Me ren Mark 14:1-72
-
Souasor ra akkóta le nieló Jises (1, 2)
-
Lémmis a ninitiw wóón Jises (3-9)
-
Jutas a afangemá Jises (10, 11)
-
Ewe sáingoon Pasofer (12-21)
-
Poputáán ewe Fááfen Ach Samol (22-26)
-
Osuni ussun án Piter amam (27-31)
-
Jises a iótek lón Ketsemeni (32-42)
-
Jises a ares (43-52)
-
Jises a kapwúng me ren án chón Jus we mwichen soukapwúng mi tekia (53-65)
-
Piter a amam Jises (66-72)
14 Iei a ruu rán me mwen ewe Pasofer me ewe Ránin Chulapen Pilawa Ese Lefen. Me ekkewe souasor mi lap me ekkewe soumak ra kúkkútta alen ar repwe rawei i pwe repwe turufi* me nieló i.
2 Pún ra erá: “Esap atun ewe ránin chulap, eli epwe aosukosuka ekkewe aramas.”
3 Lupwen a nóm Petani me mwéngé* lón imwen Simon, ewe mi piin úri keinepan, emén fefin a feito fán eú rumeen* lémmis mi fókkun mémmóng, ena lémmis mi ffér seni nard,* ese nofit ngeni och mettóch. Neminna a suuki ewe rume me a poputá le ninatiw wóón mékúran.
4 Ren ena, ekkóch ra eráfengen fán song: “Pwata a asolapaaló ei lémmis?
5 Pún ei lémmis a tongeni fen améméló wóón lap seni 300 denarii* me ngeni ekkewe mi wéúngaw ewe moni!” Iwe, ra fókkun mángaw ren neminna.*
6 Nge Jises a apasa: “Oupwe likitaaló neminna. Pwata oua aosukosuka? I a féri minne mi múrinné ngeniei.
7 Pún ekkewe mi wéúngaw ra nónnóm remi fansoun meinisin, me oua tongeni féri ngeniir minne mi múrinné ineet chék oua mochen, nge ngang úsapw nónnóm remi fansoun meinisin.
8 A féri met a tongeni féri. A epiti inisi ngeni lémmis pwe epwe ammólnatá inisi me mwen ái peiás.
9 Enlet úa erenikemi, ese lifilifil ia ewe kapas allim a afalafalfeil ie wóón unusen fénúfan, minne ei fefin a féri aramas repwe pwal silei pwe minen áchechcheman.”
10 Iwe, Jutas Iskariot, emén me lein ekkewe Engol me Rúúemén, a feiló ren ekkewe souasor mi lap pwe epwe afangemá i ngeniir.
11 Atun ra rong, ra fókkun pwapwa me pwon pwe repwe ngeni moni silifer. Ina minne, a poputá le kúkkútta menni atun a fich an epwe afangemá i.
12 Iwe, lón ewe áeúin ránin Pilawa Ese Lefen, ewe atun éérenier le asoratá ewe asoren Pasofer, néún kewe chón káé ra apasa ngeni: “Ia ka mochen ám áúpwe feiló me ammólnatá ie pwe kopwe mwéngé ewe Pasofer?”
13 Ren ena, a akúnéló rúúemén me lein néún kewe chón káé me ereniir: “Oupwe feiló lón ewe telinimw nge emén mwán mi uwei eú leenien konik mi ffér seni pwúl epwe chuurikemi. Oupwe tapweló mwirin,
14 me ese lifilifil menni imw a tolong lón, oupwe ereni ewe mastaan imw, ‘Ewe Sense a apasa: “Ifan ewe ruumwen waséla ia ngang me nei kewe chón káé áúa tongeni mwéngé ewe Pasofer ie?” ’
15 Me epwe áiti ngenikemi eú watteen ruumw mi nóm asan, mi wor pisekin lón me a mmólnetá. Oupwe ammólnatá ewe mwéngéén Pasofer fán itach ikena ie.”
16 Iwe, ekkewe chón káé ra feiló me tolong lón ewe telinimw me ra kúna mettóch meinisin ussun chék met Jises a ereniir, me ra ammólnatá fán iten ewe Pasofer.
17 Mwirin an a lekunioletiw, i a waroto fitifengen me ekkewe Engol me Rúúemén.
18 Iwe, atun ra móót* órun ewe cheepel me mwéngé, Jises a apasa: “Enlet úa erenikemi pwe emén me leimi ekkeei mi fitiei le mwéngé, epwe afangemáei.”
19 Ra poputá le letipechou, iwe emén me emén leir a ereni: “Esap ngang ena, iká met?”
20 A ereniir: “Epwe emén me lein ekkewe Engol me Rúúemén, ewe emén mi fitiei le ottukulong lón ewe sepi.
21 Pún ewe Néún aramas epwele máló, ussun chék met a fen makketiw ussun i. Nge feiengaw ngeni ena aramas ewe Néún aramas epwe afangemá me ren! Epwe fen éch iká ena aramas esap uputiw.”
