Me ren Mattu 27:1-66
27 Lupwen a rániló, meinisin ekkewe souasor mi lap me ekkewe néúwisin Jus ra pwúngúpwúngfengen ussun ar repwe nieló Jises.
2 Mwirin ar fééti i, ra átekinaló me atolonga lepéún Pailat, ewe governor.
3 Lupwen Jutas, ewe mi afangemá i, a kúna pwe a pwúngúló pwe Jises epwele ninniiló, a niamam me eliwinisefáli ekkewe 30 féún silifer ngeni ekkewe souasor mi lap me ekkewe néúwisin Jus,
4 a apasa: “Úa tipis ren ái afangemá emén aramas ese wor tipisin.” Ra apasa: “Ina óm osukosuk, esap ám!”
5 Iwe, a manetiw ekkewe féún silifer lón ewe imwenfel me feiló. Mwirin a ló me pwisin fórusi.
6 Nge ekkewe souasor mi lap ra angei ekkewe féún silifer me apasa: “Ese pwúng an epwe tolong lón ewe leenien isoisen asor lón ei imwenfel, pún liwinin chcha.”
7 Mwirin ar pwúngúpwúngfengen, ra néúnéú ewe moni le mééni ewe fénúen chón ffér sepi pwúl pwe leenien peiásen ekkewe chón ekis.
8 Ina minne, ena fénú a iteni Fénúen Chcha tori ikenái.
9 Minne Kot a apasa me ren ewe soufós Jeremaia a pwénúetá: “Me ra angei ekkewe 30 féún silifer, ewe liwin ekkóch me lein néún Israel kewe ra aotaaló fán itan,
10 me ra ngeniir fán iten ewe fénúen chón ffér sepi pwúl ussun chék met Jiowa* a fen allúkú ngeniei.”
11 Iei Jises a útá mwen ewe governor, me ewe governor a eisini: “En ewe Kingen chón Jus?” Jises a pélúweni: “Ussun chék met ka apasa.”
12 Nge lupwen ekkewe souasor mi lap me ekkewe néúwisin Jus ra tipimwáál ngeni, i ese pélúweni.
13 Iwe, Pailat a ereni: “Kese rong ekkeei chómmóngun mettóch ra etipisuk wóón?”
14 Nge ese pélúweni i, sap mwo nge eú fós, ina minne ewe governor a fókkun máirú.
15 Iteiten ránin chulap, éérenien ewe governor an epwe omusawu emén chón kalapus, ewe emén ewe mwichen aramas a mochen.
16 Lón ena atun a wor emén chón kalapus mi silleló ren féfféringawan, itan Parapas.
17 Iwe, atun ra chufengen, Pailat a ereniir: “Ié oua mochen ái úpwe omusa ngenikemi, Parapas are Jises ewe mi kan iteni Kraist?”
18 Pún Pailat a silei pwe ra atolonga i lepéún pokiten lólówó.
19 Pwal eú, atun a móót wóón ewe leenien móótun apwúng, pwúlúwan we a tiinaaló pwóróus ren, a erá: “Kosap féri och mettóch ngeni ena mwán mi pwúng, pún úa fókkun riáfféú ikenái ren eú ttan pokiten i.”
20 Nge ekkewe souasor mi lap me ekkewe néúwisin Jus ra pesei ekkewe aramas ar repwe tingor Parapas, nge Jises epwe ninniiló.
21 Lón án ewe governor pélúweni, a ereniir: “Ié me lein ekkeei rúúemén oua mochen úpwe omusa ngenikemi?” Ra apasa: “Parapas.”
22 Pailat a ereniir: “Nge met úpwele fér ngeni Jises ewe mi kan iteni Kraist?” Iir meinisin ra erá: “Epwe ninniiló wóón ewe irá!”
