Ngeni Ekkewe Chón Kalesia 4:1-31
4 Iká ewe chón álemwir a chúen emén semirit, i ese tekia seni emén slave inaamwo iká mettóch meinisin an, iká met?
2 Nge i a nóm fán ekkewe chón túmúnú me ekkewe souwan tori ewe fansoun mi kefilitá me ren seman we.
3 Pwal ina chék ussun ren kich, atun sia chúen emén semirit sia fétek fán mettóchun ei fénúfan.
4 Nge lupwen a tori ewe fansoun mi kaúkúló, Kot a tiinaato Néún we, ewe mi uputiw seni emén fefin me nóm fán ewe allúk,
5 pwe epwe angasaaló chókkewe mi nóm fán ewe allúk ren an mééniir, pwe Kot epwe muutikich pwe sipwe néún.
6 Iei oua néún Kot, ina minne Kot a tiinaato lón letipach ewe ngún mi fel mi nóm ren Néún we, iwe a efisi ach sipwe apasa fán léúwommóng: “Appa,* Semem!”
7 Ina minne, ouse chúen emén slave, nge oua néún Kot. Iwe, iká ámi néún, oupwe pwal chón álemwir me ren Kot.
8 Nge lón ewe atun ouse silei Kot, oua slave ngeni ekkewe kot chofona.
9 Nge iei oua fen silei Kot, are fen Kot a silekemi, iwe pwata oua kulsefál ngeni ekkewe mettóchun fénúfan mi apwangapwang me lamotongaw me mochen slave sefál ngeniir?
10 Oua pinini ekkewe rán me maram me fansoun me ier.
11 Úa niwokkus iká epwe chék solap ái achocho fán itemi.
12 Ámi pwii kana, úa tingormaw ngenikemi, oupwe ussun chék ngang, pún ngang úa pwal ussumi me lóóm. Ese wor och mi mwáál oua féri ngeniei.
13 Nge ámi oua silei pwe pokiten úa samaw iwe a suuk ngeniei ái úpwe kerán afalafala ngenikemi ewe kapas allim.
14 Me inaamwo iká apwangapwangen inisi a eú sóssót ngenikemi, nge ouse oputaei are nnou ngang.* Oua fen etiwaei ussun emén néún Kot chónláng, are ussun Kraist Jises.
15 Ifa ewe pwapwa oua eáni me mwan? Pún úa lúkúlúk pwe iká epwe tufich, oupwe fen olusaawu mesemi me ngeniei.
16 Iwe met, oua oput ngang pokiten úa erenikemi minne mi enlet?
17 Ra tinikken pwe repwe winnenikemi, nge esap ren och popun mi múrinné. Ra mochen áimukemiiló seniei pwe oupwe mochen tapweló mwiriir.
18 Iwe nge, fansoun meinisin a múrinné ngeni emén an epwe tinikken le winnenikemi ren eú popun mi múrinné, me ei mettóch esap chék fis atun úa nóm remi.
19 Ámi nei kana kúkkún semirit, ngang úpwele pwal meteksefál fán itemi ussun án emén fefin metekin néúnéú tori ámi oupwe napanapeni napanapen Kraist kewe.
20 Úa áneán pwe amwo úa nóm remi iei me kapas pwetete ngenikemi. Úse chúen silei met úpwe féri ngenikemi.
21 Ámi chókkana mi chúen mochen nóm fán ewe allúk, oupwe ereniei, Ouse rong minne ewe Allúk a erá?
22 Áwewe chék, a fen makketiw pwe a wor rúúemén néún Eperiam át, emén me wóón ewe chón angang fefin, nge emén me wóón ewe fefin mi ngas,
23 nge ewe emén me wóón ewe chón angang fefin a uputiw seni futuk, nge ewe pwal emén me wóón ewe fefin mi ngas a uputiw ren án Kot pwon.
24 Ei pwóróus a pwal wor och weween, ekkeei fefin ra wewe ngeni ruu pwonen etipeeú, ewe eú seni ewe Chuuk Sinai, ewe a néúnatiw ekkewe repwe slave, ina i Ekar.
25 Iwe, Ekar a wewe ngeni Sinai, eú chuuk lón Arapia, me a liosuetá ewe Jerusalem iei, pún iir me néún kewe iir slave.
26 Nge ewe Jerusalem asan a ngas, me ina i inach we.
27 Pún a makketiw: “Kopwe pwapwa, en ewe fefin mi riit. Kopwe mweireir o púchérún pwapwa, en ewe fefin ese mwo toruk metekin néúnéú, pún néún ewe fefin mi riit ra chómmóng lap seni néún ewe fefin mi wor pwúlúwan.”
28 Iwe, ámi pwii kana, ámi néún ewe pwon ussun chék Aisek.
29 Nge ussun chék án ewe mi uputiw seni futuk poputá le eriáfféwú ewe mi uputiw ren ewe ngún mi fel, pwal ina ussun met a fis iei.
30 Iwe nge, met ewe taropwe mi pin a apasa? “Kopwe asúoló ewe chón angang fefin me néún we, pún néún ena chón angang fefin we esap eti néún ewe fefin mi ngas we le angei ewe álemwir.”
31 Ina minne, ámi pwii kana, esap kich néún ewe chón angang fefin, nge kich néún ewe fefin mi ngas.