22 Iwe, atun ra chúen mwéngé, i a angei ewe pilawa, a eáni eú iótek, a kinikisietiw, me ngeniir, a erá: “Oupwe angei. Ei a wewe ngeni inisi.”
23 Iwe a angei eú kap, a apasa an kilisou ngeni Kot, me ngeniir, me iir meinisin ra ún seni.
24 Me a ereniir: “Ei a wewe ngeni chchaai ‘chchaan ewe pwonen etipeeú,’ ewe epwe niniiló fán ásengesin chómmóng.
25 Enlet úa erenikemi, úsapw fókkun chúen únsefál ei wain tori ewe rán lupwen úpwe ún ewe mineféén wain lón ewe Mwúún Kot.”
26 Sáingolóón, mwirin ar eáni kélún mwareiti Kot, ra feiló ngeni ewe Chukun Olif.
27 Iwe, Jises a ereniir: “Ámi meinisin oupwe chepetek, pún a makketiw: ‘Úpwe nieló ewe chón mmasen siip, me ekkewe siip repwe parasfeil.’
28 Nge mwirin ái manawetá, úpwe akkomwoló mwemi lón Kalili.”
29 Nge Piter a ereni: “Inaamwo iká meinisin ekkewe ekkóch repwe chepetek, ngang úsapw.”
30 Ren ena, Jises a ereni: “Enlet úa erenuk pwe ikenái, ewer, wesewesen lón ei pwinin, mwen án emén chukó epwe kékké fán ruu, kopwe amam ngang fán úlúngát.”
31 Nge i a chék ekkereni: “Ikáámwo úpwe fituk le máló, úsapw fókkun amam en.” Pwal meinisin ekkewe ekkóch ra pwal erá ena.
32 Iwe, ra tikeri ewe leeni itan Ketsemeni, me a ereni néún kewe chón káé: “Oupwe móót ikeei atun úa iótek.”
33 Me a luki Piter me Jemes me Jon, me a poputá le meefi watteen weires me a fókkun lólilen.
34 A ereniir: “Úa fókkun letipeta, arap ngeni úpwe máló ren. Oupwe nóm ikeei me mammasa.”
35 Me a feiló ekis towaw, a fotopwásuk me chapetiw lepwúl me poputá le iótek pwe iká mi tufich, ewe kulók epwe ló seni i.
36 Iwe, a apasa: “Appa,* Semei, mettóch meinisin a tufich ngonuk. Kopwe angei seniei ei kap. Nge esap met úa mochen, nge met óm mochen.”
37 A liwin me a kúner pwe ra méúr, me a ereni Piter: “Simon, ka méúr? Ese wor óm péchékkúl le mammasa lón eú chék awa?
38 Oupwe chék mammasa me sópweeló le iótek pwe ousap tolong lón sóssót. Ewer, ewe letip a mochen* féri nge ewe futuk a apwangapwang.”
39 A pwal liwinló iótek, nge a tingor ekkewe mettóch a fen tingor me mwan.
40 A pwal liwinto me kúner pwe ra méúr, pwe meser kewe ra choutiw, ina minne rese silei met repwe pélúwen ngeni i.
41 Iwe, a liwinto lón aúlúngátin fansoun me a ereniir: “Lón ei esin fansoun, oua annut me asésé! A naf! A tori ewe kulók! Nengeni! Ewe Néún aramas epwele kúna afangemá me lepéún ekkewe chón tipis.
42 Oupwe pwáátá, sia ló. Nengeni! Ewe chón afangemáei a arapoto.”
43 Mwittir chék, atun a chúen fóffós, Jutas, emén me lein ekkewe Engol me Rúúemén, a waroto me eú mwichen aramas ra fiti fán néúr ketilas me wokur, ra tiitiito me ren ekkewe souasor mi lap me ekkewe soumak me ekkewe néúwisin Jus.
44 Nge ewe chón afangemá a fen ngeniir eú esissil, a apasa: “Ewe emén úpwe kisi, ina i ewe oupwe aresini me oupwe emmwenaaló me túmúnú pwe esap súló.”
45 Iwe, a feil weneweneto me feiliiti i me apasa: “Rappai!” me kisi i.
46 Iwe, ra turufi i me aresini.
47 Iwe nge, emén me lein chókkewe mi útá a úttawu néún we ketilas me pékúoló selingen ewe chón angang, néún ewe souasor mi lapalap.
48 Nge Jises a ereniir: “Oua feito fán ketilas me wok pwe oupwe aresiniei ussun emén chón solá?
49 Iteiten rán úa nóm remi lón ewe imwenfel me asukul, nge ouse aresiniei. Nge a fis ei pwe epwe pwénúetá ekkewe Taropwe mi Pin.”
