Me ren Mattu 6:1-34
6 “Oupwe túmúnú pwe ousap féri ámi féffér múrinné mwen mesen aramas fán iten chék ar repwe kúna, iká oua ina ussun esap wor liiwinimi me ren Sememi we mi nóm láng.
2 Iwe, lupwen oupwe eáni liffangen úméúméch,* ousap ettiki eú rappwa mwemi ussun met ekkewe chón likótuputup ra féri lón ekkewe sinakok me wóón ekkewe al pwe repwe angei ling me ren aramas. Enlet úa erenikemi pwe a fen unus ngeniir liiwiniir.
3 Nge en, lupwen kopwe eáni liffangen úméúméch, kosap mut ngeni pelieméngún poum an epwe silei met peliefichin poum a féri,
4 pwe óm liffangen úméúméch epwe chék monomonoló. Iwe, Semom we mi kúna lemonomon epwe liiwini ngonuk.
5 “Pwal och, lupwen oupwe iótek ousap ussun ekkewe chón likótuputup mi mochen útá me iótek lón ekkewe sinakok me lón ekkewe pwokukuun alelap pwe aramas repwe kúner. Enlet úa erenikemi pwe a fen unus liiwiniir.
6 Nge lupwen kopwe iótek, kopwe tolong lón pwisin ruumwom, nge mwirin óm éppúngaaló asamom, kopwe iótek ngeni Semom mi nóm lemonomon. Iwe, Semom we mi kúna lemonomon epwe liiwini ngonuk.
7 Lupwen kopwe iótek kosap epini me epini ekkewe kapas ussun met aramasen ekkewe mwú ra féri, pún ra ekieki pwe epwe aúselinger pokiten ar néúnéú chómmóng kapas.
8 Ina minne, ousap áppirúúr pún Sememi a silei met oua osupwangan pwal mwo nge mwen ámi tingorei.
9 “Iwe, epwe iei ussun ámi iótek:
“ ‘Semem mi nónnóm láng, itom epwe pin.
10 Amwo Mwuum epwe feito. Amwo letipom epwe pwénúetá wóón fénúfan ussun chék lón láng.
11 Kopwe ngenikem enem mwéngé* fán iten ei rán ikenái,
12 me omusaaló ám kewe liwinimmang ussun chék ám omusaaló án ekkewe chón liwinimmang ngenikem.
13 Kosap uweikemilong lón sóssót, nge kopwe angasakem* seni ewe emén mi fókkun ngaw.’
14 “Pún iká oupwe omusaaló án aramas tipis, Sememi lón láng epwe pwal omusaakemiiló,
15 nge iká ouse omusaaló án aramas tipis, Sememi we esap pwal omusaaló tipisimi.
16 “Lupwen oua echikefel ousap wó lólilen ussun ekkewe chón likótuputup, pún ra awówóngawa wóón meser* pwe aramas repwe ekieki pwe ra echikefel. Enlet úa erenikemi pwe a fen unus ngeniir liiwiniir.
17 Nge en, lupwen kopwe echikefel, epiti mékúrom me oresi mesom,
18 pún aramas rete esilla pwe ka echikefel, nge Semom we chék ewe epwe kúna. Iwe, Semom we mi kúna lemonomon epwe liiwini ngonuk.
19 “Oupwe úkútiw le iseis wéú fán itemi wóón fénúfan, ikewe pwétúr* me paarang repwe áni, me ikewe ekkewe chón solá repwe tolong me solááni.
20 Nge oupwe fen iseis wéú fán itemi lón láng, ikewe pwétúr are paarang resap áni, me ikewe chón solá resap tolong me solááni.
21 Pún ia woum a nóm ie, letipom epwe pwal nóm ie.
22 “Mesom ina lampen inisum. Iwe iká mesom a nefótófót,* unusen inisum epwe saramaram.*
23 Nge iká mesom a lólówó,* unusen inisum epwe rochopwak. Iká esap saram ewe a nónnóm reom nge wesewesen rochopwak, epwele ifan me watteen ena rochopwak!
24 “Ese wor emén a tongeni slave ngeni rúúemén masta, pún epwe oput ewe emén nge tongei ewe emén, are epwe pach ngeni ewe emén nge ésúfélúngawa ewe emén. Ouse tongeni slave ngeni Kot me Moni.
25 “Ina minne úa erenikemi: Oupwe úkútiw le aúreki manawemi ren met oupwe áni are únúmi, are ussun inisimi ren met oupwe úfeni. Esap pwe manaw a lamot seni mwéngé me ewe inis seni úf?
26 Oupwe attolafichi ekkewe machchang fán láng. Iir rese fótuki féún pwikil are rese kinikin are ionaalong lón imwen iseis, nge Sememi we lón láng a amwéngééniir. Esap pwe oua aúchea lap seniir?
27 Ié me leimi a tongeni attamaaló pwal mwo nge ekis* manawan ren an aúrek?
28 Pwal och, pwata oua aúrek ussun úf? Oupwe káé seni ekkewe pééniráán* lemasies, ren ifa ussun ra mááritá, rese angang weires, rese pwal tete úf,
29 nge úa erenikemi pwe pwal mwo Salomon lón an ling ese tongeni éúféúfa ngeni pwisin i úf mi ussun múrinnéén ekkeei péénirá.
30 Iká iei ussun án Kot éúféúfa ekkewe irá lón ewe masies mi nóm ikenái nge lesor ra kóturulong lón umw, esap pwe epwe fen aúféúfakemi, ámi kewe mi lúkú kisikis?
31 Ina minne, ousap fókkun aúrek me apasa, ‘Met sipwele áni?’ are, ‘Met sipwele únúmi?’ are, ‘Met sipwele úfeni?’
32 Pún ikkena ekkewe mettóch meinisin ekkewe mwú ra achocho le kútta. Sememi lón láng a silei pwe oua osupwangen ekkena mettóch meinisin.
33 “Ina minne, oupwe sópweeló le kúkkútta akkomw án Kot we Mwú me an we pwúng, iwe meinisin ekkena pwal ekkóch mettóch repwap kapach ngenikemi.
34 Ina minne, ousap fókkun aúrek ussun lesor pún lesor epwe pwisin wor an aúrek. Eú me eú rán a naf ngeni pwisin an kewe osukosuk.
Footnote
^ Krik, “pilawa.”
^ Are “selánikem.”
^ Are “rese túmúnú torotorer.”
^ Ewe kapasen Krik a weneiti ewe sókkun ménú mi chang mi áni mangaku.
^ Are “ffat.”
^ Are “uren saram.”
^ Krik, “ngaw.”
^ Are “lily.”
