kapwúng Tekia mi Túmúnú án Aramas Pwúúng lón Iurop. A ffat pwe ese fókkun wor emén epwe tongeni aúkaló angangen péún Kot!​—Ais. 54:17; álleani Aisea 59:1.

14. Ikkefa pwal ekkóch pisekin ánnet mi ánnetatá pwe Kot a ákkálisi néún aramas?

¹⁴ Ewe angangen afalafala ewe kapas allim mi fis wóón unusen fénúfan pwal ina eú pisekin ánnet mi pwáraatá usun angangen péún Kot. (Mat. 24:14; Föf. 1:8) Ewe tipeeúfengen lefilen néún Jiowa aramas seni fénú meinisin a chék tongeni fis pokiten án Jiowa álillis. A fókkun kkóló ena esin tipeeú! Pwal mwo aramas rese fel ngeni Jiowa ra erá: “Enlet, Kot a nonom lefilemi!” (1 Kor. 14:25) A wor chómmóng pisekin ánnet mi ánnetatá pwe Kot a ákkálisi néún aramas. (Álleani Aisea 66:14.) Nge en, ka kúna angangen péún Jiowa lón manawom?

15. Fán ekkóch, pwata a tongeni weires ach sipwe mirititi pwe Jiowa a ákkálisikich?

¹⁵ Fán ekkóch neman sise kúna angangen péún Kot lón manawach. Pwata? Lupwen a chómmóng ach osukosuk, neman sipwe ménúkaaló pwe Jiowa a fen ákkálisikich fán chómmóng me mwan. Ina met a fis ngeni Elias. I emén mi pwora, nge atun Kiwin Isipel a mochen nieló, a niwokkus. Ren och fansoun a ménúki ifa usun Jiowa a fen álisi me mwan. Ewe Paipel a erá pwe Elias a mochen epwele máló. (1 King 19:1-4) Ia a tongeni kúna me ie álillis me pwora? A lamot epwe afóta ekiekin wóón Jiowa.​—1 King 19:14-18.

16. Ifa usun sia tongeni kúna Kot atun a wor ach osukosuk?

¹⁶ Hiop a kon nefotofot wóón minne a lólileniesini, ina minne ese mirititi ika ifa ekiekin Jiowa usun an we osukosuk. (Hiop 42:3-6) Pwal kich, fán ekkóch neman a  weires ach sipwe kúna Kot pokiten ekkewe osukosuk sia kúkkúna. Nge met a tongeni álisikich pwe sipwe kúna minne Kot a féfféri fán itach? Mi lamot sipwe ekilonei met Paipel a apasa usun ach kewe osukosuk. Atun ach káé ewe Paipel me kúna ekkewe pwóróus are kapasen emmwen mi ataweei osukosuk mi léllé ngeni ach, usun nge Jiowa a fóffós ngenikich are emmwenikich. Iwe, sia meefi pwe Jiowa i wesewesen emén chiechiach, me sia pwal tongeni erá: “Me mwan üa rong usum ren selingei, nge iei üa nenengenuk ren mesei.”

17, 18. (a) Ifa usun kopwe kúna angangen péún Jiowa lón manawom? (b) Apwóróusa eú pwóróus mi pwáraatá ifa usun Kot a ákkálisikich ikenái.

¹⁷ Ifa usun ka tongeni kúna angangen péún Jiowa lón manawom? Sipwe ppii nimu mettóch. Áeúin, neman ka meefi pwe Jiowa a álisuk pwe kopwe kúna ewe enlet. Oruuan, neman ka chemeni óm fiti eú án Chón Kraist kewe mwich me rongorong eú afalafal, iwe ka apasa, “Iei met a wesewesen lamot ngeniei!” Aúlúngátin, neman ka fen kúna ifa usun Jiowa a pélúweni eú me lein óm kewe iótek. Arúáánún, neman ka mochen alapaaló óm angang ngeni Jiowa me ka kúna pwe i a fen álisuk le tikeri ena. Enimuan, neman ka towu seni óm angangen moni pokiten a kon angealó watteen óm fansoun le angang ngeni Jiowa nge mwirin, ka kúna pwénúetáán án Kot ei pwon: “Usap fakkun poutukelo.” (Ipru 13:5, Testament Mi Fö) Lupwen a péchékkúl ach riri ngeni Jiowa, epwele mecheres ach sipwe kúna angangen péún lón manawach.

¹⁸ Emén Chón Kraist seni Kenya itan Sarah a apasa: “Ua iótek fán iten emén nei chón káé ua meefi pwe ese kon aúcheani an káé Paipel. Ua eisini Jiowa ika ua tongeni kaúló le káé ngeni. Mwirin chék ai apasa ‘Amen,’ a riing nei we phone. Ena chón káé a tingoreei ika a tongeni fitiei le ló mwich! Ua wesen mwaar!” Ika sia ekieki met Kot a féfféri fán itach, sipwe kúna pwe i a ákkálisikich. Pwal emén itan Rhonna, a nónnóm Asia a erá pwe sise mwittir kúna ifa usun Jiowa a ákkálisikich lón manawach. A pwal erá: “Nge atun ka kúna, kopwe ingeló ren úkúkún watteen an chúngúkich!”

19. Met a pwal lamot sipwe féri pwe sipwe kúna Kot?

¹⁹ Jesus a erá pwe chókkewe “repwe küna Kot” a lamot epwe “limöch leluker.” (Mat. 5:8) Met weween ena? Weween mi lamot epwe limeliméch ekiekich me sipwe úkútiw le féri minne ese pwúng. (Álleani 2 Korint 4:2.) Sia káé lón ei lesen pwe ach kúna Kot, a wewe ngeni ach sipwe akkachocho le apéchékkúlaló ach riri ngeni i. Nge lón en lesen mwirin, sipwe káé ika ifa usun lúkú a tongeni álisikich le kúnaéchú angangen péún Jiowa lón manawach.