23 A erá: “Pwata? Met sókkun mettóch mi ngaw a féri?” Nge ra chék alapaaló ar púppúchér: “Epwe ninniiló wóón ewe irá!”
24 Atun Pailat a kúna pwe ese tongeni féri och mettóch, nge a fen chék lapóló akúrang, a angei konik me a télú péún mwen mesen ekkewe aramas me apasa: “Ese wor tipisi ren chchaan ei mwán. Ei epwele pwisin nónnóm remi.”
25 Ren ena, meinisin ekkewe aramas ra apasa: “Chchaan epwe nónnóm wóómw me wóón néúm kewe.”
26 Iwe, a omusa ngeniir Parapas, me a allúkú ngeni ekkewe soufiu án Jises epwe kawet me repwe uwealó pwe epwe ninniiló wóón ewe irá.
27 Mwirin, néún ewe governor kewe soufiu ra uwealó Jises ngeni imwen ewe governor we. Iwe, unusen ewe mwichen soufiu ra chufengen me rongeeló únúkkún.
28 Ra pwiliti seni úfan me finiti ngeni eché mangaak mi parochól,
29 me ra piti epa mwárámwár seni irá félúfél me watá wóón mékúran me waalong efóch wok lón peliefichin péún. Ra fótopwúkútiw mwan me turunufasa, ra apasa: “Rán allim Kingen ekkewe chón Jus!”
30 Ra attufa i me angei ewe wok me poputá le opuni mékúran.
31 Sáingolóón, mwirin ar turunufasa i, ra pwiliti seni ewe mangaak me éúféúfa ngeni úfan we úféúfen lúkún me ra uwealó pwe epwe chúfélútá wóón ewe irá.
32 Atun ra feffeiló, ra kúna emén re Sairine itan Simon. Ra eriáni ei mwán an epwe mwárei án Jises we iráán ninni.*
33 Nge lupwen ra tori eú leeni itan Kolkota, ewe mi wewe ngeni Péénsékún Mékúr,
34 ra ngeni i wain mi nofit ngeni irá mi kipwin pwe epwe únúmi, nge mwirin an neni, ese mochen únúmi.
35 Lupwen ra chúfélúetá wóón ewe irá, ra eineti úfan we úféúfen lúkún ren ar úttút* wóón,
36 me ra mómmóót ikenan me mammasa i.
37 Ra pwal pacheetá ekkeei kapasen tipimwáál ngeni asen mékúran: “Iei i Jises ewe Kingen chón Jus.”
38 Mwirin, ra eitiwaatá rúúemén chón solá wóón ekkewe irá únúkkún i, emén peliefichin me emén pelieméngún.
39 Me chókkewe mi pwereto ikena ra eáni kapas turunufas ngeni, ra wichikichiki mékúrer
40 me apasa: “En ewe ka erá pwe kopwe ataietiw ewe imwenfel me aúetá lón úlúngát rán, pwisin selánuk! Iká en emén néún Kot, tétiw me wóón ei iráán ninni!”*
41 Pwal ina chék ussun ren ekkewe souasor mi lap fitifengen me ekkewe soumak me ekkewe néúwisin Jus ra poputá le turunufasa i, ra apasa:
42 “A seláni ekkewe ekkóch, nge ese tongeni seláni pwisin i! Iká i ewe Kingen Israel, epwe tétiw me wóón ewe iráán ninni,* iwe sipwe lúkú i.
43 A eáni lúkúlúk Kot, iwe, iká Kot a pwapwaiti, iwe, Kot epwe amanawa i pún i a erá, ‘Ngang ewe Néún Kot.’ ”
44 Pwal ina chék ussun, pwal mwo ekkewe chón solá mi eitiwetá wóón ekkewe irá únúkkún i ra esiita.
45 Seni ewe awonuen kulók,* eú kiroch a arochaaló unusen ewe fénú tori ewe etiuen kulók.*
46 Ina epwe etiuen kulók, Jises a kékké fán léúwommóng, a apasa: “Eli, Eli, lama sapaktani?” a wewe ngeni, “Ái Kot, ái Kot, pwata ka likitieiló?”
