Me ren Mattu 11:1-30
11 Lupwen Jises a wes le ngeni ekkewe 12 chón káé emmwen, a feiló seni ikena pwe epwe asukul me afalafal lón ekkewe ekkóch telinimw.
2 Nge lupwen Jon a rong me lón imwen fétek ussun án Kraist kewe angang, a tiinaaló néún kewe chón káé
3 pwe repwe eisini: “En ewe Emén epwe war, are áúpwe witiwiti pwal emén?”
4 Jises a pélúweniir: “Oupwe feiló me apwóróusa ngeni Jon met oua rongorong me kúna.
5 Ekkewe mi chuun iei ra kúner me ekkewe mi pechemá ra fetál, ekkewe mi keinepan ra liméch me ekkewe mi selingepúng ra rongorong, ekkewe mi máló ra manawsefál me ekkewe mi wéúngaw ra rongorong ewe kapas allim.
6 A pwapwa ewe emén ese chepetek rei.”
7 Atun chókkana ra feffetáleló, Jises a poputá le fós ngeni ewe pwiin aramas ussun Jon: “Met oua ló katol lón ewe fénúapé? Efóch ását mi mwaroro ren ewe ásepwál?
8 Iwe, met chék oua ló katol? Emén mwán mi úféúf úf mi kire pwetete?* Chókkewe mi úféúf úf mi kire pwetete ra kan nóm lón imwen ekkewe king.
9 Iwe, pwata chék oua feiló? Pwe oupwe kúna emén soufós? Ewer, úa erenikemi, a lap seni emén soufós.
10 Iei i ewe emén a mak ussun: ‘Nengeni! Úa tiinaaló me mwom* nei we chón uwei pwóróus, ewe epwe ammólnatá alom me mwom!’
11 Enlet úa erenikemi pwe me lein chókkewe mi upu seni fefin, ese wor emén mi tekiatá a lap seni Jon Papatais, nge ewe emén mi kisikis lón Mwúún láng a lap seni i.
12 Seni ránin Jon Papatais tori iei, ewe Mwúún láng ina met aramas ra achocho ngeni, me chókkana mi achocho ngeni ra angei.*
13 Pún meinisin ekkewe Soufós me ewe Allúk, ra osuni tori fansoun Jon.
14 Ese lifilifil iká oupwe mochen lúkú are ousap, nge Jon i ‘Elias ewe emén ekkewe soufós ra erá pwe epwe feito.’
15 Emén mi wor selingan, epwe aúseling.
16 “Ié úpwe aléllé ngeni ei táppin aramas? Ra ussun semirit mi mómmóót lón ekkewe leenien amémé me kékkéwu ren chiener kewe chón kukkunou,
17 ra apasa: ‘Áúa ettiki minen nikáttik fán itemi nge ouse pwérúk, áúa ngúngúres nge ouse awata inisimi ren letipeta.’
18 Pwal ina chék ussun, Jon a feito, esap mwéngé are ún, nge aramas ra erá, ‘Mi wor timon wóón.’
19 Ewe Néún aramas a feito, a mwéngé me ún, nge aramas ra apasa, ‘Nengeni! Emén mwán mi luló mwéngémmóngun me mi únnúmmóng wain, emén chiechien chón angei takises me chón tipis.’ Iwe nge, tipáchem a pwá pwúngún* ren an kewe angang.”*
20 Iwe, a poputá le apwúngú ekkewe telinimw, ikewe a féri lap ngeni an kewe manaman ie, pún rese áier.
21 “Feiengawom Koresin! Feiengawom Petsaita! Pún iká ekkewe manaman mi fis ngenikemi ra fis lón Tair me Siton, repwele fen chék áier me lóóm ren ar úféúf tuuk me móót lón falangen ekkei.
22 Nge úa erenikemi, pwe kapwúngún Tair me Siton epwe ppán lón ewe Ránin Kapwúng lap senikemi.
23 Me en Kaperniom, kopwe tekiatá lón láng? Kopwe feitiw lón Peiás,* pún iká ekkewe manaman mi fis lón leeniom ra fis lón Sotom, iwe epwe nóm tori lón ekkeei rán.
24 Nge úa erenikemi, pwe kapwúngún fénúen Sotom epwe ppán lón ewe Ránin Kapwúng lap sonuk.”
25 Lón ena atun Jises a apasa: “Semei, ewe Samolun láng me fénúfan, úa mwareituk mwen mesen aramas pokiten ka opaaló ekkeei mettóch seni ekkewe mi tipáchem me silelap, nge pwáriireló ngeni ekkewe semirit.
26 Ewer Semei, pún iei met ka tipeeú ngeni.
27 Semei a fen ngeniei mettóch meinisin. Ese wor emén a unusen silei ewe Naw pwe ewe chék Sam. Ese pwal wor emén a unusen silei ewe Sam pwe ewe chék Naw me ié ewe Naw a mochen pwáár ngeni.
28 Oupwe feito rei ámi meinisin mi angang weires me uwochou, me ngang úpwe asésékemi.
29 Oupwe ámweraalong wóómi ái waas me káé seniei, pún úa mosonoson me tipetekison lón letipei, me oupwe kúna asésé.
30 Pún ái waas a mecheres le ámmwár, me osei a ppán.”
Footnote
^ Are “úf mi múrinné?”
^ Krik, “mwen mesom.”
^ Krik, “turufi.”
^ Are “a leteló.”
^ Are “ren mwirilóón.”
