Me ren Mark 8:1-38
8 Lón ekkena rán, a pwal wor eú mwichemmóngun aramas, nge ese wor met repwe áni. Iwe, a kérato ekkewe chón káé me ereniir:
2 “Úa tongei ekkeei aramas, pún ra fen nónnóm rei ren úlúngát rán me ese wor met ra áni.
3 Iká úpwe tiiniireló ngeni imwer fán ar echik,* repwe mammasaroch me wóón al, me ekkóch leir iir seni towaw.”
4 Nge néún kewe chón káé ra pélúweni i: “Ia me lón ei leeni mi towaw emén epwe kút pilawa ie epwe naf ngeni ekkeei aramas pwe repwe mét?”
5 Iwe, a eisiniir: “Fiteféú pilawa mi wor remi?” Ra erá: “Fúúféú.”
6 A ereni ekkewe aramas ar repwe móttiw wóón ewe pwúl. Mwirin a angei ekkewe fúúféú pilawa, a iótekin kilisou, a kiniiretiw me poputá le ngeni néún kewe chón káé pwe repwe eineti, iwe, ra ngeni ekkewe aramas.
7 A pwal wor rer fitemén kúkkún iik, iwe a efeiéchúúr, a ereniir pwe repwe pwal einetiir.
8 Iwe, ra mwéngé me métúló, me ra ionifengeni ekkewe lusun, fisu watteen chúúk mi ur.
9 A wor ina epwe 4,000 mwán. Mwirin a tiiniireló.
10 Mwittir chék a tétá wóón ewe waa fiti néún kewe chón káé me ra sáiló ngeni ewe leeni Talmanuta.*
11 Me ikeei ie, ekkewe Farisi ra feito me poputá le ánini ngeni. Ren ar repwe sótuni i, ra ereni an epwe féri eú manaman lón iten Kot.
12 Iwe, Jises a fókkun letipeta me apasa: “Pwata ei táppin aramas a kútta eú esissil? Enlet úa apasa, ese wor esissil epwe kawor ngeni ei táppin aramas.”
13 Iwe, a likitiireló, a tétásefál me sáiló ewe epek.
14 Iwe nge, ra ménúki le uwou pilawa, me a chék wor rer eféú pilawa wóón ewe waa, ese pwal wor och sókkun mwéngé.
15 Iwe, a poputá le éúréúrer ren an apasa: “Oupwe túmúnúkemi seni iisen ekkewe Farisi me iisen Erot.”
16 Iwe, ra poputá le áninifengen lefiler ren an we ese wor pilawa rer.
17 Atun a kúna ei, a ereniir: “Pwata oua áninifengen an ese wor pilawa remi? Ousaamwo mirititi me weweiti? Letipemi a chúen wewemmang?
18 ‘Ikáámwo a wor mesemi, ouse kúna, me ikáámwo a wor selingemi, ouse rong?’ Ouse chemeni
19 ewe atun úa kinikisietiw ekkewe nifféú pilawa fán iten ekkewe 5,000 mwán, fitu chúúk mi ur ren ekkewe lusun oua ionfengeni?” Ra ereni: “Engol me ruu.”
20 “Atun úa kinikisietiw ekkewe fúúféú pilawa fán iten ekkewe 4,000 mwán, fitu watteen chúúk mi ur ren ekkewe lusun oua ionfengeni?” Me ra ereni: “Fisu.”
21 Ren ena, a ereniir: “Ousaamwo weweiti?”
22 Iei ra wareiti Petsaita. Me ikeei ie aramas ra uweato ren emén mwán mi chuun, me ra tingormaw ngeni an epwe attapa.
23 Iwe, a kémwéch péún ewe mwán mi chuun me panaló lúkún ewe sóópw. Mwirin an attufa mesen átena, a isettá péún wóón i me eisini: “Ka kúna och mettóch?”
24 Ewe mwán a netá me apasa: “Úa kúna aramas, nge ra ussun chék irá mi fetálfeil.”
25 A isettásefál péún wóón mesen ewe mwán kewe, me a ffatéch án ewe mwán kúna. A échsefál mesan, me a tongeni kúnaéchú mettóch meinisin.
26 Iwe, a tiinaaló ngeni imwan, me apasa: “Kosap tolong lón ewe sóópw.”
27 Iwe, Jises me néún kewe chón káé ra feiló ngeni ekkewe sóópw lón Seseria Filipai, me a poputá le kapas eis ngeni néún kewe chón káé me wóón ewe al, a apasa: “Ié ekkewe aramas ra apasa pwe ngang?”
28 Ra apasa: “Jon Papatais, nge ekkóch ra apasa Elias, me pwal ekkóch, emén me lein ekkewe soufós.”
29 Iwe, a eisiniir: “Nge ámi, ié oua erá pwe ngang?” Piter a pélúweni: “En ewe Kraist.”
30 Ren ena, a fókkun allúk ngeniir ar resap ereni emén ussun i.
31 Pwal och, a poputá le asukuler pwe ewe Néún aramas epwe kúna chómmóng riáfféú me esap ketiw me ren ekkewe néúwisin Jus me ekkewe souasor mi lap me ekkewe soumak. Me epwe ninniiló, iwe lón aúlúngátin rán epwe manawetá.
32 Ren enletin, a affata ngeniir ena kapas. Nge Piter a panaló ekis me poputá le apwúngú.
33 Iwe a kul, attola néún kewe chón káé, me apwúngú Piter, a apasa: “Feiló lúkúsékúrúi, Setan! Pún óm ekiek, esap án Kot ekiek nge án aramas.”
34 Iwe, a kérato ekkewe aramas fitifengen me néún kewe chón káé me ereniir: “Iká emén a mochen tapwoto mwiri, epwe pennúkú pwisin i me angei an iráán ninni* me tattapwoto mwiri.
35 Pún ié a mochen seláni manawan epwe péút seni, nge ié a péút seni manawan fán ásengesi me fán ásengesin ewe kapas allim epwe seláni manawan.
36 Epwe met múrinnéén án emén aramas eáni mettóch meinisin lón ei fénúfan, nge a péút seni manawan?
37 Epwe wesewesen met emén aramas epwe fangoló pwe ekkesiwilin manawan?
38 Pún ié a sáwásiniei me ái kewe kapas me lein ei táppin aramas ese túppwél me mi tipis, ewe Néún aramas epwe pwal sáwásini i atun epwe feito lón lingen Seman we fitifengen me ekkewe chónláng mi pin.”