47 Atun ra rong ei, ekkóch chókkewe mi úkkúútá ikewe ra poputá le apasa: “Ei mwán a kékkéri Elias.”
48 Iwe mwittir chék, emén me leir a ssá me angei eú ammat me ottukaalong lón wain mi mwóón me pacheetá wóón efóch wok me ngeni pwe epwe únúmi.
49 Nge ekkewe lusun me leir ra apasa: “Likiti! Sipwe katol iká Elias epwe feito me seláni i.”
50 Jises a pwal kékké fán léúwommóng me máló.*
51 Me nengeni! kaatenin ewe imwenfel a kamwefesen seni asan feitiw fan, me fénúfan a chechchech me ekkewe faw ra mékkúfesen.
52 Me ekkewe peiás ra suukuló me chómmóng somáán ekkewe mi pin ra nopowu
53 me chómmóng aramas ra kúner. (Mwirin an manawetá, ekkóch aramas mi towu seni me lein ekkewe peiás, ra tolong lón ewe telinimw mi pin.)*
54 Nge atun ewe meilapen soufiu me chókkewe mi nóm ren mi mammasa Jises ra kúna ewe chechchechin fénú me ekkewe mettóch mi fis, ra fókkun niwokkus me apasa: “Mi pwúng, i Néún Kot.”
55 Me chómmóng fefin ra nóm ikewe ra kakkatol me towaw, iir kewe mi fiti Jises seni Kalili pwe repwe álisi i,
56 ekkóch me leir Meri Maktalin me Meri inen Jemes me Joses me inen néún Sepeti kewe.
57 Iwe lekuniol, emén mwán mi pisekisek seni Arimatia itan Josef a feito, i ewe a pwal wiliiti néún Jises chón káé.
58 Ei mwán a feiló ren Pailat me tingor inisin Jises we. Iwe, Pailat a allúkú ngeni ekkewe soufiu ar repwe ngeni i.
59 Josef a angei ewe inis, túkúmi lón eché mangaak mi fókkun múrinné me limeliméch,
60 me waalong lón peiásan minefé, mi ttu lón achaw. Mwirin an asokopenaaló eféú féúmmóngun faw ppen asamen ewe peiás, a feiló.
61 Nge Meri Maktalin me pwal ewe emén Meri ra chék nónnóm ikewe, mómmóót mwen ewe peiás.
62 Ekkeei mettóch ra fis lón ewe ránin Ammólnatá fán iten ewe Sapat. Sorotáán ewe rán, ekkewe souasor mi lap me ekkewe Farisi ra chufengen mwen Pailat.
63 ra apasa: “Governor, áúa chemeni met ewe mwán mi chofona a apasa atun i mi chúen manaw, ‘Mwirin úlúngát rán úpwe manawetá.’
64 Ina minne, allúkú ar repwe túmúnú le mammasa ewe peiás tori ewe aúlúngátin rán, pwe néún kewe chón káé resap etto me solááni, me ereni ekkewe aramas, ‘A manawetá seni máló!’ Iwe ei lesópwólóón chofona, epwe kon ngaw seni ewe akkomwan.”
65 Pailat a apasa ngeniir: “Ou angei ekkóch soufiu. Ou feiló me mammasa ewe peiás úkúúkún ámi tongeni.”
66 Iwe, ra feiló me annúkúéchú ewe faw ren ewe peiás me onómu ekkewe soufiu.
Footnote
^ Ra angang féúkúkkúnún faw are kúkkúnún amúch mi esissillatá emén me emén chókkewe mi fiti me waalong lón eché mangaak are eú leenien konik me ra anomwonomwa. Ewe minne néún ewe faw are amúch mi turuwu, ina i ewe a win.
^ Ina epwe 12:00 leolowas.
^ Ina epwe 3:00 p.m.
^ Are “kaúló le ngasangas.”
^ Ei pwóróus lón ei parentheses a weneiti minne epwap fis.
