Ewe Paipel eú puk mi kkóló aúchean. A masou ren kapasen emmwen seni ewe Chón Férikich. (2 Timoty 3:16) Minne a mak lón, a wesewesen tongeni kkúú manawach. Ren enletin, iei met a pwisin apasa: “Än Kot kapas a manau o manaman.” (Ipru 4:12) A wor manamanan le ámúrinnééló manawach lón ekkeei ruu mettóch, a awora emmwen fán iten manawach ikenái rán me rán, me a pwal álisikich le silei Kot me an kewe pwon.​—1 Timoty 4:8; James 4:8.

A ámúrinnééló manawom iei. Ewe Paipel a tongeni álisuk lón mettóch meinisin mi fis lón manawom. A awora kapasen emmwen mi álilliséch fán iten ekkeei mettóch:

•   Riri lón famili me pwal riri ngeni ekkóch.​—Efisos 4:31, 32; 5:22, 25, 28, 33.

• Memmeef me péchékkúlen inis.​—Kölfel 37:8; Än Salomon Fos 17:22.

• Minne mi pwúng me mwáál.​—1 Korint 6:9, 10.

• Atufichin manaw.​—Än Salomon Fos 10:4; 28:19; Efisos 4:28. *

Eú pea pwúpwúlú alúwél me fépwúl lón Asia, ra fókkun aúcheani án Paipel emmwen. Ra usun chómmóng pwúpwúlúfé mi kúna weiresin ar repwe érén ngeniir napanapen emén me emén leir me awora alen pwóppwóróusfengen lefiler. Nge iir ra poputá le apwénúetá met ra álleani seni Paipel. Iwe, met mwirilóón? Iei alon ewe mwán Vicent: “Minne ua álleani lón Paipel a álisiei le ataweei fán tong ekkewe osukosuk lón ám pwúpwúlú. Ám onómu manawem fán emmwenien Paipel a atoto ngenikem manaw mi pwapwa.” Pwúlúwan we itan Annalou, a pwal erá: “Ám álleani pwóróusen ekkewe aramas mi mak lón Paipel, a álisikem. Iei ua meefi pwapwa me menemenéch ren ám pwúpwúlú me pwal ren ekkewe mettóch aua achocho ngeni lón manawem.”

A álisuk le silei Kot. Me lúkún meefien Vicent na usun pwúpwúlú, iei met a pwal erá: “Ren ai ákkálleani Paipel, iei ua meefi ai akkarap ngeni Jiowa lap seni me mwan.” Alon Vicent na a pwáraatá usun eú mettóch mi lamot. Ina án ewe Paipel a tongeni álisuk le silei Kot. Ika ka féri ena, kosap chék kúna feiéch seni an emmwen, nge ka tongeni silei i me chiechi ngeni. Kopwe pwal kúna pwe a awora tichikin pwóróus fán iten ewe manaw mi múrinné lón mwachkkan, ewe atun ka tongeni pwapwaiti “ewe enletin manau,” manaw tori feilfeiló chék. (1 Timoty 6:19) Ina och mettóch ese pwal wor eú puk lúkún Paipel epwe tongeni áiti ngonuk.

Ika ka poputá le álleani Paipel me sópweló le féfféri ena, pwal en kopwe tongeni kúna ekkena feiéch sia fen pwóróus wóón, epwe múrinnéló manawom iei me kopwe silei Kot. Iwe nge, atun kopwe álleani Paipel, neman epwe ppiitá chómmóng óm kapas eis. Iwe lupwen a fis ena, chemeni ewe leenien áppirú mi múrinné emén néúwis seni Itiopia a isetiw, ewe a manaw 2,000 ier a ló. A chómmóng an kapas eis usun Paipel. Iwe lupwen emén a eisini ika a weweiti minne a álleani, i a erá: “Epwe ifa usun ai üpwe tongeni weweiti nge esap wor eman a awewe ngeniei?” * Iwe i a fókkun etiwa álillis seni emén néún Jesus chón káé itan Filip, ewe mi fen lipwákéch le asukula aramas usun Paipel. (Föför 8:30, 31, 34) Pwal ina chék usun, ika ka mochen alapaaló óm silei ewe Paipel, aua etiwok óm kopwe tiinaaló óm tingor wóón ei website jw.org are mak ngeni ewe address mi arapakkan ngeni leeniom mi mak lón ei puk. Ka pwal tongeni chuuri ekkewe Chón Pwáraatá Jiowa ra nóm kkan ngonuk are ló ngeni ar we Leenien Mwich lón leeniom we. Pwata kese angei eú Paipel iei me mut ngeni an epwe emmwenuk ngeni ewe manaw mi múrinné?