Me ren Jon 20:1-31
20 Lón ewe áeúin ránin wiik, Meri Maktalin a ló ren ewe peiás lesossorusich, atun mi chúen kiroch, me a kúna pwe ewe faw a fen púlúpúlúló seni ewe peiás.
2 Iwe, a ssáto ren Simon Piter me ewe pwal emén chón káé, ewe Jises a echeni, me a ereniir: “Ra uwealó ewe Samol me lón ewe peiás, me áúse silei ia ra onómu i ie.”
3 Iwe, Piter me ewe pwal emén chón káé ra ló ren ewe peiás.
4 Iir me rúúemén ra poputá le ssáppék, nge ewe pwal emén chón káé a mwittir seni Piter me a tori ewe peiás akkomw.
5 A pwóretiw me nelong lón me a kúna ekkewe mangaak mi múrinné mi nóm ikena, nge ese tolong lón.
6 Mwirin, Simon Piter a pwal waroto, a tapwoto mwirin me a tolong lón ewe peiás. Me a kúna ekkewe mangaak mi múrinné mi nóm ikena.
7 Ewe mangaak wóón mékúran ese nóm ren ewe pwal och mangaak, nge a énnúló me imuuló wóón pwisin an lón eú leeni.
8 Mwirin, ewe pwal emén chón káé mi akkomw tikeri ewe peiás a pwal tolong, me a kúna me lúkú.
9 Pún rese mwo weweiti met ewe taropwe mi pin a apasa pwe i epwe manawetá seni máló.
10 Iwe, ekkewe chón káé ra liwiniti imwer.
11 Iwe nge, Meri a úkkúútá lúkún únúkkún ewe peiás me kekkechiw. Atun an kekkechiw, a pwóretiw pwe epwe nelong lón ewe peiás,
12 me a kúna rúúemén chónláng mi úféúf mi pwech mi móót ikewe ia inisin Jises we a piin koon ie, emén únnú mékúran me emén únnú pechen.
13 Iwe ra ereni: “Fefin, pwata ka kechiw?” A ereniir: “Ra uwealó ái we Samol, me úse silei ia ra onómu i ie.”
14 Mwirin an apasa ei, a kulsefál me a kúna Jises mi úkkúútá ikena ie, nge i ese esilla pwe i Jises.
15 Jises a ereni: “Fefin, pwata ka kechiw? Ié ena ke kútta?” Tittipen neminna pwe i ewe chón atake, a ereni: “Mwán, iká pwe en ke uwealó i, kopwe ereniei ia ka onómu ie, iwe úpwe ló angei i.”
16 Jises a ereni: “Meri!” Atun a kulsefál, a ereni lón kapasen Ipru: “Rapponi!” (a wewe ngeni “Sense!”)
17 Jises a ereni: “Kosap amwéchúei pún úsaamwo feitá ren ewe Sam. Nge kopwe feiló ren pwii kewe me ereniir, ‘Ngang úpwele feitá ren Semei we pwal Sememi, me ren ái we Kot pwal ámi Kot.’ ”
18 Meri Maktalin a feiló me uwealó ewe pwóróus ren ekkewe chón káé: “Úa kúna ewe Samol!” Me i a ereniir met a ereni.
19 Iwe, lekuniolun ena rán, ewe áeúin rán lón ewe wiik, ekkewe asam ra lok ikewe ia ekkewe chón káé ra nóm ie pokiten ar niwokkusiti ekkewe chón Jus. Iwe, Jises a feito me útáló lukanaper me a ereniir: “Amwo epwe wor ámi kinamwe.”
20 Mwirin an apasa ei, a ékúna ngeniir péún kewe me pwal lepekin we. Iwe ekkewe chón káé ra pwapwa ren ar kúna ewe Samol.
21 Jises a apasasefál ngeniir: “Amwo epwe wor ámi kinamwe. Ussun chék ewe Sam a tiinieito, ngang úpwe pwal tiinikemiiló.”
22 Mwirin an apasa ei, a usaawu wóór ásepwálin ngasangasan me ereniir: “Oupwe angei ewe ngún mi fel.
23 Iká oua omusaaló tipisin emén aramas, weween pwe ra fen musoló me ren Kot. Iká ouse omusaaló tipisin emén aramas, weween pwe rese musoló.”
24 Nge Tomas, emén me lein ekkewe Engol me Rúúemén, ewe mi iteni ewe Nippwe, ese nóm rer atun Jises a etto.
25 Iwe, ekkewe pwal ekkóch chón káé ra ereni: “Áúa kúna ewe Samol!” Nge i a ereniir: “Úsapw fókkun lúkú, chilóón chék iká úpwe kúna me lón péún lemóón ekkewe chúfél me etikaalong aútún pei lón lemóón ekkewe chúfél me etikaalong pei lón lepekin we.”
26 Iwe, wanú rán mwirin, néún kewe chón káé ra pwal nómsefál lón ewe imw, me Tomas a nóm rer. Ikáámwo ekkewe asam ra lok, Jises a feito me útáló lukanaper me apasa: “Amwo epwe wor ámi kinamwe.”
27 Mwirin a ereni Tomas: “Kopwe watá aútún poum ikeei, me katol pei keei, me angei poum me etikaalong lón lepeki, me kopwe kaúló le tipemwárámwár nge kopwe lúkú.”
28 Tomas a pélúweni, a ereni: “Ái Samol me ái Kot!”
29 Jises a ereni: “Pokiten ka kúnaei, ka lúkú? Ra pwapwa chókkewe rese kúna nge ra lúkú.”
30 Ren enletin, Jises a pwal féri chómmóng manaman* me mwen ekkewe chón káé, nge rese makketiw lón ei puk.*
31 Nge ekkeei ra fen makketiw pwe oupwe lúkú pwe Jises i ewe Kraist, ewe Néún Kot, me ren ena lúkú, oupwe kúna manaw pokiten itan.
