Áeúin Taropwe Ngeni Timoty 2:1-15
2 Ina minne, lap seni meinisin, úa pesekemi ámi oupwe tingor ngeni Kot fán iten ekkewe ekkóch, tingormaw ngeni, iótek ngeni, me kilisou ngeni fán iten sókkun aramas meinisin,
2 fán iten ekkewe king me meinisin ekkewe mi eáni wis tekia, pwe sipwe sópweeló le eáni eú manaw mi kinamwe fitifengen me ach unusen túppwél ngeni Kot me tinikken.
3 Iei met mi múrinné me ketiw me ren Kot, ach we Chón Amanaw,
4 ewe a tipeni án sókkun aramas meinisin repwe kúna manaw me eáni ewe sile mi pwúng ussun ewe enlet.
5 Pún a wor emén chék Kot, pwal emén chón affér lefilen Kot me aramas, Kraist Jises. I ewe mwán,
6 ewe mi fangoló manawan pwe penmanawen meinisin, ina met aramas repwe fós ussun lón ewe fansoun mi kefililó.
7 Ren ái úpwe pwáraaló ena, Kot a ewisa ngeniei ái úpwe emén chón afalafal me emén aposel. Ngang emén senseen lúkú me ewe enlet ngeni ekkewe ekkóch mwú. Ngang úa kapas enlet, úse chofona.
8 Ina minne, úa mochen pwe lón ekkewe leeni meinisin oua mwichfengen ie, ekkewe mwán mi túppwél repwe sópweeló le ikkiótek, resap song me ánini.
9 Pwal ekkewe fefin repwe afouta ngeniir úf mi ésúúfél, ekkewe ese ássáw, me ekkewe mi pwáári mirit, nge esap ren sókkun fúresin mékúr are kolt are faw aúchea are úf mi fókkun mémmóng.
10 Nge repwe afouter lón ewe napanap mi fich ngeni fefin mi fel ngeni Kot. Mi lamot repwe féri angang múrinné pwe epwe ina fouter.
11 Lupwen emén fefin a angei káit, a lamot epwe chék fanafaneló me onómu fán emmwenien ekkewe mwán.
12 Úse mut ngeni emén fefin an epwe asukul are nemenem wóón emén mwán, nge epwe chék fanafaneló.
13 Pún Atam a akkomw ffér, mwirin If.
14 Pwal och, Atam ese tupuló, nge ewe fefin a unusen tupuló me wiliiti emén chón tipis.
15 Iwe nge, emén fefin epwe kúna túmún ren an wor néún iká epwe sópweeló lón an eáni lúkú, tong, pin, me mirit.