50 Iwe, iir meinisin ra likitaaló i me súló.
51 Nge emén alúwél mi chék úféúf och mangaak mi fókkun múrinné me seleló fan, a poputá le tattapweló mwirin me ra sótun turufi i,
52 nge a chék likitaaló úfan we mangaak mi fókkun múrinné me súló fán an seleló.*
53 Iei ra emmwenaaló Jises ren ewe souasor mi lapalap, me meinisin ekkewe souasor mi lap me ekkewe néúwisin Jus me ekkewe soumak ra chufengen.
54 Nge Piter a tattapweló mwirin me towaw, tori ren imwen ewe souasor mi lapalap, me a móttiw ren ekkewe chón angangen ewe imw me arara ren ewe ekkei.
55 Iei ekkewe souasor mi lap me unusen án chón Jus we mwichen soukapwúng mi tekia, ra kúkkútta chókkewe repwe tipimwáál ngeni Jises ren an epwe ninniiló, nge rese kúnékún.
56 Ren enletin, chómmóng ra apasaatá kapasen tipimwáál ngeni, nge minne ra pwáraatá rese tipeeúfengen.
57 Pwal ekkóch ra útá me apasa kapasen tipimwáál ngeni, ra erá:
58 “Áúa rong an apasa, ‘Úpwe ataietiw ei imwenfel mi ffér ren péún aramas, nge lón úlúngát rán úpwe aúetá pwal eú esap ffér ren péún aramas.’ ”
59 Iwe nge, pwal mwo wóón ei pwóróus, ar kewe kapasen tipimwáál rese tipeeúfengen.
60 Iwe, ewe souasor mi lapalap a útá me mwer me kapas eis ngeni Jises, a apasa: “Ese wor met kopwe pélúwen ngeniir? Kese rong met ei ekkeei mwán ra etipisuk wóón?”
61 Nge a chék fanafaneló me ese fókkun pélúweni. Iwe, ewe souasor mi lapalap a pwal poputá le kapas eis ngeni me ereni: “En ewe Kraist, Néún ewe Kot mi Pin?”
62 Mwirin Jises a apasa: “Ewer, ngang ewe, me oupwe kúna ewe Néún aramas an mómmóót peliefichin ewe Kot mi Manaman me feffeito lón ekkewe kuchuun láng.”
63 Ren ei, ewe souasor mi lapalap a kamwei úfan we me apasa: “Pwal met lamoten epwe wor chón pwáraatá?
64 Oua rong an kapas mi ésúfélúngaw ngeni Kot. Met oua ekieki?”* Meinisin iir ra apwúngaló pwe a fich ngeni an epwe máló.
65 Iwe, ekkóch ra poputá le attufa i me pwélúoló mesan me éfénú i me ereni: “Iká en emén soufós, erenikem ié a éfénuk!” Me ekkewe chón mmasa ewe imwen kapwúng ra pésapei me uwealó i.
66 Iwe, atun Piter a nóm fan ren ewe imw, emén me lein néún ewe souasor mi lapalap chón angang fépwúl a feito.
67 Atun a kúna Piter an arara inisin, a newenewen ngeni me apasa: “Pwal en ka fiti Jises, ewe re Nasaret.”
68 Nge a amam, a apasa: “Úse silei i me úse pwal weweiti met ena ka fós ussun,” me a feiliwu arapakkan ewe ttit.
69 Me ikena ie ewe chón angang fépwúl a kúna i me a pwal poputá le ereni chókkewe mi útá ikena: “Iei i emén me leir.”
70 A pwal amamsefál. Me ekiseló mwirin, chókkewe mi úkkúútá ikena ra pwal poputá le ereni Piter: “Pwúngún, en emén leir, pún ren enletin, en emén re Kalili.”
71 Nge i a poputá le ékképél me apasa pwe i epwe anúmamaw iká esap apasa ewe enlet: “Úse sissilei ei mwán oua fósun!”
72 Mwittir chék emén chukó a kékké fán oruuan, me Piter a chemeni met Jises a fen ereni: “Mwen án emén chukó epwe kékké fán ruu kopwe amam ngang fán úlúngát.” Iwe, a meefi watteen metekin letipan me poputá le kechiw.
Footnote
^ Are “aresini.”
^ Are “móót tiwiniin órun ewe cheepel.”
^ Nard, eú sókkun irá mi pwokkus.
^ Are “ra fós ngeni neminna fán song; ra apwúngú neminna.”
^ Are “móót tiwiniin.”
^ Eú kapasen Ipru are Aramaik mi wewe ngeni “O Semei!”
^ Krik, “mwétéres.”
^ Are “ekis pippisek; fán chék úfan úféúfen lón.”
^ Krik, “Met oua apwúngaló?”
